प्रेरितां 2:42 - बिलासपुरी नौआं नियम

⁴² कने सै प्रेरितां ते शिक्षा पाणे, कने संगती रखणे, प्रभु भोज, कने प्राथना करने च लगीरे रै।

प्रेरितां 2:42 ပူးပေါင်းရင်းမြစ်များ

लूका 24:30

तां जे सै रोटी खाणे बैट्ठे, तां यीशुये रोटी लेईने परमेशरा रा धन्यवाद कित्या, फेरी सै तोड़ीने ताहली जे तिन्हाजो देणे लगया।

लूका 24:35

फेरी इम्माऊस रे तिन्हें दुईं माहणुयें बी अपणी कहाणी सुणाई भई कियां बाटा जान्दे बगत यीशु परगट हुये, कने जिस वगत सै रोटी तोड़ीरां थे, ताहली कियां तिन्हे यीशुये जो पछयाणया था।

प्रेरितां 1:14

ये सब कई जनानां कने यीशुये री माता मरियम कने तिसरे भाईयां सौगी इक मन हुईने प्राथना च लगीरे रै।

प्रेरितां 11:23

सै तित्थी पुज्जी ने कने परमेशरा रा अनुग्रह देखीने खुश हुआ, कने सबनीं जो ये उपदेश दित्या भई तन-मन लाईने प्रभुये ने चिपकी रे रौआ।

प्रेरितां 14:22

कने हरेक नगरा रे चेलयां रे मना जो मजबूत करदे रहे कने ये उपदेश देआं थे भई विश्वासा च बणीरे रौआ; कने ये बोलां थे, “अहांजो मते दुख सहीने परमेशरा रे राज्जा च जाणे मिलणा।”

प्रेरितां 2:46

पैहलके दिनां च सारे विश्वासी लोक हर रोज़ इक मन हुईने मन्दरा च कट्ठे हुआं थे, कने घरा-घरा रोटी तोड़दे हुये खुशिया ने कने साफ मना ने रोटी खां थे,

प्रेरितां 20:11

कने भीं ते ऊपर जाईने रोटी तोड़ी कने खाईने इतनिया देरा तक गल्लां करदा रैया भई भ्याग हुणे लगीग्या; फेरी सै चलिग्या।

प्रेरितां 20:7

हफ्ते रे पैहले दिन तां जे अहें प्रभु भोज्जा च शामिल होणे खातर कट्ठे हुये, तां पौलुसे तिस जे दुज्जे दिन चली जाणा था, तिन्हांने गल्लां कित्तियां; कने अधिया राति तका गल्लां करदा रैया।

प्रेरितां 4:23

सै छुट्टीने अपणे साथियां ला आये, कने जो किछ मुखियायाजकें कने बजुर्गें तिन्हांने बोलीरा था, तिन्हांजो सुणाईत्या।

प्रेरितां 4:31

तां जे सै प्राथना करी चुक्के, तां जगह तित्थी जे सै कट्ठे थे हिल्लीगी, कने सै सब पवित्र आत्मा ते भरीगे, कने परमेशरा रा वचन हिम्मता ने सुणांदे रै।

प्रेरितां 6:4

पर अहां त प्राथना च कने वचना रे प्रचारा कने सखाणे रिया सेवा च लगी रयां रैहणा।”

रोमियो 12:12

अपणिया आशा च खुश रौआ; परेशानियां च धैर्य रखा; कने हमेशा प्राथना करदे रौआ।

1 कुरिन्थियों 10:21

तुहें प्रभुये रे कटोरे कने बुरीआत्मा रे कटोरे दुईं चते नीं पी सकदे। तुहें प्रभुये री मेज बुरीआत्मां री मेज दुईं रे सहभागी नीं हुई सकदे।

1 कुरिन्थियों 11:2

हऊँ तुहांरी तारीफ कराँ, काँह्भई तुहें मिन्जो हर वगत याद करदे रैं; कने सै जे शिक्षायें मैं तुहांजो दित्ति रियां, तिन्हांरा सावधानिया ने पालन करया राँये।

1 कुरिन्थियों 14:6

इस खातर साथी विश्वासियो, जे हऊँ तुहांले आईने होरीं भाषां च गल्लां करूँ, तां इसते हऊँ तुहांरा क्या भला करगा? पर जे हऊँ प्रकाशन, ज्ञान, भविष्यवाणी, शिक्षा रियां गल्लां तुहांजो बोलूं, तां तुहांरे खातर इसरा फायदा।

