यूहन्ना 16:20 - बिलासपुरी नौआं नियम

²⁰ हऊँ तुहांजो सच-सच गलाया राँ, मेरे मरने ते बाद तुहां रोणा कने दुखी हूणा, पर इस संसारा रे लोकां खुशियां मनाणियां। तुहांजो दुख हूणा पर ताहली जे तुहां मिन्जो जिऊंदा देखणा तिस वगत तुहांरा दुख खुशिया च बदली जाणा।

यूहन्ना 16:20 ပူးပေါင်းရင်းမြစ်များ

मत्ती 21:38

पर तिन्हे ठेकेदारें ताहली जे मालका रे बेटे जो देख्या तां सै अप्पूँ चियें गलाणे लगे, ‘येत इसरा बारस आ, औआ इस्सो मारी दें कने इसरा सब किछ अहांरा हुई जाणा।’

मत्ती 5:4

परमेशर तिन्हां लोकां जो आशीष देआं, सै जे दुख मनायें, काँह्भई परमेशर तिन्हांजो तसल्ली देआं।

मरकुस 14:72

तां ताहलूं दुज्जी बारी कुकड़े झांग दित्ति। पतरसा जो यीशुये री गलाई री गल्ल याद आई, भई “कुकड़ा रे दो बार झांग देणे ते पैहले तू तिन्न बारी मेरा इन्कार करना।” सै इसा गल्ला जो सोच्चीने दुखी हुया कने रोणे लगया।

मरकुस 16:10

तिसे जाईने यीशुये रे साथियां जो ये खबर सुणाई, सै जे दुखा च डुब्बीरे थे कने रोया राँ थे।

लूका 22:45

फेरी सै प्राथना ते उट्ठीने अपणे चेलयां ले गया, पर दुखा रिया वजह ने सै दवास हुईने सुत्तीरे दिखे।

लूका 22:62

फेरी पतरस तिस अंगणा ते निकल़ीने बाहरौ चलिग्या कने बिलकी-बिलकी ने रोणे लगया।

लूका 23:27

लोकां री इक बड्डी भीड़ तिसरे पिच्छे चलीरी थी, तिन्हां च मतियां जनानां बी रोन्दी कने बलाप करदियां चली रियां थी।

लूका 24:17

यीशुये तिन्हाने गलाया, “येढ़ा लगां भई तुहें किसी गल्ला पर बड़ा सोच विचार करी रायें?” सै तिसा इ जगह पर खड़ीगे, कने उदासी तिन्हारे चेहरे पर साफ सुझया राँ थी।

लूका 24:21

पर अहांजो आशा थी भई सैई मसीह आ सै जे इस्राएल जो रोमी लोकां ते छुड़ाणे खातर आईरा, इन्हां सारियां गल्लां रे सिवाय इसा घटना जो हुई रिया जो आज्ज तिज्जा दिन आ।

लूका 6:21

परमेशर तिन्हां लोकां जो आशीष देआं, जो परमेशर चाँह, तिसजो सै लोक, सै जे ईमानदारिया ने ग्रहण करने री इच्छा रक्खां ये; काँह्भई तिन्हौ तिस तृप्त हुणे तक हरेक चीज़ देणी। परमेशर तिन्हां लोकां जो आशीष देआं, सै जे हुण रोया दे ओ, काँह्भई येढ़ा बगत औणा ताहली जे तुहां खुश हुईने हसणा।

यूहन्ना 16:33

मैं तुहांजो ये सब गल्लां इस खातर बोलियां भई तुहांजो मेरते शान्ति मिलो। संसार तुहांजो दुख देआं, हिम्मत रखा! मैं संसारा जो जित्तिल्या।”

यूहन्ना 16:6

तुहें इस खातर दुखी ये काँह्भई मैं तुहांजो ये गल्लां दस्सी तियां।

यूहन्ना 20:20

ये बोल्लीने यीशुये अपणे हाथ कने बखिया रा जख्म तिन्हांजो दस्या। चेलयां तंजे प्रभुये जो देख्या, तां सै बौहत खुश हुईगे।

प्रेरितां 5:41

सै इस गल्ला ते खुश हुईने महासभा रे सामणे ते चलीगे, भई अहें यीशुये रे खातर बदनाम हुणे लायक त बणे।

रोमियो 5:11

कने सिर्फ येई नीं, पर अहें अपणे प्रभु यीशु मसीह रे जरिये परमेशरा च आनन्द कराँ ये, तिसरिया बजह ने जे हुण अहांरा मेल हुईरा।

2 कुरिन्थियों 6:10

अहें दुखां रे वगता च बी, हमेशा खुश ये; हलाँकि अहें गरीब ये, फेरी बी बौहत लोकां जो आत्मिकता च अमीर बणाई दें। लोक समझां ये अहांले किछ निआं, जबकि अहांले त सब किछ आ।

गलातियां 5:22

पर पवित्र आत्मा रा फल़ प्यार, खुशी, शान्ति, धीरज, दया, भलाई, विश्वास,

1 थिस्सलुनीकियां 1:6

तुहें बड़यां दुखां च पवित्र आत्मा ते मिलणे औल़ियां खुशिया ने खुशखबरिया जो ग्रहण कित्या कने अहांरी कने प्रभुरी चाल चलने लगे।

याकूब 1:2

मसीह च मेरे विश्वासी भाईयो तुहां सब्बीं जो मेरा नमस्कार! ताहली जे तुहां पर कई तरह री मुशीवतां आओ, तां इस्सो बड़े मजे री गल्ल समझयों,

यहूदा 1:24

परमेशर तुहांजो रुढ़णे ते बचाणे च सक्षम आ, सै तुहांजो निर्दोष कने आनन्द दायक बनाणे च सक्षम आ, ताहली जे सै तुहांजो अपणिया महिमा च तिसरे सामणे खड़ा हुणे खातर ल्यौआं। तिने अहांरे प्रभु यीशु मसीह रे जरिये अहांरा छुटकारा कित्तिरा। महिमा, गौरव, प्राक्रम कने अधिकार वगता रे शुरु ते तिसरा इ हाया कने हुण बी तिसरा इ हाया कने जुगां-जुगां तक तिसरा इ रैहणा। आमीन।

प्रकाशितवाक्य 11:10

धरतिया रे रैहणे औल़यां तिन्हां रिया मौती ते खुश हूणा कने जशन मनाणा, तिन्हां इक्की दुज्जे ला तोफे भेजणे, काँह्भई इन्हें दुईं भविष्यवक्तयां धरतिया रे रैहणे औल़यां जो सताया था।

प्रकाशितवाक्य 18:7

जितणी तिने अपणी बडयाई कित्ती कने सुख-बलास कित्या, तितनी इ तिस्सो पीड़ कने दुख देओ; काँह्भई सै अपणे मनां च बोलां इ, ‘हऊँ राणिया साई बैठीरी कने विधवा नीं; मिन्जो कदीं बी किछ दुख नीं हूणा।’