Jeremías 12:11 - Li Santil hu

¹¹ Ma̱cꞌaꞌ chic na-oc cuiꞌ queꞌxcanab li naꞌajej. Ma̱cꞌaꞌ chic cuan chi saꞌ. Chanchan li chaki chꞌochꞌ quicana ut ma̱ ani na-oc xcꞌaꞌux chirilbal.

Q'eqchi Bible

¹¹ Nayamnak ut nakirnak xe'xkanab' chi q'axal toq'ob'aal ru; po'lem xkanaak chixjunil, ab'an maajun naraho'k b'ayaq xch'ool chirix.

Jeremías 12:11 ပူးပေါင်းရင်းမြစ်များ

Jeremías 23:10

Saꞌ li naꞌajej aꞌin nabaleb li nequeꞌxmux ru xsumlajiqueb. Eb li tenamit yalyo̱queb xkꞌe chixba̱nunquil li ma̱usilal. Xban nak li cuanqueb saꞌ xcuanquil nequeꞌxba̱nu li cꞌaꞌru nequeꞌraj xjuneseb, joꞌcan nak li Ka̱cuaꞌ quixtzꞌekta̱na li chꞌochꞌ. Chaki chic li chꞌochꞌ ut chaki chic li pachꞌayaꞌ.

Isaías 42:25

Joꞌcan nak li Dios quirisi xjoskꞌil saꞌ xbe̱neb ut xeꞌrahobtesi̱c riqꞌuin li pletic li xeꞌxba̱nu li xicꞌ nequeꞌiloc reheb. Chanchan nak xeꞌcꞌateꞌ saꞌ xam. Abanan incꞌaꞌ queꞌxqꞌue retal li yo̱ chixcꞌutbal chiruheb li Ka̱cuaꞌ. Queꞌrahobtesi̱c xban, abanan incꞌaꞌ queꞌraj xqꞌuebal retal lix ya̱lal.

Jeremías 14:2

Quixye: —Eb laj Judá yo̱queb chi ya̱bac xban li raylal li yo̱queb chixcꞌulbal. Kꞌaxal ra yo̱queb chixcꞌulbal lix tenamiteb. Chunchu̱queb li cristian saꞌ chꞌochꞌ xban xrahil xchꞌo̱leb. Ut eb laj Jerusalén yo̱queb chi ya̱bac xban li raylal li yo̱queb chixcꞌulbal.

Malaquías 2:2

Cui incꞌaꞌ nequeba̱nu li cꞌaꞌru ninye ut cui incꞌaꞌ nequeqꞌue e̱chꞌo̱l chixqꞌuebal xlokꞌal lin cꞌabaꞌ, texintzꞌekta̱na ut le̱ rosobtesinquil tinsukꞌisi chokꞌ raylal. Ac xexintzꞌekta̱na xban nak incꞌaꞌ xeqꞌue e̱chꞌo̱l chixba̱nunquil li cꞌaꞌru xinye e̱re.

Zacarías 7:5

—Ye reheb chixjunileb li tenamit ut reheb ajcuiꞌ laj tij chi joꞌcaꞌin: Ya̱l nak la̱ex xeba̱nu le̱ ayu̱n ut xexya̱bac saꞌ li roꞌ po ut saꞌ li xcuuk po. Xeba̱nu aꞌan rajlal chihab chiru laje̱b xca̱cꞌa̱l (70) chihab. ¿Ma re xqꞌuebal ta biꞌ inlokꞌal la̱in nak xeba̱nu aꞌan?

Jeremías 19:8

La̱in tinsach ru li naꞌajej aꞌin. Xiu xiu rilbal tincanab. Li ani teꞌnumekꞌ aran teꞌxsach xchꞌo̱l ut teꞌxhob xban nak poꞌinbil ta̱cana̱k.

Jeremías 10:25

Isi la̱ joskꞌil saꞌ xbe̱neb li xni̱nkal ru tenamit li incꞌaꞌ nacateꞌxlokꞌoni. Isi la̱ joskꞌil saꞌ xbe̱neb li incꞌaꞌ nequeꞌxya̱ba la̱ cꞌabaꞌ xban nak queꞌxsach ruheb li ralal xcꞌajol laj Jacob. Queꞌxsach ruheb chixjunileb ut queꞌxsach ajcuiꞌ lix naꞌajeb.—

Jeremías 10:22

Abihomak. Qꞌuehomak retal li esilal li yo̱ chak chi cha̱lc. Cꞌajoꞌ li choki̱nc saꞌ li nimla tenamit li cuan saꞌ li norte. Teꞌxsach ru chixjunileb li tenamit li cuanqueb Judá. Ta̱cana̱k chi ma̱cꞌaꞌ chic cuan chi saꞌ. Ta̱cana̱k chokꞌ xnaꞌaj laj xoj, chan laj Jeremías.

