Jeremías 33:9 - Li Santil hu

⁹ Cꞌajoꞌ nak ta̱sahokꞌ saꞌ inchꞌo̱l chirilbal li tenamit Jerusalén. Ut eb li jalan tenamit li cuanqueb saꞌ ruchichꞌochꞌ teꞌxqꞌue inlokꞌal ut teꞌxnima cuu. Nak teꞌrabi resil li us li yo̱quin chixba̱nunquil reheb, teꞌxucuak. Ut teꞌsach xchꞌo̱leb chirabinquil chanru nak xinqꞌueheb cuiꞌchic chi cua̱nc saꞌ tuktu̱quil usilal lin tenamit.

Q'eqchi Bible

⁹ Jerusalén a'anaq li xnimal xsahil linch'ool, a'anaq linloq'al ut linwankil sa' xyanqeb' chixjunil li tenamit sa' ruuchich'och'. Naq eb' a'an te'rab'i resil chixjunil li us tink'am chaq sa' xb'eeneb' laj Jerusalén, ut chixjunil li usilal tinb'aanu reheb', te'xsiksiki rib' ut te'sachq xch'ool”.

Jeremías 33:9 ပူးပေါင်းရင်းမြစ်များ

Isaías 60:5

Cꞌajoꞌak xsahil saꞌ e̱chꞌo̱l nak te̱ril nak yo̱keb chi cha̱lc nabal chi tenamit li cuanqueb chak jun pacꞌal li palau. Ut teꞌxcꞌam chak lix biomaleb li xni̱nkal ru tenamit nak teꞌcha̱lk e̱riqꞌuin.

Jeremías 13:11

Joꞌ nak li cui̱nk naxbacꞌ lix cꞌa̱mal xsaꞌ chi xsaꞌ, joꞌcan ajcuiꞌ raj nak xcuaj nak cauhakeb xchꞌo̱l lin tenamit cuiqꞌuin. Aꞌaneb raj lin tenamit. Aꞌaneb raj li teꞌqꞌuehok inlokꞌal ut teꞌxnima raj cuu. Abanan eb aꞌan incꞌaꞌ queꞌraj. Queꞌxkꞌet ban li cua̱tin.

Isaías 62:7

Meꞌhilan chixtzꞌa̱manquil chiru li Dios toj retal nak tixyi̱b cuiꞌchic li tenamit Jerusalén re nak chixjunileb li cuanqueb saꞌ ruchichꞌochꞌ teꞌxqꞌue xlokꞌal.

Nehemías 6:16

Queꞌrabi nak ac xya̱loꞌ li cꞌanjel. Chixjunileb li xicꞌ nequeꞌiloc ke queꞌxucuac, joꞌqueb ajcuiꞌ li tenamit li cuanqueb chi nachꞌ kiqꞌuin. Xuta̱nal queꞌel xban nak queꞌxqꞌue retal nak li Ka̱cuaꞌ, aꞌan li quitenkꞌan ke chixyi̱banquil li tzꞌac.

Oseas 3:5

Abanan ta̱cuulak xkꞌehil nak eb laj Israel teꞌsukꞌi̱k cuiꞌchic riqꞌuin li Ka̱cuaꞌ lix Dioseb ut teꞌxsicꞌ junak reheb li ralal xcꞌajol laj David chokꞌ xreyeb. Ut saꞌ rosoꞌjiqueb li cutan, teꞌxxucua ru li Ka̱cuaꞌ ut teꞌxcꞌu̱luban cuiꞌchic li usilal li tixba̱nu reheb.

Jeremías 31:4

La̱in tinyi̱b cuiꞌchic le̱ tenamit, la̱ex aj Israel. Ut texinqꞌue cuiꞌchic chi cua̱nc saꞌ le̱ tenamit. Te̱chap cuiꞌchic le̱ cuajb ut texxic chi xajoc xban xsahil e̱chꞌo̱l.

Jeremías 26:6

la̱in tinba̱nu re li templo aꞌin joꞌ quinba̱nu re li tenamit Silo. Ut chixjunileb li xni̱nkal ru tenamit li cuanqueb saꞌ ruchichꞌochꞌ teꞌxmajecua li tenamit aꞌin, chan.

Isaías 62:12

“Santil Tenamit” ta̱yehekꞌ reheb laj Israel ut ta̱yehekꞌ ajcuiꞌ reheb “Colbileb xban li Ka̱cuaꞌ”. Ut li tenamit Jerusalén tixcꞌabaꞌi “Li tenamit li raro, li incꞌaꞌ chic tzꞌekta̱nanbil”.—

Salmos 40:3

Numtajenak li sahil chꞌo̱lej quixqꞌue cue. Tinbicha jun li acꞌ bich re xlokꞌoninquil li kaDios. Nabaleb li teꞌabi̱nk re li bich ut teꞌxqꞌue xlokꞌal ut teꞌxpa̱b li Ka̱cuaꞌ.

