Miqueas 5:8 - Li Santil hu

⁸ Ut eb laj Israel, li joꞌ qꞌuial chic li incꞌaꞌ teꞌosokꞌ, aꞌanakeb li kꞌaxal cauhakeb rib saꞌ xya̱nkeb chixjunileb li tenamit. Chanchanakeb li cakcoj li kꞌaxal cau rib saꞌ xya̱nkeb chixjunileb li xul saꞌ qꞌuicheꞌ. Ma̱ ani ta̱ru̱k tixcol rib chiruheb laj Israel. Chanchanakeb li ral cakcoj nak na-oc saꞌ xya̱nkeb li carner ut naxchap jun ut naxpedasi ut ma̱ ani naru nacoloc re chiru.

Q'eqchi Bible

⁸ Sa' xyanqeb' li tenamit ut eb' li k'iila poyanam, li rela'eb' li ralal xk'ajol laj Jakob chanchanaqeb' li kaqkoj sa' xyanqeb' li k'iila josq' aj xul sa'eb' li k'iche', jo'aqeb' li ral kaqkoj sa' xyanqeb' li karneer: nat'upink ut nasachok b'arwi' nanume'k, ut maajun naramok chiru.

Miqueas 5:8 ပူးပေါင်းရင်းမြစ်များ

Zacarías 10:5

Cauhakeb rib laj Israel chi pletic joꞌ li soldado li nequeꞌxyekꞌi li xicꞌ nequeꞌiloc reheb saꞌ li sulul li cuan saꞌ be. Teꞌnumta̱k saꞌ xbe̱neb li xicꞌ nequeꞌiloc reheb xban nak la̱in li Ka̱cuaꞌ tincua̱nk riqꞌuineb. Teꞌxcꞌut xxuta̱neb li nequeꞌchal chirix cacua̱y chi pletic riqꞌuineb.

Miqueas 4:13

Li Ka̱cuaꞌ tixye reheb lix tenamit: —La̱ex aj Jerusalén, ayukex. La̱ex chic texnumta̱k saꞌ xbe̱neb li xicꞌ nequeꞌiloc e̱re. La̱in tinqꞌuehok e̱cacuilal. Chanchanakex li joskꞌ aj cuacax. Chanchan cua̱nk le̱ xucub hierro. Ut le̱ rok chanchanak bronce. Texnumta̱k saꞌ xbe̱neb nabal chi tenamit. Ut li cꞌaꞌru te̱re̱chani te̱kꞌaxtesi cue. Lix biomaleb te̱mayeja chicuu. La̱in li Ka̱cuaꞌ li kꞌaxal nim incuanquil saꞌ xbe̱neb chixjunileb li cuanqueb saꞌ ruchichꞌochꞌ, chan li Ka̱cuaꞌ.

Zacarías 12:3

Ut saꞌeb li cutan aꞌan la̱in tinqꞌue cuiꞌchic xcuanquileb laj Jerusalén. Chanchanakeb chic jun li pec kꞌaxal a̱l. Ut chixjunileb li xni̱nkal ru tenamit teꞌxjunaji ribeb ut teꞌxyal numta̱c saꞌ xbe̱neb laj Jerusalén. Abanan incꞌaꞌ teꞌxcuy xmetzꞌe̱uheb laj Jerusalén. Kꞌaxal ra teꞌxcꞌul.

Zacarías 9:15

Li nimajcual Dios tixcoleb lix tenamit Israel. Ut aꞌaneb teꞌnumta̱k saꞌ xbe̱neb li xicꞌ nequeꞌiloc reheb ut teꞌxyekꞌi saꞌ rokeb li pec li teꞌcutekꞌ cuiꞌ. Teꞌsachekꞌ chi junaj cua li xicꞌ nequeꞌiloc reheb laj Israel joꞌ nak nacamsi̱c li xul li nequeꞌxmayeja. Nequeꞌxxoc lix quiqꞌuel saꞌ jun li secꞌ ut nequeꞌxqꞌue saꞌ xxuc li artal.

Oseas 5:14

La̱in tincꞌut lin joskꞌil chiruheb li ralal xcꞌajol laj Efraín. Chanchanakin li cakcoj nak tinrahobtesiheb. Chanchanakin li ral li cakcoj nak tinrahobtesiheb li ralal xcꞌajol laj Judá. Joꞌ nak naxchap lix tib li cakcoj, joꞌcan ajcuiꞌ tinba̱nu la̱in riqꞌuineb. La̱in tinqꞌueheb saꞌ raylal ut tincanabeb xjuneseb ut ma̱ ani ta̱ru̱k ta̱colok reheb saꞌ cuukꞌ.

