San Juan 9:31 - Li Santil hu

³¹ La̱o nakanau nak li Dios incꞌaꞌ narabi nak nequeꞌtijoc laj ma̱c. Narabi ban lix tijeb li nequeꞌxxucua ru ut nequeꞌxba̱nu li cꞌaꞌru naraj.

Q'eqchi Bible

³¹ Laa'o naqanaw naq li Yos ink'a' narab'iheb' laj maak; ab'an wi junaq naxxiwa ru li Yos ut naxb'aanu li rajom, a'an na'ab'iik.

San Juan 9:31 ပူးပေါင်းရင်းမြစ်များ

Proverbios 15:29

Li Ka̱cuaꞌ incꞌaꞌ narabi lix tijeb li incꞌaꞌ useb xnaꞌleb. Abanan eb li ti̱queb xchꞌo̱l, li Ka̱cuaꞌ narabi lix tijeb.

Isaías 1:15

Incꞌaꞌ chic nacuaj rilbal nak te̱taksi le̱ rukꞌ chi tijoc. Usta qꞌuila sut nequextijoc, abanan la̱in incꞌaꞌ chic tincuabi xban nak la̱ex aj camsinel.

Proverbios 28:9

Li ani incꞌaꞌ naraj rabinquil lix chakꞌrab li Dios, li Dios naxtzꞌekta̱na ajcuiꞌ lix tij aꞌan nak ta̱tijok.

Miqueas 3:4

Te̱ya̱ba raj chic xcꞌabaꞌ li Ka̱cuaꞌ, abanan aꞌan incꞌaꞌ chic texsume. Xmukbal ban chic rib tixba̱nu che̱ru saꞌ eb li cutan aꞌan, xban nak numtajenak li ma̱usilal ac xeba̱nu.

Salmos 145:19

Li Ka̱cuaꞌ naxqꞌue li cꞌaꞌru nequeꞌraj eb li nequeꞌxucuan ru. Narabi nak nequeꞌxtzꞌa̱ma xtenkꞌanquileb chiru ut naxcoleb.

Zacarías 7:13

Quixye ajcuiꞌ li Ka̱cuaꞌ: —Nak la̱in quina̱tinac riqꞌuineb incꞌaꞌ queꞌraj rabinquil li cꞌaꞌru quinye. Joꞌcan nak la̱in incꞌaꞌ ajcuiꞌ xeꞌcuabi nak xeꞌxtzꞌa̱ma xtenkꞌanquil chicuu.

Proverbios 21:13

Li ani incꞌaꞌ narabi nak yo̱ chixtzꞌa̱manquil xtenkꞌanquil li nebaꞌ, joꞌcan ajcuiꞌ tixcꞌul aꞌan. Incꞌaꞌ ta̱sume̱k nak tixtzꞌa̱ma xtenkꞌanquil.

Jeremías 14:12

Usta nequeꞌxba̱nu lix ayu̱n, la̱in incꞌaꞌ tinsumeheb nak teꞌxya̱ba lin cꞌabaꞌ. Usta nequeꞌxmayeja li ru li racui̱mkeb ut nequeꞌxcꞌat li xul chokꞌ xmayejeb chicuu, la̱in incꞌaꞌ tincꞌul. Tinqꞌueheb ban chi camsi̱c saꞌ li ple̱t, malaj ut teꞌca̱mk xban cueꞌej ut xban caki yajel, chan li Dios.

San Juan 15:16

Ma̱cuaꞌ la̱ex xexsicꞌoc cuu la̱in. La̱in ban xinsicꞌoc e̱ru la̱ex ut xexinxakab chixba̱nunquil li ti̱quilal. Le̱ ti̱quilal incꞌaꞌ ta̱osokꞌ. Ta̱cua̱nk ban chi junelic. Ut lin Yucuaꞌ tixqꞌue e̱re chixjunil li te̱tzꞌa̱ma saꞌ incꞌabaꞌ la̱in.

Ezequiel 8:18

Xban nak cꞌajoꞌ lin joskꞌil saꞌ xbe̱neb, la̱in tinqꞌueheb chixtojbal lix ma̱queb. La̱in incꞌaꞌ tintokꞌoba ruheb chi moco tincuuxta̱naheb ru. Usta nequeꞌxjap reheb chixya̱banquil lin cꞌabaꞌ, abanan la̱in incꞌaꞌ chic tincuabi lix tijeb.

San Juan 4:34

Li Jesús quixye reheb: —La̱in nasahoꞌ inchꞌo̱l nak ninba̱nu li cꞌaꞌru naraj li quitaklan chak cue ut tinchoy xba̱nunquil lix cꞌanjel. Aꞌan ru̱chil li cua chokꞌ cue la̱in, chan.

Salmos 18:41

Xeꞌxjap reheb chixtzꞌa̱manquil xtenkꞌanquil, abanan ma̱ ani quicoloc reheb. Queꞌxtzꞌa̱ma xtenkꞌanquileb a̱cue, at Ka̱cuaꞌ. Abanan la̱at incꞌaꞌ casume lix tijeb.

Li xHu LAJ JOB 42:8

Anakcuan te̱cꞌam cuukub li toro ut cuukub li carner te̱lom ut texxic riqꞌuin laj Job, laj cꞌanjel chicuu re nak aꞌan ta̱mayejak saꞌ e̱cꞌabaꞌ la̱ex. Laj Job ta̱tijok che̱rix ut la̱in tincuabi lix tij. Ma̱cꞌaꞌ tinba̱nu e̱re usta e̱cꞌulub xtojbal rix le̱ ma̱c xban nak incꞌaꞌ xeye li ya̱l chicuix joꞌ xba̱nu laj Job, chan li Dios.

