Oseas 4:1 - Li Santil hu

¹ Abihomak ra̱tin li Ka̱cuaꞌ, ex ralal xcꞌajol laj Israel, xban nak yo̱ xjoskꞌil saꞌ e̱be̱n la̱ex li cuanquex saꞌ li naꞌajej aꞌin. Joꞌcaꞌin yo̱ chixyebal li Ka̱cuaꞌ Dios: —Ma̱ ani ti̱c xchꞌo̱l ut ma̱ ani na-uxta̱nan u ut ma̱ ani naqꞌuehoc retal nak La̱in li Ka̱cuaꞌ Dios.

Q'eqchi Bible

¹ Ab'ihomaq li raatin li Qaawa', ex aj Israel. Ok re sa' raqb'a aatin rik'ineb' li wankeb' sa' li tenamit a'in, xb'aan naq maak'a' chik arin li tiikil ch'oolej ut li rahok, maajun chik nanawok ru li Qaawa'.

Oseas 4:1 ပူးပေါင်းရင်းမြစ်များ

Jeremías 4:22

Li Ka̱cuaꞌ quixye: —Ma̱cꞌaꞌeb xnaꞌleb lin tenamit. Incꞌaꞌ nequeꞌxnau cuu. Chanchaneb li cocꞌal li ma̱cꞌaꞌeb xnaꞌleb. Chanchaneb li cocꞌal li incꞌaꞌ nequeꞌxtau xya̱lal. Cuanqueb xnaꞌleb chixba̱nunquil li ma̱usilal, abanan incꞌaꞌ nequeꞌraj xba̱nunquil li us, chan.

Miqueas 6:2

Abihomak la̱ex aj Israel. Li Ka̱cuaꞌ oc re chi rakoc a̱tin saꞌ e̱be̱n. Ta̱abi̱k resil yalak bar saꞌ xya̱nkeb li tzu̱l li xakxo̱queb chi cau saꞌ xnaꞌajeb. Abihomak li yo̱ chixyebal li Ka̱cuaꞌ. Li Ka̱cuaꞌ yo̱ xjoskꞌil saꞌ xbe̱neb lix tenamit. Oc re chixyebal cꞌaꞌru lix ma̱queb laj Israel.

1 Corintios 15:34

Checꞌoxla chi us li yo̱quex chixba̱nunquil ut mexma̱cob chic. Cuanqueb saꞌ e̱ya̱nk li toj ma̱jiꞌ nequeꞌxpa̱b li Dios. Re xcꞌutbal e̱xuta̱n nak ninye e̱re chi joꞌcaꞌin.

Romanos 1:28

Xban nak incꞌaꞌ nequeꞌxcꞌoxla li Dios, joꞌcan nak queꞌtzꞌekta̱na̱c xban li Dios saꞌ li tzꞌekbe̱tal aj naꞌleb chixba̱nunquil li moco uxc ta naraj.

Oseas 12:2

Li Ka̱cuaꞌ yo̱ xjoskꞌil saꞌ xbe̱neb li ralal xcꞌajol laj Judá ut tixqꞌueheb chixtojbal xma̱queb li ralal xcꞌajol laj Jacob aꞌ yal chanru xyehom xba̱nuhomeb. Tixqꞌueheb chixtojbal xma̱queb joꞌ xcꞌulubeb.

Jeremías 25:31

Teꞌrabi chixjunileb toj saꞌ xmaril li ruchichꞌochꞌ nak li Ka̱cuaꞌ li nimajcual Dios ta̱rakok a̱tin saꞌ xbe̱neb li tenamit. Li Ka̱cuaꞌ tixqꞌueheb chixjunileb chixtojbal lix ma̱queb ut tixqꞌueheb chi camsi̱c riqꞌuin chꞌi̱chꞌ li nequeꞌba̱nun re li ma̱usilal, chan li Ka̱cuaꞌ.

Jeremías 5:4

La̱in quinye nak aꞌaneb li nebaꞌ li incꞌaꞌ queꞌxtzol ribeb. Incꞌaꞌ nequeꞌxtau ru li cꞌaꞌru naraj li Dios, chi moco nequeꞌxnau nak tento teꞌxba̱nu li cꞌaꞌru quixye.

