1 कुरिन्थियों 14:3 - बिलासपुरी नौआं नियम

³ पर सै जे भविष्यवाणी कराँ, सै माहणुआं जो तिन्हारी तरक्की, प्रोत्साहन, कने तसल्लिया रे खातर बोलां।

1 कुरिन्थियों 14:3 ပူးပေါင်းရင်းမြစ်များ

लूका 3:18

यूहन्ना इस तरिके ने लोकां जो कई गल्लां ते चत्तन्न करदा रैया, कने मसीह रे औणे री खुशखबरिया रा प्रचार करदा रैआं था।

प्रेरितां 13:15

मूसा री व्यवस्था कने भविष्यवक्तयां री कताब पढ़ने ते बाद यहूदी सभा घरा रे सरदारे तिन्हांजो गलाया, “हे भाईयो, जे तुहांरे मना च लोकां जो उपदेश देणे री कोई गल्ल इ तां बोल्ला।”

प्रेरितां 14:22

कने हरेक नगरा रे चेलयां रे मना जो मजबूत करदे रहे कने ये उपदेश देआं थे भई विश्वासा च बणीरे रौआ; कने ये बोलां थे, “अहांजो मते दुख सहीने परमेशरा रे राज्जा च जाणे मिलणा।”

प्रेरितां 15:32

यहूदा कने सीलासे सै जे अप्पूँ बी भविष्यवक्ता ये, बौहत गल्लां ते विश्वासियां जो उपदेश देईने मजबूत कित्या।

प्रेरितां 4:36

यूसुफ साइप्रस नौआं रे टापुये च रैहणे औल़ा इक लेवी था तिसरा नौं प्रेरितें बरनबास रखया था; तिसरा मतलब जे दुज्जेयां जो हिम्मत देणे औल़ा माहणु आ।

प्रेरितां 9:31

इयां सारे यहूदिया, गलील, कने सामरिया प्रदेशा री कलीसिया जो चैन मिलीग्या कने तिन्हांरी तरक्की हुईगी; कने सै प्रभु यीशुये रे डरा कने पवित्र आत्मा रे शान्तिया च चलदी कने बधदी गई।

रोमियो 12:8

जे तुहांरा बरदान हौंसला देणे औल़ा ओ, तां तिस्सो हौंसला देन्दे रैहणा चाहिन्दा; जे किसी जो दान देणे रा बरदान मिलीरा, तां तिस्सो खुले दिला ने दान देणा चाहिन्दा; जे किसी जो अगुवाई करने रा बरदान मिलां, तां सै जोशा ने अगुवाई करे; सै जे दया करो, सै खुशिया ने करो।

रोमियो 14:19

इस खातर अहें तिन्हां गल्लां जो करने री सदा कोशिश करदे रौ तिन्हांते जे लोक मिली जुली ने रई सक्को कने इक दुज्जे रे विश्वासा जो मजबूत करने च मदद करी सक्को।

रोमियो 15:2

अहां चते हर इक अपणे साथी विश्वासियां रे खातर सैई करना चाहिन्दा सै जे ठीक आ, सै जे तिस्सो खुश करगा कने तिसरे विश्वासा जो मजबूत करगा।

1 कुरिन्थियों 10:23

“मिन्जो सब किछ करने री अनुमति हाई,” पर सब किछ फायदे रा निआं; “मिन्जो सब किछ करने री अनुमति हाई,” पर सब किछ उपयोगी नींआ।

1 कुरिन्थियों 14:12

इस खातर तुहें बी ताहली जे आत्मिक वरदान्नां रिया धुन्ना च हो, तां येढ़ि कोशिश करा भई तुहांरे वरदान्नां रिया तरक्किया ते कलीसिया री तरक्की हो।

1 कुरिन्थियों 14:17

तू त अच्छे तरिके ने परमेशरा रा धन्यवाद करदा हूणा, पर दुज्जे री तरक्की नीं हुंदी।

1 कुरिन्थियों 14:26

अरे साथी विश्वासियो क्या करना चहिन्दा? ताहली जे तुहें कट्ठे हुआं ये, तां हरेक रे दिला च भजन, उपदेश, होरीं भाषां, प्रकाशन या होरीं भाषा रा मतलब दसणा रैया। सब किछ कलीसिया री आत्मिक तरक्किया खातर हूणा चहिन्दा।

1 कुरिन्थियों 14:31

काँह्भई तुहें सब इक-इक करीने भविष्यवाणी करी सक्कां ये, ताकि सब सिक्खी सक्को कने सब्बीं जो प्रोत्साहन मिली सक्को।