Li xHu LAJ JOB 35:12

Nequeꞌxtzꞌa̱ma raj xtenkꞌanquileb, abanan li Dios incꞌaꞌ naxsumeheb xban nak nequeꞌxnimobresi ribeb ut incꞌaꞌ us lix naꞌlebeb.

San Juan 7:17

—Li ani ta̱ajok xba̱nunquil li cꞌaꞌru naraj li Dios, aꞌan tixnau ma re li Dios li tijleb li yo̱quin chixcꞌutbal malaj ut yal incꞌaꞌux injunes.

Jeremías 15:1

Tojoꞌnak li Ka̱cuaꞌ quixye cue: —Usta laj Moisés ut laj Samuel teꞌcha̱lk chi a̱tinac cuiqꞌuin chirix li tenamit aꞌin, abanan la̱in incꞌaꞌ tincuil xtokꞌoba̱l ruheb. Xicakeb. Isiheb chicuu.

Jeremías 11:11

Joꞌcan nak la̱in tinqꞌue li raylal saꞌ xbe̱neb ut incꞌaꞌ chic ta̱ru̱k teꞌxcol ribeb chiru. Usta nequeꞌya̱bac chixtzꞌa̱manquil xtenkꞌanquileb, abanan la̱in incꞌaꞌ tincuabi lix tijeb.

Isaías 58:9

Cui te̱tzꞌa̱ma e̱tenkꞌanquil cue, la̱in texintenkꞌa. Nak te̱ya̱ba lin cꞌabaꞌ, la̱in tinye e̱re, “Cueꞌquin re texintenkꞌa.” Abanan tento nak te̱canab xba̱nunquil raylal reheb le̱ ras e̱ri̱tzꞌin ut te̱canab xkꞌabanquileb. Ut incꞌaꞌ tex-a̱tinak chi ma̱cꞌaꞌ rajbal.

Salmos 143:10

Ta̱cꞌut taxak chicuu cꞌaꞌru ta̱cuaj la̱at tinba̱nu xban nak la̱at lin Dios. Aꞌ taxak la̱ santil musikꞌ chitenkꞌa̱nk cue chi cua̱nc saꞌ ti̱quilal.

Génesis 20:7

Ut anakcuan ta̱kꞌaxtesi li ixk aꞌin riqꞌuin lix be̱lom. Laj Abraham aꞌan jun li profeta li nayehoc re li cua̱tin ut aꞌan ta̱tijok cha̱cuix re nak incꞌaꞌ tatca̱mk. Abanan cui incꞌaꞌ nacakꞌaxtesi li ixk aꞌin, la̱at tatca̱mk, joꞌ eb ajcuiꞌ la̱ comon, chan li Dios.

Génesis 19:29

Li Ka̱cuaꞌ Dios quixsach ruheb chi junaj cua chixjunil li tenamit li cuanqueb saꞌ li ru takꞌa. Abanan quijulticoꞌ re li cꞌaꞌru quixtzꞌa̱ma laj Abraham. Joꞌcan nak quixcol laj Lot.

Salmos 106:23

Li Dios quixye nak tixsach ruheb laj Israel lix tenamit. Abanan laj Moisés li sicꞌbil ru xban quia̱tinac chirixeb re nak li Dios incꞌaꞌ tixsach ruheb. Ut quinumeꞌ caꞌchꞌin lix joskꞌil li Dios saꞌ xbe̱neb ut incꞌaꞌ quixsach ruheb.

Salmos 99:6

Laj Moisés ut laj Aarón queꞌcꞌanjelac chiru li Ka̱cuaꞌ chokꞌ aj tij. Ut laj Samuel quitijoc chiru. Eb aꞌan queꞌxtzꞌa̱ma xtenkꞌanquil chiru li Ka̱cuaꞌ ut aꞌan quixsume lix tijeb.

Salmos 40:8

At inDios, nacuulac chicuu xba̱nunquil li cꞌaꞌru nacacuaj. Junelic cuan saꞌ inchꞌo̱l la̱ chakꞌrab.

Hebreos 10:7

Ut quinye: Cueꞌquin, at Ka̱cuaꞌ, tinba̱nu li nacacuaj joꞌ tzꞌi̱banbil saꞌ li Santil Hu chicuix. (Sal. 40:6-8)

Deuteronomio 1:45

La̱ex texya̱bak nak quexsukꞌi chak ut quetzꞌa̱ma chiru li Dios nak aꞌan textenkꞌa. Abanan li Ka̱cuaꞌ incꞌaꞌ quirabi nak queya̱ba lix cꞌabaꞌ.

Li xHu LAJ JOB 35:13

Relic chi ya̱l li nimajcual Dios incꞌaꞌ narabi li cꞌaꞌru nequeꞌxtzꞌa̱ma xban nak incꞌaꞌ nequeꞌxtzꞌa̱ma chi anchaleb xchꞌo̱l.

San Juan 9:30

Li cui̱nk quixye reheb: —La̱ex nequeye nak incꞌaꞌ nequenau bar xchal chak li cui̱nk aꞌan. Nasach inchꞌo̱l e̱ban xban nak li cui̱nk aꞌan xqꞌuehoc cue chi iloc la̱in.

San Juan 9:32

Chalen chak saꞌ xticlajic li ruchichꞌochꞌ, ma̱ jun sut qui-abiman nak cuan ta junak cui̱nk tixte ta xnakꞌ ru junak mutzꞌ chalen saꞌ xyoꞌlajic.

San Juan 11:22

Abanan la̱in ninnau nak chixjunil li cꞌaꞌru ta̱tzꞌa̱ma chiru li Dios, aꞌan tixqꞌue a̱cue, chan lix Marta.