Jeremías 2:20 - Li Santil hu

²⁰ Li nimajcual Dios quixye: —La̱ex aj Israel, ac junxil xerisi e̱rib rubel incuanquil ut queye nak incꞌaꞌ chic texcꞌanjelak chicuu. Saꞌ xbe̱neb li tzu̱l ut rubeleb li cheꞌ li ni̱nk xmu xelokꞌoni li jalanil dios. Chanchanex li ixk li nequeꞌxcꞌayi ribeb.

Q'eqchi Bible

²⁰ “Laa'at ak junxil chik kawisi aawib' rub'el inwankil, ut kaq'etq'eti aawib' chiwu ut kaye: «Ink'a' chik nawaj k'anjelak chawu», chankat. Ut sa' xb'eenatq eb' li b'ool ut rub'elatq li ninqi che' katyoklaak ut kamux aawib' jo' junaq aj yumb'eet.

Jeremías 2:20 ပူးပေါင်းရင်းမြစ်များ

Deuteronomio 12:2

Te̱sach chi junaj cua chixjunileb li naꞌajej li nequeꞌxlokꞌoni cuiꞌ li jalanil dios eb li tenamit li te̱re̱chani. Te̱jucꞌ chi junaj cua lix artal li cuanqueb saꞌ eb li tzu̱l, ut saꞌ xbe̱n bol, joꞌ eb ajcuiꞌ li cuanqueb rubel li cheꞌ li ni̱nkeb xmu.

Levítico 26:13

La̱in li Ka̱cuaꞌ le̱ Dios. La̱in quin-isin chak e̱re Egipto re nak incꞌaꞌ chic texcua̱nk chokꞌ rahobtesinbil mo̱s. Chanchan nak cuan li yugo saꞌ e̱cux nak quexcuan rubel xcuanquileb. Abanan la̱in quexcuisi rubel xcuanquileb. Anakcuan naru te̱taksi le̱ riloba̱l nak texbe̱k.

Jeremías 17:2

Jultic reheb le̱ ralal e̱cꞌajol eb li artal ut li yi̱banbil dios xAsera li quelokꞌoni rubeleb li cheꞌ li ni̱nk xmuheb ut saꞌ eb li naꞌajej li ni̱nkeb xteram.

Oseas 3:3

Xinye re: —Najt tatcua̱nk saꞌ cuochoch ut incꞌaꞌ chic ta̱mux ru la̱ sumlajic, chi moco ta̱sicꞌ jalan chic cui̱nk, chi moco la̱in tincua̱nk a̱cuiqꞌuin, chanquin re.

Jeremías 30:8

Saꞌ li cutan aꞌan, chan li Ka̱cuaꞌ, la̱in tincuisi li raylal li cuanqueb cuiꞌ. Chanchan nak tintok li yugo ut tincuisi li cadena li bacꞌbo̱queb cuiꞌ. Incꞌaꞌ chic teꞌqꞌuehekꞌ saꞌ cacuil cꞌanjel xbaneb li jalaneb xtenamit.

Isaías 1:21

¿Chanru nak xejal e̱naꞌleb, ex tenamit? Junxil xine̱lokꞌoni ut xexcuan saꞌ ti̱quilal. Abanan anakcuan xine̱tzꞌekta̱na. Chanchanex chic li ixk li naxcꞌayi rib. Anakcuan la̱ex chic aj camsinel.

Nahum 1:13

Nak cuanquex rubel xcuanquilal eb aꞌan chanchan nak cuan li yugo saꞌ e̱be̱n. Abanan chanchan tintoki li yugo nak texcuisi rubel xcuanquileb aꞌan. Chanchan bacꞌbo̱quex riqꞌuin cadena nak cuanquex xbaneb. Abanan la̱in tintꞌupi li cadena li bacꞌbo̱quex cuiꞌ, chan li Dios reheb laj Israel.

Oseas 2:5

xban nak eb aꞌan ralal xcꞌajol li ixk li incꞌaꞌ naxuta̱nac xba̱nunquil li ma̱usilal. Li ixk aꞌan quixye: —La̱in tinxic riqꞌuineb li cui̱nk li nequeꞌqꞌuehoc cue lin cua cuucꞌa, li nequeꞌqꞌuehoc cue li cha̱bil tꞌicr lana ut lino joꞌ ajcuiꞌ li vino ut li aceite olivo, chan.

