मती ओजाःतेरा भगवानराः नपाय सरवन 4:24 - Korwa Bible

²⁴ हाँयराः ञाव जमा सिरिया राइजरे जगावयान, अरू हाँय बदीरेकू अयूमतेरा, हँकुःआ होड़कू अँकूरिकुःआ हसूत होड़कू, अरू भूतकू समसावनेना हँकुःआ होड़कू, भपरी होड़कू अरू लकवा ञेडतेडकुःआ हँकुःआ होड़कू, हँकू जमाकू हाँय एचेरेकू अगूतेडकुःआ। अरू हाँय हँकुःआ जमा होड़कूय नपायतेरा।

मती ओजाःतेरा भगवानराः नपाय सरवन 4:24 ပူးပေါင်းရင်းမြစ်များ

मती ओजाःतेरा भगवानराः नपाय सरवन 12:22

हनते तोनोंग तोनोंग होड़कू मी होड़ होड़ ईसू एचेरेकू अगूतिरिया। हाँयग होड़ कोंदा अरू अंधाय दोहोना। ईसू हाँये नपायतेरा अरू हाँय जमाकूने ञेला अरूय अयुमेःआ।

मती ओजाःतेरा भगवानराः नपाय सरवन 14:1

हनमेला गलील छतररीग हातपात होड़ हरदोस ईसू बदीरेय अयूमतेरा,

मती ओजाःतेरा भगवानराः नपाय सरवन 15:22

दो हना छतररीग मी होड़ कनानी जइत अइमी, ईसू एचेरेय वेजेडा अरू मुरुक सटीते खिररी घड़ीने कताया, “ने परबू, दाऊद राजारीग नइड़-बाँस होड़, ईंगमे मयावा। भूत ईंग बिटी मुरुके संतावगेयतना।”

मती ओजाःतेरा भगवानराः नपाय सरवन 17:15

“ने परबू, ईंग बेटाम मयावा। हाँय भपरी ञेडेयता अरू मुरुक ससताय दोहोनता अरू घड़ी घड़ी सेंगेलरे अरू दाःरेय लेबदा जुवाःता।

मती ओजाःतेरा भगवानराः नपाय सरवन 17:18

हनते ईसू हाँयग भूते डंटावतेरा अरू भूत डिंघा अतेय उडुंगयान अरू हनन मेला हाँयग डिंघा नपायबाःयान।

मती ओजाःतेरा भगवानराः नपाय सरवन 4:23

हनते ईसू जमा गलील छतररे सेनेडखन हँकूराः अरजी ओड़ाःकूनरेय चेडतेडकुःआ। हाँय होड़कू एचेरे भगवानराः राइजराः नपाय सरवने परसारतेरा अरू अबड़ाहा होड़कू अरू जमा बरानाः बेमरियातेकू दोहोना हँकुःआ होड़कूय नपायगोड ञवना।

मती ओजाःतेरा भगवानराः नपाय सरवन 8:28

हनते ईसू हना हुडिंग समुंदर पारनेनखन गदरेनिया छतररेय सोदोरनेना। दो भूतकू समसावतोकिन दोहोना, हँकिनाः बार होड़ होड़किन, मड़गट अते उडुंगनेनखन ईसू सुदाकिन जुमावनेना। हँकिन मुरुक जबड़किन दोहोना। अरू हना अते तोनोंगीग हना दूरते मेरकू सेने अवेना।

मती ओजाःतेरा भगवानराः नपाय सरवन 8:33

दो सुकरीकूरिकुःआ सरवाहाकू हना ततेरतेकू ञीरयान अरू सहररे सेनेडखन होड़कू एचेरे, हंडा चिनचिला होयानेना अरू मड़ंगरे भूतकू समसावनेना हँकिनाः होड़किनराः जीवरे चिनचिला होयानेना हना जमाकूनकू कता उदुःतेरा।

मती ओजाःतेरा भगवानराः नपाय सरवन 8:6

“ने परबू, ईंगरीग मी होड़ सेवकिया होड़ इदानिया। हाँय लकवा ञेडगोतिरिया अरू हना हसूते मुरुक हलकइनरे इदानिया।”

मती ओजाःतेरा भगवानराः नपाय सरवन 9:26

नाःआ सरवन हना देसरिकुःआ मुरुक बगरा होड़कू एचेरे सितरावयान।

मती ओजाःतेरा भगवानराः नपाय सरवन 9:35

ईसू एटाः एटाः सहरकून अरू गाँवकूनरे सेनेडखन हँकूराः अरजी ओड़ाःकूनरेय चेडतेडकुःआ। हाँय भगवानराः राइजराः नपाय सरवने परसार उदुःतेरा अरू बेमरियातेकू दोहोना हँकुःआ होड़कूय नपायगोड ञवना।