1 कुरिन्थियों 8:1

हुण हऊँ मूर्तियां रे सामणे बल़ि कित्तिरे माँसा रे बारे च दसणा चांह सै जे तुहें मेरते पुच्छया था : अहें जाणाँ ये भई अहां सब्बीं जो इसरा ज्ञान आ कने ज्ञान माहणुये जो घमण्डी बणां, पर प्यार अहांजो मजबूत कराँ।

2 कुरिन्थियों 1:4

कने सै जे अहांरी सारियां मुशीवतां च अहांजो तसल्ली देआं ताकि अहें बी मुशीवतां च पईरे लोकां जो तियां इ तसल्ली देई सक्को, तियां जे परमेशरे अहांजो दित्ति।

2 कुरिन्थियों 2:7

इस खातर इसते बधिया येआ भई तिसजो माफ करा कने हौंसला देआ ताकि येढ़ा माहणु निराश हुईने पूरी तरह विश्वासा जो छडी नीं देओ।

इफिसियां 4:29

तुहांरे मुँआं ते कोई बुरी गल्ल नीं निकल़णी चाहिन्दी, पर जरूरता रे मुतावक सैई निकल़ो सै जे दुज्यां रिया तरक्किया खातर मददगार हो, ताकि तिसते जे सुणने औल़े रा भला हो।

इफिसियां 6:22

इसी वजह ने मैं तिस्सो तुहांले भेज्या राँ, भई तुहें अहांरी हालत जाणो कने सै तुहांजो हौंसला देई सक्को।

कुलुस्सियां 4:8

हऊँ तिस्सो तुहांले इस खातर भेज्जी राँ, भई तुहांजो तिसते अहांरे सारे हालचाला रा पता चली जाओ, ताकि सै तुहांरे विश्वासा च तुहांजो मजबूत करी सक्को।

1 थिस्सलुनीकियां 2:11

तुहें जाणदे इ हाये भई तियां जे इक पिता अपणे बच्चयां ने बर्ताव कराँ, तियां इ अहें तुहां चते हर इक्की जो उपदेश करदे, शान्ति देन्दे, कने समझान्दे थे,

1 थिस्सलुनीकियां 2:3

काँह्भई तुहांजो अहांरी विनती कोई गल़ती या बुरे मकसदा पर अधारित नीं, कने नांई अहें किसी जो बी धोखा देणे री कोशिश कराँ ये।

1 थिस्सलुनीकियां 3:2

कने अहें तिमुथियुस जो, सै जे मसीह रिया खुशखबरिया च अहांरा भाई आ कने परमेशरा रा सेवक आ, इस खातर तिस्सो तुहांले भेज्या भई सै तुहांजो मजबूत करने कने विश्वासा रे बारे च समझाई सक्को।

1 थिस्सलुनीकियां 4:1

भाईयो, अहें तुहांते विनती कराँ ये कने तुहांजो प्रभु यीशुये च समझावांये भई तेढ़ा जे तुहें अहांते ठीक चाल चलना कने परमेशरा जो खुश करना सिखी रा, कने तेढ़े जे चलां बी ये, तेढ़े इ होर बी तरक्की करदे जाओ।

1 थिस्सलुनीकियां 4:18

इयां इ इन्हां गल्लां ते इक्की दूये जो हौंसला देआ करा।

2 थिस्सलुनीकियां 3:12

अहें येढ़यां लोकां जो प्रभु यीशु मसीह रे अधिकारा ने ये हुक्म देआंये कने तिन्हांते विनती कराँ ये भई शाँतिया ने काम्म करदे रौआ कने अपणी कमाईया री रोटी खाया करा।

1 तिमुथियुस 1:4

कने तिन्हांने बोल भई येढ़ि मन घड़न्त कहाणियां कने पूर्वजां रियां खत्म नीं हुणे औल़ियां कहाणियां पर मन नीं लगाओ, तिन्हांते जे सिर्फ विवाद इ पैदा हुआं ये। कने सै विवाद परमेशरा रिया योजना जो रोकां ये, सै जे तिन्हां लोकां रे जरिये इ हुई सक्कां सै जे परमेशरा पर विश्वास कराँ ये।

1 तिमुथियुस 4:13

तदुआं तका जे हऊँ नीं आऊं, तदुआं तका वचन पढ़ने कने उपदेश देणे कने सखाणे रा काम्म कर।

