गलातियां 2:2 - बिलासपुरी नौआं नियम

² हऊँ परमेशरा रे दर्शणा रिया वजह ने ऊत्थी गया था। कने ताहली जे हऊँ तित्थी था, हऊँ कल्हिया जेईया कलीसिया रे अगुवेयां ने मिलया कने हऊँ अन्यजातियां रे बिच जिस खुशखबरिया रा जे प्रचार कराँ, तिसा इ खुशखबरिया रा मैं बखान कित्या। ताकि येढ़ा नीं हो भई सै काम्म जे मैं पिछले दिनां च कित्या था कने लगातार करदा रैहन्गा, सै बेकार नीं हुई जाओ।

गलातियां 2:2 ပူးပေါင်းရင်းမြစ်များ

मत्ती 10:16

खबरदार! हऊँ तुहांजो असहाय भेड्डां साई लोकां रे बिच भेज्जां सै जे भेड़िये साई खतरनाक ये। इस खातर सर्पां साई चलाक कने समझदारिया ने काम्म करा, कने कबूतरां साई भोल़े-भाल़े कने खरयां गुणां जो परगट करा।

प्रेरितां 15:12

तां सै सारी सभा चुपचाप बरनबासा कने पौलुसा री सुणने लगी, भई परमेशरे तिन्हांरे दवारा अन्यजातियां च कितणे बड्डे-बड्डे चमत्कार, कने नोखे काम्म दस्से।

प्रेरितां 15:2

पौलुस कने बरनबास तिन्हांने सैहमत नीं थे, तिन्हांरी बौहत बैहस कने झगड़ा हुआ तां ये मन्नया गया भई पौलुस कने बरनबास कने तिन्हां चते किछ विश्वासी लोक इसा गल्ला रा समाधान करने प्रेरितां कने प्राचीनां ले यरूशलेम जो जाओ।

प्रेरितां 15:4

ताहली जे सै यरूशलेम नगरा च पुज्जे, तां कलीसिया रे लोक कने प्रेरित कने प्राचीन तिन्हांने खुशिया ने मिले, कने पौलुस कने बरनबासे दस्या भई परमेशरे तिन्हांने सौगी हुईने केढ़े-केढ़े काम्म कित्तिरे थे।

प्रेरितां 18:9

प्रभुये इक्की राति दर्शण देईने पौलुसा जो गलाया, “मत डर, बोल्ली जा कने चुप मत रै;

प्रेरितां 23:11

तिसा राति प्रभु यीशु तिसले आया कने खड़े हुईने गलाया, “हे पौलुस, हिम्मत रख; काँह्भई तेढ़ी जे तैं यरूशलेम च मेरी गवाही दित्ति, तेढ़ी तिज्जो रोम शहरा च बी गवाही देणे पौणी।”

प्रेरितां 5:34

पर गमलीएल नौआं रा इक फरीसी सै जे व्यवस्थापक कने सब्बीं लोकां च खरा था, कचैहरिया च खड़े हुईने प्रेरितां जो थोड़िया देरा खातर बाहरा जो भेजणे रा हुक्म दित्या।

रोमियो 9:16

इस खातर ये नांत किसी माहणुये रिया इच्छा पर निर्भर कराँ कने नां किसी रे कोशिश करने पर वल्कि दया करने औल़े परमेशरा पर निर्भर कराँ।

1 कुरिन्थियों 1:23

पर अहें त तिस क्रूसा पर चढ़ाईरे मसीह रा सन्देश सुणवांये, सै जे यहूदियां रे खातर अपमान आ कने अन्यजातियां रे खातर मूर्खता इ;

1 कुरिन्थियों 2:2

काँह्भई मैं ये ठाणी लरा था भई तुहांरे बिच यीशु मसीह यनिके क्रूसा पर चढ़ाईरे मसीहे जो छड्डिने होर किसी गल्लां जो नीं सखाऊं।

1 कुरिन्थियों 9:24

क्या तुहें नीं जाणदे भई दौड़ा च त सब दौड़ां ये, पर ईनाम इक्की जोई मिलां? इस खातर तुहें इयां दौड़ा भई ईनाम जित्तो।

1 कुरिन्थियों 9:26

इस खातर हऊँ लक्ष्य हीन माहणुये साई नीं दौड़दा; कने हऊँ इक येढ़ा मुक्केबाज आ सै जे हवा च मुक्के नीं मारदा।

