रूमी 7:6 - Korwa Bible

⁶ मनदो ईसू मसी गोएगनेनते अबू एएचे पराःआ हना नियमराः बोझा अते भगवान अबूय सडावकेडबुःआ। हनाते अबूराः कसूर जीव टुटीगयना, जेमहा अबू ओजाःतो नियम इया कोवान, मनदो सुद बिरुवाराः ओंगोलते नँवा जीवते भगवानबू सेवा अवेय।

रूमी 7:6 ပူးပေါင်းရင်းမြစ်များ

रूमी 1:9

जमा बेला अपे उहियारकेडपेखनिंग अरजीगोड ञवनतना माःआन भनगवान हमा ईंगरीग हिदइतदार हवे। अरू हनाँयग भगवानरीग बेटात ईसू मसीराः नपाय सरवन परसार घड़ीन मिनी जीवतेयिंग सेवायतना।

रूमी 12:2

अपे चउंदीसरिकुःआ होड़कू इया अहापे सलाः। मनदो भगवान अपेराः ओंगोल नँवाकेडखन बदलाव ओवायपे, जेमहा अपे भगवान ननायगुःता अरू जमालेःआते सताय अरू ननपाय हवे, हाँयराः हनानाः हिछापे सुदी अवेय।

रूमी 6:11

हनालगा अपे अँननपे अपे ओंगोलबाःकान, अले एचे कसूरलेःआ हना जंगर नुँहू अले ओरो एचे कसूर अवेतेडलेःआ अरू ईसू मसी एमेकेरा हना जीवते अबू भगवान लगाबू जियाःतना।

रूमी 6:19

अपे ओहेनपे बुझाव अवेन लगा ईंग मीटोंग बड़रायिंग ककतातना। मड़ंगरे अपे अँननपेराः देह दगलीकून कसूर अरू बेनेलूर बुताकून एचेय लगापे जिमातेरा। दो नुँहू अपे हनन इया अपेराः देह दगलीकून, नपाय बुता एचेय लगा अरू अपेराः जीव सुद होयाः लगा, भगवान एचेरेपे जिमा एंडागोड।

रूमी 6:2

नाःआ इया कहियो ओरो होयानेना। अबू कसूर जीव जियाः लगाबू अड़ाः एंडागोतेडा दो, अरूबू कनासूरगोड ञवनता जा?

रूमी 6:22

मनदो अपेराः कसूर जीव टुटीगयना अरू भगवानरिकुःआ बेगारी होड़कूपे बड़ाँवयना। नुँहू अपे सुद होड़कू बड़ाँवकियानखन ओरो टुटीगनेना हना जीवपे पवाःता।

रूमी 6:4

अबू बतिसमाबू गोःतेड मेला हाँय सुदाबू गोएगनेना दो अबू हों हाँय सुदा तीलतो इया इदानबुःआ। अरू अपांग भगवान ईसू मसी गोएगतो होड़कू अते अनँयगराः अगामाः जंगरतेय जियाव रेमकिरिया, हनन इया अबू हों नँवा जीवबू जियाव अवेनता।

रूमी 7:1

दो ईंगरिकुःआ अजी बोपोहकूतिंग, अपे मोसेसराः नियमकूनपे सुसुदीतना। हनालगा अपे एचेरेयिंग कतायतना, तोनोंगीग होड़ जीयते दोहोन, हना वरी हाँय नियमकून इया सलाः पराःता।

रूमी 7:2

मीटोंग अउल-तउल कतायिंग कतायतना, तोनोंगीग बियाहतो अइमी अनँयग हेरेल जीयते दोहोन वरी, नियम इया हाँय सुदा जोड़ावतो इदानिया। मनदो हेरेलतो गोएग जुवाःतान दो हाँय एटाः होड़ सुदा सगइगुः लगा नियम अतेय उडुंग जुवाःता।

रूमी 7:4

ईंगरिकुःआ अजी बोपोहकूतिंग, हनन इया अबू ईसू मसी सुदाबू गोएगनेना। हनालगा नुँहू अपे भगवान ननायगे लगा मोसेस एमेकेरा हना मड़ंगाः नियमकूनराः बोझारे कोवापेःआ। ईसू गोएगतो होड़कू अते भगवान जियाव रेमकिरिया, जेमहा अबू हाँय लगा नपाय बुताबू बुता अवेय। अरू नुँहू अबू नाँयग ईसूरिकुःआ होड़कू हवे।

2 कुरिंती 3:6

अरू हनाँय अले नँवा कता-जमकावतोराः सेवकिया जुकूरे बड़ाँवगोतेडलेःआ। नाःआ नँवा कता-जमकावतो ओजाःतो नियामकूनते कोवानेःआ, मनदो सुद बिरुवाते इदा। ओजाःतो नियमकून मेरबू मनाःतान अते गुजुःराः डंडबू पवाःता, मनदो सुद बिरुवाते जीवबू पवाःता।

2 कुरिंती 5:17

तोनोंगीग मसी सुदाय मिनीयान दो हाँयराः जीव नँवायना। हाँयराः जुना जीव टुटीगयना अरू जमालेःआतेय नँवायना।

गलातिया 3:13

भगवानराः कागदरे ओजाःतो इदा, तोनोंगीग कठवारेकू ठोंकावगेयतान दो, हाँयग होड़ सती-सरापतोय दोहोनता। दो ईसू कुरूसरेकू ठोंकावतिरिग मेला, हाँय अबूराः कसूर बदलारे सती-सरापनेनखन नियमराः सती-सरापतेय सडावकेडबुःआ।

गलातिया 6:15

अपे खतनात होड़कू सहे बेगर खतनात होड़कू इदानपे हों अपे बदीरे भगवान एचेरे एटाः इयाःआ ओंगोल कोवानेःआ। मनदो मइद कता ननानाः हवे; ईसू मसीते भगवान अपेराः जीवे नँवागोतेडा।

इपीसी 4:24

अरू भगवान इया बेगर गारबार अरू सुद बड़ाँवकेडखन नँवा जीव सतायरेपे जियाः लगा इदा।

पिलिपी 3:3

मनदो अबू भगवानराः बिरुवाते हाँय जाग घड़ीन ईसू मसीबू मान मरजइतता। अरू होड़कूराः खतना इयाःआ रिती-बिधीरे मेरबू भरसाता। हनालगा सताय खतनात होड़कू अँननबू हवे।

कुलूसी 3:10

अपेराः लूर-नेवन नँवायना। अरू अपेरीग तुलादार भगवान आँयगराः लूर इया अपेराः लूर-नेवने नँवागोड ञवनता, जेमहा अपे हाँय, अनउर नाय नपायतेपे सुदी अवेय।