1 थिस्सलुनीकियां 4:16 - बिलासपुरी नौआं नियम

¹⁶ काँह्भई प्रभु यीशुये अप्पूँ इ स्वर्गा ते उतरना; तिस बगत ललकार, कने प्रधान दूतां री अवाज़ सुणाई देणी, कने परमेशरा रिया तुरहियां बजणियां; कने सै जे मसीह च मरीरे, तिन्हां पैहले जिऊंदेयां हूणा।

1 थिस्सलुनीकियां 4:16 ပူးပေါင်းရင်းမြစ်များ

मत्ती 16:27

माहणुये रा पुत्र स्वर्गदूतां सौगी अपणे पिता रिया महिमा च औणे औल़ा, तिसजे हर किसी जो तिसरे कर्मां रे मुतावक ईनाम देणा।

मत्ती 16:28

हऊँ तुहांजो बोलां भई येत्थी किछ येढ़े तिन्हां तदुआं तक नीं मरना, तदुआं तक जे माहणुये रे पुत्रा जो तिसरे राज्जा च औन्दे हुये नीं देक्खी लो।”

मत्ती 25:31

“ताहली जे माहणुये रे पुत्रा यनि मांह वापस अपणिया महिमा च औणा कने सारे स्वर्गदूत मेरे सौगी औणे, तां मांह सब्बी लोकां पर राज करने खातर अपणे राजकीय संघासणा पर बैठणा।

मत्ती 26:64

यीशुये जबाब दित्या, “तैं अप्पूँ इ बोल्या; पर हऊँ तुहांजो बोलां भई तुहां माहणुये रा पुत्र सर्वशक्तिमान परमेशरा रे सज्जे पासे बैठिरा कने अम्बरा रे बद्दल़ां पर बड़े छोड़ औन्दे देखणा।”

प्रेरितां 1:11

कने तिन्हांजो गलाया, “गलील प्रदेशा रे लोको, तुहें काँह हल्तियें तक खड़ीने स्वर्गा खौ देख्या रायें? सैई यीशु, तिस्सो जे परमेशर तुहां लाते स्वर्गा जो चक्कीने लेई गरा, जिस तरिके ने तुहें तिस्सो स्वर्गा जो जान्दे देख्या तियां इ तिस फेरी वापस औणा।”

1 कुरिन्थियों 15:18

फेरी सै विश्वासी जे मसीह च मरी चुक्कीरे, सै बी नाश हुये।

1 कुरिन्थियों 15:20

पर हकीकत च मसीह मूईरयां चते जिऊंदा हुईरा, कने सै जे मरी चुक्कीरे, तिन्हां च जिऊंदा हुणे औल़ा सै पैहला हुया।

1 कुरिन्थियों 15:23

पर हरेक अपणिया-अपणिया बारिया ते: जिऊंदा हुणे औल़यां च पैहले मसीह; फेरी तिसरे औणे पर तिसरे लोक।

1 थिस्सलुनीकियां 1:10

कने स्वर्गा ते तिसरे पुत्रा रे औणे रा इन्तजार करने रे खातर तिसजो जे परमेशरे मूईरयां चते जिऊंदा कित्या था, यनि यीशु सै जे अहांजो औणे औल़े कोपा ते बचां।

1 थिस्सलुनीकियां 3:11

हुण परमेशर अहांरा पिता कने अहांरे प्रभु यीशु मसीह ने प्राथना कराँ ये भई सै तुहांले औणे जो अहांरे खातर रस्ता त्यार करो;

2 थिस्सलुनीकियां 1:7

कने तुहें सै जे पीड़ा सैयां राँये कने अहांजो बी तिस चैन देणा। ये तिस वगत हूणा ताहली जे प्रभु यीशुये अपणे सामर्थी दूतां सौगी, भड़की रिया अग्गी च स्वर्गा ते प्रगट हूणा,

2 थिस्सलुनीकियां 2:1

अरे साथी विश्वासियो, हुण अहें अपणे प्रभु यीशु मसीह रे दुज्जी बार औणे, कने तिस सौगी अहांरे कट्ठे हुणे रे बारे च तुहांजो विनती कराँ ये।

2 पतरस 3:10

पर प्रभुये रा दिन चोरा साई औणा, तिस दिन इक खतरनाक गर्जना सौगी अकाश खत्म हुई जाणा कने अम्बरा रा सारा किछ फुक्खीने नाश हुई जाणा कने तिस दिन धरती कने तिस पर कित्तिरे सारे काम्म प्रगट हुई जाणे।

यहूदा 1:9

पर प्रधान स्वर्गदूत मीकाईल, ताहली जे शैतान्ना ने मूसा रिया लाशा रे बारे च बैहस करया राँ था, तां बी तिसरे खिलाफ तिने बेईज्जत करने औल़यां शब्दां ने तिसरी निंध्या करने री हिम्मत नीं कित्ती, पर तिने बोल्या, “प्रभु तिज्जो डान्टो।”

प्रकाशितवाक्य 1:10

हफ्ते रे पैहले दिन मिन्जो परमेशरा रे आत्मे अपणे वशा च करील्या; कने अपणे पिछे ते तुरहिया साई ऊच्चिया अवाज़ा च ये बोलदे हुये सुणया,

प्रकाशितवाक्य 1:7

देक्खा, मसीह बद्दल़ां सौगी आया रां, कने सारयां तिस्सो देखणा, येत्थी तक भई सै लोक बी तिन्हेंजे तिस्सो भाले ने बिन्हया था; तिन्हां बी तिसखा देखणा, कने संसारा रे सारयां लोकां तिसरिया वजह ते बिलकी-बिलकी ने रोणा। हाँ, ये हूणा। आमीन।

प्रकाशितवाक्य 14:13

फेरी मैं स्वर्गा ते ये अवाज़ सुणी, “लिख: सै मृतक जे प्रभुये च मराँ ये, सै हुण आशीषित ये।” पवित्र आत्मा बोलां, “हाँ, काँह्भई तिन्हां अपणिया मेहणता ते आराम पाणा, कने तिन्हांरे भले काम्म तिन्हां सौगी ये।”

प्रकाशितवाक्य 8:13

ताहली जे मैं फेरी देख्या, तां अम्बरा रे बिच इक्की ऊकाबा जो उड़दे कने ऊच्चिया अवाज़ा च येढ़ा बोलदे सुणया, “इन्हां तिन्नां स्वर्गदूतां री तुरहिया री अवाज़ा रिया वजह ते, तिन्हांरा बजणा जे अजें बाकी आ, धरतिया पर रैहणे औल़यां पर हाय, हाय, हाय!”

प्रकाशितवाक्य 8:2

फेरी मैं तिन्हां सत्तां स्वर्गदूतां जो देख्या सै जे परमेशरा रे सामणे खड़े रैं, कने तिन्हांजो सात्त तुरहियां दित्तियां गईयां।