Ezequiel 23:5

Nak sumsu cuiqꞌuin, lix Ahola quixmux ru xsumlajic ut quicuan riqꞌuineb li soldado aj Asiria, li cuanqueb nachꞌ riqꞌuin li tenamit.

Ezequiel 20:28

La̱in quincꞌameb saꞌ li cha̱bil naꞌajej li quinyechiꞌi reheb. Nak queꞌril li tzu̱l li najt xteram ut eb li cheꞌ li ni̱nk xmu, queꞌxqꞌue xmayejeb aran. Queꞌxchikꞌ injoskꞌil nak queꞌxqꞌue lix cꞌatbil mayej ut queꞌxqꞌue li vino chokꞌ xmayej ut queꞌxqꞌue ajcuiꞌ li sununquil pom.

Ezequiel 16:41

Teꞌxcꞌateb la̱ cuochoch ut nabaleb li ixk yo̱keb chi iloc a̱cue nak ta̱cꞌul xtojbal a̱ma̱c. Riqꞌuin aꞌin ta̱canab ma̱cobc riqꞌuineb li cui̱nk ut incꞌaꞌ chic ta̱qꞌue xma̱taneb.

Ezequiel 16:31

Saꞌ chixjunileb li be cayi̱b li naꞌajej li najt xteram re ta̱lokꞌoni cuiꞌ li jalanil dios. Cayi̱beb li artal saꞌ eb li naꞌajej li cuanqueb cuiꞌ nabal li cristian re ta̱ba̱nu li ma̱usilal. Abanan incꞌaꞌ cacꞌul la̱ tojbal joꞌ nequeꞌxba̱nu li ixk li nequeꞌxcꞌayi ribeb.

Ezequiel 16:28

Incꞌaꞌ quicꞌojla a̱chꞌo̱l riqꞌuin li ma̱usilal li ac xaba̱nu toj retal co̱at Asiria chixmuxbal la̱ sumlajic riqꞌuineb. Chi moco riqꞌuin aꞌan quicꞌojla a̱chꞌo̱l.

Isaías 14:25

La̱in tinsach ruheb laj Asiria li cuanqueb saꞌ xnaꞌajeb laj Israel lin tenamit. Tinyekꞌiheb saꞌ cuok aran saꞌ eb lin tzu̱l. Tojoꞌnak tincuisi li a̱lal i̱k li xeꞌxqꞌue saꞌ xbe̱neb laj Israel lin tenamit.

Isaías 10:27

Saꞌ eb li cutan aꞌan tex-isi̱k rubel xcuanquil eb laj Asiria. Incꞌaꞌ chic texrahobtesi̱k xbaneb. Chanchan nak ta̱isi̱k li a̱lal i̱k li cuan saꞌ e̱be̱n. Malaj ut chanchan nak ta̱isi̱k junak yugo saꞌ e̱be̱n. Chanchan nak ta̱tokekꞌ li yugo.

Isaías 9:4

Xban li raylal yo̱queb chixcꞌulbal laj Israel, chanchan cuan jun li yugo saꞌ xbe̱neb ut yo̱queb chi saqꞌuecꞌ riqꞌuin cheꞌ. Abanan xacuisiheb saꞌ raylal. Chanchan xacuisi li yugo ut xatok li cheꞌ. Xasach xcuanquileb li nequeꞌnumta saꞌ xbe̱neb laj Israel. Xasacheb li nequeꞌrahobtesin reheb, joꞌ caba̱nu reheb laj Madián junxil.

Salmos 78:58

Queꞌxqꞌue xjoskꞌil li Dios xban nak queꞌxyi̱b li artal li nequeꞌxlokꞌoni cuiꞌ li yi̱banbil dios. Xban nak queꞌxlokꞌoni li yi̱banbil dios, cꞌajoꞌ nak quirahoꞌ xchꞌo̱l li Ka̱cuaꞌ.

