इफिसियां 4:24 - बिलासपुरी नौआं नियम

²⁴ कने तुहौं नया स्वाभाव धारण करना चाहिन्दा, तिसजो जे परमेशरे अपणे बराबर हुणे खातर बणाईरा। तुहांरा स्वभाव सही मायने च धर्मी कने पवित्र हूणा चाहिन्दा।

इफिसियां 4:24 ပူးပေါင်းရင်းမြစ်များ

लूका 1:75

तिसरे सामणे पवित्रता कने प्रभुरी इच्छा रे मुतावक जिन्दगी भर तिसरी सेवा करदे रैईये।

यूहन्ना 17:17

तू सच्चाईया ते तिन्हांजो पवित्र कर। तेरा वचन सच्चा।

रोमियो 12:2

हुण होर अग्गे इस संसारा रिया रीता पर मता चलदे; पर परमेशर तुहांरे मना जो बदलने रे जरिये तुहांजो नया दिल देओ। ताकि तुहें परमेशरा रियां इच्छां जो जाणी सकगे, यानि सै जे भली, सै जे तिस्सो खुश कराँ इ कने सै जे उत्तम इ।

रोमियो 13:12

ये येढ़ा भई रात तकरीवन खत्म हुई चुक्कीरी, कने दिन सिरने जोआ; इस खातर अन्धकारा ने जुड़ीरे सारयां कम्मां जो करना बन्द करा कने जोतिया च रैहणे खातर त्यार हुई जावा।

रोमियो 13:14

बल्कि प्रभु यीशु मसीह साई जीओ, कने जिस्मा री इच्छां जो पूरा करने री कोशिश नीं करा।

रोमियो 6:4

ताहली जे अहें बपतिस्मा लेआ था, तां अहें मसीह ने सौगी मारे गये थे कने गड्डे गये थे ताकि अहें इक नई जिन्दगी जी सक्को, तियां जे मसीह पिता परमेशरा रिया महिमा रे जरिये मूईरयां चते जिऊंदा हुया था।

रोमियो 7:6

पर व्यवस्था अहांरे ऊपर राज नीं करदी, अहें मूईरे लोकां साई ये कने ये अहांरे ऊपर कोई हक नीं जताई सकदी। हुण अहें लिखिरी पुराणी व्यवस्था रा पालन करीने नीं वल्कि आत्मा सौगी नये तरिके ने परमेशरा री सेवा करी सक्कां ये।

रोमियो 8:29

काँह्भई तिन्हांजो जे तिने पैहले ते चुणीरा कने तैह कित्या भई सै तिसरे पुत्रा साई बणी जाओ ताकि तिसरा पुत्र कई भाईयां च पैहला हूणा।

1 कुरिन्थियों 15:53

काँह्भई जरूरी आ, भई सै नाशवान शरीर अविनाशिये जो धारण करी लो, कने ये मरणहार शरीर अमरता जो धारण करी लो।

2 कुरिन्थियों 3:18

पर ताहली जे अहें सब अपणे खुल्हे चेहरे ने प्रभुये री महिमा रा ध्यान कराँ ये, तां परमेशर अहौं हौल़यां-हौल़यां अपणे स्वरूपा च बधदी हुई महिमा सौगी बदल़ां, ये महिमा प्रभु तेई मिलां इ, सै जे पवित्र आत्मा।

2 कुरिन्थियों 4:16

इस खातर अहें निराश नीं हुन्दे: अहांरे बाहरी शरीर कमजोर हुन्दे जाई कराँ ये, तां बी अहांरी अंतरात्मा हर रोज नौंईं त नौंईं हुन्दी जाई कराँ इ।

2 कुरिन्थियों 5:17

इस खातर जे कोई मसीह पर विश्वास कराँ, तां हुण सै नया माहणु आ; पुराणा जीवन गुजरिग्या; कने नया जीवन शुरु हुईग्या।

गलातियां 3:27

काँह्भई तुहें सारे तिन्हें जे मसीह रा बपतिस्मा लेई लरा, मसीह रे चरित्रा जो धारण करी लरा।

गलातियां 6:15

काँह्भई नांत खतने रा कोई महत्व हाया कने नां बगैर खतने रा, जे महत्व हाया तां सै नौंईयां सृष्टिया रा।

इफिसियां 2:10

काँह्भई परमेशर अहांरा बनाणे औल़ा, तिने मसीह यीशु च अहांरी सृष्टि इस खातर कित्ती भई अहें भले काम्म करो, तिन्हांजो जे परमेशरे पैहले ते अहांरे खातर त्यार कित्तिरा।

इफिसियां 2:15

व्यवस्था रे बौहत नियम थे, पर मसीहे अपणिया मौती रे जरिये सारे यहूदी नियमां जो मटाया, तिसते जे यहूदी कने अन्यजातियां जो मसीह अप्पूँ सौगी मेल कराईने इक नया समूह बणाए। इस तरिके ने तिने तिन्हांरे बिच मेल-मलाप कित्या।

इफिसियां 6:11

परमेशरा रे सारे हथियाराँ जो पैहनी लो, ताकि तुहें शैतान्ना रिया बुरिया चाला रे सामणे खड़े रैई सक्को।

तीतुस 2:14

तिने अप्पूँजो अहांरे खातर बलिदान करित्या ताकि अहांजो हरेक पापा ते छडवाई लो कने शुद्ध करीने अपणे खास लोक बणाई लो, सै जे भले काम्म करने च पूरे समर्पित ये।

इब्रानियों 1:8

पर परमेशर पुत्रा रे बारे च बोलां, “परमेशर, तेरा संघासण युगां-युगां तकौ रैहणा: कने तुहां न्याय ने राज करना।

इब्रानियों 12:14

सब्बीं ने शान्तिया ने रैहणे, कने पवित्र हुणे रे खातर हर तरह री कोशिश करदे रौआ, काँह्भई पवित्रता ते बिणा कोई प्रभुये जो कदीं बी नीं देखी सकदा।

1 पतरस 2:2

पर तियां जे नये जम्मीरे बच्चे अपणिया मौआ रे असली दुधा खातर तरसां ये तियां इ तुहांजो बी परमेशरा रे वचना जो सिखणे खातर तरसणा चाहिन्दा, ताकि तिसरे जरिये पूरे तरिके ने छुटकारा पाणे खातर तुहें बधदे जाओ।

2 पतरस 1:4

इन्हां सब्बीं रे जरिये परमेशरे अहांजो बौहत महान कने बौहत कीमती बरदान दित्ते, तिन्हांजो देणे रा जे तिने वायदा कित्या था, ताकि इन्हां बरदान्नां रे जरिये तुहें संसारा रियां बुरियां इच्छां ते बची सक्को सै जे लोकां जो नाश कराँ इयां कने तुहें परमेशरा रे अपणे स्वभावा च शामिल हुणे खातर आई सक्को।