Isaías 34:1

Quimkex la̱ex li cuanquex saꞌ eb li xni̱nkal ru tenamit, ut chꞌutubomak e̱rib chirabinquil li oc cue chixyebal. Ex tenamit checanabak e̱rib chixqꞌuebal retal li tinye e̱re. Cherabihak che̱junilex la̱ex li cuanquex saꞌ ruchichꞌochꞌ ut cheqꞌuehak retal.

Isaías 1:18

Joꞌcaꞌin quixye li Ka̱cuaꞌ: —Quimkex. Abihomak ut chetauhak xya̱lal li cꞌaꞌru tinye e̱re. Cui tzꞌaj ru le̱ ra̱m xban li ma̱c, la̱in tinsakobresi nak tincuy le̱ ma̱c. Sak chic ta̱cana̱k joꞌ xsakal li ratzꞌam que. Cui le̱ ma̱c joꞌ li caki bon ma̱ jokꞌe na-el, aban la̱in tinsakobresi le̱ ra̱m ut joꞌ xsakal li nokꞌ ta̱cana̱k.

Apocalipsis 2:29

Cui te̱raj xtaubal ru lix ya̱lal, cheqꞌuehak retal li naxye li Santil Musikꞌej reheb laj pa̱banel, chan li Cꞌajolbej reheb laj pa̱banel li cuanqueb Tiatira.

Apocalipsis 2:11

Cui te̱raj xtaubal ru lix ya̱lal, cheqꞌuehak retal li naxye li Santil Musikꞌej reheb laj pa̱banel. Li ani tixcuy xnumsinquil chixjunil li raylal aꞌin ut incꞌaꞌ nachꞌinan xchꞌo̱l saꞌ lix pa̱ba̱l, li jun aꞌan incꞌaꞌ tixcꞌul lix cab xcamic. Incꞌaꞌ ta̱xic saꞌ xbalba, chan li Cꞌajolbej reheb laj Esmirna.

San Juan 8:55

La̱ex incꞌaꞌ nequenau ru aꞌan. Abanan la̱in ninnau ru. Cui ut tinye ta nak incꞌaꞌ ninnau ru, la̱inak raj aj ticꞌtiꞌ joꞌ la̱ex. Aban la̱in ninnau ru ut ninba̱nu li cꞌaꞌru naxye aꞌan.

Amós 7:16

Joꞌcan nak chacuabi li ra̱tin li Ka̱cuaꞌ. La̱at incꞌaꞌ nacacuaj tinye li raylal li xchal saꞌ e̱be̱n la̱ex laj Israel, chi moco nacacuaj tinye li cꞌaꞌru xchal saꞌ e̱be̱n la̱ex li ralal xcꞌajol laj Isaac. Joꞌcan ut nak tinye a̱cue li cꞌaꞌru xye cha̱cuix li Ka̱cuaꞌ.

Oseas 5:1

La̱ex laj tij, cherabihak li oc cue chixyebal. La̱ex laj Israel, cheqꞌuehak retal li tinye. Ex ralal xcꞌajol li rey, abihomak li tinye anakcuan. Xexrakoc raj a̱tin saꞌ xbe̱neb li tenamit saꞌ ti̱quilal. Abanan incꞌaꞌ xeba̱nu. Joꞌcan nak ta̱rakekꞌ a̱tin saꞌ e̱be̱n la̱ex ut texinqꞌue chixtojbal rix le̱ ma̱c. Xeqꞌue e̱rib joꞌ jun raꞌal reheb laj Mizpa joꞌ ajcuiꞌ reheb laj Tabor.

Jeremías 34:4

At Sedequías, chaqꞌuehak retal li yo̱quin chixyebal a̱cue. La̱at incꞌaꞌ tatcamsi̱k saꞌ li ple̱t.

Jeremías 19:3

Ta̱ye reheb, “La̱ex lix reyeb laj Judá ut la̱ex li cuanquex Jerusalén, cherabi li cꞌaꞌru naxye li Ka̱cuaꞌ. Li Ka̱cuaꞌ li nimajcual Dios li nequeꞌxlokꞌoni eb laj Israel naxye chi joꞌcaꞌin: Qꞌuehomak retal. La̱in tinqꞌue jun li raylal saꞌ li naꞌajej aꞌin. Ut ta̱rahokꞌ saꞌ xxiqueb chirabinquil li cꞌaꞌru tinba̱nu.