Salmos 50:22

Cheqꞌuehak retal aꞌin la̱ex li nequextzꞌekta̱nan cue. Cheba̱nuhak cue̱nt. Ma̱re anchal texinsach chi junaj cua ut ma̱ ani chic naru ta̱colok e̱re.

Hebreos 12:25

Me̱tzꞌekta̱na li ra̱tin li Dios joꞌ queꞌxba̱nu eb laj Israel. Eb aꞌan incꞌaꞌ queꞌxcuy rabinquil xchakꞌrab li Dios ut queꞌxtzꞌekta̱na li ra̱tin nak quichꞌoloba̱c chak xya̱lal chiruheb aran saꞌ li tzu̱l. Ut quirakeꞌ a̱tin saꞌ xbe̱neb. Cui incꞌaꞌ queꞌcoleꞌ eb aꞌan, ¿ma tojaꞌ ta chic la̱o tocolekꞌ cui takatzꞌekta̱na li Dios li naa̱tinac chak toj saꞌ choxa?

Hechos 18:6

Abanan eb aꞌan incꞌaꞌ queꞌcuulac chiru li yo̱ chixyebal laj Pablo. Queꞌoc chi majecua̱nc. Joꞌcan nak laj Pablo quixchikꞌchikꞌi li rakꞌ ut quixye reheb: —Cui la̱ex incꞌaꞌ texcolekꞌ, aꞌ yal e̱re. Saꞌ e̱be̱n la̱ex cuan li ma̱c. La̱in ma̱cꞌaꞌ inma̱c xban nak ac xinye e̱re lix ya̱lal. Chalen anakcuan la̱in tinchꞌolob xya̱lal reheb li ma̱cuaꞌeb aj judío, chan.

San Mateo 10:14

Ut yalak ani incꞌaꞌ ta̱cꞌuluk e̱re chi moco ta̱rabi le̱ ra̱tin, nak tex-e̱lk saꞌ li cab aꞌan, malaj ut saꞌ li tenamit, te̱chikꞌchikꞌi li poks cuan che̱rok chokꞌ retalil nak incꞌaꞌ chic texcꞌoxlak chirix li naꞌajej aꞌan.

Génesis 49:9

La̱at, Judá, la̱at joꞌ ral jun li cakcoj li cau rib chiru chixjunileb li xul. Joꞌcan nak nacatinjuntakꞌe̱ta riqꞌuin li cakcoj xban nak cau a̱cuib. Li cakcoj naxchap li xul ut naxtiu ut natakeꞌ saꞌ li tzu̱l, ut aran nabuchla chak ut ma̱ ani naru nachꞌeꞌoc re.

Hebreos 2:3

Cui eb aꞌan queꞌxcꞌul xtojbal xma̱c, ¿chan put ru nak tocolekꞌ la̱o chiru li tojba ma̱c cui nakatzꞌekta̱na li lokꞌlaj colba-ib li quixyechiꞌi ke li Ka̱cuaꞌ Jesucristo? Li Jesucristo quixyechiꞌi ke li kacolbal kꞌaxal lokꞌ. Ut chirix aꞌan, eb li queꞌabin re li ra̱tin, aꞌan eb ajcuiꞌ queꞌchꞌoloban lix ya̱lal chiku.

Números 24:9

Eb laj Israel chanchaneb li cakcoj. Nak nequeꞌoc chi hila̱nc, ma̱ ani naru na-ajsin reheb. Osobtesinbilakeb li teꞌxtzꞌa̱ma rosobtesinquileb laj Israel. Ut tzꞌekta̱nanbilakeb li teꞌxtzꞌa̱ma ma̱usilal saꞌ xbe̱neb, chan laj Balaam.

Salmos 44:5

La̱at tattenkꞌa̱nk ke chi numta̱c saꞌ xbe̱neb li nequeꞌrahobtesin ke. Saꞌ a̱cꞌabaꞌ la̱at, la̱o toe̱chani̱nk reheb li xicꞌ nequeꞌiloc ke.

Salmos 104:20

La̱at caqꞌue li kꞌojyi̱n ut eb li xul li cuanqueb saꞌ qꞌuicheꞌ nequeꞌel chi be̱c chiru li kꞌojyi̱n.

