1 पतरस 1:12 - Korwa Bible

¹² हँकू अँननकूराः नफा लगा कोवान, मनदो नपाय सरवनकू अयुमेता हँकुःआ होड़कू लगाकू सेवाःआ, माःआन भगवान हँकूय एचे सुदीवातेडकुःआ। अरू नाःआ बेलारे, भगवान सेरमो देस अतेय वारकेरा हाँयग सुद बिरुवाराः जंगरते पपरसार होड़कू अपे एचेरे, सेरमो देसरिकुःआ बराहीलकू हों बुझाः लगाकू तरसाःतना, हना नपाय सरवनकू परसारकेरा।

1 पतरस 1:12 ပူးပေါင်းရင်းမြစ်များ

मती ओजाःतेरा भगवानराः नपाय सरवन 11:25

दो हनमेला ईसू कतातेरा, “ने सेरमो देस अरू चउंदीसरीग मालिक, ईंगरीग अपांग भगवान, ईंग आमिंग धनियाबादतना। आम नाःआ कताकून, कनहूनदारकू अरू सुदीदारकू अतेम ओकोतेरा अरू लइंकू इया होड़कू एचेरेम उदुःकेरा।

मती ओजाःतेरा भगवानराः नपाय सरवन 11:27

ईंगरीग अपांग भगवान ईंग एचेरे जमाकूने जिमाकेरा। सनातायते अपात अड़ाःकेडखन तोनोंगीग होड़ बेटात मेरेय सुदीयता, अरू बेटात अड़ाःकेडखन तोनोंगीग होड़ अपात मेरेय सुदीयता। भगवान सुसुदी लगा बेटात सुनावकूता, हँकुःआ होड़कू एकला भगवानकू सुदी अवेता।

मती ओजाःतेरा भगवानराः नपाय सरवन 16:17

हनते ईसू कता कुदातेरा, “ने एवनारीग बेटात सिमोन, भगवान आम जीवे नपायकेरा। तोनोंगीग मनुवा अगीते कोवान, मनदो सेरमो देसरे इदानिया ईंगरीग अपांग भगवान, नाःआ कता अनँयग आमे कता उदुःवाडमेःआ।

मरकूस 16:15

हनते ईसू हँकू एचेरेय कतातेरा, “अपे नाःआ जमा चउंदीसरिकुःआ होड़कू एचेरे सेनेकियानखन नपाय सरवनपे परसारगोड।

लूका 15:10

दो ईसू कताया, “अपे ईंगपे अयूम, नान इया भगवान अगी कसूर अते जीवे कुदाता हाँयग होड़ बदीरे सेरमो देसरिकुःआ बराहीलकू बहालगुःता।

लूका 2:26

भगवानराः सुद बिरुवा मड़ंगरे सिमोन एचेरे कतातेरा, भगवान वारेयता हाँयग मसी अरीनमे ञेलेय हना वरी आम ओरोम गोएगनेना, माःआन।

लूका 9:6

दो हँकुःआ मूक चेलाकू एटाः एटाः गाँव अगी तोराकू अरू नपाय सरवन उदुःवाडखन बेमारीतेकू दोहोना हँकुःआ होड़कूकू एचे नपायतेडखनकू सलाःआ।

एहुना 15:26

मनदो संघरादार, ईंग अपांग अगीते अपे एचेरेयिंग वारेयता, हाँय अपे एचेरेय वेग मेला ईंग बदीरेय कता उदुःगेता। हाँय भगवान अगीतेय वेगता हान सतायराः बिरुवा हवे।

मूक चेलाकू 10:44

दो पतरस पनरसारगे मेला, भगवानराः सरवनकू अअयूमा हँकुःआ जमा होड़कू सुद बिरुवातेकू पेरेगयान।

मूक चेलाकू 16:10

पउलूस नाःआ दरसन ञेलतेडखन तयोमरेय सुदीगोतेड, मकिदुनिया देसरिकुःआ होड़कू एचेरे भगवानराः नपाय सरवन कता उदुः लगा भगवान अलेय राःतना, माःआन। अरू ओहेन मकिदुनिया देस सेन लगाले सपड़ावनेना।

