2 कुरिन्थियों 5:13 - बिलासपुरी नौआं नियम

¹³ काँह्भई जे कोई अहांने बोलां भई अहें पागल ये तां परमेशरा खातर ये, कने जे दुज्जे लोक बोलां ये भई अहें सयाणे तां सै तुहांरे खातर ये।

2 कुरिन्थियों 5:13 ပူးပေါင်းရင်းမြစ်များ

मरकुस 3:21

ताहली जे यीशुये रे घरा औल़यां ये सुणया, तां सै तिस्सो पकड़ने रे खातर निकल़े, काँह्भई तिन्हांजो लगया भई यीशु पागल हुईगरा।

रोमियो 12:3

इस खातर परमेशरा रे अनुग्रह रिया वजह ने सै बरदान जे तिने मिन्जो दित्या, तिस्सो ध्याना च रखदे हुये हऊँ तुहां चते हर इक्की ने बोलां, भई तेढ़ा जे समझणा चाहिन्दा तिसते बधीने कोई खुद अप्पूँजो नीं समझे; यनिके जितना विश्वास परमेशरे तुहांजो दित्या, तिसरे मुतावक अप्पूँजो समझा।

2 कुरिन्थियों 11:1

मेरी आशा इ भई तुहां मेरी छोट्टी जेई मूर्खता जो सैई लेणा, तियां जे हकीकत च तुहें इस वगत सैई बी रैयां ये।

2 कुरिन्थियों 12:11

हऊँ मूर्खां साई नाटक करी रां, पर येढ़ा करने रे खातर मिन्जो तुहें मजबूर कित्या; तुहां लोकां जो मेरी सपारस करनी चाहिन्दी थी, हलाँकि हऊँ किछ निआं, पर तुहांरे तिन्हां महान प्रेरितां, ते हऊँ किसी बी तरिके ने छोट्टा निआं।

2 कुरिन्थियों 12:6

काँह्भई जे हऊँ घमण्ड करना चाऊँ तां बी मांज मूर्ख नीं बणना, काँह्भई मांह सच्च बोलणा; पर हऊँ रुकी जां, ताकि येढ़ा नीं ओ भई तियां जे कोई मिन्जो देखां या माहते सुणां, मिन्जो तिसते बधीने समझो।

2 कुरिन्थियों 7:12

इसी खातर ताहली जे मैं तुहांजो सै कड़क चिट्ठी लिखी थी तां तिस माहणुये रिया वजह ने नीं, तिने जे अन्याय कित्या था कने नांई तिसरिया वजह ने तिसरे प्रति जे अन्याय कित्या गया था। पर इस खातर लिखया था ताकि परमेशर तुहांजो दस्सो भई तुहें अहांरा कितना ख्याल रखां ये।

कुलुस्सियां 1:24

मिन्जो इसा गल्ला री खुशी भई हुण हऊँ तुहांरे खातर दुख सैई सकूँ, कने तियां जे मसीह दुख सैया, तियां इ हऊँ बी खुशिया ने तिन्हां सारयां दुखां जो कलीसिया रे फायदे रे खातर अपणे शरीरा च सैयां सै जे जरूरी ये, ताकि कलीसिया री मदद करी सकूँ सै जे मसीह रे शरीरा साई आ।

1 थिस्सलुनीकियां 1:5

काँह्भई ताहली जे अहें यीशु मसीह री खुशखबरी तुहांजो दस्सी तां तुहांले सिर्फ शब्दां ची नीं पुज्जी, बल्कि पवित्र आत्मे बी सामर्था ने काम्म कित्या; कने तुहें बौहत गैहराईया ने विश्वास कित्या। ये तुहें जाणाँ ये भई ताहली जे अहें तुहां सौगी थे, तां तुहांरी मदद करने खातर अहें किस तरिके रा व्यवहार कित्या।

2 तिमुथियुस 2:10

इस खातर परमेशरा रे चुणी रयां लोकां खातर हऊँ सब किछ सैयां ताकि सै बी मसीह यीशुये च मिलणे औल़े छुटकारे जो अनन्त महिमा सौगी पाई सक्को।