Miqueas 1:7 - Li Santil hu

⁷ Ut chixjunil lix yi̱banbil dios tinpuqꞌuiheb. Ut tincꞌat chixjunil li qꞌuebil reheb li ixk aj yumbe̱t, li queꞌcꞌanjelac chiru lix dioseb. Tinsacheb ru chixjunileb lix yi̱banbil dios. Jalan xtenamiteb quicꞌutuc chiruheb xlokꞌoninquil li jalanil dios ut anakcuan jalan chic xtenamiteb ta̱makꞌok chiruheb lix dioseb joꞌ ajcuiꞌ lix biomaleb li ixk aj yumbe̱t li queꞌcꞌanjelac chiru lix dioseb, chan li Dios.

Q'eqchi Bible

⁷ Chixjunileb' li xyiib'anb'il yos taaputz'imanq, ut taak'atmanq jo'nimal tamresinb'il rik'in li jo'maajo'il b'aanuhom. Tinjuk' chixjunileb' li yal k'oxlanb'il yos, xb'aan naq yiib'anb'ileb' rik'in xtojb'aleb' laj yumb'eet, ut a'an wi' chik tinkanab'eb' wi'!”.

Miqueas 1:7 ပူးပေါင်းရင်းမြစ်များ

Deuteronomio 23:18

Ut incꞌaꞌ naru teꞌxqꞌue chokꞌ xmayej saꞌ lix tabernáculo li Ka̱cuaꞌ le̱ Dios li tumin li nequeꞌxcꞌul li nequeꞌxcꞌayi ribeb. Incꞌaꞌ naru nequeꞌxtoj riqꞌuin li tumin aꞌan li cꞌaꞌru xeꞌxyechiꞌi re li Dios. Li Ka̱cuaꞌ xicꞌ naril li ma̱c aꞌan.

Oseas 2:12

La̱in tinsach li racui̱mk uvas ut li cheꞌ higo li quixye nak aꞌan lix tojbal li quiqꞌueheꞌ re xbaneb li cui̱nk li nequeꞌrahoc re. Ma̱cꞌaꞌ chic ta̱e̱lk saꞌ xnaꞌaj li acui̱mk uvas ut ma̱cꞌaꞌak chic li cheꞌ li nau̱chin. Teꞌsachekꞌ xbaneb li joskꞌ aj xul.

Apocalipsis 18:3

Xsacheꞌ xcuanquil xban nak numtajenak li ma̱c nequeꞌxba̱nu. Chixjunileb li rey li cuanqueb saꞌ ruchichꞌochꞌ nequeꞌcuulac Babilonia chixba̱nunquil li ma̱usilal riqꞌuineb. Chanchan calajenakeb xban li ma̱usilal yo̱queb chixba̱nunquil. Ut eb laj cꞌay queꞌbiomoꞌ aran xban nak nabal li cꞌaꞌak re ru queꞌxcꞌayi chi terto xtzꞌak, chan.

Oseas 8:6

Aꞌan moco dios ta. Yal yi̱banbil xban jun laj tenol chꞌi̱chꞌ re Israel. Li cuacax oro li nequeꞌxlokꞌoni aran Samaria ta̱puqꞌui̱k.

Apocalipsis 18:9

Eb li rey li cuanqueb saꞌ ruchichꞌochꞌ li queꞌcuulac aran Babilonia chixba̱nunquil li ma̱usilal rochbeneb ut queꞌsahoꞌ saꞌ xchꞌo̱leb riqꞌuineb, ta̱rahokꞌ saꞌ xchꞌo̱leb chirilbal nak yo̱k chi sachecꞌ ru li tenamit. Teꞌya̱bak xban xrahil xchꞌo̱leb nak teꞌril xsibel li tenamit nak yo̱k chi cꞌatc.

Joel 3:3

Queꞌbu̱lic chirixeb lin tenamit. Ut queꞌxcꞌayiheb li sa̱j al chokꞌ xtojbaleb li ixk li nequeꞌxcꞌayi ribeb. Ut queꞌxcꞌayiheb li tukꞌ ixk chokꞌ xtzꞌak li vino li nequeꞌrucꞌ.

Oseas 2:5

xban nak eb aꞌan ralal xcꞌajol li ixk li incꞌaꞌ naxuta̱nac xba̱nunquil li ma̱usilal. Li ixk aꞌan quixye: —La̱in tinxic riqꞌuineb li cui̱nk li nequeꞌqꞌuehoc cue lin cua cuucꞌa, li nequeꞌqꞌuehoc cue li cha̱bil tꞌicr lana ut lino joꞌ ajcuiꞌ li vino ut li aceite olivo, chan.