1 तिमुथियुस 6:2

कने तिन्हांरे मालक जे विश्वासी ये, तिन्हांजो सै विश्वासी हुणे रिया वजह ते नीच नीं जाणो, वल्कि सै तिन्हांरी होर बी अच्छे तरिके ने सेवा करो, काँह्भई इसते फायदा लेणे औल़े विश्वासी ये कने परमेशर तिन्हांने प्रेम कराँ। इन्हां गल्लां रा उपदेश करया कर कने पालन करने रे खातर लोकां जो हौंसला दे।

2 तिमुथियुस 4:2

भई तू परमेशरा रे वचना रा प्रचार कर हालात चाये ठीक हो या नीं हो वचन प्रचार करने खातर त्यार रै। तिज्जो लोकां जो ये दसणा जरूरी आ भई तिन्हें क्या गल़ती कित्तिरी कने तू तिन्हांरे पापां रे खातर तिन्हौं डान्ट। पर तिज्जो लोकां जो हौंसला बी देणा चाहिन्दा तियां जे तू धीरजा ने तिन्हांजो शिक्षा देआं।

तीतुस 1:9

कने तिसा सखाई रिया खुशखबरिया पर तिस्सो मजबूतिया ने विश्वास करना चाहिन्दा, सै सन्देश जे सच्चा कने कदीं बदलदा नींआ ताकि सै दुज्जे लोकां जो सही शिक्षा कने हौंसला देई सकगा कने बैहस करने औल़यां जो गल़त साबित करगा।

तीतुस 2:15

इस खातर तीतुस हऊँ चाँह भई तू क्रेते टापुए रे विश्वासियां जो ये गल्लां सखा सै जे मैं तिज्जो दस्सी रियां। अपणयां लोकां तिन्हांजो करने रे खातर प्रोत्साहन दे, तित्थी तक जे जरुरी हो, तित्थी तिन्हां च सुधार कर। तिज्जो येढ़ा करने रा पूरा अधिकार आ। ध्यान रख भई सै जे किछ तू सिखां, कोई बी तिज्जो अनदेखा नीं करो।

तीतुस 2:6

इस तरिके ने जवान मर्दां जो बी अपणा बर्ताव काबू करने खातर विनती कर।

तीतुस 2:9

विश्वासी सै जे दास ए, तिन्हांजो सखा भई सै अपणे-अपणे मालकां रे अधीन रौ। तिन्हांजो दस्स भई सै हर गल्ला च अपणे स्वामियां जो खुश करने री कोशिश करो कने तिन्हा ने झगड़ा नीं करो;

इब्रानियों 10:25

कने इक्की दूये सौगी कट्ठा हूणा नीं छड्डा, तियां जे किछ लोक कट्ठे नीं हुन्दे। पर इक्की दूये जो जादा ते जादा हिम्मत देन्दे रौआ; काँह्भई तुहें जाणाँ ये भई प्रभुये रे न्याय रा दिन जल़द औणे औल़ा।

इब्रानियों 13:22

मेरे साथी विश्वासियो, हऊँ तुहांजो विनती कराँ भई इस उपदेशा रियां गल्लां जो मैं तुहांजो हौंसला देणे रे खातर लिखिरा धैर्य ने सुणी लौआ, काँह्भई ये चिट्ठी सै जे मैं लिखिरी ये बौहत लम्बी नीं।

इब्रानियों 3:13

पर तदुआं तक जे सै दिन तिसजो जे आज्ज बोल्या जां, हर रोज इक्की दुज्जे जो हौंसला देन्दे रौआ, येढ़ा नीं हो भई तुहां चते कोई माहणु पापां रे धोखे च आईने परमेशरा रे हुक्मां जो मनणे ते इन्कार नीं करी दो।

1 पतरस 5:12

मैं तुहांजो ये छोट्टी जेई चिट्ठी सिलवानुस रिया मददा ने लिखिरा, तिस्सो जे हऊँ बफादार विश्वासी समझां। हऊँ तुहांजो हौंसला देणा चांह कने विश्वास दिलां भई परमेशरा रा सच्चा अनुग्रह येई हाया। इस अनुग्रह च बणीरे रौआ।

यहूदा 1:20

पर मेरे प्यारे मित्रो, तुहांजो पवित्र विश्वासा च बधणे खातर इक्की दूये री मदद करदे रैहणा चाहिन्दा कने पवित्र आत्मा रिया अगुवाईया रे जरिये तुहांजो प्राथना करनी चाहिन्दी।