Proverbios 1:11 - Li Santil hu

¹¹ Usta teꞌxye e̱re, “Quimkex kiqꞌuin. Chex-oque̱nk saꞌ kaya̱nk. Toxic ut takaram saꞌ xbe li ma̱cꞌaꞌeb xma̱c ut takacamsiheb nak yo̱keb chi numecꞌ.

Q'eqchi Bible

¹¹ Mare anchal te'xye aawe: “Kim chiqix, qaramaq sa' b'e li maak'a' xmaak re xkamsinkil chi maak'a' xyaalal.

Proverbios 1:11 ပူးပေါင်းရင်းမြစ်များ

Jeremías 5:26

Saꞌ xya̱nkeb lin tenamit cuanqueb li incꞌaꞌ useb xnaꞌleb. Yo̱queb chixsicꞌbal chanru nak teꞌxba̱nu ma̱usilal reheb li ras ri̱tzꞌin. Chanchaneb laj yo li nequeꞌxqꞌue li raꞌal re xchapbaleb li cocꞌ xul.

Proverbios 1:18

Eb li cui̱nk aꞌan nequeꞌxyi̱b li raꞌal re ta̱tꞌanekꞌ jalan. Abanan aꞌaneb ajcuiꞌ nequeꞌtꞌaneꞌ chi saꞌ. Incꞌaꞌ nequeꞌxqꞌue retal nak nequeꞌxqꞌue rib saꞌ chꞌaꞌajquilal.

Proverbios 12:6

Li a̱tin li nequeꞌxye li incꞌaꞌ useb xnaꞌleb, aꞌan chanchan jun li raꞌal re camsi̱nc. Abanan li a̱tin li nequeꞌxye li ti̱queb xchꞌo̱l, aꞌan nacoloc.

Hechos 25:3

Queꞌxtzꞌa̱ma chiru laj Festo nak tixba̱nu li usilal, tixtakla cuiꞌchic Jerusalén laj Pablo xban nak queꞌxcꞌoxla xrambal saꞌ be re xcamsinquil.

Hechos 23:15

Joꞌcan nak la̱ex rochbeneb li nequeꞌtaklan saꞌ xbe̱neb laj judío yehomak re li coronel nak tixtakla chak arin laj Pablo cuulaj. Ye re nak te̱raj te̱nau tzꞌakal xya̱lal chirix. La̱o ac xkacauresi kib re nak takacamsi nak toj ma̱jiꞌ nacꞌulun arin, chanqueb.

Miqueas 7:2

Ma̱ jun chic li cui̱nk ti̱c xchꞌo̱l saꞌ ruchichꞌochꞌ ut ma̱ ani chic junak cha̱bil. Chixjunileb nequeꞌcamsin ut li junju̱nk nequeꞌxsicꞌ chanru nak ta̱ru̱k teꞌxbalakꞌi li ras ri̱tzꞌin.

Jeremías 11:19

La̱in chanchanin jun li carner li yo̱ chi cꞌamecꞌ chi camsi̱c. Ma̱cꞌaꞌ saꞌ inchꞌo̱l nak yo̱queb chixcꞌu̱banquil chanru nak tineꞌxcamsi. Yo̱queb chixyebal, “Kacamsihak li cui̱nk aꞌin joꞌ nak nayoqꞌueꞌ li cheꞌ li cuan ru. Kisihak chi jun aj cua saꞌ ruchichꞌochꞌ re nak ma̱ ani chic ta̱jultica̱nk re,” chanqueb.

Proverbios 30:14

Cuanqueb li nequeꞌrahobtesin reheb li nebaꞌ saꞌ ruchichꞌochꞌ toj retal nequeꞌxmakꞌ chiruheb li cꞌaꞌru cuan reheb.

Proverbios 1:16

Eb aꞌan teꞌraj ru xba̱nunquil li incꞌaꞌ us ut teꞌraj ru camsi̱nc.

Salmos 56:6

Nequeꞌxchꞌutub rib ut yalak bar nequeꞌxmuk rib chi rilbal cꞌaꞌru yo̱quin. Yo̱queb chixqꞌuebal cuetal jokꞌe ta̱ru̱k tineꞌxchap re tineꞌxcamsi.

Salmos 35:7

La̱in ma̱cꞌaꞌ inma̱c, abanan queꞌxyi̱b jun li raꞌal re inchapbal. Usta ma̱cꞌaꞌ inma̱c queꞌxbec jun li jul re nak tintꞌanekꞌ chi saꞌ.

Salmos 17:12

Chanchaneb li cakcoj nak teꞌraj inchapbal. Ut chanchaneb li ral li cakcoj li yo̱queb chiroybeninquil lix tibeb saꞌ lix naꞌajeb.

San Juan 15:25

Joꞌcaꞌin xcꞌulman xban nak tzꞌi̱banbil chak retalil saꞌ li chakꞌrab li quiqꞌueheꞌ reheb: Ma̱cꞌaꞌ raj inma̱c, abanan xicꞌ quineꞌril.

Proverbios 24:15

Me̱cꞌu̱b junak naꞌleb incꞌaꞌ us xba̱nunquil re te̱ba̱nu raylal reheb li cha̱bileb. Chi moco tex-oc saꞌ li rochocheb chixpoꞌbal ru li cꞌaꞌruheb re.

Proverbios 29:24

Li ani na-oquen chirix junak aj e̱lkꞌ, aꞌan xicꞌ naril rib xjunes rib. Usta nayeheꞌ re nak tento tixye li ya̱l, abanan incꞌaꞌ naxye xban xxiu.