यूहन्ना 12:48 - बिलासपुरी नौआं नियम

⁴⁸ सै जे मिन्जो छोट्टा जाणाँ सै मेरियां गल्लां मनदा निआं तिस्सो दोषी बनाणे औल़ा त इक आ; मतलब सै जे वचन मैं बोल्या, तिस इ न्याय रे दिन तिस्सो दोषी ठराना।

यूहन्ना 12:48 ပူးပေါင်းရင်းမြစ်များ

मत्ती 10:15

हऊँ तुहांजो सच्च बोलां, भई ताहली जे न्याय हूणा, तिस दिन तिस गाँवां री दशा ते सदोम कने अमोरा रे नगराँ री हालत जादा सैहणे लायक हूणी।

मत्ती 21:42

यीशुये तिन्हाने गलाया, “क्या तुहें पवित्रशास्त्रा रा ये बचन नीं पढ़या: ‘राजमिस्त्रियें इक्की पत्थरा जो बेकार समझीने सटाईत्या था, पर वगत औणे पर पता लगया भई सैई पत्थर कुणे रा सबनीं ते खास पत्थर बणीग्या? येढ़ा परमेशरा रिया तरफा ते हुया, सै जे अहां रियां नज़राँ च त नोखा।’

मत्ती 25:31

“ताहली जे माहणुये रे पुत्रा यनि मांह वापस अपणिया महिमा च औणा कने सारे स्वर्गदूत मेरे सौगी औणे, तां मांह सब्बी लोकां पर राज करने खातर अपणे राजकीय संघासणा पर बैठणा।

मरकुस 12:10

क्या तुहें पवित्रशास्त्रा च ये वचन नीं पढ़या : “‘तिस पत्थरा जो जे राज मिस्त्रीये बेकार समझया था, सैई मकाना रा खास पत्थर हुईग्या;

मरकुस 16:16

सै जे विश्वास करो कने बपतिस्मा लओ तिसरा इ छुटकारा हूणा, पर सै जे विश्वास नीं करगा सै दोषी समझया जाणा;

मरकुस 8:31

तां यीशु चेलयां जो सखाणे लगया भई माहणुये रे पुत्रा यनि मेरे खातर जरूरी आ भई सै बौहत दुख सहो, कने यहूदी बजुर्ग, कने मुखियेयाजकां, कने शास्त्रियां तिस्सो घटिया समझीने मारी देणा, कने तिस तिज्जे दिन मूईरयां चते भीं ते जिऊंदा हुई जाणा।

लूका 10:16

“सै जे कोई तुहांरी सुणां, सै मेरी बी सुणां, कने सै जे कोई तुहांरा इन्कार कराँ, सै मेरा बी इन्कार कराँ; कने सै जे कोई मेरा इन्कार कराँ, सै मेरे भेजणे औल़े रा इन्कार कराँ।”

लूका 17:25

पर इसते पहले माहणुये रे पुत्रा यनि मिन्जो जो बौहत जुल्म सैहणे पौणा, कने इसा पीढ़ियां रे लोकां मिन्जो अपराधी बनाणा।

लूका 20:17

यीशुये तिन्हां खा देख्या कने गलाया, “तां फेरी पवित्रशास्त्रा च ये क्या लिखिरा? तिस पत्थरा जो जे राजमिस्त्रियें बेकार समझीने कण्डे करी तरा था, सैई पत्थर हुण कुणे रा खास पत्थर हुईगरा।

लूका 7:30

पर फरीसियें कने व्यवस्थापकें यूहन्ना रा बपतिस्मा नां लेणे ते अपणे खातर परमेशरा री योजना जो ठोकर मारीती।

लूका 9:22

फेरी यीशुये गलाया, “काँह्भई माहणुये रे पुत्रा रे खातर ये जरूरी आ भई सै मता दुख सओ, कने बजुर्गां, मुखियायाजकां कने शास्त्रियां हऊँ घटिया समझीने मारी देणा, पर तिज्जे दिन मांज भीं ते ज्यून्दे हुई जाणा।”

लूका 9:26

जो कोई मेरते या मेरियां गल्लां ते शर्मांगा; माहणुये रे पुत्रा बी यनि मांह, ताहली जे अपणी, कने अपणे पिता री, कने पवित्र स्वर्गदूतां री महिमा सौगी औणा, तां तिसते शर्माणा।

यूहन्ना 11:24

मार्थे तिसने बोल्या, “हऊँ जाणाँ इ भई न्याय रे दिन तिस भीं ते जिऊंदे हूणा, ताहली जे हर कोई जिऊंदा हुई जाणा।”

यूहन्ना 5:45

ये नीं सोच्चा भई माह पिता रे सामणे तुहां पर दोष लगाणा; तुहां पर दोष लगाणे औल़ा त मूसा, तिस पर जे तुहें भरोसा रखीरा।

