San Juan 17:3 - Li Santil hu

³ Li junelic yuꞌam, aꞌan nak teꞌxnau a̱cuu la̱at li junajat chi tzꞌakal Dios ut teꞌxnau ajcuiꞌ cuu la̱in li Jesucristo li quina̱takla chak.

Q'eqchi Bible

³ A'an a'in li junelik yu'am: naq te'xnaw aawu laa'at li junat chi tz'aqal Yos ut li xataqla chaq, li Jesus a' li Kriist.

San Juan 17:3 ပူးပေါင်းရင်းမြစ်များ

1 Juan 5:20

Ut la̱o nakanau nak li Ralal li Dios quicꞌulun saꞌ ruchichꞌochꞌ. Quixqꞌue kanaꞌleb re xnaubal bar cuan li tzꞌakal Dios. Ut junajo chic riqꞌuin li tzꞌakal Dios xban nak xkapa̱b li Jesucristo li Ralal li Dios. Aꞌan li naqꞌuehoc ke li yuꞌam chi junelic.

San Juan 17:25

At inYucuaꞌ, la̱at ti̱c a̱chꞌo̱l. Eb li incꞌaꞌ nequeꞌpa̱ban incꞌaꞌ nequeꞌxnau a̱cuu. Abanan la̱in ninnau a̱cuu ut eb lin tzolom nequeꞌxnau chic nak la̱at xattaklan chak cue.

San Juan 3:17

Li Dios incꞌaꞌ quixtakla chak li Ralal saꞌ ruchichꞌochꞌ chixtenebanquil li tojba ma̱c saꞌ xbe̱neb li cuanqueb saꞌ ruchichꞌochꞌ. Quixtakla ban chak re nak saꞌ xcꞌabaꞌ aꞌan teꞌcolekꞌ.

Oseas 6:3

Chikanauhak biꞌ ru li Ka̱cuaꞌ. Chikaqꞌuehak kachꞌo̱l chixnaubal ru chi tzꞌakal. Chꞌolchꞌo nak ta̱cꞌulu̱nk li Ka̱cuaꞌ. Ta̱cꞌulu̱nk joꞌ nak nachal li cutan rajlal. Ta̱cꞌulu̱nk joꞌ nak nachal li hab re xtꞌakresinquil li chꞌochꞌ saꞌ xkꞌehil li a̱uc ut nachal ajcuiꞌ mokon re xtꞌakresinquil li acui̱mk.—

1 Juan 4:6

Abanan la̱o ralal xcꞌajol li Dios. Ut eb li nequeꞌpa̱ban re li Dios nocoeꞌrabi. Ut eb li incꞌaꞌ nequeꞌpa̱ban re li Dios incꞌaꞌ nequeꞌraj kabinquil. Riqꞌuin aꞌan nacꞌutun ani cuan li Santil Musikꞌej riqꞌuin ut ani cuan xmusikꞌ laj balakꞌ riqꞌuin.

1 Crónicas 28:9

Ut la̱at, at Salomón, at cualal, chapa̱b li Ka̱cuaꞌ lix Dios la̱ yucuaꞌ ut chatcꞌanjelak chiru chi anchal a̱chꞌo̱l ut saꞌ ti̱quilal. Li Ka̱cuaꞌ, aꞌan naxnau cꞌaꞌru cuan saꞌ xchꞌo̱l li junju̱nk ut naxnau chanru lix naꞌleb. Cui la̱at ta̱sicꞌ li Dios, aꞌan ta̱tenkꞌa̱nk a̱cue. Cui ut ta̱tzꞌekta̱na, aꞌan tatxtzꞌekta̱na ajcuiꞌ la̱at chi junaj cua.

San Juan 17:23

La̱in cua̱nkin riqꞌuineb ut la̱at cua̱nkat cuiqꞌuin re nak junajak chic ruheb chi tzꞌakal kiqꞌuin. Ut xban nak junajak chic ruheb kiqꞌuin, eb li incꞌaꞌ nequeꞌpa̱ban teꞌxqꞌue retal nak la̱at xattaklan chak cue ut teꞌxqꞌue ajcuiꞌ retal nak la̱at nacaraheb joꞌ nak niquina̱ra la̱in.

Isaías 61:1

Lix musikꞌ li nimajcual Dios cuan cuiqꞌuin. Li Dios quixsicꞌ cuu ut quinixtakla chixyebal li cha̱bil esil reheb li rahobtesinbileb. Quinixtakla chixtenkꞌanquileb li cuanqueb saꞌ raylal. Quinixtakla chixcolbaleb li cuanqueb chi pre̱xil joꞌqueb ajcuiꞌ li cuanqueb saꞌ tzꞌalam.