Jeremías 9:20

Laj Jeremías quixye: —La̱in quinye reheb, “La̱ex ixk, abihomak li cꞌaꞌru naxye li Ka̱cuaꞌ. Qꞌuehomak retal li naxye. Cꞌutumak chiruheb le̱ coꞌ chanru teꞌya̱bak. Ut cꞌutumak ajcuiꞌ li bich re rahil chꞌo̱lej chiruheb le̱ rami̱g.

Jeremías 7:28

La̱at ta̱ye reheb: La̱ex aj Israel, la̱ex jun li tenamit li incꞌaꞌ xeba̱nu li cꞌaꞌru xye e̱re li Ka̱cuaꞌ. Incꞌaꞌ xecꞌu̱luban le̱ kꞌusbal xqꞌue e̱re li Ka̱cuaꞌ le̱ Dios. Incꞌaꞌ nequexcuan saꞌ xya̱lal, chi moco nequeye li ya̱l.

Jeremías 6:13

Chixjunileb nequeꞌxrahi ru li biomal, joꞌ eb li toj sa̱jeb, joꞌ ajcuiꞌ li ac che̱queb. Eb li profeta ut eb laj tij aj balakꞌeb.

Jeremías 4:28

Ta̱rahokꞌ xchꞌo̱l li ruchichꞌochꞌ ut ta̱kꞌojyi̱nokꞌ ru li choxa. Li Ka̱cuaꞌ quixye nak ta̱cꞌulma̱nk chi joꞌcan ut aꞌan incꞌaꞌ tixjal xcꞌaꞌux.

Jeremías 2:4

La̱ex aj Israel, li ralal xcꞌajol laj Jacob, cherabihak li cꞌaꞌru yo̱ chixyebal e̱re li Ka̱cuaꞌ.

Isaías 66:5

Abihomak li cꞌaꞌru naxye li Ka̱cuaꞌ e̱re la̱ex li nequexxucuac nak nequerabi li ra̱tin li Dios. —Nequextzꞌekta̱na le̱ ras e̱ri̱tzꞌin, li xicꞌ nequeꞌiloc e̱re, inban la̱in ut nequexhob nak nequeꞌxye, “Lokꞌoninbilak taxak li Ka̱cuaꞌ. Chisahokꞌ taxak e̱chꞌo̱l riqꞌuin”. Xuta̱nal teꞌe̱lk eb li nequeꞌyehoc re chi joꞌcaꞌin.

Isaías 34:8

xban nak aꞌan li cutan nak li Ka̱cuaꞌ tixqꞌue re̱kaj reheb laj Edom li raylal queꞌxba̱nu reheb laj Israel. Aꞌan li chihab nak teꞌxcꞌul re̱kaj li ma̱usilal queꞌxba̱nu.

Isaías 28:14

Abihomak li cꞌaꞌru naxye li Ka̱cuaꞌ e̱re la̱ex li nequextaklan saꞌ li tenamit Jerusalén, la̱ex li nequekꞌetkꞌeti e̱rib.

Isaías 5:3

Ut li raro inban quixye: —La̱ex aj Jerusalén ut la̱ex aj Judá, tzꞌilomak rix anakcuan ani cuan xma̱c. ¿Ma la̱in malaj ut li cuacui̱mk?

Isaías 1:10

La̱ex li nequexcꞌamoc be saꞌ li tenamit Jerusalén chanchanex laj Sodoma. Ut chanchanex laj Gomorra. Abihomak li yo̱ chixyebal e̱re li Ka̱cuaꞌ li kaDios. Qꞌuehomak retal lix ya̱lal li yo̱ chixchꞌolobanquil che̱ru.

1 Reyes 22:19

Li profeta Micaías quixye ajcuiꞌ: —Qꞌuehomak retal li cꞌaꞌru quixcꞌutbesi chicuu li Ka̱cuaꞌ. Xcuil li Ka̱cuaꞌ cꞌojcꞌo saꞌ lix cꞌojariba̱l saꞌ choxa. Ut chixjunileb lix ángel xakxo̱queb chixcꞌatk. Cuanqueb saꞌ lix nim ukꞌ ut cuanqueb saꞌ lix tzꞌe.

Isaías 59:4

Ma̱ ani na-ajoc rakoc a̱tin saꞌ ti̱quilal. Incꞌaꞌ nequeye li ya̱l saꞌ li rakleb a̱tin. Nequecꞌojob e̱chꞌo̱l riqꞌuin li ticꞌtiꞌ. Junes raylal ut ma̱usilal nequeba̱nu.