Zacarías 12:2

—La̱in tinqꞌue xcuanquileb laj Jerusalén. Ut eb li xicꞌ nequeꞌiloc reheb teꞌxucuak nak teꞌcha̱lk chi pletic riqꞌuineb ut riqꞌuineb li jun chꞌol chic li tenamit li cuanqueb xcue̱nt Judá. Nak teꞌril li tenamit Jerusalén sicsotkeb xbaneb xxiu.

Jeremías 44:8

¿Cꞌaꞌut nak nequechikꞌ injoskꞌil riqꞌuin xlokꞌoninquileb li dios li xeyi̱b ut riqꞌuin xcꞌatbal le̱ pom chiruheb li dios li cuanqueb arin Egipto li bar xexchal cuiꞌ chi cua̱nc? La̱ex te̱sach e̱rib e̱junes ut texhobekꞌ ut xicꞌ chic tex-ilekꞌ xbaneb chixjunileb li xni̱nkal ru tenamit li cuanqueb saꞌ ruchichꞌochꞌ.

Jeremías 29:1

Laj Jeremías quixtzꞌi̱ba jun li hu nak cuan Jerusalén ut quixtakla Babilonia riqꞌuineb laj tij ut eb laj cꞌamol be, joꞌ eb ajcuiꞌ li profeta ut chixjunileb li tenamit li queꞌcꞌameꞌ chi pre̱xil xban laj Nabucodonosor.

Jeremías 3:17

Saꞌ eb li cutan aꞌan li tenamit Jerusalén “Xcꞌojariba̱l li Ka̱cuaꞌ” chic tixcꞌabaꞌin. Ut chixjunileb li xni̱nkal ru tenamit teꞌxchꞌutub ribeb aran chixqꞌuebal inlokꞌal la̱in li Ka̱cuaꞌ. Ut incꞌaꞌ chic teꞌxcacuubresi xchꞌo̱leb chixba̱nunquil li ma̱usilal li queꞌxrahi ru xba̱nunquil junxil.

Ester 8:17

Saꞌ li junju̱nk chi tenamit li quitakla̱c cuiꞌ li chakꞌrab li quixqꞌue li rey, cꞌajoꞌ nak quisahoꞌ saꞌ xchꞌo̱leb laj judío ut queꞌninkꞌei̱c xban nak aꞌan jun nimla cutan chokꞌ reheb. Ut nabaleb li ma̱cuaꞌeb aj judío queꞌoc saꞌ xya̱nkeb xban nak qui-oc xxiuheb xbaneb laj judío.

2 Crónicas 20:29

Ut chixjunileb li ni̱nki tenamit cꞌajoꞌ nak queꞌxucuac nak queꞌrabi resil chanru nak li Ka̱cuaꞌ quipletic riqꞌuineb li xicꞌ nequeꞌiloc reheb laj Israel.

Salmos 130:4

Abanan la̱at nacacuy nacasach li kama̱c. Joꞌcan nak tento nak takaqꞌue a̱lokꞌal.

Isaías 55:13

Chokꞌ re̱kaj li qꞌuix ta̱yoꞌla̱k li ciprés. Ut chokꞌ re̱kaj li cuara qꞌuix ta̱yoꞌla̱k li cuau̱t. Riqꞌuin aꞌan ta̱cꞌutu̱nk nak kꞌaxal nim xcuanquil li Ka̱cuaꞌ. Ut li retalil aꞌin ma̱ jokꞌe ta̱sachma̱nk. Ta̱cua̱nk ban chi junelic.

Isaías 62:4

Incꞌaꞌ chic ta̱yehekꞌ “tzꞌekta̱nanbil” reheb, chi moco ta̱yehekꞌ reheb nak sachbil ru lix naꞌajeb. Ta̱yehekꞌ ban reheb “Hefzi-bá” ut ta̱yehekꞌ “Beula” re lix chꞌochꞌeb xban nak li Ka̱cuaꞌ quisahoꞌ saꞌ xchꞌo̱l riqꞌuineb ut aꞌan chanchanak jun li be̱lomej li naxra lix chꞌochꞌ.

Isaías 64:2

Cuben chak ut cꞌut la̱ cuanquil chiruheb li xicꞌ nequeꞌiloc a̱cue. Ut eb li xni̱nkal ru tenamit sicsotkeb teꞌcana̱k cha̱cuu. Chanchan nak naloch li xam ut nacuokxin li haꞌ xban xtikcual.

Jeremías 3:19

La̱ex aj Israel, la̱in xcuaj nak xexincꞌul chokꞌ cualal incꞌajol. Xinqꞌue e̱re jun li cha̱bil naꞌajej. Aꞌan li kꞌaxal cha̱bil chiru chixjunil li naꞌajej li cuan saꞌ ruchichꞌochꞌ. La̱in xcuaj nak te̱ye “At inyucuaꞌ” cue. Incꞌaꞌ xcuaj nak tine̱tzꞌekta̱na.

Jeremías 4:2

Cui te̱tzꞌekta̱naheb li yi̱banbil dios naru te̱ba̱nu li juramento saꞌ incꞌabaꞌ la̱in li yoꞌyo̱quil Dios. Te̱ba̱nu saꞌ xya̱lal ut saꞌ ti̱quilal. Ut saꞌ incꞌabaꞌ la̱in chixjunileb li tenamit teꞌosobtesi̱k ut tineꞌxlokꞌoni, chan li Dios.