San Juan 17:21

At inYucuaꞌ, li cꞌaꞌru nintzꞌa̱ma cha̱cuu, aꞌan nak junajak taxak ruheb. Cheꞌcua̱nk kiqꞌuin joꞌ nak cuanquin la̱in a̱cuiqꞌuin ut la̱at cuancat cuiqꞌuin. Junajak taxak ruheb re nak li cuanqueb saꞌ ruchichꞌochꞌ teꞌxpa̱b nak la̱at xattaklan chak cue.

San Juan 3:34

Li Jesucristo, aꞌan taklanbil chak xban li Dios ut naxye li cꞌaꞌru nayeheꞌ re xban li Dios xban nak li Santil Musikꞌej cuan riqꞌuin chi tzꞌakal.

2 Corintios 4:6

Nak toj kꞌojyi̱n chak ru li ruchichꞌochꞌ, li Dios quixye, “Chicua̱nk li cutan re xcutanobresinquil ru li ruchichꞌochꞌ.” Ut aꞌan ajcuiꞌ li nacutanobresin re li kacꞌaꞌux re nak naru takanau chanru lix lokꞌal li Dios. Ut li Jesucristo naxcꞌut chiku lix lokꞌal li Dios.

2 Ts 1:8

Chanchan li rakꞌ xam nak ta̱cha̱lk li Ka̱cuaꞌ Jesucristo riqꞌuin xnimal xlokꞌal chi rakoc a̱tin. Tixqꞌueheb chixtojbal xma̱queb li ani incꞌaꞌ nequeꞌpa̱ban re li Dios joꞌ ajcuiꞌ li ani incꞌaꞌ nequeꞌraj rabinquil resilal li colba-ib li naxqꞌue li Ka̱cuaꞌ Jesucristo.

San Juan 17:8

La̱in xinye reheb li cꞌaꞌru xaye cue ut xeꞌxcꞌul li cua̱tin. Xeꞌxqꞌue retal nak relic chi ya̱l a̱cuiqꞌuin xinchal chak ut xeꞌxpa̱b nak la̱at xattaklan chak cue.

San Juan 14:26

Li Santil Musikꞌej li tixtakla chak li Yucuaꞌbej chokꞌ cuu̱chil, aꞌan ta̱tenkꞌa̱nk e̱re ut aꞌan ta̱cꞌutuk che̱ru chixjunil li cꞌaꞌak re ru li incꞌaꞌ nequetau ru. Ut aꞌan tixjultica e̱re chixjunil li cꞌaꞌru xinye e̱re.

San Juan 8:19

Eb laj fariseo queꞌchakꞌoc ut queꞌxye re: —¿Ani la̱ yucuaꞌ? chanqueb re. Li Jesús quixye reheb: —La̱ex incꞌaꞌ nequenau ani lin Yucuaꞌ xban nak incꞌaꞌ nequenau cuu la̱in. Cui ta nequenau cuu la̱in, nequenau aj raj cuiꞌ ru lin Yucuaꞌ, chan reheb.

1 Corintios 15:34

Checꞌoxla chi us li yo̱quex chixba̱nunquil ut mexma̱cob chic. Cuanqueb saꞌ e̱ya̱nk li toj ma̱jiꞌ nequeꞌxpa̱b li Dios. Re xcꞌutbal e̱xuta̱n nak ninye e̱re chi joꞌcaꞌin.

Isaías 53:11

Nabal li raylal quixcꞌul nak toj yoꞌyo saꞌ ruchichꞌochꞌ. Abanan ta̱qꞌuehekꞌ cuiꞌchic lix sahil xchꞌo̱l ut tixnau nak cuan rajbal nak quixcꞌul li raylal. Laj cꞌanjel chiru li Dios ti̱c xchꞌo̱l ut aꞌan tixtoj rix lix ma̱queb nabal ut saꞌ xcꞌabaꞌ aꞌan li Dios tixcuy tixsacheb lix ma̱queb.

1 Ts 1:9

Yalak bar yo̱queb chixserakꞌinquil chanru nak coe̱cꞌul nak cocuulac e̱riqꞌuin ut yo̱queb chixserakꞌinquil chanru nak quecanab xlokꞌoninquil li yi̱banbil dios ut quepa̱b ut nequexcꞌanjelac chic chiru li tzꞌakal Dios, li yoꞌyo.

