रूमी 7:4 - Korwa Bible

⁴ ईंगरिकुःआ अजी बोपोहकूतिंग, हनन इया अबू ईसू मसी सुदाबू गोएगनेना। हनालगा नुँहू अपे भगवान ननायगे लगा मोसेस एमेकेरा हना मड़ंगाः नियमकूनराः बोझारे कोवापेःआ। ईसू गोएगतो होड़कू अते भगवान जियाव रेमकिरिया, जेमहा अबू हाँय लगा नपाय बुताबू बुता अवेय। अरू नुँहू अबू नाँयग ईसूरिकुःआ होड़कू हवे।

रूमी 7:4 ပူးပေါင်းရင်းမြစ်များ

मती ओजाःतेरा भगवानराः नपाय सरवन 26:26

हँकू जोजोमा हननमेला ईसू रुटीय साबतेड अरू भगवान धनियाबादतेडखन हना रुटीय डुंडीगतेरा। हँकू ओवातेडकूखने कतातेरा, “ना अरूपे जोम। नाःआ ईंगराः देह हवे।”

मरकूस 4:20

नपाय ओतरे लोजोरनेना हना बिहान नाःआ इया होड़कू हवे। हँकू सरवन अयूमकेडखन मुरुक नपायते अँनकूराः जीवरेकू दोहोगोडता अरू सहाव घड़ीन नपायते तीस, साठ अरू मी सव तुरहा जोःओ जोःता।”

एहुना 15:8

अपे नपाय बुताकेडखन मुरुक जोःओपे अदेरगोड दो अपे ईंगरिकुःआ चेलाकूपे बड़ाँःता। भगवानराः मान मरजइत नानाः अते होयाःता।

एहुना 3:29

कनियानुनी बरवारीग हवे मनदो बरवारीग सउंगता सपड़ावकेडखन बरवाय तंगीता अरू हाँय बरवाराः अरो अयूमकेडखने बहाल जुवाःता। हनन इया नुँहू ईंग हों मुरुकिंग बहालयना।

एहुना 6:51

सेरमो देस अते उतरावकिया, हना जीवराः रुटी इनिंग हवे। तोनोंगीग नाःआ रुटीय जोम दो, हाँय कहियो ओरोय गोएगनेना। अरू चउंदीसरिकुःआ होड़कू जियाः लगायिंग एमेयता, हना रुटी ईंगराः मास हवे।”

रूमी 6:11

हनालगा अपे अँननपे अपे ओंगोलबाःकान, अले एचे कसूरलेःआ हना जंगर नुँहू अले ओरो एचे कसूर अवेतेडलेःआ अरू ईसू मसी एमेकेरा हना जीवते अबू भगवान लगाबू जियाःतना।

रूमी 6:14

अपे नियम इयापे सलाःआ हना अते भगवान अपे मेरेय सडावगाडपेःआ, मनदो हाँय अपेय मयावाडपेखने सडावकेडपेःआ। हनालगा अपे अँननपेराः जीव, बेलूराः कसूर ओंगोल इया अलोपे सलाव ओवा।

रूमी 6:2

नाःआ इया कहियो ओरो होयानेना। अबू कसूर जीव जियाः लगाबू अड़ाः एंडागोतेडा दो, अरूबू कनासूरगोड ञवनता जा?

रूमी 6:22

मनदो अपेराः कसूर जीव टुटीगयना अरू भगवानरिकुःआ बेगारी होड़कूपे बड़ाँवयना। नुँहू अपे सुद होड़कू बड़ाँवकियानखन ओरो टुटीगनेना हना जीवपे पवाःता।

रूमी 7:3

हेरेलतो जीयते दोहोन मेला हाँय एटाः होड़ सुदाय सगइगुःतान दो हाँय सनहीता। मनदो हेरेलतो गोएग जुवाःतान दो हाँय एटाः होड़ सुदा सगइगुः अते मेरेय सनहीता।

रूमी 7:6

मनदो ईसू मसी गोएगनेनते अबू एएचे पराःआ हना नियमराः बोझा अते भगवान अबूय सडावकेडबुःआ। हनाते अबूराः कसूर जीव टुटीगयना, जेमहा अबू ओजाःतो नियम इया कोवान, मनदो सुद बिरुवाराः ओंगोलते नँवा जीवते भगवानबू सेवा अवेय।

रूमी 8:2

अबू ईसू मसीरिकुःआ होड़कू हवे। हनालगा भगवानराः बिरुवा नँवा जीवे एमेकेरा अरू हाँय अबू कनासूर जीवते एचे अड़ाःकेडबूखन गुनुजुःतेय सडावकेडबुःआ।

1 कुरिंती 10:16

अबू परबू भोज धनियाबाद घड़ीनबू जोम-ञूयता। अबू हना अंगूर रसबू ञूयतान दो ईसू अनँयगराः बलंगीय तूतेरा अते नफाबू पवावकिया अरू हना नफाराः इताडदारबू बड़ाँःता। अरू अबू हना रुटी डुंडीग घड़ीनबू जोमतान दो ईसू अनँयग देहरे कटसियाय सहावतेरा अते नफाबू पवावकिया अरू हना नफाराः इताडदारबू बड़ाँःता।