1 Reyes 12:32

Ut quixye nak saꞌ li oꞌlaju xbe li cuakxak li po teꞌxba̱nu jun li nimla ninkꞌe. Chanchan li ninkꞌe li nequeꞌxba̱nu aran Judá. Ut quimayejac chiru li artal aran Bet-el chiru li cuacax oro li quixqꞌue chi yi̱ba̱c. Ut quixxakab eb ajcuiꞌ aj tij re teꞌcꞌanjelak saꞌ eb li naꞌajej li najt xteram li quixyi̱b.

1 Samuel 12:10

Nak ac cuanqueb chic saꞌ raylal, queꞌxtzꞌa̱ma xtenkꞌanquileb chiru li Dios ut queꞌxye, “La̱o xoma̱cob xban nak xatkatzꞌekta̱na ut xkalokꞌoniheb li yi̱banbil dios Baal ut Astarot. At Ka̱cuaꞌ, choa̱col taxak chiruheb li xicꞌ nequeꞌiloc ke ut tocꞌanjelak cha̱cuu,” chanqueb.

Josué 24:26

Ut laj Josué quixtzꞌi̱ba retalil li queꞌxba̱nu saꞌ li hu li tzꞌi̱banbil cuiꞌ lix chakꞌrab li Dios. Ut quixchap jun li nimla pec ut quixxakab rubel jun to̱n li ji li cuan aran chixcꞌatk li tabernáculo.

Josué 24:24

Ut queꞌxye re: —La̱o tocꞌanjelak chiru li Ka̱cuaꞌ li kaDios ut takaba̱nu li cꞌaꞌru tixye ke, chanqueb.

Josué 1:16

Ut eb li ralal xcꞌajol laj Rubén, laj Gad ut laj Manasés queꞌchakꞌoc ut queꞌxye re laj Josué: —Takaba̱nu chixjunil li cꞌaꞌru xaye ke. La̱o toxic bar toa̱takla cuiꞌ.

Deuteronomio 26:17

La̱ex xechꞌolob saꞌ li cutan aꞌin nak li Ka̱cuaꞌ, aꞌan le̱ Dios. Xeyechiꞌi nak te̱pa̱b aꞌan ut te̱ba̱nu li cꞌaꞌru naxye. Xeyechiꞌi nak junelic te̱ba̱nu li chakꞌrab li xqꞌue e̱re ut te̱ba̱nu le̱ taklanquil xban.

Deuteronomio 15:15

Chijulticokꞌ e̱re chanru nak quexcuan chak la̱ex chokꞌ rahobtesinbil mo̱s aran Egipto ut li Ka̱cuaꞌ le̱ Dios quicoloc chak e̱re. Joꞌcan nak la̱in xinqꞌue e̱re li chakꞌrab aꞌin anakcuan.

Deuteronomio 5:27

At Ka̱cuaꞌ Moisés, tatjilok cuiꞌchic la̱at ut ta̱cuabi chixjunil li cꞌaꞌru tixye li Ka̱cuaꞌ li kaDios. Chirix aꞌan ta̱ye ke cꞌaꞌru tixye ut la̱o takabi ut takaba̱nu li cꞌaꞌru tixye ke”, chanqueb.

Deuteronomio 4:34

¿Ma cuan ta biꞌ junak Dios quixsicꞌ ta ru junak tenamit saꞌ xya̱nkeb li jun chꞌol chic? Li Dios quixcꞌutbesi nabal li retalil nak quexrisi chak saꞌ li naꞌajej Egipto. Quixba̱nu riqꞌuin milagro ut sachba chꞌo̱lej ut riqꞌuin pletic. Riqꞌuin xnimal xcuanquil quixba̱nu li cꞌaꞌak re ru xiu xiu rilbal. La̱ex queril nak li Ka̱cuaꞌ le̱ Dios quixba̱nu li sachba chꞌo̱lej nak quexrisi chak saꞌ li naꞌajej Egipto.

Deuteronomio 4:20

Abanan la̱ex sicꞌbil e̱ru xban li Ka̱cuaꞌ. Aꞌan qui-isin chak e̱re saꞌ li naꞌajej Egipto, li chanchan tikcual xam xban li raylal li quecꞌul. Quexrisi chak re nak texcua̱nk chokꞌ xtenamit. Ut relic chi ya̱l nak la̱ex chic lix tenamit anakcuan.

