इपीसी 4:25 - Korwa Bible

²⁵ अबू मिनी देहराः एटाः एटाः दगलीकून इदानबुःआ। हनालगा अबू लबरा बड़रा अड़ाःकेडखन अँननबू अबू सताय बड़राकून कता होड़ेंग लगा इदा।

इपीसी 4:25 ပူးပေါင်းရင်းမြစ်များ

एहुना 8:44

कलउ अपेरीग अपांग हवे अरू हाँयराः ओंगोल इया एचेय लगापे चहाःता। हाँय मनाड़ंग वरीते होड़कूय ञेड गोएगता अरू तोनोंग इयाःआ सताय हाँय एचेरे कोवानेःआ। हनालगा हाँय भगवानराः सताय सरवने हिनइस-बिनइसवाता। हाँय लबरा इदानिया अरू जमा बरानाः लबरा हनाँय अगीते उडुंगगुःता। हनालगा हाँय अनँयगराः लूर-नेवन इया लबरा बड़राय कतागोड ञवनता।

रूमी 12:5

हनन इया अबू जमा बिसवासी होड़कू ईसू मसीराः देह इया मिनीकियानखन एटाः एटाः देह दगलीकून इया इदानबुःआ।

1 कुरिंती 10:17

अबू मुरुक बगरा होड़कू इदानबुःआ। मनदो रुटी मिनीटोंग इदा। नाःआ रुटी डुंडीग हटिंगकियानखन अबू जमाकूबू जोमता। हना नाःआ उदुःता, अबू जमाकू मिनी देह इया इदानबुःआ।

2 कुरिंती 7:14

अपे बदीरे हाँय एचेरे ईंग मुरुक ईंग भल-भलायनेना। अरू अपे ईंग मेरपे गियू ओवाडिंगा। अले अपे बदीरेले कतातेरा हना जमाकून सताय दोहोना अरू हनन इया अपे बदीरे तितूस एचेरेले भल-भलायनेना हना हों सनाताय होयायान।

इपीसी 4:15

मनदो सताय कता इया जियाः घड़ीन अँननबू अबू अलार-दुलारकेडखन जमा बरानाःरे, कलसियाराः बोः, ईसू मसी इया, अबू हनारागोड ञवन लगा इदा।

इपीसी 4:22

अपे नाःआ इया मड़ंगरेकू चेडतेडपेःआ। बेनेलूर ओंगोलते लायगुःआ अपेराः जुना जीव अड़ाः एंडाकेडखन,

इपीसी 4:31

हिगार हटिंगगुः इयाःआ हटी ओंगोल अपे जीव अते चलाः एंडागोडपे। अपे कटराहा अरू रिसकट होड़कू अहापे होयाः। जमा बरानाः कड़ीग, ओपता बड़रा अरू जमा इयाःआ टेनसाहापे चलाः एंडागोड।

इपीसी 5:30

अबू कलसियारिकुःआ होड़कू मसीराः देहराः दगलीकून हवे। हनालगा हाँय अबूय दुलारता अरूय असूलबूता।

कुलूसी 3:8

मनदो नुँहू अपे रीस, कटराहा, टेनसाहा, ओपता बड़रा अरू तूड बड़रा, नाःआ जमाकून हिर-हिटी अड़ाः एंडागोडपे।

कुलूसी 3:9

अपेराः बेनेलूर दोहोना हना जुना जीवपे चलाः एंडागोतेडा। हनालगा अँननपे अपे अहापे लबरा होड़ेंग।

1 तिमुतियूस 1:10

सनहा-सनही होड़कू अरू बेगर खापरे बुताकू एचेयता हँकुःआ होड़कू लगा, होड़ अकिरिंग होड़कू अरू जलिया होड़कू, लबरा हिदइतदारकू अरू सताय चेडतोकू घंटावता हँकुःआ जमा होड़कू लगा नियमकून इदा।

1 तिमुतियूस 4:2

ओंगोल लोलो लोहाते लो मुरात इया केटेग इदा हँकुःआ लबरा पचघुचिया होड़कू ननन इया होड़कूकू चेडता।

तितूस 1:12

करेत डुगुरीग मी होड़ मरंगीग सुधिया होड़ अँननकू बदीरेय कतातेरा, करेत डुगुरिकुःआ होड़कू सगर बेला लबरा बड़राकू बड़राता, अरू बेलूर पहाड़ जानरकू इया जोम असगतिया होड़कू इदानकुःआ।

तितूस 1:2

अरू कहियो मेरेय लबराता हाँयग भगवान मुनुरुक जूग परियारेय जबानतेरा ओरो टुटीगनेना हना जीव लगाकू असरागे।

इबरानी 12:1

भगवान एचेरेकू बिसवासतेरा हँकुःआ जमा होड़कू अबूराः चाइरो गतर, बदरी इया हिदइतदारकू इदानकुःआ। हनालगा मान अबू रोंकावबूता हनाकून अरू अबू दाःबूता हना कसूरकूनबू चलाः एंडाय। अरू भगवान अबू लगाय संजोड़केरा हनानाः बतकाः, सहाव घड़ीनबू बतकाव ञवन।

एकूब 1:21

हनालगा अपेराः जमालेःआ लेटाव-पेटाव अरू बेलूर नेवन अपे जीव अतेपे चलाः एंडागोड अरू अँननपे अपे हुडिंग ओंगोलकियानखन भगवान अपे बनसाव लगा अपे जीवरे हुड़ू इयाय रोपाकेरा हना सरवनपे मनाः।

1 पतरस 2:1

हनालगा ईंगरिकुःआ अजी बोपोहकूतिंग, अपे जमा बरानाः टेनसाहा अरू बेलूर कताकून, लबरा बड़रा, पचघुचिया, इरा अरू जमा बरानाः ओपता बड़रा, अपे जीव अतेपे चलाः एंडागोड।

उदुःतो कताकून 21:8

मनदो पोंकाहा होड़कू, अरू बेगर बिसवासी होड़कू, अरू एरंग होड़कू, अरू ञेड एएंडा होड़कू, अरू सनहा-सनही होड़कू, अरू पपंगाड़ होड़कू अरू मुरती सेवा होड़कू अरू जमा लबरा होड़कू, हँकू जमाकू हना सेंगेल अरू हितकाःतो लेटे दिरिराः हुडिंग समुंदररेकू रेमगे बोलोगोडकूता। अरू ननानाः हवे बार नमार गुजुः।”

उदुःतो कताकून 22:15

कुतू इया होड़कू, अरू पपंगाड़ होड़कू, अरू सनहा-सनही होड़कू, अरू ञेड एएंडा होड़कू, अरू मुरती सेवा होड़कू, जमा बरानाः लबरा चहाः होड़कू अरू अडिग होड़कू, हँकू जमाकू हना सहरराः बहरीकू दोहोनता।