Proverbios 30:30

Lix be̱n, aꞌan li cakcoj li kꞌaxal cau rib saꞌ xya̱nkeb li xul. Ut ma̱ ani naxxucua ru.

Isaías 5:29

Nak teꞌxjap reheb li soldado chanchan nak nequeꞌxjap re li cakcoj malaj ut li ral li cakcoj nak oc re chixchapbal lix tib ut ma̱ ani ta̱makꞌok chiru.

Ezequiel 39:10

Incꞌaꞌ teꞌxic aj siꞌ saꞌ cꞌaleba̱l, chi moco teꞌxyocꞌ xsiꞌeb saꞌ qꞌuicheꞌ xban nak teꞌxcꞌat chokꞌ xsiꞌeb li cꞌaꞌru quicꞌanjelac re pletic. Ut teꞌxmakꞌ chiruheb li xicꞌ nequeꞌiloc reheb li cꞌaꞌru quimakꞌeꞌ chiruheb laj Israel junxil, chan li Ka̱cuaꞌ.

Miqueas 2:12

Chi ya̱l la̱in texinxoc cuiꞌchic la̱ex aj Israel ut tinchꞌutub cuiꞌchic e̱ru li joꞌ qꞌuialex chic li xexcoleꞌ. Chanchanakex li carner li cuanqueb aran Bosra nak texinqꞌue cuiꞌchic saꞌ li naꞌajej li quinqꞌue e̱re junxil. Ut texqꞌuia̱nk toj retal ta̱nujak cuiꞌchic li naꞌajej, chan li Ka̱cuaꞌ.

Miqueas 4:7

Rahobtesinbileb anakcuan ut najt cuanqueb. Abanan ta̱cuulak xkꞌehil nak tinqꞌueheb cuiꞌchic chi qꞌuia̱nc ut teꞌcua̱nk cuiꞌchic xcuanquil li incꞌaꞌ queꞌsacheꞌ. Ut la̱in li Ka̱cuaꞌ tintakla̱nk saꞌ xbe̱neb saꞌ li tzu̱l Sión chalen anakcuan ut chi junelic, chan li Ka̱cuaꞌ.

Miqueas 5:3

Joꞌcan utan li Dios tixcanabeb xjuneseb lix tenamit toj ta̱cuulak xkꞌehil nak ta̱yoꞌla̱k li Acuabej arin saꞌ ruchichꞌochꞌ. Ut ta̱cuulak xkꞌehil nak teꞌsukꞌi̱k cuiꞌchic saꞌ lix tenamiteb laj Israel li joꞌ qꞌuial chic queꞌcana.

Miqueas 7:18

Ma̱ jun chic li Dios cuan. Caꞌaj cuiꞌ la̱at. La̱at nacatcuyuc ma̱c ut nasach saꞌ a̱chꞌo̱l lix ma̱queb la̱ tenamit Israel, li joꞌ qꞌuial chic li incꞌaꞌ queꞌsacheꞌ. La̱at incꞌaꞌ nacatjoskꞌoꞌ chi junaj cua. Nasahoꞌ ban saꞌ a̱chꞌo̱l chi uxta̱na̱nc u.

Zacarías 11:6

Joꞌcan ajcuiꞌ la̱in incꞌaꞌ chic tincuil xtokꞌoba̱l ruheb lin tenamit, chan li Ka̱cuaꞌ. —Tincanabeb ban re nak xicꞌ teꞌril ribeb chi ribileb rib. Tinkꞌaxtesiheb saꞌ rukꞌeb lix reyeb toj retal teꞌsachekꞌ xbaneb. Ut la̱in incꞌaꞌ tincoleb saꞌ rukꞌeb, chan li Ka̱cuaꞌ.

Malaquías 4:3

Saꞌ li cutan aꞌan, la̱in tinqꞌueheb li incꞌaꞌ useb xnaꞌleb rubel le̱ cuanquil la̱ex. Chanchanakeb chic li poks li nequeyekꞌi saꞌ e̱rok.

Zacarías 14:18

Ut cui eb laj Egipto incꞌaꞌ teꞌxic aran Jerusalén chi lokꞌoni̱nc rajlal chihab saꞌ li ninkꞌe aꞌan, li Ka̱cuaꞌ Dios tixqꞌue ajcuiꞌ raylal saꞌ xbe̱neb joꞌ nak quixqꞌue raylal saꞌ xbe̱neb li xni̱nkal ru tenamit ut incꞌaꞌ tixqꞌue li hab saꞌ xbe̱n li racui̱mkeb.