1 तिमुथियुस 6:18 - बिलासपुरी नौआं नियम

¹⁸ तिन्हांजो भले काम्म करने खातर हुक्म दे कने सै बौहत भले काम्म करो, कने उदारता पूर्वक दान देईने दुज्यां री मद्‌द करने जो त्यार रौ।

1 तिमुथियुस 6:18 ပူးပေါင်းရင်းမြစ်များ

मत्ती 5:42

सै जे तेरते कोई चीज मंगां, तिस्सो देई दे; कने सै जे उधार लेणे खातर विनती कराँ, तिसजो मना नीं कर।”

लूका 12:21

तिस माहणुये ने बी येढ़ा इ हूणा सै जे अपणे खातर दुनियां री धन-दौलत त कट्ठी कराँ, पर परमेशरा सौगी कीमती रिश्ता नीं रखदा।”

लूका 3:11

यूहन्ने तिन्हाजो जवाब दित्या, “जे तुहांले दो कुरते ओ, तां तिन्हां चते इक कुरता तिसले जे निआं तिस ज़रुरतमन्द माहणुये जो देई दो, कने जे तुहांले रोटी ओ, तां तिसाजो तिन्हां सौगी बन्डी लो सै जे भुक्खे ओ।”

प्रेरितां 10:38

परमेशरे कियां-कियां नासरत नगरा रे यीशुये जो पवित्र आत्मा कने सामर्था ते अभिषेक कित्या; सै भलाई करदा कने जितने लोक सै जे शैताने सताईरे थे, ठीक करदा फिरया, काँह्भई परमेशर तिसने सौगी था।

प्रेरितां 11:29

तां चेलयां ये फैसला कित्या भई सब अपणे-अपणे धना रे मुतावक यहूदिया प्रदेशा च रैहणे औल़े मसीह विश्वासिया रे खातर अपणिया सामर्थय रे मुतावक सहायता करें।

प्रेरितां 9:36

याफा नगरा च तबीता नामक विश्वासी थी। यूनानी भाषा च तिसारा नौं दोरकास था। सै बौहत सारे भले-भले काम्म कने मदद कराँ थी।

रोमियो 12:13

परमेशरा रे लोकां री जरूरतां च मदद करा; मैहमान्नां रे आदर सत्कारा खातर हर वगत त्यार रौआ।

रोमियो 12:8

जे तुहांरा बरदान हौंसला देणे औल़ा ओ, तां तिस्सो हौंसला देन्दे रैहणा चाहिन्दा; जे किसी जो दान देणे रा बरदान मिलीरा, तां तिस्सो खुले दिला ने दान देणा चाहिन्दा; जे किसी जो अगुवाई करने रा बरदान मिलां, तां सै जोशा ने अगुवाई करे; सै जे दया करो, सै खुशिया ने करो।

1 कुरिन्थियों 16:2

हफ्ते रे पैहले दिन तुहां चते हर इक अपणी-अपणी कमाईया रे मुतावक किछ अप्पूँ ले रखी छड्डा, ताकि मेरे औणे पर चन्दा नीं कठेरने पौ।

2 कुरिन्थियों 8:12

काँह्भई जे किसी च दान देणे री इच्छा हाई, तां सै जे किछ तिसले हाया, तिसरे मुतावक तिसरा दान ग्रहण हूणा, उसरे मुतावक नीं सै जे तिसले निआं।

2 कुरिन्थियों 8:9

काँह्भई अहांरे प्रभु यीशु मसीह रे अनुग्रह जो तुहें जाणाँ ये; भई सै अमीर हुन्दे हुये बी तुहांरे खातर गरीब बणीग्या, ताकि तिसरिया गरीबिया ते तुहें अमीर बणी जो।

गलातियां 6:10

इस खातर तियां जे कोई मौका मिलो, अहांजो सारयां ने भलाई करनी चाहिन्दी, खास कर अपणे विश्वासी भाईयां सौगी।

इफिसियां 4:28

सै जे चोरी करदा आया, सै इसते बाद चोरी नीं करो, बल्कि तिस्सो काम्म करना चाहिन्दा, खुद अपणे हत्थां ने मेहणत करा, ताकि तिसले तिस्सो जे जरूरत इ, तिस सौगी बंडणे जो किछ हुई सक्को।

1 तिमुथियुस 5:10

कने भलयां कम्मां च तिसारा नौं हो, तियां जे बच्चयां रा पाल़ण-पोषण; मेहमान्नां री सेवा कित्ती हो, पवित्र लोकां री इक दासिया साई सेवा कित्ती हो, दुखियां री मद्‌द कित्ती हो, कने हरेक भले कम्मां च मन लाया हो।

तीतुस 2:14

तिने अप्पूँजो अहांरे खातर बलिदान करित्या ताकि अहांजो हरेक पापा ते छडवाई लो कने शुद्ध करीने अपणे खास लोक बणाई लो, सै जे भले काम्म करने च पूरे समर्पित ये।

तीतुस 3:8

सै गल्लां जे मैं लिखी रियां सै सच्चियां इ, कने हऊँ चांह भई तू इन्हां गल्लां रे बारे च मजबूतिया ने बोल्लो, ताकि तिन्हें जे परमेशरा पर विश्वासा कित्या, सै भले कम्मां च लगी रैहणे खातर ध्यान देओ। ये गल्लां भली कने सब्बीं रे फायदे रियां इ।

इब्रानियों 13:16

भलाई करना कने इक्की दूये री मदद करना नीं भूल्लो, काँह्भई परमेशर येढ़े बलिदान्नां ते खुश हुआं।

याकूब 2:5

मेरे प्यारे साथी विश्वासियो, ध्याना ने सुणा, क्या परमेशरे तिन्हां लोकां जो नीं चुणीरा, सै जे संसारा रिया नजरां च गरीब ये, ताकि सै विश्वासा च अमीर हुई जो कने तिस राज्जा रे बारस बणो, तिसजो जे परमेशरे अपणयां भगतां जो देणे रा वायदा कित्तीरा?

1 पतरस 3:11

तिस्सो बुराईया रा साथ छड्डिने भलाई करनी चाहिन्दी; तिस्सो दुज्जेयां सौगी मेल-मलापा ने रैहणे खातर कोशिश करनी चाहिन्दा।

1 यूहन्ना 3:17

पर जिस किसी ले संसारिक धन-दौलत हो कने सै अपणे साथी विश्वासिये जो जरूरत मन्द देखीने तिस पर तरस नीं खाओ, तां तिसच परमेशरा रा प्यार कियां बणीने रैई सक्कां?

3 यूहन्ना 1:11

प्यारे मित्र, सै जे बुरा तिसरी नीं, पर सै जे भला तू तिसरी नकल कर, काँह्भई सै जे भलाई कराँ सै परमेशरा रा, पर सै जे बुराई कराँ तिने परमेशरा जो नीं देखीरा।