Jeremías 9:11

Li Ka̱cuaꞌ quixye: —La̱in tinsach ru li tenamit Jerusalén. Jucꞌbil chic ta̱cana̱k chixjunil. Ta̱cana̱k chokꞌ xnaꞌajeb laj xoj. Chanchan chaki chꞌochꞌ teꞌcana̱k eb li tenamit li cuanqueb Judá. Ma̱ ani chic ta̱ru̱k ta̱cua̱nk saꞌ li naꞌajej aꞌan, chan li Ka̱cuaꞌ.

Jeremías 6:8

Qꞌuehomak e̱chꞌo̱l chi cua̱nc saꞌ ti̱quilal la̱ex aj Jerusalén re nak la̱in incꞌaꞌ texincanab e̱junes, ut re ajcuiꞌ nak incꞌaꞌ tinsukꞌisi le̱ naꞌaj chokꞌ chaki chꞌochꞌ ut incꞌaꞌ chic teꞌcua̱nk cristian aran.

Isaías 57:1

Nak nequeꞌcam li ti̱queb xchꞌo̱l, ma̱ ani naxcꞌoxla cꞌaꞌut nak nequeꞌcam. Nak nequeꞌcam li cha̱bileb xnaꞌleb, ma̱ ani naqꞌuehoc retal nak yal xeꞌisi̱c saꞌ li raylal li cha̱lc re.

Eclesiastés 7:2

Kꞌaxal us nak toxic chi yoꞌlec camenak chiru nak toxic chi ninkꞌei̱c. Li ani toj yoꞌyo, tento nak cua̱nk saꞌ xchꞌo̱l lix camic xban nak aꞌan li rosoꞌjic li junju̱nk.

Romanos 8:22

Nakanau nak li ruchichꞌochꞌ chalen anakcuan cuan saꞌ raylal ut yo̱ chiroybeninquil nak ta̱usa̱k. Li ruchichꞌochꞌ, aꞌan joꞌ jun li ixk yo̱ chixcꞌulbal li raylal nak ac qꞌuira̱c re.

Levítico 26:32

La̱in tinsach ru le̱ naꞌaj. Ut teꞌsach xchꞌo̱leb li xicꞌ nequeꞌiloc e̱re li cuanqueb aran.

Jeremías 4:20

Tojeꞌ ajcuiꞌ xkacꞌul jun li raylal ut xchal jun chic saꞌ kabe̱n. Xsacheꞌ ru chixjunil li kanaꞌaj. Saꞌ junpa̱t xeꞌsacheꞌ ruheb li kamuheba̱l. Ut eb li tꞌicr xeꞌpejeꞌ.

Jeremías 4:27

Li Ka̱cuaꞌ quixye nak tixsach ru lix chꞌochꞌeb. Abanan incꞌaꞌ tixsach ruheb chi junaj cua.

Jeremías 4:28

Ta̱rahokꞌ xchꞌo̱l li ruchichꞌochꞌ ut ta̱kꞌojyi̱nokꞌ ru li choxa. Li Ka̱cuaꞌ quixye nak ta̱cꞌulma̱nk chi joꞌcan ut aꞌan incꞌaꞌ tixjal xcꞌaꞌux.

Jeremías 25:11

Chixjunil li naꞌajej aꞌin ta̱osokꞌ ut ta̱cana̱k chi ma̱cꞌaꞌ chic cuan chi saꞌ. Xucuajel rilbal li cꞌaꞌru tixcꞌul. Ut eb li tenamit teꞌcꞌanjelak chiru lix reyeb laj Babilonia chiru laje̱b xca̱cꞌa̱l (70) chihab.

Joel 1:10

Ra saꞌ xchꞌo̱l li chꞌochꞌ xban nak ma̱cꞌaꞌ chic cuan chiru. Xeꞌchakic li trigo ut xeꞌchakic lix cheꞌel li uvas, ut ma̱cꞌaꞌ chic li aceite xban nak xeꞌchakic lix cheꞌel li olivo.

Jeremías 9:9

¿Ma incꞌaꞌ ta biꞌ tinqꞌueheb chixtojbal lix ma̱queb li tenamit aꞌin? ¿Ma incꞌaꞌ ta biꞌ tinqꞌue re̱kaj reheb li ma̱usilal nequeꞌxba̱nu? La̱in li Ka̱cuaꞌ ninyehoc re aꞌin.—

Jeremías 9:10

Laj Jeremías quixye: —La̱in tinya̱bak chirix li cꞌaꞌru quixcꞌul li tzu̱l ut li pachꞌayaꞌ. Xeꞌcana chi ma̱cꞌaꞌ chic cuan chiru ut ma̱ ani chic nanumeꞌ aran. Incꞌaꞌ chic nequeꞌabi̱c chi ya̱bac li cuacax. Queꞌe̱lelic li xul li nequeꞌrupupic chiru choxa. Ut queꞌe̱lelic ajcuiꞌ chixjunileb li joskꞌ aj xul, chan.