यूहन्ना 6:39

कने मेरे भेजणे औल़े परमेशरा री इच्छा येई, भई सै जे किछ तिने मिन्जो दित्तिरा तिस्सो हऊँ पूरा-पूरा संभाल़ीने रक्खूं, पर माह तिन्हां सब्बीं जो न्याय रे दिन भीं ते जिऊंदा करी देणा।

यूहन्ना 8:47

सै जे परमेशरा रा माहणु आ, सै परमेशरा रियां गल्लां सुणां; कने तुहें इस खातर मेरियां गल्लां नीं सुणदे भई तुहें परमेशरा रे लोक नींये।”

प्रेरितां 17:31

काँह्भई तिने इक दिन रखीरा, तिसच जे तिस माहणुये रे जरिये संसारा रा न्याय करना, तिस्सो जे तिने रखीरा, कने तिस्सो मूईरेयां चते ज्यूंदा करीने इसा गल्लां रा सबूत सारयां लोकां जो देईतरा।”

प्रेरितां 3:23

पर हरेक माहणु, सै जे तिस भविष्यवक्ता री नीं सुणो, सै लोकां बिच नाश कित्या जाणा।

रोमियो 2:16

ये गल्लां तिस दिन हुणियां ताहली जे परमेशर मेरिया प्रचार कित्ती रिया खुशखबरिया रे मुतावक यीशु मसीह रे जरिये माहणुये रियां गुप्त गल्लां रा न्याय करना।

2 कुरिन्थियों 4:3

जिसा खुशखबरिया रा जे अहें प्रचार कराँ ये, जे तिसजो लोक समझी नीं पायें, तां सै नाश हुणे औल़े लोक इ हाये सै जे समझदे नींये।

2 थिस्सलुनीकियां 1:8

कने सै जे परमेशरा जो नीं पछयाणदे कने अहांरे प्रभु यीशुये रे खुशखबरिया जो ग्रहण नीं करदे तिन्हाजो तिस सजा देणी।

इब्रानियों 10:25

कने इक्की दूये सौगी कट्ठा हूणा नीं छड्डा, तियां जे किछ लोक कट्ठे नीं हुन्दे। पर इक्की दूये जो जादा ते जादा हिम्मत देन्दे रौआ; काँह्भई तुहें जाणाँ ये भई प्रभुये रे न्याय रा दिन जल़द औणे औल़ा।

इब्रानियों 12:25

सावधान रौआ, भई तुहें परमेशरा ते मुँह नीं फेरा सै जे तुहांजो गल्लां कराँ, काँह्भई जे इस्राएल रे लोक सजा ते नीं बचे ताहली जे तिन्हें इसा धरतिया च रैहन्दे हुये मूसा रियां गल्लां ते मुँह फेरील्या था, तां सच्चीजो अहें बी नीं बची सकदे, जे अहें तिस परमेशरा ते मुँह फेरगे सै जे स्वर्गा ते अहांने गल्लां कराँ।

इब्रानियों 2:3

तां अहां लोकां जो बी पक्का सजा मिलणी जे अहें बड्डे छुटकारे ते बेफिक्र रैं। प्रभु यीशु मसीह खुद इस छुटकारे रे बारे च पैहले बोल्या था कने तिस्सो सुणने औल़यां चेलयां रे जरिये अहांजो सच्चा साबित हुया।

इब्रानियों 4:12

काँह्भई परमेशरा रा वचन जिऊंदा, सामर्थी, कने हरेक दोधारी तलवारी ते बी बौहत पैना; सै अहांरे प्राण कने आत्मा जो गहराईया तक बिन्हां, तियां जे इक तेज तलवार अहांरे हरेक जोड़ां जो, कने गुदे-गुदे जो लग करीने आर-पार बिन्ही देईं, कने मनां रियां भावनां कने विचाराँ जो परखी लेआं।

1 पतरस 1:5

परमेशर अपणिया सामर्था रे जरिये तुहांजो सुरक्षित रखां, काँह्भई तुहें मसीह पर विश्वास कराँ ये कने तिस तुहांजो लगातार आखिरी दिना तक सुरक्षित रखी रखणा, फेरी तुहां जाणना भई परमेशरे तुहांरा पूरे तरिके ने पापाँ ते कने मौती ते छुटकारा कित्तिरा।

2 पतरस 3:3

सब्बीं ते पैहले तुहांजो ये समझी लेणा चाहिन्दा भई आखरी दिनां च मजाक डवाणे औल़यां मजाक डवान्दे हुये औणा, कने तिन्हां अपणी बुरी इच्छां रे मुतावक चलना।

2 पतरस 3:7

पर आज्ज का अकाश कने धरती सै जे हुण अस्तित्व ची, तिस इ बचना रे जरिये अग्गी ते नाश हुणे रे खातर सुरक्षित इ। तिन्हांजो तिस दिना तक रखया गईरा ताहली जे परमेशरा हुक्म नीं मनणे औल़े लोकां रा न्याय करना कने तिन्हांरा नाश करना।