2 थिस्सलुनीकियां 2:17 - बिलासपुरी नौआं नियम

¹⁷ तुहांरे मना जो प्रोत्साहन देओ कने तुहांजो हरेक कम्मां कने वचना च मजबूत करो।

2 थिस्सलुनीकियां 2:17 ပူးပေါင်းရင်းမြစ်များ

रोमियो 1:11

काँह्भई मेरी बौहत इच्छा इ भई हऊँ तुहांजो मिलीने तुहांजो आशीषां बंडी सक्कूँ सै जे परमेशरा रे आत्मे मिन्जो दित्ति रियां, ताकि तुहें विश्वासा च मजबूत हुई सक्को;

रोमियो 15:13

सारियां आशां रा देणे औल़ा परमेशर तुहांजो बड़े आनन्द कने शान्तिया ने भरी दो, तियां जे भई तिसच तुहांरा विश्वास आ, ताकि पवित्र आत्मा रिया सामर्था ते तुहें आशा ने भरी जाओ।

रोमियो 16:25

हुण सारी महिमा परमेशरा री ओ, सै जे तुहांजो विश्वासा च मजबूत करी सक्कां, तियां जे खुशखबरी बोलां इ। यीशु मसीह रे बारे री ये खुशखबरी अन्यजातियां रे लोकां रे खातर तिसरी योजना परगट कित्तिरी सै जे युगां-युगां ते छुपीरी थी।

1 कुरिन्थियों 1:8

तिस तुहांजो आखिर तक मजबूत रखणा ताकि तुहें अहांरे प्रभु यीशु मसीह रे दिन निर्दोष हुन्गे।

2 कुरिन्थियों 1:21

परमेशर इ हाया, सै जे तुहां सौगी मसीह च अहांजो मजबूत कराँ, कने परमेशरे अहां पर अपणी मोहर लाईने बयाने रे रुपा च अपणा आत्मा अहांरे दिला च रखीने अहांरा अभिषेक कित्तिरा।

कुलुस्सियां 2:7

कने तिस ची मजबूत हुन्दे जावा तियां जे इक पेड़ धरतिया च जड़ पकड़ां; कने लगातार तिस ची अपणे विश्वासा जो बधान्दे जावा, कने परमेशरा रा जादा ते जादा धन्यवाद करदे रौआ।

1 थिस्सलुनीकियां 3:13

ताकि सै तुहांरयां मनां जो मजबूत करो भई ताहली जे अहांरे प्रभु यीशु मसीह फेरी अपणे पवित्र लोकां सौगी आओ तां तुहें अहांरे परमेशर कने पिता रे सामणे पवित्र कने निर्दोष हुणे।

1 थिस्सलुनीकियां 3:2

कने अहें तिमुथियुस जो, सै जे मसीह रिया खुशखबरिया च अहांरा भाई आ कने परमेशरा रा सेवक आ, इस खातर तिस्सो तुहांले भेज्या भई सै तुहांजो मजबूत करने कने विश्वासा रे बारे च समझाई सक्को।

2 थिस्सलुनीकियां 2:16

खुद अहांरे प्रभु यीशु मसीह, कने अहांरे पिता परमेशर तिने जे अहांने प्यार कित्या, कने अपणे अनुग्रह ते अनन्त प्रोत्साहन कने उत्तम आशा दित्तिरी,

2 थिस्सलुनीकियां 3:3

पर प्रभु बफादार आ; तिस तुहांजो मजबूत करना कने तिस शैतान्ना ते बचाणे।

इब्रानियों 13:9

लग-लग किस्मा रे विचित्र उपदेशां ते नीं भरमाये जाओ, काँह्भई तुहांरे मना रे खातर ये बधिया भई सै परमेशरा रे अनुग्रह रे जरिये मजबूत बणे, नां की खाणे रे बारे च नियमां रा पालन करने रे जरिये। काँह्भई जितने लोक इस नियमा रा पालन कराँ ये सै अपणे खातर किछ बधिया नीं करदे।

1 पतरस 5:10

तुहांजो थोड़िया देरा रे कष्ट सैहणे ते बाद सारे अनुग्रह देणे औल़ा परमेशर तिने जे तुहांजो मसीह च अपणी युगानुयुगा री महिमा रे खातर सद्दीरा, खुद इ तुहांजो सिद्ध, मजबूत, बलवन्त कने स्थिर करी देंगा।

1 यूहन्ना 3:18

मेरे प्यारे बच्चो, अहांरा प्यार सिर्फ मुँआं ते गलाई रियां गल्लां तक इ सीमित नीं रैहणा चाहिन्दा, पर कर्म करने औल़ा कने सच्चा हूणा चाहिन्दा।

यहूदा 1:24

परमेशर तुहांजो रुढ़णे ते बचाणे च सक्षम आ, सै तुहांजो निर्दोष कने आनन्द दायक बनाणे च सक्षम आ, ताहली जे सै तुहांजो अपणिया महिमा च तिसरे सामणे खड़ा हुणे खातर ल्यौआं। तिने अहांरे प्रभु यीशु मसीह रे जरिये अहांरा छुटकारा कित्तिरा। महिमा, गौरव, प्राक्रम कने अधिकार वगता रे शुरु ते तिसरा इ हाया कने हुण बी तिसरा इ हाया कने जुगां-जुगां तक तिसरा इ रैहणा। आमीन।