Isaías 27:9

Li Dios tixcuy xma̱queb laj Israel nak telajeꞌxjuqꞌui chixjunil li artal li nequeꞌlokꞌoni̱c cuiꞌ li jalanil dios. Tixcuy xma̱queb nak ma̱cꞌaꞌak chic li yi̱banbil dios xAsera, chi moco li naꞌajej li nacꞌatman cuiꞌ li pom.

2 Crónicas 31:1

Nak queꞌrakeꞌ chi ninkꞌei̱c, eb laj Israel li cuanqueb Jerusalén queꞌco̱eb saꞌ eb li tenamit li cuanqueb saꞌ xcue̱nt Judá. Queꞌxjuqꞌui li ni̱nki pec li nequeꞌxlokꞌoni cuiꞌ li yi̱banbil dios ut queꞌxjori lix jalam u̱ch lix Asera. Queꞌxjuqꞌui li naꞌajej li najt xteram ut eb li artal li cuanqueb yalak bar saꞌ lix naꞌajeb li ralal xcꞌajol laj Judá, laj Benjamín, laj Efraín ut laj Manasés. Nak queꞌxchoy xsachbal chixjunil, eb laj Israel quilajeꞌco̱eb saꞌ lix naꞌajeb saꞌ lix tenamiteb.

Deuteronomio 9:21

Ut la̱in quinchap li cuacax oro li queyi̱b nak quexma̱cob chiru li Dios ut quincꞌat saꞌ xam. Chirix aꞌan quinjori ut quinqueꞌi ut lix poksil quincut saꞌ li nimaꞌ li yo̱ chi xic saꞌ li ru takꞌa.

Levítico 26:30

La̱in tintꞌan li naꞌajej li najt xteram li nequexlokꞌonin cuiꞌ. Ut tinjucꞌ li artal li nequecꞌat cuiꞌ le̱ pom. Ut la̱in tintu̱b le̱ camenak saꞌ xbe̱neb le̱ yi̱banbil dios, li moco yoꞌyo̱queb ta. Ut xicꞌ chic texcuil.

1 Samuel 5:4

Saꞌ li cutan jun chic eb laj Asdod queꞌcuulac cuiꞌchic aran ut queꞌxtau cuiꞌchic laj Dagón tꞌantꞌo saꞌ chꞌochꞌ chiru lix Lokꞌlaj Ca̱x li Ka̱cuaꞌ. Tokol lix cux ut tokoleb ajcuiꞌ li rukꞌ chi xcabichal ut cuanqueb aran chiru li oqueba̱l re li ochoch. Caꞌaj chic lix nimal quicana chi incꞌaꞌ quijoreꞌ.

Isaías 2:18

Ut ta̱risiheb chixjunileb li yi̱banbil dios. Ma̱ jun chic ta̱cana̱k.

Isaías 23:17

Nak acak xnumeꞌ li laje̱b xca̱cꞌa̱l (70) chihab li Ka̱cuaꞌ tixcanabeb cuiꞌchic li tenamit Tiro chi cꞌayi̱nc ut chi lokꞌoc riqꞌuineb chixjunileb li tenamit yalak bar saꞌ ruchichꞌochꞌ. Chanchanakeb li ixk li nequeꞌxcꞌayi rib.

Ezequiel 6:6

Saꞌ chixjunil li naꞌajej li texcua̱nk cuiꞌ ta̱sachekꞌ ruheb. Ta̱sachekꞌ ruheb chi junaj cua le̱ artal li nequexlokꞌonin cuiꞌ ut eb le̱ yi̱banbil dios ta̱puqꞌui̱k. Li artal li nequecꞌat cuiꞌ li incienso teꞌpoꞌi̱k. Chixjunil li quilaje̱yi̱b ta̱poꞌi̱k chi junaj cua.

Oseas 2:14

Abanan la̱in tincꞌam cuiꞌchic saꞌ li chaki chꞌochꞌ bar cuiꞌ ma̱cꞌaꞌ cuan. Ut aran tinkꞌunbesi cuiꞌchic ut tinye re nak kꞌaxal ninra.

Oseas 8:5

La̱in xicꞌ nacuil li cuacax oro li nequeꞌxlokꞌoniheb laj Samaria. Cꞌajoꞌ lin joskꞌil yo̱ saꞌ xbe̱neb. ¿Ma ma̱ jokꞌe teꞌxcanab xba̱nunquil li ma̱usilal?