Joel 2:11 - Li Santil hu

¹¹ Joꞌcan ajcuiꞌ ta̱cꞌulma̱nk nak li Ka̱cuaꞌ ta̱a̱tinak chi cau xya̱b xcux riqꞌuineb lix soldado ut teꞌxba̱nu li cꞌaꞌru tixye. Kꞌaxal cuiꞌchic nabaleb ut cauheb rib. Ut kꞌaxal xiu xiu nak ta̱cuulak li cutan aꞌan nak li Ka̱cuaꞌ ta̱rakok a̱tin. ¿Ani ta biꞌ ta̱ru̱k tixcol rib chiru?

Q'eqchi Bible

¹¹ Li Qaawa' tixjap re chi xtaqlankileb' a'an. K'ajo'aq xk'ihaleb' laj k'anjel chiru ut jwal naab'alaqeb' li neke'paab'ank re. Xiwajelaq li kutan taaraqoq wi' aatin li Qaawa'. Maajun taakuyuq re rilb'al.

Joel 2:11 ပူးပေါင်းရင်းမြစ်များ

Malaquías 3:2

¿Ani ta cuiꞌ tixcuy rilbal lix cꞌulunic li Ka̱cuaꞌ? Ut, ¿ani ta cuiꞌ ta̱ru̱k tixxakab rib nak ta̱cꞌulu̱nk xban nak aꞌan joꞌ jun li xam li na-isin xtzꞌajnil li oro, ut joꞌ li xabo̱n li nasakobresin re li tꞌicr?

Nahum 1:6

¿Ani ta biꞌ ta̱ru̱k ta̱cuyuk re lix joskꞌil li Dios? Ut, ¿ani ta biꞌ ta̱ru̱k tixcol rib chiru li Dios nak ta̱joskꞌokꞌ? Aꞌan chanchan li xam nak naxcꞌut lix joskꞌil. Ut nak najoskꞌoꞌ li Dios nalajeꞌjacheꞌ li sako̱nac.

Apocalipsis 18:8

Joꞌcan nak chiru jun cutan talajeꞌcha̱lk li raylal saꞌ xbe̱n li tenamit aꞌan. Ta̱cha̱lk ca̱mc, ut ya̱bac ut cueꞌej saꞌ xbe̱neb. Li tenamit ta̱sachekꞌ ru riqꞌuin xam xban nak kꞌaxal nim xcuanquil li Ka̱cuaꞌ li ta̱rakok a̱tin saꞌ xbe̱neb, chan.

Apocalipsis 6:17

Xcuulac xkꞌehil li rakba a̱tin saꞌ kabe̱n. ¿Ani ta cuiꞌ ta̱ru̱k tixcol rib chiru aꞌan? chanqueb.

Joel 3:16

Nak la̱in tina̱tinak chi cau xya̱b incux saꞌ li tzu̱l Sión aran Jerusalén, li choxa joꞌ ajcuiꞌ li ruchichꞌochꞌ teꞌecꞌa̱nk saꞌ xnaꞌaj. Abanan eb laj Israel lin tenamit cauhakeb xchꞌo̱l cuiqꞌuin. Ut cuiqꞌuin teꞌyoꞌoni̱nk xban nak la̱in tincolok reheb.

Jeremías 30:7

Ta̱cuulak xkꞌehil nak teꞌxcꞌul junak li nimla raylal. Ma̱cꞌaꞌ naru najuntakꞌe̱taman cuiꞌ li raylal aꞌan. Kꞌaxal ra teꞌxcꞌul li ralal xcꞌajol laj Jacob. Abanan eb aꞌan teꞌcolekꞌ chiru li raylal.

Salmos 46:6

Yo̱ xjoskꞌileb li tenamit ut cauheb rib nak nequeꞌxcꞌoxla. Abanan aꞌ yal jokꞌe tixye li Ka̱cuaꞌ, li ruchichꞌochꞌ ta̱osokꞌ.

Amós 5:20

Nak ta̱rakok a̱tin li Ka̱cuaꞌ, junes rahil chꞌo̱lej ta̱cua̱nk. Ma̱cꞌaꞌak sahil chꞌo̱lejil. Junes ya̱bac ta̱cua̱nk saꞌ eb li cutan aꞌan ut ma̱cꞌaꞌak sahil chꞌo̱lej.

