1 यूहन्ना 4:6 - बिलासपुरी नौआं नियम

⁶ अहें परमेशरा रे लोक ये, इस खातर सै जे परमेशरा जो जाणाँ, सै अहांरी सुणां; कने सै जे परमेशरा जो नीं जाणदा सै अहांरी नीं सुणदा; इयां अहें सच्चे आत्मे च, कने भटकाणे औल़े आत्मे च फर्क देखीने पछयाणी लैं।

1 यूहन्ना 4:6 ပူးပေါင်းရင်းမြစ်များ

लूका 10:22

फेरी यीशुये अपणे चेलयां ने गलाया, “मेरे पिता सारा अधिकार मिन्जो देई दित्तिरा; कने कोई नीं जाणदा भई पुत्र कुण आ, सिर्फ पिता जाणां भई पिता कुण आ ये बी कोई नीं जाणदा; सिर्फ पुत्र जाणा भई पिता कुण आ, कने माहणु पिता परमेशरा जो तांई जाणी सक्कां ये ताहली जे पुत्र तिन्हां पर पिता जो परगट करना चाये।”

यूहन्ना 10:16

मेरियां होर बी भेड्डां इयां, सै जे इसा भेडशाला री नीं। मिन्जो सै बी लौणे जरूरी आ। सै मेरी अवाज़ पैहचाण गियां, फेरी सब्बीं रा इक इ झुण्ड कने इक इ गवाल़ा हूणा।

यूहन्ना 10:27

मेरी भेड्डां मेरी अवाज़ ध्याना ने सुणां इयां; हऊँ तिन्हौं जाणाँ, सै मेरे पिच्छे-पिच्छे चलां इयां;

यूहन्ना 10:3

द्वारपाल तिसरे खातर दरवाजा खोल्ली देआं, कने भेड्डां तिसरी अवाज़ पछयाणां इयां, कने सै अपणियां भेड्डां जो नौं लेईने सद्दां कने बाहरौ लेईजां।

यूहन्ना 13:20

हऊँ तुहांजो सच बोलां, भई सै जे मेरे भेज्जीरे जो ग्रहण कराँ, सै मिन्जो ग्रहण कराँ, कने सै जे मिन्जो ग्रहण कराँ, सै मेरे भेजणे औल़े जो ग्रहण कराँ।

यूहन्ना 14:17

यनिके पवित्र आत्मा तिसजो जे संसारा रे लोक ग्रहण नीं करी सकदे, काँह्भई सै नांत इस्सो जाणाँ ये कने नांई देखी सक्कां ये; पर तुहां तिसरा पता, काँह्भई तिस सदा तुहांजो रैहणा कने तुहां च वास करना।

यूहन्ना 15:26

पर तिस बगत जे सहायक औणा, ये सै पवित्र आत्मा सै जे पिता परमेशरा रिया तरफा ते औआं कने सै जे सच्च आ तिस्सो प्रगट करां। ताहली जे तिस औणा, तां तिस तुहांजो मेरे बारे च दसणा।

यूहन्ना 16:13

पर ताहली जे सच्चाईया रा आत्मा औआं, तिस परमेशरा री हरेक सच्चाईया च तुहांरी अगुवाई करनी तिसरी जे तुहांजो जाणने री जरूरत इ, काँह्भई तिस अपणिया तरफा ते किछ नीं बोलणा, पर जो गल्लां सै परमेशरा ते सुणां तिस तुहांजो दसणियां, इस खातर तिस तुहांजो हुणे औल़ियां गल्लां हुणे ते पैहले दसणियां।

यूहन्ना 18:37

पिलातुसे तिस्सो गलाया, तां क्या तू राजा? यीशुये जबाब दित्या, “तू बोलां भई हऊँ राजा। हऊँ इस खातर पैदा हुईने संसारा च आया भई सच्चाईया रे बारे च सखाई सक्कूँ। सै माहणु जे सच्चाईया ने प्यार रक्खां ये सै मेरा बचन सुणां ये।”

यूहन्ना 20:21

यीशुये तिन्हांजो फेरी भीं गलाया तुहांजो शान्ति मिलो, तियां जे पिता परमेशरे मिन्जो संसारा च भेज्या तियां इ हऊँ बी तुहांजो संसारा च भेज्या रां।