Jeremías 10:10

Abanan li Ka̱cuaꞌ, aꞌan li tzꞌakal Dios. Aꞌan li yoꞌyo̱quil Dios ut li tzꞌakal Rey chi junelic kꞌe cutan. Nak yo̱ xjoskꞌil li Ka̱cuaꞌ, li ruchichꞌochꞌ na-ecꞌan saꞌ xnaꞌaj. Ut eb li xni̱nkal ru tenamit incꞌaꞌ teꞌxcuy rilbal lix joskꞌil.

Isaías 48:16

Cha̱lkex cuiqꞌuin ut cherabihak li tinye e̱re. Chalen saꞌ xticlajic incꞌaꞌ xina̱tinac e̱riqꞌuin riqꞌuin a̱tin chꞌaꞌaj xtaubal ru. Cuanquin e̱riqꞌuin nak yo̱ chi cꞌulma̱nc chixjunil aꞌin. Li nimajcual Dios ut li Santil Musikꞌej queꞌtaklan chak cue.—

Salmos 9:10

Li ac xeꞌpa̱ban cha̱cuu, cauheb xchꞌo̱l a̱cuiqꞌuin. La̱at, at Ka̱cuaꞌ, incꞌaꞌ nacatzꞌekta̱na li ani naxtzꞌa̱ma xtenkꞌanquil a̱cue.

San Juan 10:36

Li Acuabej Dios xsicꞌoc cuu ut xinixtakla chak saꞌ ruchichꞌochꞌ. ¿Cꞌaꞌut nak nequeye la̱ex nak yo̱quin chixmajecuanquil li Dios riqꞌuin nak ninye nak la̱in li Ralal?

San Juan 7:29

Caꞌaj cuiꞌ la̱in ninnaꞌoc ru xban nak riqꞌuin aꞌan xinchal chak. Li Dios, aꞌan li quitaklan chak cue, chan li Jesús.

San Juan 6:57

Li yoꞌyo̱quil Dios, aꞌan li quitaklan chak cue. Joꞌ nak yoꞌyo chi junelic aꞌan, joꞌcan nak yoꞌyo̱quin ajcuiꞌ la̱in chi junelic. Joꞌcan ajcuiꞌ li ani naxtzaca lin tibel, li jun aꞌan ta̱cua̱nk xyuꞌam chi junelic saꞌ incꞌabaꞌ la̱in.

2 Crónicas 15:3

Najt queꞌcuan laj Israel chi incꞌaꞌ yo̱queb chixlokꞌoninquil li tzꞌakal Dios. Ma̱cꞌaꞌeb laj tij chixcꞌutbal lix ya̱lal chiruheb ut ma̱cꞌaꞌ lix chakꞌrab li Dios riqꞌuineb.

San Juan 5:44

Nak nequeqꞌue e̱lokꞌal chi ribil e̱rib, cꞌajoꞌ nak nacuulac che̱ru. Abanan incꞌaꞌ nequesicꞌ li lokꞌal li naxqꞌue li jun chi Dios. ¿Chan ta cuiꞌ ru nak tine̱pa̱b la̱in chi joꞌcanan?

San Juan 11:42

La̱in ninnau nak junelic niquina̱cuabi. Abanan ninye a̱cue aꞌin re nak eb li cuanqueb arin teꞌril li cꞌaꞌru tinba̱nu ut teꞌxpa̱b nak la̱at xattaklan chak cue, chan li Jesús nak quitijoc.

San Lucas 9:48

Ut quixye reheb: —Li ani ta̱cꞌuluk re junak chꞌina al joꞌ aꞌin saꞌ incꞌabaꞌ la̱in, tinixcꞌul ajcuiꞌ la̱in; ut li ani ta̱cꞌuluk cue la̱in, tixcꞌul ajcuiꞌ li ani xtaklan chak cue. Joꞌcan nak li ani cubenak xcuanquil saꞌ e̱ya̱nk anakcuan, aꞌanak chic li nimak xcuanquil.—

San Marcos 9:37

—Li ani naxqꞌue xlokꞌal li toj kꞌun xchꞌo̱l joꞌ li chꞌina al aꞌin saꞌ incꞌabaꞌ la̱in, naxqꞌue ajcuiꞌ inlokꞌal la̱in. Ut ma̱cuaꞌ caꞌaj cuiꞌ la̱in naxqꞌue inlokꞌal. Naxqꞌue aj ban cuiꞌ xlokꞌal li Dios li quitaklan chak cue.—

1 Corintios 8:4

Anakcuan tina̱tinak chirix li tzacae̱mk mayejanbil chiruheb li yi̱banbil dios. La̱o nakanau nak li yi̱banbil dios ma̱cꞌaꞌ nequeꞌoc cuiꞌ xban nak moco dioseb ta. Nakanau nak jun ajcuiꞌ li Dios cuan.

