San Marcos 8:31 - Li Santil hu

³¹ Li Jesús quixchꞌolob xya̱lal chiruheb nak aꞌan li Alalbej ut nak nabal li raylal cha̱lc re saꞌ xbe̱n. Quixye reheb nak ta̱tzꞌekta̱na̱k xbaneb li xakabanbileb chi cꞌanjelac saꞌ li templo. Ta̱tzꞌekta̱na̱k ajcuiꞌ xbaneb li xbe̱nil aj tij. Joꞌ ajcuiꞌ xbaneb laj tzꞌi̱b ut quixye ajcuiꞌ reheb nak ta̱camsi̱k ut ta̱cuacli̱k cuiꞌchic chi yoꞌyo saꞌ rox li cutan.

Q'eqchi Bible

³¹ Li Jesus kixtikib' xtzolb'aleb' naq li K'ajolb'ej tento tixk'ul naab'al rahilal, tento taatz'eqtaanaaq xb'aaneb' li cheekel winq, li xb'eenileb' aj tij ut eb' laj tz'iib', taakamsiiq ut taawakliiq chi yo'yo sa' rox li kutan.

San Marcos 8:31 ပူးပေါင်းရင်းမြစ်များ

Hechos 7:35

Laj Moisés, aꞌan li queꞌxtzꞌekta̱na laj Israel nak queꞌxye: “¿Ani xqꞌuehoc a̱cue chi takla̱nc ut chi rakoc a̱tin?” chanqueb. Aꞌan li quitakla̱c chixtenkꞌanquileb laj Israel ut chixcolbaleb. Quitakla̱c xban li Ka̱cuaꞌ nak li ángel quixcꞌutbesi rib chiru saꞌ li jun to̱n chi qꞌuix yo̱ xxamlel.

San Juan 2:19

Quichakꞌoc li Jesús ut quixye reheb: —Jucꞌumak li templo aꞌin ut chiru oxib cutan tincuaclesi cuiꞌchic chi acꞌ, chan reheb.

San Lucas 24:26

¿Ma incꞌaꞌ ta biꞌ tento nak tixcꞌul chixjunil li raylal aꞌin li Cristo laj Colonel li yechiꞌinbil xban li Dios re nak ta̱qꞌuehekꞌ xlokꞌal? chan reheb.

San Lucas 17:25

Abanan tento nak la̱in li Cꞌajolbej tinrahobtesi̱k ut tintzꞌekta̱na̱k xbaneb li cuanqueb saꞌ ruchichꞌochꞌ saꞌ eb li cutan aꞌin.

San Marcos 12:10

¿Ma incꞌaꞌ xeril saꞌ li Santil Hu li naxye chi joꞌcaꞌin? Li pec li queꞌxtzꞌekta̱na laj cablanel, aꞌan li kꞌaxal lokꞌ li quiqꞌueman chokꞌ xxuc li cab.

San Mateo 21:42

Li Jesús quixpatzꞌ reheb: —¿Ma incꞌaꞌ xeril saꞌ li Santil Hu li naxye chi joꞌcaꞌin? Li pec li queꞌxtzꞌekta̱na laj cablanel, aꞌan li kꞌaxal lokꞌ, li quiqꞌueman chokꞌ xxuc li cab. Li Ka̱cuaꞌ, aꞌan quixqꞌue xlokꞌal li pec. Ut aꞌan xsachba chꞌo̱lej chokꞌ ke la̱o. (Sal. 118:22-23)

San Mateo 12:40

Joꞌ nak laj Jonás oxib cutan ut oxib kꞌojyi̱n quicuan chak saꞌ xsaꞌ li nimla car, joꞌcan ajcuiꞌ nak la̱in li Cꞌajolbej tincua̱nk oxib cutan ut oxib kꞌojyi̱n saꞌ li mukleba̱l.

