1 थिस्सलुनीकियां 5:14 - बिलासपुरी नौआं नियम

¹⁴ साथी विश्वासियो, अहें तुहांजो विनती कराँ ये भई सै जे विश्वासी आलसी ये तिन्हाजो सावधान करा, कायराँ जो हौंसला देआ, सै जे कमजोर ये तिन्हांरी मदद करा, कने सारयां खा सहनशीलता दस्सा।

1 थिस्सलुनीकियां 5:14 ပူးပေါင်းရင်းမြစ်များ

मत्ती 12:20

जिस किसी जो बी कोई समस्या इ सै इक बुझदे हुए दिऊए साई आ प्रभुये तिसरा नुक्शान नीं होणे देणा, पर आखिर च तिस न्याय करवाएगा।

लूका 22:32

पर शमौन, प्राथना च मैं तेरे खातर बिनती किति भई तेरा विश्वास टुटी नीं जाओ, इस खातर ताहली जे तू अपणे पापां ते मन फिराई ने मेरले वापस आई जाओ, ताहली अपणे भाईयां जो बी विश्वासा च मजबूत करयां।”

प्रेरितां 20:27

काँह्भई हऊँ परमेशरा रियां सारियां गल्लां जो तुहां पूरिया रितिया ते दसणे जो कदीं मनी झिझक्या।

प्रेरितां 20:31

“इस खातर जागदे रौआ, कने याद करा भई मैं तिन्नां साल्लां तका रात-दिन रोई-रोई ने हर इक्की जो चेतावनी देणा नीं छडया।

प्रेरितां 20:35

मैं तुहांजो सब किछ करीने दस्या भई इयां-इयां मेहणत करीने कमजोराँ जो संभाल़णा कने प्रभु यीशुये रे वचन याद रखणे जरूरी ये, सै जे तिने अप्पूँ इ बोलीरा : ‘परमेशर अहांजो बौहत आशीष देआं ताहली जे अहें अपणे खातर लेणे रे बजाय दुज्जेयां जो दें।’ ”

रोमियो 12:1

इस खातर मेरे साथी विश्वासियो, परमेशरा री महान दया रिया वजह ने हऊँ तुहांजो विनती कराँ, भई अप्पूँजो पवित्र, इक जिऊंदा बलिदान्ना रे रुपा च परमेशरा जो खुश करदे हुये अर्पण करा। परमेशरा री अराधना करने रा येई सही तरीका।

रोमियो 14:1

तिसरा विश्वास जे कमजोर आ, तिसरा बी स्वागत करा, पर तिस्सो क्या करना चाहिन्दा या क्या नीं करना चाहिन्दा इस बारे च बैहस नीं करा।

1 कुरिन्थियों 4:14

ये सारा किछ हऊँ तुहांजो शर्मिन्दा करने खातर नीं लिखिराँ, पर अपणे प्यारे बच्चे समझीने तुहांजो चेतावनी देआं।

1 कुरिन्थियों 8:7

पर सारे लोक ये नीं जाणदे। किछ लोक येढ़े सै जे हुण तक मूर्तियां ने जुड़ीरे कने सै ताहली जे येढ़ा खाणा खांये तां सै हुण बी ये समझां ये भई ये मूर्तियां रे सामणे बल़ि कित्तिरा खाणा, इस खातर सै ये समझां ये भई सै अशुद्ध हुईगरे, काँह्भई तिन्हांरी अन्तरात्मा कमजोर इ।

गलातियां 5:22

पर पवित्र आत्मा रा फल़ प्यार, खुशी, शान्ति, धीरज, दया, भलाई, विश्वास,

इफिसियां 4:2

हमेशा नम्रता कने कोमलता सौगी, धैर्यपूर्वक व्यवहार करा, इक्की दूये जो प्यारा ने सैहन्दे रौआ।

इफिसियां 4:32

अप्पूँ चियें इक्की दुज्जे रे प्रति दयालु कने करुणावान बणा कने अप्पूँ चियें इक्की दूये रे अपराधां जो तियां इ माफ करा तियां जे मसीह रे जरिये तुहांजो परमेशरे बी माफ कित्या।

कुलुस्सियां 1:28

तिसरा प्रचार करीने अहें हर इक माहणुये जो मसीह जो ग्रहण करने रे बारे सावधान कराँ ये कने सारे ज्ञाना ते हरेक माहणुये जो सखां ये, भई अहें हरेक माहणुये जो मसीह च सिद्ध करीने परमेशरा रे सामणे हाजर करिये।

2 थिस्सलुनीकियां 3:15

तां बी तुहें तिस्सो दुश्मण नीं समझा, पर विश्वासी जाणीने खबरदार करा।

1 तिमुथियुस 3:3

सै पियक्कड़ कने मार-पीट करने औल़ा नीं हो पर दयालु हो, कने नां झगड़ने औल़ा, कने नां पैसे रा लालची हो।

1 तिमुथियुस 6:11

पर अरे परमेशरा रे माहणु तिमुथियुस, तू इन्हां गल्लां ते दूर हुई जा, कने सै जे सही आ तिसजो करने री हरेक कोशिश कर, कने परमेशर तेढ़ा जे चांह तू तियां बर्ताव कर, मसीह पर विश्वास कर, दुज्यां लोकां ने प्यार कर, मुशीवतां जो सैई लै कने लोकां सौगी गुस्सा नीं कर।

2 तिमुथियुस 4:2

भई तू परमेशरा रे वचना रा प्रचार कर हालात चाये ठीक हो या नीं हो वचन प्रचार करने खातर त्यार रै। तिज्जो लोकां जो ये दसणा जरूरी आ भई तिन्हें क्या गल़ती कित्तिरी कने तू तिन्हांरे पापां रे खातर तिन्हौं डान्ट। पर तिज्जो लोकां जो हौंसला बी देणा चाहिन्दा तियां जे तू धीरजा ने तिन्हांजो शिक्षा देआं।

तीतुस 1:10

हऊँ इस खातर ये बोलां काँह्भई बौहत सारे लोक तिस समूहा चते सै जे ये दवाव पांये भई सारे मसीह लोकां रा खतना हूणा जरूरी आ, ये लोक अधिकारियां रा आदर नीं करदे, कने अपणी बकवास गल्लां ते दुज्यां लोकां जो धोखा देआंये।

तीतुस 1:6

इक अगवा निर्दोष कने इक्की पत्निया रा पति हूणा चाहिन्दा, तिन्हांरे बच्चे जे विश्वासी हुणे चाहिन्दे, कने तिन्हांजो अच्छा बर्ताव करना चाहिन्दा ताकि कोई तिन्हां पर इल्जाम नीं लाई सक्को भई सै बेकाबू कने हुक्म नीं मनणे औल़ा।

इब्रानियों 12:12

इस खातर अपणे थक्कीरे हत्थां जो ऊपर चक्का कने अपणे कम्बदे हुये गोडयां जो मजबूत करा।

इब्रानियों 13:3

कैदियां रे प्रति तुहांरा व्यवहार येढ़ा ओ भई मन्नो तुहें खुद तिन्हां साई जेल्ला च ओ, कने तिन्हांने जे बुरा बर्ताव हुया राँ तिन्हांजो ये मन्नीने याद करा भई तुहां सौगी ये बुरा बर्ताव हुया राँ।