Jeremías 30:18 - Li Santil hu

¹⁸ Ut quixye cuiꞌchic li Ka̱cuaꞌ: —La̱in tincꞌameb cuiꞌchic lin tenamit saꞌ li naꞌajej li quinqꞌue re laj Jacob. Tincuil xtokꞌoba̱l ru lix tenamiteb. Ta̱yi̱ba̱k cuiꞌchic li tenamit saꞌ xbe̱n li quipoꞌeꞌ najter. Ut li palacio ta̱xakaba̱k cuiꞌchic saꞌ lix naꞌaj joꞌ nak quicuan junxil.

Q'eqchi Bible

¹⁸ Li Qaawa' kixye ajwi' chi jo'ka'in: “Eb' li ralal xk'ajol laj Jakob te'sutq'iiq chaq wi' chik sa' li xmuheb'aaleb', xb'aan naq twuxtaana ru li xna'ajeb' a'an. Jerusalén taawaklesimanq wi' chik sa' xb'een li po'lem, ut li kawub'resinb'il ochoch taayiib'aaq wi' chik sa' li xna'aj tz'aqal.

Jeremías 30:18 ပူးပေါင်းရင်းမြစ်များ

Salmos 102:13

At Ka̱cuaꞌ, la̱at ta̱cuil xtokꞌoba̱l ku. Ta̱cuosobtesi cuiꞌchic la̱ tenamit Sión. Ac xcuulac xkꞌehil nak ta̱tenkꞌa cuiꞌchic.

Jeremías 30:3

Ta̱cuulak xkꞌehil nak la̱in tinqꞌueheb cuiꞌchic chi sukꞌi̱c saꞌ lix naꞌajeb lin tenamit li cuanqueb chi pre̱xil. Tinqꞌueheb chi sukꞌi̱c saꞌ li naꞌajej li quinqꞌue reheb lix xeꞌto̱nil yucuaꞌeb re nak teꞌcua̱nk aran, chan li Dios.

Jeremías 33:7

Tebinsukꞌisi cuiꞌchic saꞌ lix tenamiteb laj Judá li queꞌcꞌameꞌ chi pre̱xil joꞌ eb ajcuiꞌ laj Israel. Tebinqꞌue cuiꞌchic chi cua̱nc saꞌ lix tenamiteb joꞌ nak queꞌcuan junxil.

Jeremías 49:39

Abanan ta̱cuulak xkꞌehil nak la̱in tinqꞌueheb cuiꞌchic chi sukꞌi̱c saꞌ lix naꞌajeb li ralal xcꞌajol laj Elam ut sa chic teꞌcua̱nk, chan li Ka̱cuaꞌ.

Jeremías 23:3

Ut la̱in tinchꞌutubeb cuiꞌchic ruheb lin tenamit li joꞌ qꞌuial xeꞌcoleꞌ saꞌ eb li naꞌajej li xinjeqꞌui cuiꞌ ruheb. Tebincꞌam cuiꞌchic saꞌ lix naꞌajeb ut ta̱cua̱nk ralal xcꞌajoleb ut teꞌqꞌuia̱nk cuiꞌchic.

Zacarías 1:16

Joꞌcan nak li nimajcual Dios quixye: —Tincuuxta̱na cuiꞌchic ruheb laj Jerusalén. Ta̱yi̱ba̱k cuiꞌchic li templo ut ta̱yi̱ba̱k ajcuiꞌ chixjunil li tenamit Jerusalén, chan li Dios.

Jeremías 46:27

La̱ex aj Israel, li ralal xcꞌajol laj Jacob, mexxucuac. Michꞌinan e̱chꞌo̱l. La̱in tincolok e̱re usta saꞌ najtil tenamit cuanquex chak. Ut tinqꞌueheb cuiꞌchic chi sukꞌi̱c eb la̱ cualal a̱cꞌajol li cuanqueb chi pre̱xil. Texcua̱nk cuiꞌchic saꞌ tuktu̱quil usilal. Ut incꞌaꞌ chic texxucuak.

Jeremías 49:6

Abanan, mokon chic la̱in tinqꞌueheb cuiꞌchic chi sukꞌi̱c saꞌ lix naꞌajeb li ralal xcꞌajol laj Amón ut sa chic teꞌcua̱nk, chan li Ka̱cuaꞌ li nimajcual Dios.