Oseas 6:2

Usta ac xsach ku, abanan tixqꞌue cuiꞌchic li kayuꞌam chiru cuib oxib cutan ut tocua̱nk riqꞌuin.

1 Corintios 15:4

Joꞌ nak queꞌxtzꞌi̱ba chak li profeta najter, joꞌcan quicꞌulman. Li Ka̱cuaꞌ Jesucristo quimukeꞌ ut quicuacli cuiꞌchic chi yoꞌyo saꞌ rox li cutan.

San Lucas 24:44

Ut quixye reheb: —Li cꞌaꞌru xincꞌul, aꞌan ajcuiꞌ li quinserakꞌi chak e̱re nak toj cuanquin chak saꞌ e̱ya̱nk. Tento nak ta̱tzꞌaklok ru chixjunil li tzꞌi̱banbil chak retalil chicuix saꞌ lix chakꞌrab laj Moisés, joꞌ ajcuiꞌ saꞌ lix hu eb li profeta ut saꞌ ajcuiꞌ li Salmos, chan reheb.

Jonás 1:17

Ut li Dios quixcauresi jun li nimla car re ta̱nukꞌuk re laj Jonás. Ut laj Jonás quinukꞌeꞌ chi jun xban li car chi incꞌaꞌ quicꞌuxeꞌ. Ut quicuan oxib cutan ut oxib kꞌojyi̱n saꞌ xsaꞌ li nimla car aꞌan.

Isaías 53:3

Xicꞌ qui-ileꞌ ut quitzꞌekta̱na̱c xbaneb li cuanqueb saꞌ ruchichꞌochꞌ. Junes rahil chꞌo̱lejil quixcꞌul ut quixcuy li rahobtesi̱c. Ma̱ ani quiraj iloc re. Quikatzꞌekta̱na ut ma̱cꞌaꞌ na-oc cuiꞌ chiku nak quikil.

Salmos 118:22

Li pec li quitzꞌekta̱na̱c xbaneb laj cablanel, aꞌan li pec li kꞌaxal cha̱bil li quiqꞌueheꞌ chokꞌ xxuc li cab.

1 Samuel 10:19

Abanan la̱ex xetzꞌekta̱na li Ka̱cuaꞌ le̱ Dios, li quicoloc e̱re chiruheb li raylal ut li chꞌaꞌajquilal li cuanquex cuiꞌ. Anakcuan la̱ex nequeye: La̱o takaj junak karey, chanquex. Joꞌcan nak anakcuan us te̱chꞌutub e̱rib chiru li Ka̱cuaꞌ chi te̱p, aꞌ yal chanru xqꞌuial li junju̱nk chꞌu̱tal, chan laj Samuel.

1 Samuel 8:7

Ut li Ka̱cuaꞌ quixye re laj Samuel: —Ba̱nu li yo̱queb chixtzꞌa̱manquil a̱cue li tenamit. Ma̱cuaꞌ la̱at yo̱queb cha̱tzꞌekta̱nanquil. La̱in ban yo̱queb chintzꞌekta̱nanquil xban nak eb aꞌan incꞌaꞌ nequeꞌraj nak la̱in tintakla̱nk saꞌ xbe̱neb.

San Juan 12:48

Tento nak ta̱rakekꞌ a̱tin saꞌ xbe̱neb li nequeꞌtzꞌekta̱nan cue, li incꞌaꞌ nequeꞌpa̱ban re li cꞌaꞌru ninye. Li a̱tin li xinye, aꞌan ajcuiꞌ li ta̱qꞌuehok reheb chixtojbal rix lix ma̱queb saꞌ rosoꞌjiqueb li cutan.

San Mateo 27:63

Ut queꞌxye re: —Ka̱cuaꞌ, xjulticoꞌ ke li a̱tin quixye laj balakꞌ nak toj yoꞌyo̱k. Quixye nak saꞌ rox li cutan ta̱cuacli̱k cuiꞌchic chi yoꞌyo.