यूहन्ना 8:19

इस पर लोकें तिसजो गलाया, “तेरा पिता किति आ?” यीशुये जबाब दित्या, “न तुहें मिन्जो जाणदे, न त मेरे पिता जो, जे तुहें मिन्जो जाणदे हुन्दे, तां मेरे पिता जो बी जाणी लेन्दे।”

यूहन्ना 8:23

तिने तिन्हाने गलाया, “तुहें थल्ले रे कने हऊँ स्वर्गा रा; तुहें इस संसारा रे, हऊँ इस संसारा निआं।

रोमियो 1:1

हऊँ पौलुस यीशु मसीह रा दास आ कने प्रेरित होणे रे खातर परमेशरा रे जरिये चुणया गया, कने परमेशरा रिया खुशखबरिया रा प्रचार करने खातर लग कित्या गया।

रोमियो 11:8

तियां जे पवित्रशास्त्रा च लिखिरा, “परमेशरे तिन्हांरे मन कने दिलां जो सुस्त कित्या, तिन्हौं येढ़ियां आक्खीं दित्तियां ताकि सै देक्खी नीं सक्को कने येढ़े कान्न दित्ते सै जे सुणी नीं सकदे थे, कने ठीक येई दशा आज्ज तक बणीरी।”

1 कुरिन्थियों 14:37

जे कोई माहणु अप्पूँजो भविष्यवक्ता या आत्मिक माहणु समझो, तां ये जाणी लो भई सै जे गल्लां हऊँ तुहांजो लिखां, सै प्रभुये रा हुक्म आ।

2 कुरिन्थियों 10:7

तुहें सिर्फ सै जे सामणे आ तिसरे इ बाहरले रुपा जो देखां ये। जे किसी रा अपणे बारे च ये भरोसा भई सै मसीह रा, तां सै ये बी जाणी लो, भई तियां जे सै मसीह रा तियां इ अहें बी मसीह रे।

2 थिस्सलुनीकियां 1:8

कने सै जे परमेशरा जो नीं पछयाणदे कने अहांरे प्रभु यीशुये रे खुशखबरिया जो ग्रहण नीं करदे तिन्हाजो तिस सजा देणी।

1 तिमुथियुस 4:1

पवित्र आत्मा साफ-साफ बोलां भई आखिरी दिनां च किछ लोकां मसीह रिया शिक्षा पर विश्वास करना छड्डिने दुष्टात्मां री शिक्षा पर विश्वास करना, तिन्हां भटकाणे औलियां बुरीआत्मां जो अपनाणा।

2 पतरस 3:2

हऊँ चांह भई तुहें तिन्हां गल्लां जो याद करा तिन्हांजो जे पवित्र भविष्यवक्तयां बौहत पैहले बोल्या था, कने अहांरे प्रभु कने छुटकारा करने औल़े रे तिन्हां हुक्मां जो बी याद करा सै जे तुहांरे प्रेरितां यनि अहांरे जरिये दित्तिरे थे।

1 यूहन्ना 4:1

मेरे प्यारे मित्रो, हर किसी आत्मा रा विश्वास मता करदे, पर हमेशा तिन्हारी परख करीने देक्खा भई क्या सै परमेशरा रिया तरफा ते आ कि नीं? ये हऊँ तुहांजो इस खातर गलाईराँ काँह्भई मते सारे झूट्ठे भविष्यवक्ता इस संसारा च फैलीरे।

1 यूहन्ना 4:4

मेरे प्यारे बच्चो, तुहें परमेशरा रे लोक ये, कने तुहें झूट्ठे भविष्यवक्तयां पर जीत पाईरी; काँह्भई सै पवित्र आत्मा जे तुहां चा, सै संसारा च रैहणे औल़े शैतान्ना ते महान आ।

1 यूहन्ना 4:8

सै जे दुज्यां ने प्यार नीं रखदा, सै परमेशरा जो नीं जाणदा, काँह्भई परमेशर प्यार आ।

1 यूहन्ना 5:19

अहें जाणाँ ये भई अहें परमेशरा रे बच्चे, कने सारा संसार तिस शैतान्ना रे बशा चा।

यहूदा 1:17

पर प्यारे मित्रो, तुहें तिन्हां गल्लां जो जरूर याद रखा तिन्हौं जे अहांरे प्रभु यीशु मसीह रे प्रेरित पैहले तेई बोल्ली चुक्कीरे।