2 कुरिन्थियों 12:1

हुण मिन्जो गर्व करने इ पौणा हलाँकि इसच मेरा कोई फायदा नींआ, पर मांह हुण दर्शणां कने प्रकाशनां रे बारे च गर्व करना सै जे प्रभुये मिन्जो दित्तिरे।

गलातियां 1:12

काँह्भई मैं इसजो नां किसी माहणुये ते लेआ कने नां किसी ते सिक्खया, बल्कि खुद यीशु मसीहे इसजो माह पर परगट कित्या।

गलातियां 1:16

कने ताहली जे परमेशरा री इच्छा हुई भई सै माह पर अपणे पुत्रा जो परगट करो ताकि हऊँ अन्यजातियां रे बिच तिसरिया खुशखबरिया रा प्रचार करूँ। तिस बगत इकदम मैं माहणुआं ते कोई राय नीं लैई।

गलातियां 1:6

हऊँ तुहांरे बारे च हैरान आ! भई तुहें लोक इतणी जल्दी तिस परमेशरा जो छड्डया राँये तिने जे तुहांजो मसीह रे अनुग्रह रे जरिये सद्दया, कने किसी होर सन्देशा जो सै जे खुशखबरी बोल्या जां तिसजो तुहें ग्रहण करया राँये।

गलातियां 2:6

पर तिन्हौं जे लोक अगुवे समझां थे (सै चाये केढ़े बी थे मिन्जो इसते किछ फर्क नीं पौन्दा, परमेशर किसी री तरफदारी नीं करदा) इन्हां अगुवेयां ते मिन्जो कोई नई गल्ल नीं मिली।

गलातियां 2:9

इस तरिके ने तिन्हें माह पर परमेशरा रे तिस अनुग्रह जो समझील्या कने कलीसिया रे अगुवे समझे जाणे औल़े याकूब, कैफा, कने यूहन्ने, मिन्जो कने बरनबासा जो सहयोगी बणाईने भेज्या। कने सै सहमत हुईगे भई अहें अन्यजातियां रे बिच उपदेश देन्दे रौ कने सै खतना कित्ती रयां लोकां रे बिच।

गलातियां 5:7

तुहें त बौहत अच्छे ढंगा ने अपणे आत्मिक जीवना च बधया राँ थे, हुण तुहांजो किने रोकील्या ताकि तुहें सच्चाईया जो नीं मन्नो?

फिलिप्पियां 2:16

भई ताहली जे मसीह वापस औणा तां मेरा घमण्ड करने री वजह ये हूणा भई मेरी मेहणत कने मेरा प्रयास बेकार नीं हुया।

फिलिप्पियां 2:29

इस खातर तुहें प्रभु च तिसरा बड़िया खुशिया ने स्वागत करा कने येढ़े लोकां रा आदर करदे रैहणा चाहिन्दा।

1 थिस्सलुनीकियां 3:5

इस खातर काँह्भई हऊँ होर जादा इन्तजार नीं करी सकदा था, इस खातर मैं तुहांरे विश्वासा रे बारे जाणने तिमुथियुस जो भेज्या। काँह्भई मिन्जो डर था भई किति येढ़ा नीं हो भई इम्तेहान लेणे औल़े शैताने तुहांरा इम्तेहान लेआ हो, कने अहां रिया मेहणता जो बेकार त नीं करित्या।

2 तिमुथियुस 4:7

मैं मसीह रे खातर कड़ी मेहणत कित्तिरी तियां जे भई मैं ठीक ढंगा ने कुश्ती लड़ीरी कने हऊँ सै काम्म पूरा करी चुक्कीरा सै जे यीशु मसीह मिन्जो करने खातर दित्या कने हऊँ आखिर तक बफादार रैया।

इब्रानियों 12:1

इस वजह ते ताहली जे बौहत लोकां रे विश्वासा रियां गवाहीयें अहांजो इतणे बड्डे बद्दल़ा साई घेरीरा ओ, तां औआ, हरेक रोकणे औल़ियां चिज़ां कने उलझाणे औल़यां पापां जो दूर करीने, तिसा दौड़ा च जे अहां दौड़णा तिसाजो धैर्य ने दौड़िये।