Isaías 44:26

Abanan, la̱in ninba̱nun re nak ta̱uxma̱nk li cꞌaꞌru nequeꞌxye laj cꞌanjel chicuu. Us ta̱e̱lk lix cꞌanjeleb li tintaklaheb. La̱in ninye nak teꞌcua̱nk cuiꞌchic cristian saꞌ li tenamit Jerusalén. Ut teꞌyi̱ba̱k cuiꞌchic li tenamit li cuanqueb Judá, li queꞌsacheꞌ junxil.

Jeremías 31:4

La̱in tinyi̱b cuiꞌchic le̱ tenamit, la̱ex aj Israel. Ut texinqꞌue cuiꞌchic chi cua̱nc saꞌ le̱ tenamit. Te̱chap cuiꞌchic le̱ cuajb ut texxic chi xajoc xban xsahil e̱chꞌo̱l.

Jeremías 33:11

Ta̱abima̱nk cuiꞌchic xya̱b xcuxeb li yo̱queb chixjapbal reheb xban xsahil xchꞌo̱leb. Ta̱abima̱nk nak yo̱keb chi sahokꞌ saꞌ xchꞌo̱leb li yo̱queb chi ninkꞌei̱c saꞌ li sumla̱c. Ta̱abi̱k ajcuiꞌ xya̱b xcuxeb nak yo̱keb chixlokꞌoninquil li Dios ut nequeꞌxye: Lokꞌoninbil taxak li Ka̱cuaꞌ li nimajcual Dios xban nak aꞌan cha̱bil ut kꞌaxal nim li ruxta̱n saꞌ kabe̱n junelic. Ta̱abi̱k ajcuiꞌ xya̱b xcuxeb nak yo̱keb chixcꞌambal lix mayejeb re bantioxi̱nc saꞌ lix templo li Ka̱cuaꞌ. Tebinqꞌue cuiꞌchic chi sukꞌi̱c saꞌ lix naꞌajeb eb li queꞌcꞌameꞌ chi pre̱xil ut teꞌcua̱nk cuiꞌchic joꞌ nak queꞌcuan junxil.

1 Crónicas 29:19

Nintzꞌa̱ma cha̱cuu nak ta̱tenkꞌa laj Salomón li cualal. Ti̱cak taxak xchꞌo̱l re nak tixba̱nu li cꞌaꞌru naxye saꞌ la̱ chakꞌrab. Tixba̱nu taxak chixjunil li cꞌanjel ut tixyi̱b taxak la̱ templo li ac xincauresi chixjunil li cꞌaꞌak re ru re xyi̱banquil, chan laj David.

Jeremías 29:14

Nak tine̱sicꞌ tine̱tau. La̱in texinqꞌue chi sukꞌi̱c saꞌ le̱ naꞌaj. La̱in texinchꞌutub saꞌ chixjunileb li naꞌajej li xinjeqꞌui cuiꞌ e̱ru. Texcuisi chak saꞌ li naꞌajej li xexcꞌameꞌ cuiꞌ, chan li Ka̱cuaꞌ.

Isaías 44:28

Nak la̱in tinye re laj Ciro nak aꞌan ta̱cꞌanjelak chicuu, laj Ciro tixba̱nu li cꞌaꞌru nacuaj toj retal nak tixye nak li tenamit Jerusalén ta̱yi̱ba̱k cuiꞌchic. Ut tixye ajcuiꞌ nak li templo ta̱yi̱ba̱k cuiꞌchic, chan li Ka̱cuaꞌ.

Jeremías 31:38

Ta̱cuulak xkꞌehil nak li tenamit aꞌin ta̱yi̱ba̱k chokꞌ cue. Naticla chak cuan cuiꞌ li cab li najt xteram re laj Hananeel ut nacuulac cuan cuiꞌ li puerta li cuan saꞌ xuc.

Jeremías 31:23

Li Ka̱cuaꞌ lix Dioseb laj Israel quixye: —La̱in tebincꞌam cuiꞌchic laj Israel saꞌ lix naꞌajeb aran Judá. Nak cua̱nkeb saꞌ lix tenamiteb, teꞌxye, “Li Ka̱cuaꞌ taxak chi-osobtesi̱nk re lix santil tzu̱l li cuan Jerusalén, li santil naꞌajej li nacuan cuiꞌ”.