गलातियां 1:6

हऊँ तुहांरे बारे च हैरान आ! भई तुहें लोक इतणी जल्दी तिस परमेशरा जो छड्डया राँये तिने जे तुहांजो मसीह रे अनुग्रह रे जरिये सद्दया, कने किसी होर सन्देशा जो सै जे खुशखबरी बोल्या जां तिसजो तुहें ग्रहण करया राँये।

इफिसियां 2:20

तुहें इक येढ़ा घर ये सै जे प्रेरितां कने भविष्यवक्तयां री निऊंवा पर बणाईरा, कने तिसरे कुणे रा पत्थर खुद मसीह यीशु आ।

इफिसियां 6:18

कने तियां जे पवित्र आत्मा तुहांरी अगुवाई कराँ, तियां इ हर बगत कने सब प्रकारा रियां प्राथनां कने विनतियां करदे रौआ। इसा वजह ने जागदे रौआ कने सब पवित्र लोकां रे खातर लगातार प्राथना करदे रौआ।

फिलिप्पियां 1:5

काँह्भई तुहें यीशु मसीह रिया खुशखबरिया पर विश्वास करने रे दिना ते लेईने अज्जा तक खुशखबरिया रे प्रचारा च मेरा साथ देन्दे रै।

कुलुस्सियां 1:23

ये तांई हुई सक्कां तां जे तुहें अपणे विश्वासा च मजबूतिया ने टिक्कीरे रैहन्गे, कने खुशखबरिया रे जरिये दित्ति रिया तिसा आशा रा त्याग नीं करी दो, तिसौ जे तुहें सुणया। ये खुशखबरी इसा धरतिया पर रैहणे औल़े सारयां लोकां जो प्रचार कित्या गईरा, कने हऊँ पौलुस तिसरा इ सेवक बणीरा।

कुलुस्सियां 4:2

हमेशा प्राथना च लगीरे रौआ, कने ताहली जे तुहें प्राथना करो तां सावधान रौआ कने परमेशरा रा धन्यवाद करदे रौआ;

2 तिमुथियुस 3:14

पर तिमुथियुस तैं तिन्हां गल्लां जो जे सिखीरा कने मजबूतिया ने विश्वास कराँ, तिन्हां पर लगातार विश्वास करदा रैयां, काँह्भई तू तिन्हांजो जाणाँ भई तिज्जो किने इसा सच्चाईया जो सखाईरा।

इब्रानियों 10:25

कने इक्की दूये सौगी कट्ठा हूणा नीं छड्डा, तियां जे किछ लोक कट्ठे नीं हुन्दे। पर इक्की दूये जो जादा ते जादा हिम्मत देन्दे रौआ; काँह्भई तुहें जाणाँ ये भई प्रभुये रे न्याय रा दिन जल़द औणे औल़ा।

इब्रानियों 10:39

पर अहें हटणे औल़यां चते नींये सै जे नाश हुई चुक्कीरे। पर अहें तिन्हां चते सै जे परमेशरा पर विश्वास कराँ ये कने छुटकारा पाई चुक्कीरे।

1 यूहन्ना 1:3

जो किछ अहें देख्या कने यीशु मसीह रे बारे च सुणया तिसरी गवाही तुहौं बी देआंये, इस खातर भई अहां सौगी तुहांरी संगती ओ; अहांरी ये संगती पिता ने कने तिसरे पुत्र यीशु मसीह ने सौगी।

1 यूहन्ना 1:7

पर तियां जे परमेशर जोति आ, तियां इ जे अहें बी जोतिया च जीवन बिताईये, तां अहें इक्की दुज्जे ने संगती रखां ये, कने तिसरे पुत्र यीशु मसीह रा खून अहांजो सारयां पापां ते साफ कराँ।

1 यूहन्ना 2:19

सै मसीह रा बरोध करने औल़े अहांरा साथ छड्डी ने चली गरे, पर सै अहांरे अपणे नीं थे। जे सै अहांरे अपणे हुन्दे, तां अहांने सौगी रैहन्दे। पर सै अहांजो छड्डी गरे ताकि परमेशर अहांजो ये दस्सी सक्को भई तिन्हां चते कोई बी अहांरा निआं।

यहूदा 1:20

पर मेरे प्यारे मित्रो, तुहांजो पवित्र विश्वासा च बधणे खातर इक्की दूये री मदद करदे रैहणा चाहिन्दा कने पवित्र आत्मा रिया अगुवाईया रे जरिये तुहांजो प्राथना करनी चाहिन्दी।