मूक चेलाकू 2:33

हाँय जमाकू अते मरंग तुलाकिडिगखन भगवान आँयग खउना तिःई गतरे हातपात सुदाय एचे दुड़ुःकिरिया। मड़ंगरे अपांग भगवान जबानतेरा हाँयग सुद बिरुवा भगवान अते ईसू पवावनेनखन अपे अयुमेतना अरूपे ञेलतना हना अले एचेरेय वारगोतेडा।

मूक चेलाकू 4:31

हँकू अरजीतेड हना तयोमरे हँकुःआ होड़कू दोहोना हना ततेरराः ओत डोलावनेना। हनते हँकुःआ जमा होड़कूराः जीव भगवानराः सुद बिरुवाते पेरेगयान अरू भगवानराः सरवन होड़कू एचेरे डीड़तेकू कता उदुःतेरा।

मूक चेलाकू 4:8

हनते पतरस सुद बिरुवाते पेरेगनेनखन हँकू एचेरेय कतातेरा,

मूक चेलाकू 8:25

पतरस अरू एहुना हना छतररे भगवानराः सरवन कता उदुः लगा चबानेन दो हँकिन एरुसलेम अगीकिन कुदा सेनेडा। सेनेन सेन दूररे हँकिन ईसूराः नपाय सरवन समरिया छतरराः एटाः एटाः गाँवरेकिन परसार उदुःतेरा।

रूमी 1:15

हनालगा ईंग रूमी सहररिकुःआ होड़कू एचेरे हों नपाय सरवन उदुःवाकू लगायिंग तरसाःतना।

रूमी 1:17

भगवानराः कागदरे ओजाःतो इदा, “भगवान बेगर गारबारीग होड़े बनाड़ाँवकिरिया, हाँयग होड़ बिसवासतेय जियावगोड ञवनता।” हनन इया नपाय सरवनरे बुँहड़ीन अते टुटीग वरीय बिनिसवासगोड ञवनता, हनाँयग होड़ भगवान बेगर गारबारीग होड़े बड़ाँवगेयता।

रूमी 10:15

तोनोंगीग हँकू मेरकू वारकेकुः दो हँकू करा इया एटाःकू एचेरेकू कता उदुः अवेकेःआ? हनालगा भगवानराः कागदरे हँकुःआ होड़कू बदीरे नाःआ इया ओजाःतो इदा, “नपाय सरवनकू उदुःता हँकुःआ होड़कूराः काट तुमिन सुघर इदा!”

रूमी 15:19

ईंग बयाव जुवाः इयाःआ बुता अरू चिनहाकूनिंग एचेय लगा, हाँय सुद बिरुवाराः जंगरे एमेवारिंगा। नाःआ इया एरुसलेम सहर अते इलुरिकूम छतर वरी ईंग ईसू मसीराः नपाय सरवन मुरुक बगरा होड़कू एचेरेयिंग परसार उदुःकेरा।

1 कुरिंती 2:10

मनदो भगवान अनँयगराः बिरुवाते अबू एचेरे ननानाः कताकूने एचे उदुःतेरा। सुद बिरुवा जमालेःआय सुदीयता। हान मनुवाकू लगा ओकोत इदा भगवानराः कताकून हों नपायते सुदीयता।

2 कुरिंती 1:22

हाँय अबू अनँयगरिकुःआ हवे माःआन मीटोंग चिनहा इया अनँयगराः मोहोर लगावकेडखन अबूराः इंदरीरे सुद बिरुवा बयान इयाय एमेवाडबुःआ।

2 कुरिंती 6:6

नाःआ जमा अले जीवरे होयानेना। हनारे हों अले सुद जीवले जियाःआ, अरू भगवानराः सरवनले ओंगोल बुझाःआ अरू सहाव घड़ीन सुधा होड़कूले दोहोना। अले एचेरे सुद बिरुवा दोहोनता अरू सतायते होड़कूले दुलारा।