Zacarías 12:6

Saꞌ eb li cutan aꞌan la̱in tinqꞌueheb xcuanquil laj cꞌamol be saꞌ xya̱nkeb li ralal xcꞌajol laj Judá re nak teꞌnumta̱k saꞌ xbe̱neb chixjunileb li cuanqueb chi xjun sutam. Eb laj Judá chanchanakeb li ru xam li nacꞌatoc re li siꞌ. Chanchanakeb li xam li nanak saꞌ xya̱nk li qꞌuim li nacꞌat saꞌ junpa̱t. Eb laj Judá teꞌxsach ruheb li cuanqueb chi xjun sutam ut teꞌcua̱nk cuiꞌchic saꞌ lix naꞌajeb aran Jerusalén.

Salmos 78:69

Quixyi̱b lix templo chi cha̱bil ut quixqꞌue xlokꞌal. Quixqꞌue saꞌ xnaꞌaj joꞌ nak quixqꞌue li ruchichꞌochꞌ saꞌ xnaꞌaj re nak ta̱cua̱nk aran chi junelic.

Nehemías 7:4

Li tenamit nim chi us, abanan toj ma̱jiꞌ qꞌuiheb li cristian xban nak toj ma̱jiꞌ yi̱banbileb chixjunileb li cab saꞌ li tenamit.

Salmos 85:1

At Ka̱cuaꞌ, la̱at kꞌaxal cha̱bilat kiqꞌuin la̱o la̱ tenamit. Joꞌcan nak xoa̱cꞌam cuiꞌchic saꞌ li kanaꞌaj, la̱o li ralal xcꞌajol laj Jacob.

Zacarías 14:10

Junaj ru ta̱cana̱k li ru takꞌa. Ta̱ticla̱k chak Geba ut ta̱cuulak toj saꞌ li tenamit Rimón li cuan jun pacꞌal Jerusalén saꞌ li sur. Li tenamit Jerusalén cua̱nk saꞌ li tzu̱l ut cua̱nk ajcuiꞌ xlokꞌal. Kꞌaxal nabal cuiꞌchic li cristian teꞌcua̱nk aran. Ta̱ticla̱k chak cuan cuiꞌ li oqueba̱l re laj Benjamín ut ta̱cuulak toj cuan cuiꞌ li xbe̱n oqueba̱l, ut toj cuan cuiꞌ li oqueba̱l li cuan saꞌ xuc. Ut ta̱cuulak ajcuiꞌ toj cuan cuiꞌ li torre re laj Hananeel ut toj cuan cuiꞌ li nayatzꞌeꞌ cuiꞌ x-uva li rey.

Jeremías 31:40

Joꞌ ajcuiꞌ chixjunil li ru takꞌa li nequeꞌmukeꞌ cuiꞌ li camenak ut nequeꞌcuteꞌ cuiꞌ lix chahil, joꞌ eb ajcuiꞌ li cꞌaleba̱l li cuan cuiꞌ li nimaꞌ Cedrón, ut nacuulac ajcuiꞌ toj saꞌ li xuc li cuan cuiꞌ li oqueba̱l li nequeꞌnumeꞌ cuiꞌ li cacua̱y. Chixjunil li naꞌajej aꞌan santobresinbilak chicuu la̱in li Ka̱cuaꞌ. Ut li tenamit incꞌaꞌ chic ta̱sachekꞌ ru chi moco ta̱juqꞌuekꞌ, chan li Dios.

1 Crónicas 29:1

Chirix aꞌan li rey David quia̱tinac riqꞌuineb chixjunileb li chꞌutchꞌu̱queb aran. Quixye reheb: —Laj Salomón li cualal, li sicꞌbil ru xban li Dios, aꞌan toj sa̱j ut li cꞌanjel kꞌaxal nim xban nak li templo li tixyi̱b moco re cui̱nk ta. Re ban li nimajcual Dios.

Salmos 48:3

Li Dios cuan saꞌ li tenamit Jerusalén ut naꞌno ru nak aꞌan nacoloc re li tenamit aꞌan.

Salmos 48:13

Qꞌuehomak retal li tzꞌac li sutsu cuiꞌ ut qꞌuehomak retal chanruheb li palacio re nak ta̱ru̱k te̱serakꞌi reheb le̱ ralal e̱cꞌajol li teꞌcua̱nk mokon.