Joel 1:15

Tokꞌob xak ku xban nak cuulac re xcutanquil nak li Ka̱cuaꞌ li nimajcual Dios ta̱rakok a̱tin saꞌ kabe̱n. Aꞌan ta̱cha̱lk chixsachbal ru li tenamit.

Jeremías 50:34

Abanan li ani ta̱colok reheb, aꞌan cau rib. “Nimajcual Dios” xcꞌabaꞌ. Relic chi ya̱l aꞌan ta̱oque̱nk chirixeb re nak naru teꞌcua̱nk saꞌ tuktu̱quil usilal saꞌ lix naꞌajeb. Abanan eb laj Babilonia ta̱cha̱lk raylal saꞌ xbe̱neb.

Isaías 42:13

Li Ka̱cuaꞌ riqꞌuin xnimal xcuanquil ta̱pletik riqꞌuineb li xicꞌ nequeꞌiloc re. Chanchanak jun li soldado ac cauresinbil chi pletic. Tixjap re, re xtiquibanquil li pletic ut ta̱numta̱k saꞌ xbe̱neb li xicꞌ nequeꞌiloc re.

Isaías 13:4

Abihomak li choki̱nc saꞌ xbe̱n li tzu̱l. Aꞌaneb li qꞌuila soldado. Aꞌaneb li qꞌuila tenamit li queꞌxjunaji ribeb. Li Ka̱cuaꞌ li nimajcual Dios yo̱ chixcauresinquileb lix soldado re teꞌpletik.

Números 24:23

Ut quixye ajcuiꞌ laj Balaam: —¿Ani ta biꞌ ta̱ru̱k ta̱colekꞌ nak li Dios tixba̱nu li cꞌaꞌak re ru aꞌin?

Joel 2:31

Ta̱kꞌojyi̱nokꞌ ru li sakꞌe ut li po ta̱cakokꞌ ru chanchan li quicꞌ nak toj ma̱jiꞌ nacuulac xkꞌehil li cutan, li kꞌaxal xiu xiu, nak la̱in tinrakok a̱tin, chan li Dios.

Jeremías 25:30

At Jeremías, ta̱ye reheb chixjunil li tinye a̱cue. Ta̱ye reheb chi joꞌcaꞌin: Li Ka̱cuaꞌ ta̱a̱tinak chak saꞌ choxa chi cau xya̱b xcux. Toj saꞌ lix santil naꞌaj ta̱a̱tinak ut tixye resil li raylal cha̱lc re saꞌ xbe̱n lix tenamit. Tixjap re joꞌ nak nequeꞌxjap reheb li nequeꞌyatzꞌoc re li uvas. Chixjunileb li cuanqueb saꞌ ruchichꞌochꞌ teꞌrabi nak ta̱a̱tinak li Ka̱cuaꞌ.

Amós 5:18

Tokꞌob xak e̱ru la̱ex li yo̱quex chiroybeninquil li cutan nak ta̱cha̱lk chi rakoc a̱tin li Ka̱cuaꞌ. ¿Cꞌaꞌut nak yo̱quex chiroybeninquil li cutan aꞌan? ¿Ma incꞌaꞌ ta biꞌ nequenau cꞌaꞌru te̱cꞌul? Ma̱cuaꞌ sahil chꞌo̱lejil te̱cꞌul. Rahil chꞌo̱lej ban te̱cꞌul.

Amós 1:2

Quixye: —Li nimajcual Dios ta̱a̱tinak chak chi cau xya̱b xcux toj Sión. Toj aran Jerusalén ta̱a̱tinak chak li Ka̱cuaꞌ. Ut nak ta̱a̱tinak chak, talajeꞌchakik li pim. Ut talajeꞌchakik ajcuiꞌ li pachꞌayaꞌ saꞌ li tzu̱l Carmelo.

Joel 2:25

Li Ka̱cuaꞌ tixye: —La̱in tinqꞌue re̱kaj e̱re li quisach che̱ru saꞌ eb li chihab nak queꞌxcuaꞌ le̱ racui̱mk laj sa̱cꞌ, li torob, li motzoꞌ ut li chiliꞌ, li chanchaneb jun tu̱b chi soldado nak quebintakla e̱riqꞌuin re xsachbal le̱ racui̱mk.

