गलातिया 3:14 - Korwa Bible

¹⁴ ईसू मसी अबूय सडावकेड अते, भगवान इबराहीमराः जीव-जहने नपायतेरा। हनन इया हाँय बेगर एहूदाकूराः जीव-जहन होंय नपायकेरा, जेमहा भगवान जबानतेरा हाँयग सुद बिरुवा अबू बिसवासकेड अतेबू पवाः।

गलातिया 3:14 ပူးပေါင်းရင်းမြစ်များ

लूका 11:13

अपे कसूर होड़कू इदानपे हों अँनपे लइंकू लगा नपाय नपाय जिनिसकूनपे एमेयता। दो अपे अते अगम नपाय अपेरीग सेरमो देसरीग अपांग एचेरे सुद बिरुवापे असेय दो, अपे लगा चिला लगा मेरेय एमेकेःआ?”

लूका 24:49

ईंग अपांग जबानकेरा हाँयग सुद बिरुवायिंग वारेयता। अरू हाँय अते अपे सेरमो देसराः जंगर अरीनपे पवाः वरी ननानाः सहररेपे दोहो हताड़।”

एहुना 7:39

हाँय एचेरेकू बिसवासगेता हँकुःआ होड़कू लगा भगवान एमेयता हाँयग सुद बिरुवाराः बदीरेय कताया। हना बेला वरी भगवान अते ईसू मरंग मान मरजइत अरीने पवाः। हनालगा बिसवासतेराकू हँकुःआ होड़कू लगा सुद बिरुवा अरीने ओवाकुःआ।

मूक चेलाकू 2:33

हाँय जमाकू अते मरंग तुलाकिडिगखन भगवान आँयग खउना तिःई गतरे हातपात सुदाय एचे दुड़ुःकिरिया। मड़ंगरे अपांग भगवान जबानतेरा हाँयग सुद बिरुवा भगवान अते ईसू पवावनेनखन अपे अयुमेतना अरूपे ञेलतना हना अले एचेरेय वारगोतेडा।

मूक चेलाकू 4:12

नाःआ चउंदीसरे होड़कू सडाः लगा अरू एटाः ञाव कोनोवानेःआ अरू अबू सडाव अवे लगा हाँय अड़ाःकेडखन तोनोंगीग एटाः होड़ कोवाया।”

मूक चेलाकू 5:32

नाःआ कताकूनराः हिदइतदार अले अरू भगवानकू मनावता हँकुःआ होड़कू लगा भगवान एमेयता हाँयग सुद बिरुवा हों इदा।”

1 कुरिंती 12:13

अबू अते तोनोंग तोनोंग होड़कू एहूदाकू हवे अरू तोनोंग तोनोंग होड़कू बेगर एहूदाकू हवे। अबू अते तोनोंग तोनोंग होड़कू बेगारी होड़कू इदानकुःआ अरू तोनोंग तोनोंग होड़कू बेगारी होड़कू कोवाकुःआ। मनदो भगवान सुद बिरुवाते अबू जमाकू बतिसमाय एमेवाडबुःआ अरू मसीराः देहराः एटाः एटाः दगलीकूने बड़ाँवकेडबुःआ। नुँहू भगवान अबू जमाकू जीवरे हनानाः बिरुवाय एमेकेरा।

2 कुरिंती 1:22

हाँय अबू अनँयगरिकुःआ हवे माःआन मीटोंग चिनहा इया अनँयगराः मोहोर लगावकेडखन अबूराः इंदरीरे सुद बिरुवा बयान इयाय एमेवाडबुःआ।

गलातिया 3:16

अपे ईंगपे अयूम, इबराहीम एचेरे अरू हाँयरिकुःआ नइड़-बाँस होड़कू अते मी होड़ एचेरे भगवान जबानतेरा। दो भगवानराः कागदरे हना जबान इबराहीमरिकुःआ मुरुक नइड़-बाँस होड़कू एचेरे मेरेय जबानगाड, मनदो मिनी होड़ एचेरेय जबानतेरा, अरू हनाँय हवे सडावदार मसी।

गलातिया 3:2

मीटोंग कता ईंगपे उदुःवा। अपे भगवानराः सुद बिरुवा करा इयापे पवावकिया, नियम मनावकेडखन जा, नपाय सरवन बिसवासकेडखन?

गलातिया 4:6

नुँहू अबू भगवानरिकुःआ लइंकूबू बड़ाँवयना अते, हाँय अनँयग बेटातराः बिरुवा अबू जीवरेय वारकेरा। हनाँय बिरुवाते अबू हाँय, ने अबबा, ने अपांग, माःआन चइड़ घड़ीनबू राः अवेयता।

इपीसी 2:18

दो नुँहू अबू जमाकू मिनीटोंग सुद बिरुवाते अपांग भगवान एचेरेबू सोदोर अवेनता।

इपीसी 2:22

ईसू मसीरे सुद बिरुवाते अपे बेगर एहूदाकू हों, भगवान दोहोन लगा ओड़ाःपे बड़ाँःतना।

इपीसी 3:16

भगवान एचेरे अगम नपाय मरंग धन इदा। अरू हाँय हना धन अते सुद बिरुवाते अपेराः इंदरीरे अनँयगराः जंगर एमेकेडखन अपेराः जीवे बनड़ियाड़ ञवन लगायिंग अरजीतना।

इपीसी 4:30

सुद बिरुवाराः चिनहाते टुटीगगुःराः दिन भगवान अपे जमालेःआतेय सडावपेता। दो सुद बिरुवा अहापे एचे अदरुजीगे।

1 पतरस 1:22

अपे सताय कता मनावकेडखन अपेराः जीवपे सुदकेरा, जेमहा अपे अँननपे सतायते अपेराः इनिंदरी इंदरीते अरूपे अलार-दुलार होड़ेंग।

1 पतरस 3:9

अपे बेलूर बदलारे बेलूर अपे अहापे कुदागे, अरू तूडपेताकू हना बदलारे अलोपे तुडकू, मनदो हँकुःआ होड़कूराः जीव-जहन भगवान नपायगे लगापे अरजीगोड ञवन। ननन इयाःआ बुताकून एचेय लगा भगवान अपेय राःकेडपेःआ, जेमहा अपेराः जीव-जहन हों भगवान नपायगे।