Proverbios 8:35

Li ani nasicꞌoc re li cha̱bil naꞌleb naxtau li junelic yuꞌam. Ut li ani nasicꞌoc re naxtau li rusilal li Ka̱cuaꞌ.

San Juan 17:18

Joꞌ nak xina̱takla chak la̱in saꞌ ruchichꞌochꞌ chixchꞌolobanquil lix ya̱lal, joꞌcan ajcuiꞌ nak tintaklaheb chixchꞌolobanquil lix ya̱lal chiruheb li incꞌaꞌ nequeꞌpa̱ban.

Filipenses 3:8

Relic chi ya̱l chixjunil li cꞌaꞌak re ru xinba̱nu chak junxil ma̱cꞌaꞌ chic na-oc cuiꞌ chicuu anakcuan xban nak kꞌaxal cuiꞌchic nim xlokꞌal xpa̱banquil li Ka̱cuaꞌ Jesucristo. Re nak la̱inak chic re li Cristo, xintzꞌekta̱na chixjunil li xinba̱nu chak junxil. Aꞌan yal mul aj chic chicuu anakcuan.

Filipenses 3:10

Xincanab xba̱nunquil chixjunil li quinba̱nu chak junxil re nak tincua̱nk chi sum a̱tin riqꞌuin li Cristo. Nacuaj xcꞌulbal lix cuanquilal li Dios li quicuaclesin cuiꞌchic re li Cristo chi yoꞌyo saꞌ xya̱nkeb li camenak. Nacuaj tintzꞌako̱nk riqꞌuin li raylal li quixcꞌul ut nacuaj nak tinba̱nu joꞌ quixba̱nu li Cristo nak quixqꞌue rib chi ca̱mc.

Hebreos 3:1

Ex herma̱n, la̱ex sicꞌbil e̱ru xban li Dios chokꞌ ralal xcꞌajol. Cheqꞌuehak e̱chꞌo̱l chixcꞌoxlanquil li Jesucristo. Aꞌan li quitakla̱c chak xban li Dios chi cꞌanjelac joꞌ xyucuaꞌil aj tij saꞌ li kapa̱ba̱l.

2 Pedro 1:2

Xban nak nequenau chic lix ya̱lal chirix li Dios ut chirix li Ka̱cuaꞌ Jesucristo, ta̱cua̱nk taxak chi nabal li tuktu̱quilal e̱riqꞌuin ut chicua̱nk taxak li rusilal li Dios saꞌ le̱ chꞌo̱l.

2 Pedro 1:3

Chixjunil li cꞌaꞌru nacꞌanjelac ke saꞌ li kayuꞌam ut saꞌ li kapa̱ba̱l qꞌuebil ke xban xnimal xcuanquil li Cristo. Saꞌ xcꞌabaꞌ lix cuanquil xkanau ru li Dios li quibokoc ke chi tzꞌako̱nc riqꞌuin lix nimal xlokꞌal ut xcuanquilal.

2 Pedro 1:8

Cui nakaba̱nu aꞌin chi cuulaj cuulaj, yo̱ko chi cꞌanjelac chiru li Dios re nak li kayuꞌam incꞌaꞌ ta̱cua̱nk chi ma̱cꞌaꞌ rajbal. Cua̱nk ban xya̱lal nak takapa̱b li Ka̱cuaꞌ Jesucristo.

1 Juan 1:2

Quicꞌutbesi̱c chiku li naqꞌuehoc yuꞌam. Quikil ru aꞌan. Joꞌcan nak nakachꞌolob xya̱lal che̱ru chirix aꞌan, li naqꞌuehoc yuꞌam chi junelic. Aꞌan li cuan chak riqꞌuin li Acuabej Dios. Aꞌan quixcꞌutbesi rib chiku.

1 Juan 1:3

Nakachꞌolob xya̱lal che̱ru chirix li cꞌaꞌru quikil ut li cꞌaꞌru quikabi re nak tocua̱nk chi sum a̱tin chi kibil kib. Ut tocua̱nk ajcuiꞌ chi sum a̱tin riqꞌuin li Acuabej Dios ut riqꞌuin li Jesucristo, li Ralal.

1 Juan 2:23

Li ani naxye nak li Jesucristo ma̱cuaꞌ Ralal li Dios, li nayehoc re aꞌan ma̱cꞌaꞌ li Acuabej Dios riqꞌuin. Ut li ani naxye nak li Cristo, aꞌan li tzꞌakal Ralal li Dios, aꞌan cuan li Acuabej Dios riqꞌuin.