मूक चेलाकू 6:14 - Korwa Bible

¹⁴ नाँय नाःआ इया कततले अयूमकिरिया, नसरतरीग ईसू भगवानराः नाःआ ओड़ाःए रुबगोडता अरू मोसेस एमेकेरा हना नियम अरू रिती-बिधी अते एटाः इयाःआ नियम अरू रिती-बिधीय एमेवाबूता, माःआन।”

मूक चेलाकू 6:14 ပူးပေါင်းရင်းမြစ်များ

मती ओजाःतेरा भगवानराः नपाय सरवन 26:61

टुटीगरे बार होड़ लबरा हिदइतकिन उदुःतेड। हँकिन कतातेड, “नाँयग होड़ कतातेरा, ईंग भगवानराः नाःआ ओड़ाःयिंग रुबगोडता अरू पेय दिनरे अरूयिंग तुलागोडता, माःआन।”

मरकूस 14:58

नाँयग होड़ नाःआ इयाय कताया हनाले अयूमकेरा, तिःईतेकू तुलाकेरा हना भगवानराः ओड़ाः एचे रूब एंडागोडतिंग अरू तिःईते मेरकू तुलागरा एटाःआ ओड़ाः पेय दिनरेयिंग तुलागोडता, माःआन।

लूका 21:24

मुदइकू तलवइरतेकू ञेड एंडनता अरू होड़कू तोलकेडकूखन एटाः एटाः देसरेकू गोःयाकूता। बेगर एहूदाकूराः बेला अरीन पुराः वरी एरुसलेम सहररिकुःआ होड़कू हरुवावकेडखन मुरुककू रमदावकूता।”

लूका 21:6

मनदो ईसू कताया, “नुँहू नाःआ ओड़ाः नपाय ञिलुःतना। मी दिन दरवाःआ हना दिन मुदइ होड़कू नाःआ ओड़ाःराः मेमेडटोंग मेमेडटोंग दिरिकून उडुंग घड़ीनकू एचे रूब एंडागोडता।”

एहुना 2:19

दो ईसू कतातेड, “भगवानराः ओड़ाःपे एचे रूबगोड दो ईंग पेनेय दिनरे अरूयिंग तुलागोडता।”

एहुना 4:21

दो ईसू कतातेड, “ने दिदी, ईंग एचेरेम बिसवासगे। दरवाःआ हना बेलारे अपे भगवान नाःआ पहाड़रे सहे एरुसलेमरे ओरोपे जागतिरिया।

मूक चेलाकू 15:1

अदोम एहूदाकू एहूदिया छतर अते अंतकियारेकू वेजेडा अरू बिसवासी होड़कूकू चेडा, अपे मोसेसराः नियम इया मेरपे खतनान दो, भगवान अपे ओरोय सडावतेडपेःआ, माःआन।

मूक चेलाकू 21:21

मनदो आम बदीरे हँकुःआ एहूदाकू एचेरे तोनोंगीग लालिसकेडखने कताया, हाँय बेगर एहूदाकू तलारेय दोहोनता अरू हँकुःआ एहूदाकू अँकूरिकुःआ लइंकू खतनाकू लगा कोवानेःआ अरू मोसेसराः नियम इया तोनोंगाः रिती-बिधी एचेय लगा कोवानेःआ माःआने चेड उदुःवालेतना।

मूक चेलाकू 25:8

हनते पउलूस कता कुदातेरा, “ईंग एहूदाकूराः नियम बदीरे सहे भगवानराः ओड़ाः बदीरे सहे कइसर मरंग राजा बदीरे ईंग तोनोंगाः मेरिंग कसूरगरा।”

मूक चेलाकू 26:3

अरू आम एहूदाकूराः रिती-बिधीकून अरू हँकूराः अड़ा-चउकीकून नपायतेम सुदीयतना। हनालगा ईंग असेगेता, ईंगराः कता तिंगीड घड़ीनमे अयूमवा।

मूक चेलाकू 28:17

पेय दिन तयोमरे पउलूस रूमी सहररिकुःआ एहूदाकूरिकुःआ मूक होड़कूय एचे राः जुमावतेडकुःआ। दो हँकू जुमावनेन दो हाँय हँकू एचेरेय कतातेरा, “ने वपक बोपोहकूतिंग, ईंग अबूरिकुःआ होड़कू बदीरे अरू अबूरिकुःआ खुटिपरिया होड़कूराः रिती-बिधी बदीरे तोनोंगाः गारबार मेरिंग एचेगरा। हनारे हों हँकू एरुसलेमरे ईंगकू साबतेडखन रूमी देसरिकुःआ होड़कू एचेरेकू जिमागोतेडिंगा।

गलातिया 3:19

दो नाःआ नियमकून चिला लगा भगवान अबूय एमेवातेरा? अबू कसूर होड़कू हवे माःआन उदुःगे लगाय एमेतेरा। मड़ंगरे भगवान जबानतेरा हाँयग नइड़-बाँस होड़ अरीने वेग वरी नाःआ नियमकून सलावनेना। अरू नाःआ नियमकून सेरमोरिकुःआ बराहीलकूते मोसेस बिच-बिचवाई होड़ साबतेडखन होड़कू एचेरे भगवान कता उदुःतेरा।

गलातिया 3:23

मनदो भगवान अबू बिसवासराः दूर अरीने उदुःवाबू वरी अबू एहूदाकूराः नियमकून मनाः घड़ीन हनानाः नियमकूनराः आड़रे सींगतो होड़कू इयाबू दोहोना।