Éxodo 24:3

Ut quichal laj Moisés, quixserakꞌi re li tenamit li ra̱tin li Dios joꞌ ajcuiꞌ lix chakꞌrab. Queꞌjunajoꞌ lix chꞌo̱leb ut queꞌxye: —Chixjunil li cꞌaꞌru xye li Dios, aꞌan li takaba̱nu, chanqueb.

Éxodo 19:8

Junajeb lix chꞌo̱l eb laj Israel nak queꞌxye: —Takaba̱nu chixjunil li quixye li Dios, chanqueb. Laj Moisés quixye re li Ka̱cuaꞌ Dios li cꞌaꞌru queꞌxye.

Éxodo 3:8

Joꞌcan nak la̱in tincoleb saꞌ rukꞌeb laj Egipto ut tincuisiheb ajcuiꞌ saꞌ li tenamit aꞌan. Tincꞌameb saꞌ jun nimla naꞌajej numtajenak xcha̱bilal bar cuan cuiꞌ li sahil echej. Aꞌan li chꞌochꞌ li bar cuanqueb cuiꞌ laj cananeo, eb laj heteo, eb laj amorreo, eb laj ferezeo, eb laj heveo, ut eb laj jebuseo.

Apocalipsis 17:1

Ut jun reheb li cuukub chi ángel, li cuanqueb li cuukub chi secꞌ riqꞌuineb, quixye cue: —Quim arin. Tincꞌut cha̱cuu jun li ixk li naxcꞌayi rib chunchu saꞌ xbe̱n li haꞌ retalil li nimal tenamit Babilonia li cuan xcuanquil saꞌ xbe̱neb nabal chi tenamit. Tincꞌut cha̱cuu li tojba ma̱c li xchal saꞌ xbe̱n li tenamit aꞌan xban li ma̱usilal nequeꞌxba̱nu.

1 Reyes 14:23

Queꞌxyi̱b li naꞌajej najt xteram re teꞌxlokꞌoniheb li jalanil dios. Ut queꞌxyi̱b riqꞌuin pec ut cheꞌ li yi̱banbil dios Asera ut queꞌxlokꞌoni saꞌ chixjunil li tzu̱l ut rubel chixjunileb li cheꞌ li ni̱nk xmuheb.

Salmos 107:14

Quirisiheb rubel xcuanquil li jalaneb xtenamit. Chanchan nak quirisiheb saꞌ li kꞌojyi̱n nak quirisiheb saꞌ li raylal ut quirisi li cadena li bacꞌbo̱queb cuiꞌ.

Jeremías 2:31

La̱ex aj Israel, ¿cꞌaꞌut nak incꞌaꞌ nequerabi li cꞌaꞌru ninye e̱re? ¿Ma la̱in ta biꞌ joꞌ jun li naꞌajej chaki che̱ru? ¿Ma la̱in joꞌ jun li kꞌojyi̱n nak nequecꞌoxla? ¿Ma ma̱cꞌaꞌ nin-oc cuiꞌ che̱ru? ¿Cꞌaꞌut nak nequeye nak te̱ba̱nu li cꞌaꞌru nequeraj? ¿Cꞌaꞌut nak nequeye nak incꞌaꞌ chic texsukꞌi̱k cuiqꞌuin?

Jeremías 3:13

Caꞌaj cuiꞌ te̱qꞌue retal nak xexma̱cob chicuu la̱in li Ka̱cuaꞌ le̱ Dios ut te̱patzꞌ e̱cuybal. Xekꞌet li cua̱tin. Xelokꞌoniheb li jalanil dios rubeleb li ni̱nki cheꞌ. Ut incꞌaꞌ xeba̱nu li cꞌaꞌru xinye e̱re, chan li Dios.

Jeremías 5:5

Joꞌcan nak la̱in tinxic riqꞌuineb li cuanqueb xcuanquil ut tina̱tinak riqꞌuineb. Eb aꞌan nequeꞌxnau cꞌaꞌru naraj li Dios. Eb aꞌan nequeꞌxnau cꞌaꞌru quixye li Dios nak tento teꞌxba̱nu, chanquin. Abanan chixjunileb aꞌan queꞌxtzꞌekta̱na li Ka̱cuaꞌ ut incꞌaꞌ queꞌxba̱nu li cꞌaꞌru quixye.