गलातिया 1:12

ईंग जूग पुटूसरीग ततयिंग अते, सहे तोनोंगीग एटाः होड़ अते, नाःआ सरवन मेरिंग चेडगना। मनदो इनीसू मसी हमा, नाःआ नपाय सरवन ईंगे एचे उदुःवारा।

गलातिया 1:16

हनते हाँय अनँयग बेटात ईंगे उदुःवारिंगा, जेमहा ईंग बेगर एहूदाकू एचेरे नपाय सरवनिंग कता उदुःवाकू। ईंग तोनोंगीग होड़ सुदा मेरिंग कता होड़ेंगगना,

इपीसी 3:10

भगवान सेरमोरिकुःआ परधानकू अरू हातपातदारकू एचेरे अनँयगराः एटाः बरानाः कनहून कलसियातेय एचे उदुः लगाय ओंगोलतेरा।

1 तिसलूनिका 2:9

ने अजी बोपोहकूतिंग, अपे उहियारगेतनापे जा, अले भगवानराः नपाय सरवन अपे एचेरे परसारगे मेला दिन रइत उगार उडुंगवामिन घड़ीनले बुता जोमा, जेमहा तोनोंगीग लगा बोझा अलो होयाः।

1 तिमुतियूस 3:16

अरूबू कबुलाःता हना बिसवास मुरुक गहीर सताय इदा। होड़कूराः सुरइत मुरइतरेय जनमावनेना, बेगर गारबारते इदानिया माःआन सुद बिरुवा कता उदुःतेरा सेरमो देसरिकुःआ बराहीलकू हाँयकू ञेलतेरा, होड़कू हाँय बदीरे जमा जइत होड़कू एचेरेकू परसार उदुःतेरा, चउंदीसरिकुःआ होड़कू हाँय एचेरेकू बिसवासतेरा, अरू मान मरजइत सुदा सेरमो देस अगी भगवान रेम गोःयडिया।

इबरानी 11:13

हँकू जमाकू बिसवासकेडखनकू गोएगयान। अरू भगवान जबानतेरा हना हँकू मेरकू पवावगान। मनदो भगवान जबानतेरा हनाकून हँकू लनंकाते ञेलकेडखनकू अहाल बहालयान अरू हँकू अबू चउंदीसरे दुरीन देसरिकुःआ होड़कू इया इदानबुःआ, माःआनकू मनावयान।

इबरानी 2:4

चिनहाकूनते अरू बयाव जुवाः इयाःआ बुताकूनते अरू एटाः एटाः इयाःआ ञेनेल ञेलरे नपाय जुवाःता हना बुताकूनते, अरू अनँयग हिछा इया होड़कूय हटिंगवातेरा हाँयग सुद बिरुवाराः दहिनकूनते भगवान, हाँयराः सरवन सताय हवे माःआन हिदइते उदुःबाःगोतेडा।

इबरानी 4:2

हँकुःआ होड़कू अयूमतेरा हना नपाय सरवन अबू हों अयूमकेराबू। हँकुःआ होड़कू हना सरवन अयूमतेडखन बिसवास घड़ीन अँनकूराः जीवरे मेरकू दोहोगाड। हनालगा हँकू अयूमतेरा हना सरवनते हँकूके तोनोंगाः नफा मेर होयागान।

1 पतरस 1:25

मनदो भगवानराः सरवन कहियो ओरो टगावनेना। अरू ननानाः सरवन अपे एचेरे पपरसार होड़कू परसार उदुःतेरा।

1 पतरस 4:6

हनालगा ईसू गोएगतो होड़कू एचेरे हों नपाय सरवने परसारतेरा, जेमहा हँकूराः लूर नेवन इया भगवान फड़ियावतेडकुःआ, मनदो हँकूराः हनसा भगवान इया जीयत दोहो अवेन।

उदुःतो कताकून 5:11

अरू ईंग ञेलतेरा दो हना गदीराः अरू हँकुःआ जानरकूराः अरू मूक होड़कूराः चइरो गतर सेरमो देसरिकुःआ मुरुक बराहीलकूराः अरोयिंग अयूमतेरा। हँकू लाक लाक अरू करोड़ करोड़कू दोहोना।