2 कुरिंती 11:2

भगवान अपे बदीरेय ओंगलेता हनन इया ईंग अपे बदीरेयिंग ओंगलेतना। ईंग अपे मिनीटोंग मरद, मसी सुदायिंग मंगा-बरागोतेडपेःआ, जेमहा अपे सुद डिंडा धंगड़ी इया मसी एचेरेयिंग जिमा अवेपे।

गलातिया 3:13

भगवानराः कागदरे ओजाःतो इदा, तोनोंगीग कठवारेकू ठोंकावगेयतान दो, हाँयग होड़ सती-सरापतोय दोहोनता। दो ईसू कुरूसरेकू ठोंकावतिरिग मेला, हाँय अबूराः कसूर बदलारे सती-सरापनेनखन नियमराः सती-सरापतेय सडावकेडबुःआ।

गलातिया 5:18

सुद बिरुवा अपे अगुवाइवापेता, दो अपे मोसेसराः नियमराः आड़रे कोवापेःआ।

इपीसी 2:15

ईसू अनँयग गुजुःते एहूदाकूराः नियमकून, रिती-बिधी अरू हुकुमकून सुदाय चलाः एंडागोतेडा, जेमहा हाँय बनर गतररिकुःआ होड़कूय एचे राजू नमागोडकू अरू मिनी देह इया सलसतरेय एचे जुमावगोडकू।

पिलिपी 1:11

नाःआ इयाःआ नपाय लूर-नेवन ईसू मसीते अपेराः जीवरे होयाःता, अरू हनाते होड़कू भगवानकू जाग अरूकू मान मरजइतगेय।

पिलिपी 4:17

ईंग बदीरे अपे अहापे ओंगोलगे, नाँय तोनोंगाः संघरा पवाः लगाय चहाःतना, माःआन। मनदो ईंग चहाःतना, अपे ईंगपे संघरावातेरा, हनाते भगवान अपे इमाने एमेवापे।

कुलूसी 1:10

जेमहा अपे परबूराः हिछा इया जियाः घड़ीनपे ननायगोडेय, जमालेःआ नपाय बुतापे एचे अवेय, अरू भगवान अनउर नपायतेपे सुदीगोड ञवन।

कुलूसी 1:22

मनदो मसी मनुवा इयाय गोएगनेनते, भगवान अनँयग सुदा अपेय राजू नमागोतेडपेःआ, जेमहा हाँय अपे सुद अरू बेगर गारबारते अरू बेगर बदीते अनँयग मड़ंगरेय चड़ाँपे।

कुलूसी 1:6

अपे भगवानराः सरवनपे अयूमकेरा, अरू जमालेःआ सतायते हाँयराः मयापे बुझावकिया, अरू हना वरीते अपेराः जीवरे नफा होयाकिया। ननन इया नाःआ नपाय सरवन, चउंदीसरिकुःआ जमा होड़कू एचेरे सेड़यावयना, अरू हँकू लगा हों नफा होया ञवनतना।

कुलूसी 2:14

अबू नियमबू टड़ावतेरा, हना कसूर कराजराः नुटिस अबू बदीरे दोहोना, हना भगवान चलाः एंडागोतेडा, अरू कुरूसरेय ठोंकाव एंडागोतेडा।

कुलूसी 2:20

अपे राइजबड़ी बदीरे मड़ंग जूगरिकुःआ होड़कूराः चेडतो लगा ईसू मसी सुदा गोएगतो इया इदानपेःआ। दो अपे चिला लगा नँकुःआ होड़कूराः नियमकून इयापे सलाःतना?

इबरानी 10:10

भगवानराः हिछा इया ईसू मसीराः देह सगर सइट लगा मिनी तुरहाय बलिदानयान। हनाते अबू सुदे बड़ाँवकेडबुःआ।

1 पतरस 2:24

हाँय अनँयग देहरे अबूराः कसूरे लदाव गोःतेडखन कुरूसरेय गोएगनेना, जेमहा कसूर बदीरे गोएगतोबू दोहोन, अरू भगवानराः ओंगोल इया नपाय जीवबू जियाव अवेन। हाँयराः घाँवकूनते अबूराः जमा बरानाः बेमरियाकून नपाययना।

उदुःतो कताकून 19:7

दोबू अबू बहालते, भबराः घड़ीन हाँयबू जाग। भेड़ा होनराः बियाह निचकाःतना। अरू हाँयरीग कनिया सपड़ावतो इदानिया। हनालगा हाँयबू जागता।

उदुःतो कताकून 21:9

हनते सातगोटोंग हइजा पेरेगतो सातगोटोंग डुबहाकून साबतो सेरमो देसरिकुःआ बराहीलकू अते मीटोंग बराहीलिंग ञेलतेरा। हाँय ईंग एचेरे वेजेडखने कतातेरा, “दोमे, ईंग भेड़ा होनरीग कनियायिंग उदुःवामता। हाँय हनाँयगरीग एराते होयाःता।”