Jeremías 13:27

La̱in xinqꞌue retal li ma̱usilal nequeba̱nu. La̱in xcuil nak nequelokꞌoniheb li jalanil dios saꞌ eb li tzu̱l ut saꞌ eb li ru takꞌa. Chanchanex li nequeꞌxmux ru xsumlajiqueb. Ta̱cha̱lk li raylal saꞌ e̱be̱n la̱ex li cuanquex Jerusalén. La̱ex incꞌaꞌ nequecanab xba̱nunquil li ma̱usilal. ¿Joꞌ najtil chic texcua̱nk saꞌ li ma̱usilal? chan li Dios.

Oseas 4:13

Nequeꞌxic saꞌ li tzu̱l chi mayejac ut aran nequeꞌxcꞌat lix pomeb rubeleb li ni̱nki cheꞌ ji, álamo ut olmo, xban nak naque̱nac cua̱nc rubel lix mu. Xban nak la̱ex nequexcꞌamoc be chiruheb le̱ ralal e̱cꞌajol chixlokꞌoninquil li jalanil dios, joꞌcan nak nequecanabeb le̱ rabin chi yumbe̱tac ut nequecanabeb le̱ ralib chixmuxbal ru lix sumlajiqueb.

Jueces 2:11

Ut queꞌxba̱nu li incꞌaꞌ us chiru li Ka̱cuaꞌ. Queꞌoc chixlokꞌoninquileb li yi̱banbil dios Baal.

Jueces 2:13

Queꞌxtzꞌekta̱na li tzꞌakal Dios ut queꞌxlokꞌoniheb li yi̱banbil dios Baal, ut eb li yi̱banbil dios Astarot xcꞌabaꞌeb.

Jueces 10:6

Ut eb laj Israel queꞌxba̱nu cuiꞌchic li ma̱usilal chiru li Ka̱cuaꞌ Dios. Queꞌxlokꞌoniheb li yi̱banbil dios Baal ut Astarot. Ut queꞌxlokꞌoniheb ajcuiꞌ lix dioseb laj Siria, ut lix dioseb laj Sidón, joꞌ ajcuiꞌ lix dioseb laj Moab. Ut queꞌxlokꞌoniheb lix dioseb laj Amón ut eb laj filisteo. Eb laj Israel queꞌxtzꞌekta̱na li Ka̱cuaꞌ Dios ut incꞌaꞌ chic queꞌcꞌanjelac chiru.

Salmos 2:3

Yo̱queb chixyebal: —Aꞌan incꞌaꞌ naru nataklan saꞌ kabe̱n. Incꞌaꞌ takaqꞌue kib rubel xcuanquil aꞌan. Kisihak ban kib rubel xcuanquil, chanqueb.

Oseas 1:2

Nak li Ka̱cuaꞌ quixtiquib a̱tinac riqꞌuin laj Oseas, quixye chi joꞌcaꞌin: —Sumlan riqꞌuin junak ixk aj yumbe̱t. Ut le̱ cocꞌal li teꞌcua̱nk juntakꞌe̱tak xnaꞌlebeb riqꞌuin lix naꞌeb. Ta̱ba̱nu aꞌan re xcꞌutbal chiruheb lin tenamit nak incꞌaꞌ useb lix naꞌlebeb. Chanchaneb li ixk aꞌin li yo̱ chi yumbe̱tac xban nak xineꞌxtzꞌekta̱na, chan li Ka̱cuaꞌ.

Oseas 9:1

Quixye laj Oseas: —Anakcuan incꞌaꞌ chic ta̱sahokꞌ saꞌ e̱chꞌo̱l la̱ex aj Israel joꞌ nak nasahoꞌ saꞌ xchꞌo̱leb li tenamit li incꞌaꞌ nequeꞌpa̱ban. Xesicꞌ jalan le̱ dios chiru li Ka̱cuaꞌ. La̱ex xecꞌoxla nak le̱ dios li xesicꞌ, aꞌan xqꞌuehoc re chi u̱chi̱nc le̱ racui̱mk.