मरकूस 1:28

अरू ओहेन जमा गलील छतरराः डोबरा भइर ईसूराः ञाव जगावयान।

मरकूस 1:32

सिंगाड़ लिप-लिपाः मेला, एटाः एटाः होड़कू हसूकू दोहोना हँकुःआ होड़कू अरू भूतकू समसावनेना हँकुःआ होड़कू ईसू एचेरेकू अगूतेडकुःआ।

मरकूस 2:3

चइरगोटोंग होड़कू ईसू एचेरे मी होड़ लकवा ञेडतिरिया हाँयग होड़ पटियातेकू तूल अगूतिरिया।

मरकूस 2:4

हंडा बगरा होड़कू दोहोना। हनालगा हँकू हाँयग लकवा होड़ ईसू एचेरे मेरकू इदी अवेगडीग अरू सड़ुम चोटरेकू गोः देगतिरिया। हँकू सड़ुम उघाड़तेडखन हना दुलूते हाँय पटिया सुदा ईसू मड़ंगरेकू जुवांग लोजोरतिरिया।

मरकूस 2:9

ईंग आमराः कसूरिंग बराव एंडातेरा, माःआन कताय लगा जा, आम पटिया रेमकेडखनमे सेन, माःआन कताय लगा रिता इदा?

लूका 2:2

सिरिया राइजरीग मरंग हातपात होड़ किरिनियूस दोहोना हनमेला मनाड़ंग ञाव एचे जोड़ाव होयानेना।

लूका 4:14

सुद बिरुवाराः जंगरते पेरेगनेनखन ईसू गलील छतर अगीय कुदायान। अरू हना छतररिकुःआ जमा होड़कू एचेरे ईसू बदीरे बड़रा सितरावयान।

लूका 4:38

हनते ईसू अरजी ओड़ाः अते सिमोन पतरसराः ओड़ाःरेय सेनेडा। हनमेला सिमोनरीग हनहार जाररेय दोहोना अरू हँकू ईसू एचेरे हाँय नपायगोडेय लगाकू पइयन गोड़ाना।

लूका 5:15

ईसूराः बदीरे मुरुक तान तानरिकुःआ होड़कू सुदीगोतेड अरू मुरुक बगरा होड़कू ईसूराः बड़रा अयूमगे लगा अरू अँननकूराः बेमारी अते नपायगुः लगा हाँय एचेरेकू जुमाःआ।

लूका 5:24

अपे नाःआ कता सुदीयपे, मनुवारीग बेटातके चउंदीसरे मनुवाकूराः कसूर बराव एंडागे लगा हातपात इदा।” हनते हाँय लकवा ञेडतिरिया हाँयग होड़ एचेरेय कताया, “ईंगमे अयूम। रिमुःमे अरू आमराः पटिया रेमकेडखन ओड़ाःमे सलाव जुवाः।”

लूका 7:17

ईसू एचेतेरा हना एहूदिया राइजरे अरू चइरो गतरराः राइजरे होंकू कता उदुःगोतेड।

एहुना 10:21

मनदो एटाः होड़कू कताया, “भूत इदा हना इया नाँयग होड़राः बड़रा कोवानेःआ। तोनोंयग भूत अंधा होड़े एचे ञेल अवेयता जा?”

मूक चेलाकू 10:38

अरू सुद बिरुवा अरू आँयग जंगर एमेवातेडीगखन भगवान नसरतरीग ईसूय एटाःतिडिया। भगवान ईसू सुदाय दोहोन अते, हाँय एटाः एटाः गाँव सहरकून सेनेडखन नपाय बुताय बुतातेरा अरू भूतकू समसावनेना हँकुःआ होड़कूय नपायगोतेडा।

मूक चेलाकू 15:23

हँकू हँकिन तिःईरे नाःआ चिठीकू एमे ओतोंगगोडतेरा। अले अपेरिकुःआ वपक बोपोहकू, ईसूरिकुःआ मूक चेलाकू अरू कलसियारिकुःआ अगुवा होड़कू, अंतकिया सहर, सिरिया सहर अरू किलिकिया छतररिकुःआ बेगर एहूदा बिसवासी होड़कू लगा अले अगीते मसी सलाम।

मूक चेलाकू 15:41

हँकिन सिरिया अरू किलिकिया छतरतेकिन सेनेडा अरू हंडाकुःआ बिसवासी होड़कू ईसू मसीराः बिसवासरेकिन एचे बड़ियाड़गोतेडकू।

मूक चेलाकू 28:9

नाःआ इया होयानेन दो हना डुगुरिकुःआ एटाः एटाः हसूत होड़कू होंकू वेजेडा अरू हँकू जमाकू अँड़ेयान।

मूक चेलाकू 8:7

भूतकू होड़कू अते मुरुक खिररी घड़ीनकू उडुंगनेना अरू लकवा ञेडतो होड़कू अरू ठुठा होड़कू होंकू नपाययान।