Jeremías 16:19

Laj Jeremías quixye: —At Ka̱cuaꞌ la̱at nacatqꞌuehoc incacuilal ut la̱at nacatqꞌuehoc inmetzꞌe̱u. A̱cuiqꞌuin nincol cuib nak cuanquin saꞌ raylal. Eb li najtil tenamit teꞌcha̱lk a̱cuiqꞌuin ut teꞌxye, “Relic chi ya̱l nak li yi̱banbil dios li xeꞌxlokꞌoni chak li kaxeꞌto̱nil yucuaꞌ moco ya̱l ta. Ma̱cꞌaꞌ nequeꞌoc cuiꞌ.

Jeremías 24:6

La̱in tin-ilok reheb ut tincꞌameb cuiꞌchic chak arin saꞌ lix naꞌajeb. Tintenkꞌaheb ut incꞌaꞌ tinsacheb. Tebinqꞌue cuiꞌchic saꞌ lix naꞌajeb ut incꞌaꞌ chic tincuisiheb.

Jeremías 32:42

Aꞌan aꞌin li naxye li Ka̱cuaꞌ: Joꞌ nak quinqꞌue li nimla raylal aꞌin saꞌ xbe̱neb li tenamit, joꞌcan ajcuiꞌ nak la̱in tinba̱nu chixjunil li usilal aꞌin reheb joꞌ xinyechiꞌi reheb.

Jeremías 33:14

Cuulac re xkꞌehil nak tinba̱nu li cꞌaꞌru quinyechiꞌi reheb laj Israel joꞌqueb ajcuiꞌ laj Judá, chan li Ka̱cuaꞌ.

Jeremías 49:25

¿Cꞌaꞌut nak xcꞌul li tenamit aꞌin chi joꞌcaꞌin? Aꞌin li tenamit li qꞌuebil xlokꞌal junxil. Aꞌin li tenamit li quisahoꞌ cuiꞌ inchꞌo̱l.

Ezequiel 26:20

La̱in texintakla chi cua̱nc saꞌ xchamal li ruchichꞌochꞌ bar cuanqueb cuiꞌ li queꞌcam najter. Texincanab chi cua̱nc saꞌ xya̱nkeb li queꞌsacheꞌ ruheb najter. Incꞌaꞌ chic teꞌcua̱nk cristian saꞌ le̱ tenamit, chi moco ta̱yi̱ba̱k chic.

Ezequiel 39:13

Chixjunileb li tenamit Israel teꞌxmukeb li camenak. Ut li cutan aꞌan teꞌxninkꞌei nak ta̱qꞌuehekꞌ inlokꞌal la̱in, chan li Ka̱cuaꞌ.

Deuteronomio 30:5

Texcꞌam cuiꞌchic saꞌ li naꞌajej li quiqꞌueheꞌ reheb le̱ xeꞌto̱nil yucuaꞌ ut la̱ex te̱re̱chani li naꞌajej. Texrosobtesi ut kꞌaxal cuiꞌchic texta̱mk chiruheb le̱ xeꞌto̱nil yucuaꞌ ut kꞌaxal biomakex.

Isaías 43:21

Li tenamit aꞌin quinsicꞌ ruheb re teꞌxqꞌue inlokꞌal.

Isaías 62:1

Xban nak ninra li tenamit Sión, joꞌcan nak la̱in tinchꞌolob lix ya̱lal. Xban nak ninra li tenamit Jerusalén incꞌaꞌ tincanab xchꞌolobanquil lix ya̱lal chiruheb toj retal ta̱cꞌutu̱nk lix ti̱quilaleb. Ut ta̱cꞌutu̱nk nak colbileb chic. Chanchanak jun li xam lochlo̱k.

Jeremías 31:14

Tinqꞌueheb li cha̱bil tzacae̱mk chixtzacaheb laj tij. Ut eb lin tenamit sa teꞌcua̱nk xban nak la̱in tinqꞌue reheb li cꞌaꞌru teꞌraj. La̱in li Ka̱cuaꞌ yo̱quin chi yehoc re aꞌin.

Ezequiel 36:35

Ut teꞌxye, “Li naꞌajej aꞌin poꞌbil nak queꞌcuan ut ma̱cꞌaꞌ cuan chi saꞌ. Abanan anakcuan cha̱bil chic. Chanchan li naꞌajej Edén. Eb li tenamit poꞌbil nak queꞌcuan ut ma̱cꞌaꞌ cristian. Abanan cauresinbil chic li tenamit ut nabal li cristian cuanqueb.”

Zacarías 1:17

Ut quixye ajcuiꞌ cue li ángel: —Ta̱ye ajcuiꞌ resil aꞌin: Joꞌcaꞌin xye li nimajcual Dios. Tinqꞌue cuiꞌchic chi nabal li cꞌaꞌru reheb lin tenamit Jerusalén ut tebincuosobtesi. Chanchan nak toj xinsiqꞌueb ru chokꞌ cualal incꞌajol, chan li Dios.