Ezequiel 22:14

¿Ma toj cauhak ta biꞌ e̱chꞌo̱l ut ma toj cauhak ta biꞌ e̱rib saꞌ li cutan nak la̱in texinqꞌue chixtojbal rix le̱ ma̱c? La̱in li Ka̱cuaꞌ Dios xinyehoc re nak texinqꞌue chixtojbal rix le̱ ma̱c ut la̱in tinba̱nu li cꞌaꞌru xinye.

Isaías 7:18

Saꞌ eb li cutan aꞌan li Ka̱cuaꞌ tixbokeb laj Egipto ut eb laj Asiria. Eb laj Egipto chanchanakeb li raxya̱t xban xqꞌuialeb nak teꞌcha̱lk chi najt bar cuanqueb cuiꞌ li nimaꞌ. Ut eb laj Asiria chanchanakeb li sak cꞌau nak teꞌcha̱lk.

1 Ts 4:16

Ut nak ta̱cubek chak li Ka̱cuaꞌ Jesucristo saꞌ choxa, tixjap re chi takla̱nc. Li xbe̱nil ángel tixjap re chi bokoc, ut ta̱ya̱basi̱k xtrompeta li Dios. Ut li teꞌcuacli̱k xbe̱n cua, aꞌaneb li ac camenakeb, li queꞌpa̱ban re li Cristo.

Joel 1:6

Joꞌ nak queꞌchal laj sa̱cꞌ chixsachbal li kacui̱mk, joꞌcan nak queꞌchal chi pletic kiqꞌuin lix soldados li xni̱nkal ru tenamit. Xban nak cꞌajoꞌ xjoskꞌileb chanchaneb li cakcoj li kꞌaxal kꞌes ruch reheb. Ut chanchaneb li ixki cakcoj li ni̱nk xtzꞌiꞌ e.

Joel 2:1

Ya̱basihomak chak li trompeta saꞌ li tzu̱l Sión. Ya̱basihomak chak saꞌ li tzu̱l cuan cuiꞌ lix templo li Ka̱cuaꞌ re xyebal resil nak cuanco saꞌ raylal. Chexxucuak che̱junilex la̱ex li cuanquex Judá xban nak cuulac re xkꞌehil nak ta̱rakok a̱tin li Ka̱cuaꞌ saꞌ kabe̱n.

Joel 2:2

Nak teꞌcha̱lk laj sa̱cꞌ, ta̱kꞌojyi̱nokꞌ ru li cutan xban xqꞌuialeb. Chanchanakeb li kꞌeki chok. Chanchanakeb li jun tu̱b chi soldado nak yo̱keb chi cha̱lc chi pletic kiqꞌuin. Teꞌcha̱lk joꞌ nak nacꞌutun chak li cutan saꞌ xbe̱neb li tzu̱l. Ma̱ jun sut quicꞌulman chi joꞌcan ut ma̱ jun sut chic ta̱cꞌulma̱nk mokon chi joꞌcan.

Joel 3:14

Numtajenak xqꞌuialeb li tenamit li cuanqueb saꞌ li ru takꞌa. Aran ta̱rakekꞌ a̱tin saꞌ xbe̱neb xban nak cuulac re xkꞌehil nak la̱in li Ka̱cuaꞌ tinrakok a̱tin.

Abdías 1:15

Joꞌ xeba̱nu reheb laj Judá, joꞌcan ajcuiꞌ te̱cꞌul la̱ex. La̱ex te̱cꞌul le̱ kꞌajca̱munquil. Cuulac re xkꞌehil nak la̱in li Ka̱cuaꞌ tinrakok a̱tin saꞌ xbe̱neb chixjunileb li jalanil tenamit. Ut tinrakok ajcuiꞌ a̱tin saꞌ e̱be̱n la̱ex.

Salmos 18:14

Chanchan nak quixcut chak lix tzimaj li Ka̱cuaꞌ nak quixtakla chak li ca̱k. Ut eb li xicꞌ nequeꞌiloc cue queꞌe̱lelic ut queꞌxchaꞌchaꞌi ribeb yalak bar.

Salmos 68:18

At Ka̱cuaꞌ, xattakeꞌ saꞌ la̱ templo aran Sión ut xacꞌameb cha̱cuix li xacue̱chaniheb. Chixjunileb xeꞌxqꞌue a̱lokꞌal. Xeꞌxqꞌue ajcuiꞌ la̱ lokꞌal li xeꞌxkꞌetkꞌeti ribeb cha̱cuu junxil. Ut la̱at tatcua̱nk riqꞌuineb.