Salmos 122:7

Chicua̱nk taxak li tuktu̱quil usilal saꞌ li tenamit Jerusalén. Ut ma̱cꞌaꞌ taxak teꞌxcꞌul li cuanqueb saꞌ li naꞌajej li nequeꞌtaklan cuiꞌ.

Jeremías 29:11

Caꞌaj cuiꞌ la̱in ninnau cꞌaꞌru xincꞌu̱b ru xba̱nunquil chokꞌ e̱re. Xincꞌu̱b ru e̱tenkꞌanquil. Ma̱cuaꞌ raylal tinba̱nu e̱re. Usilal ban tinba̱nu e̱re, joꞌ yo̱quex chiroybeninquil.

Jeremías 32:15

Ba̱nu chi joꞌcan xban nak li Ka̱cuaꞌ li nimajcual Dios, lix Dioseb laj Israel naxye chi joꞌcaꞌin: Ta̱cuulak xkꞌehil nak ta̱lokꞌma̱nk cuiꞌchic li ochoch, li cꞌaleba̱l ut lix naꞌaj li acui̱mk uvas saꞌ li naꞌajej aꞌin, chan.

Ezequiel 36:11

La̱in tinqꞌue chi nabalocꞌ li cristian joꞌ eb ajcuiꞌ li xul. Kꞌaxal cuiꞌchic nabal teꞌqꞌuia̱nk ut teꞌta̱mk. Tebinqꞌue chi cua̱nc saꞌ lix naꞌajeb joꞌ nak queꞌcuan junxil. Ut kꞌaxal cuiꞌchic tintenkꞌaheb re nak ta̱cua̱nk nabal cꞌaꞌru reheb. Ut riqꞌuin aꞌin teꞌxqꞌue retal nak la̱in li Ka̱cuaꞌ.

Amós 9:14

Ut tincꞌameb cuiꞌchic lin tenamit Israel saꞌ lix naꞌajeb. Ut teꞌxyi̱b cuiꞌchic lix tenamiteb li qui-osoꞌ ut aran teꞌcua̱nk. Teꞌa̱uk cuiꞌchic uvas ut teꞌrucꞌ lix yaꞌal. Teꞌrau cuiꞌchic li racui̱mk ut teꞌxtzaca li ru li naxqꞌue.

Zacarías 1:12

Ut lix ángel li Ka̱cuaꞌ quixye: —At nimajcual Dios, laje̱b xca̱cꞌa̱l chihab yo̱ a̱joskꞌil saꞌ xbe̱neb li tenamit Jerusalén ut Judá. ¿Joꞌ najtil chic ta̱cua̱nk la̱ joskꞌil saꞌ xbe̱neb? Ut, ¿jokꞌe ta̱cuuxta̱na ruheb? chan li ángel.

Zacarías 12:7

Abanan xbe̱n cua tincoleb li ralal xcꞌajol laj Judá, re nak eb li ralal xcꞌajol laj David li cuanqueb saꞌ li tenamit Jerusalén incꞌaꞌ teꞌxnimobresi ribeb chiruheb aꞌan.

Salmos 102:14

Eb li nequeꞌcꞌanjelac cha̱cuu nequeꞌxra li tenamit Sión usta juqꞌuinbil chic. Nequeꞌril xtokꞌoba̱l ru usta poꞌinbil chixjunil.

Jeremías 32:44

Eb li chꞌochꞌ teꞌlokꞌma̱nk riqꞌuin tumin ut ta̱yi̱ba̱k xhuhileb. Ut teꞌxqꞌue li sello chiru li hu. Ut cua̱nkeb li testigos. Aꞌin ta̱cꞌulma̱nk saꞌ lix naꞌajeb li ralal xcꞌajol laj Benjamín li cuanqueb chi xjun sutam Jerusalén, joꞌ ajcuiꞌ saꞌ eb li tenamit Judá ut saꞌ eb li tenamit li cuanqueb saꞌ eb li naꞌajej li tzu̱l ru ut saꞌ eb li tenamit li cuanqueb Sefela ut saꞌ eb li tenamit li cuanqueb Neguev. Ta̱uxma̱nk chi joꞌcan xban nak la̱in tinsukꞌisiheb cuiꞌchic saꞌ xnaꞌajeb li queꞌcꞌameꞌ chi pre̱xil, chan li Ka̱cuaꞌ.