Isaías 59:8

Incꞌaꞌ nequenau chanru li cua̱nc saꞌ tuktu̱quil usilal chi moco nequeba̱nu li ti̱quilal. Junelic nequeba̱nu li incꞌaꞌ us ut eb li nequeꞌta̱ken e̱re incꞌaꞌ teꞌcua̱nk saꞌ tuktu̱quil usilal.

Jeremías 9:3

Li Ka̱cuaꞌ quixye: —Junelic se̱beb xchꞌo̱l chi ticꞌtiꞌic lin tenamit. Chanchaneb li nequeꞌcutuc riqꞌuin tzimaj. Nequeꞌxqꞌue xcuanquil li ticꞌtiꞌ ut incꞌaꞌ nequeꞌxqꞌue xcuanquil li ya̱l. Numtajenak li ma̱usilal nequeꞌxba̱nu ut incꞌaꞌ nequeꞌraj xqꞌuebal inlokꞌal, la̱in li Ka̱cuaꞌ.

Jeremías 51:5

Eb li ralal xcꞌajol laj Israel ut eb li ralal xcꞌajol laj Judá incꞌaꞌ queꞌtzꞌekta̱na̱c chi junaj cua xban li Ka̱cuaꞌ, li nimajcual Dios, usta numtajenak lix ma̱queb chiru li Ka̱cuaꞌ lix santil Dioseb.

Joel 1:2

Cherabihak la̱ex li ac che̱quex. Ut cherabihak che̱junilex la̱ex li cuanquex arin Judá. ¿Ma ac e̱cꞌulum ta biꞌ jun sutak li raylal aꞌin? Ut, ¿ma ac xcꞌulumeb ta biꞌ jun sutak le̱ xeꞌto̱nil yucuaꞌ chi joꞌcaꞌin?

Salmos 81:9

Micuan jalanil dios e̱riqꞌuin chi moco te̱lokꞌoni ru lix dioseb li jalaneb xtenamit,

Jeremías 2:9

Joꞌcan nak la̱in tinrakok a̱tin saꞌ e̱be̱n la̱ex joꞌ ajcuiꞌ saꞌ xbe̱neb le̱ ralal e̱cꞌajol.

Jeremías 9:7

Joꞌcan nak li Ka̱cuaꞌ naxye chi joꞌcaꞌin: —Chanchan nak numsinbil saꞌ xam nak tinqꞌue li raylal saꞌ xbe̱neb re nak teꞌxtau xnaꞌlebeb. Cui incꞌaꞌ tinba̱nu chi joꞌcan, ¿cꞌaꞌ chic ru ta̱ru̱k tinba̱nu reheb re teꞌusa̱k?

Jeremías 11:7

Chalen nak queꞌcuisi chak le̱ xeꞌto̱nil yucuaꞌ Egipto ut toj chalen anakcuan la̱in nabal sut quebinkꞌus. Chalen junxil yo̱quin chak chixyebal reheb: Cherabihak li cꞌaꞌru ninye.

Ezequiel 16:35

Joꞌcan ut la̱at ixakilbej li nacamux ru la̱ sumlajic, chacuabi li cꞌaꞌru naxye a̱cue li Ka̱cuaꞌ.

Oseas 5:4

Xban le̱ ma̱usilal incꞌaꞌ chic nequecꞌoxla sukꞌi̱c cuiqꞌuin la̱in le̱ Dios. Nequeqꞌue ban e̱chꞌo̱l chixlokꞌoninquil li yi̱banquil dios. Joꞌcan nak incꞌaꞌ naru te̱nau cuu nak la̱in li Ka̱cuaꞌ.

Oseas 12:3

Toj ma̱jiꞌ ajcuiꞌ nequeꞌyoꞌla laj Jacob li kaxeꞌto̱nil yucuaꞌ ut laj Esaú, ac yo̱queb chixpletinquil ribeb. Chapcho lix cux rok laj Esaú xban laj Jacob nak queꞌyoꞌla. Ut mokon nak nim chic, laj Jacob quipletic riqꞌuin lix ángel li Ka̱cuaꞌ.

Amós 3:1

La̱ex laj Israel, cherabihak li naxye li Ka̱cuaꞌ che̱rix che̱junilex la̱ex li quexrisi chak saꞌ li tenamit Egipto nak quixye chi joꞌcaꞌin: