Zacarías 10:4 - Li Santil hu

⁴ Saꞌ xya̱nkeb li tenamit Judá ta̱e̱lk chak jun li kꞌaxal nim xcuanquil, joꞌ li pec li naqꞌueheꞌ saꞌ xxuc li cab. Aꞌan chanchan li cheꞌ li nacu̱tun re junak li muheba̱l. Ut chanchan ajcuiꞌ li tzimaj re pletic. Ut aꞌan li ta̱takla̱nk saꞌ xbe̱n chixjunil li ruchichꞌochꞌ.

Q'eqchi Bible

⁴ Sa' xyanqeb' a'an te'elq laj jolominel, laj k'amol b'e ut li ninqeb' xwankil; sa' xyanqeb' a'an te'elq ajwi' chixjunileb' laj k'amol b'e.

Zacarías 10:4 ပူးပေါင်းရင်းမြစ်များ

Zacarías 9:10

Chixjunil li nacꞌanjelac re pletic tixsach ru. Lix carruaje laj Efraín tixsach ruheb joꞌ ajcuiꞌ lix cacua̱yeb laj Jerusalén. Ut tixtoki ajcuiꞌ lix tzimajeb. Tixqꞌueheb li tenamit chi cua̱nc saꞌ tuktu̱quil usilal. Ut aꞌan chic cua̱nk xcuanquil saꞌ xbe̱neb chixjunileb li naꞌajej li naticla cuan cuiꞌ li palau Mar Muerto ut nacuulac toj cuan cuiꞌ li palau Mediterráneo xcꞌabaꞌ. Ut aꞌan ajcuiꞌ cua̱nk xcuanquil saꞌ chixjunil li ruchichꞌochꞌ.

Zacarías 9:8

La̱in tincua̱nk riqꞌuineb laj Israel ut la̱in tincolok reheb chiruheb li xicꞌ nequeꞌiloc reheb. Ut ma̱ ani chic ta̱rahobtesi̱nk reheb xban nak la̱in yo̱kin chi iloc reheb.

Números 24:17

La̱in quicuil saꞌ visión li cꞌaꞌru ta̱cꞌulma̱nk saꞌ xya̱nkeb laj Israel saꞌ eb li cutan teꞌcha̱lk. Ta̱cua̱nk jun li rey saꞌ xya̱nkeb li ralal xcꞌajol laj Jacob. Chanchanak jun li chahim. Ta̱numta̱k saꞌ xbe̱neb li ralal xcꞌajol laj Moab ut tixsach ruheb li ralal xcꞌajol laj Set.

Apocalipsis 17:14

Eb li rey teꞌpletik riqꞌuin li Jun li chanchan carner. Abanan aꞌan ta̱numta̱k saꞌ xbe̱neb xban nak aꞌan li Ka̱cuaꞌ, li kꞌaxal nim xcuanquil saꞌ xbe̱n chixjunil. Ut aꞌan li tzꞌakal rey li nim xcuanquil saꞌ xbe̱neb chixjunileb li cuanqueb xcuanquil saꞌ ruchichꞌochꞌ. Ut li sicꞌbileb ru, li ti̱queb xchꞌo̱l chixta̱kenquil, teꞌnumta̱k ajcuiꞌ saꞌ xbe̱neb li rey, rochbeneb li Jun li chanchan carner.—

2 Timoteo 2:4

Junak soldado incꞌaꞌ naru naxsicꞌ jalan xcꞌanjel xban nak ac sicꞌbil ru chokꞌ soldado. Naxqꞌue ban xchꞌo̱l chixba̱nunquil li nacuulac chiru li nataklan re.

San Mateo 9:38

Joꞌcan ut tinye e̱re nak te̱tzꞌa̱ma chiru li Ka̱cuaꞌ re nak aꞌan tixtaklaheb laj cꞌanjel chixchꞌolobanquil lix ya̱lal chiruheb, chan li Jesús.

Jeremías 1:18

Anakcuan tinqꞌue a̱cacuilal joꞌ jun li tenamit cauresinbil chi pletic. Chanchanakat xcacuil li okech chꞌi̱chꞌ malaj ut li tzꞌac chꞌi̱chꞌ. Ut la̱at ta̱ye reheb chixjunileb li cuanqueb Judá nak incꞌaꞌ us yo̱queb. Ta̱ye ajcuiꞌ reheb li rey ut eb laj tij.

Isaías 54:16

La̱in quinyi̱ban re laj tenol chꞌi̱chꞌ ut aꞌan naxloch lix xam ut naxyi̱b li chꞌi̱chꞌ re pletic. Ut la̱in ajcuiꞌ quinyi̱ban reheb li cui̱nk li nequeꞌcamsin.

Isaías 49:2

Quixqꞌue innaꞌleb re tinnau a̱tinac chi cha̱bil. Chanchanin jun li chꞌi̱chꞌ kꞌes ruꞌuj. Aꞌan qui-iloc cue re nak ma̱cꞌaꞌ tincꞌul. Quinixcauresi chi us. Chanchanin li tzimaj li kꞌes ruꞌuj cuan saꞌ rochochil.

Isaías 19:13

Kꞌaxal to̱nteb li nequeꞌtaklan aran Zoán ut eb li nequeꞌcꞌamoc be saꞌ li tenamit Menfis. Xeꞌxqꞌue rib chi balakꞌi̱c ut xeꞌxqꞌue ajcuiꞌ chi balakꞌi̱c eb laj Egipto. Ut aꞌaneb raj li tzꞌakal nequeꞌcꞌamoc be saꞌ li tenamit.

Salmos 118:22

Li pec li quitzꞌekta̱na̱c xbaneb laj cablanel, aꞌan li pec li kꞌaxal cha̱bil li quiqꞌueheꞌ chokꞌ xxuc li cab.

Esdras 9:8

Abanan anakcuan, at Ka̱cuaꞌ, at kaDios, la̱at xacuil xtokꞌoba̱l ku ut xoa̱col la̱o la̱ cualal a̱cꞌajol li joꞌ qꞌuial chic xocana. Xaqꞌue kanaꞌaj saꞌ li santil naꞌajej bar ma̱cꞌaꞌ na-oc ke. La̱at nacacutanobresi li kabe ut xoa̱qꞌue chi hila̱nc junpa̱t.

1 Samuel 14:38

Joꞌcan nak laj Saúl quixbokeb li nequeꞌcꞌamoc be saꞌ xya̱nkeb li soldados ut quixye reheb: —Quimkex arin. Takatzꞌil a̱tin re xnaubal ani xma̱cob chiru li cutan aꞌin.

Génesis 49:24

Ut ta̱cuy chak xcolbal a̱cuib saꞌ rukꞌ eb aꞌan. Li Ka̱cuaꞌ Dios xqꞌuehoc xcacuilal a̱cuok a̱cuukꞌ. Bantiox re li Ka̱cuaꞌ Dios li naqꞌuehoc re lin metzꞌe̱u. Bantiox re li Ka̱cuaꞌ Dios li na-iloc ke joꞌ naxba̱nu junak laj ilol queto̱mk. Li Ka̱cuaꞌ Dios, aꞌan joꞌ jun sako̱nac ut ma̱ ani naru natꞌanoc re. Ut aꞌan naxqꞌue li kacuanquilal.

San Lucas 20:17

Li Jesús quirileb ut quixye reheb: —¿Cꞌaꞌru naraj naxye aꞌin li tzꞌi̱banbil saꞌ li Santil Hu, li queꞌxye li profeta chicuix? Li pec li queꞌxtzꞌekta̱na laj cablanel, aꞌan li kꞌaxal lokꞌ li quiqꞌueheꞌ chokꞌ xxuc li cab. (Sal. 118:22)

Efesios 2:20

La̱o aj pa̱banel chanchano li rochoch li Dios. Chanchano li pec li na-oc saꞌ xbe̱n li cimiento. Ut li cimiento, aꞌaneb li apóstol ut li profeta. Abanan li tzꞌakal xakxo cuiꞌ li cab, aꞌan li Jesucristo.

1 Pedro 2:6

Tzꞌi̱banbil retalil saꞌ li Santil Hu li quixye li Dios chirix li Cristo nak quixye chi joꞌcaꞌin: La̱in xinsicꞌ ru li Colonel joꞌ nak laj tzꞌac naxsicꞌ ru li cha̱bil pec chokꞌ xxeꞌ li cab. Xinsicꞌ ru chokꞌ xxeꞌ le̱ pa̱ba̱l. Li ani ta̱pa̱ba̱nk re incꞌaꞌ ta̱chꞌina̱nk xchꞌo̱l. (Isa. 28:16)

Jeremías 51:20

Li Ka̱cuaꞌ quixye: —La̱ex aj Babilonia, chanchanex lin martillo re sachoc. La̱ex texcꞌanjelak chicuu re xsachbaleb li xni̱nkal ru tenamit ut re xsachbal lix cuanquileb.

Isaías 28:16

Joꞌcan nak li Ka̱cuaꞌ Dios quixye chi joꞌcaꞌin: —Qꞌuehomak retal. La̱in xinsicꞌ ru jun li pec kꞌaxal lokꞌ ut xinqꞌue aran Sión chokꞌ xxuc li cab re nak cau ta̱cana̱k. Ut li ani tixcꞌojob xchꞌo̱l riqꞌuin incꞌaꞌ ta̱chꞌina̱nk xchꞌo̱l.