Jeremías 12:1 - Li Santil hu

¹ Laj Jeremías quixye: —At Ka̱cuaꞌ, la̱at junelic ti̱c a̱chꞌo̱l ut incꞌaꞌ raj nacuaj xcuechꞌbal rix li cꞌaꞌru nacaba̱nu. Abanan nacuaj xpatzꞌbal a̱cue cꞌaꞌut nak nacꞌulman chi joꞌcaꞌin. ¿Cꞌaꞌut nak us nequeꞌel li nequeꞌxba̱nu li ma̱usilal? ¿Cꞌaꞌut nak junelic sa cuanqueb li incꞌaꞌ useb xnaꞌleb?

Q'eqchi Bible

¹ At Qaawa', naq ninwech'ok aawik'in, laa'at junelik tiik aach'ool; ab'anan nawaj xpatz'b'al aawe li na'leb' a'in: K'a'ut naq jwal us neke'elk li ink'a' useb' xch'ool ut sa wankeb' li neke'b'alaq'ink?

Jeremías 12:1 ပူးပေါင်းရင်းမြစ်များ

Malaquías 3:15

Ut nequeye ajcuiꞌ, “Us xak reheb li incꞌaꞌ useb xnaꞌleb. Eb li nequeꞌba̱nun ma̱usilal, us cuanqueb. Nequeꞌxba̱nu li ma̱usilal yal re xyalbal rix li Dios ut ma̱cꞌaꞌ nequeꞌxcꞌul,” chanquex.—

Salmos 92:7

Li incꞌaꞌ useb xnaꞌleb nequeꞌtam joꞌ li pachꞌayaꞌ ut nequeꞌel chi us riqꞌuin li cꞌaꞌru nequeꞌxba̱nu. Abanan ta̱cuulak xkꞌehil nak teꞌsachekꞌ ruheb chi junaj cua.

Salmos 37:1

Mixic e̱chꞌo̱l chixcꞌoxlanquil li cꞌaꞌru nequeꞌxba̱nu li incꞌaꞌ useb xnaꞌleb ut incꞌaꞌ te̱cakaliheb riqꞌuin li cꞌaꞌru cuan reheb.

Daniel 9:7

At Ka̱cuaꞌ, la̱at junelic nacaba̱nu li ti̱quilal, abanan la̱o xuta̱nal noco-el riqꞌuin li ma̱usilal nakaba̱nu. Chikajunilo la̱o aj Israel xoma̱cob toj chalen anakcuan, li cuanqueb Judá joꞌ ajcuiꞌ li cuanqueb Jerusalén ut chixjunileb li tenamit Israel; li cuanqueb chi nachꞌ joꞌ ajcuiꞌ li cuanqueb chi najt saꞌ chixjunileb li naꞌajej bar xajeqꞌuiheb cuiꞌ ruheb xban nak xeꞌxkꞌet li chakꞌrab li qꞌuebil reheb a̱ban.

Li xHu LAJ JOB 12:6

Eb laj e̱lkꞌ junelic saheb saꞌ xchꞌo̱l saꞌ li rochocheb. Ut eb li nequeꞌxtzꞌekta̱na li Dios, ma̱cꞌaꞌ nequeꞌxcꞌul. Ut nequeꞌxcꞌoxla nak chixjunil cuan saꞌ rukꞌeb.

Habacuc 1:4

Li chakꞌrab nacana chi ma̱cꞌaꞌ chic xcuanquil. Nak nequeꞌrakoc a̱tin, incꞌaꞌ nequeꞌxba̱nu saꞌ xya̱lal. Li nequeꞌba̱nun ma̱usilal, nequeꞌnumta saꞌ xbe̱neb li ti̱queb xchꞌo̱l ut incꞌaꞌ nequeꞌrakoc a̱tin saꞌ ti̱quilal, chan laj Habacuc.

Salmos 51:4

Xinma̱cob cha̱cuu. Caꞌaj cuiꞌ cha̱cuu la̱at xinma̱cob ut xinba̱nu li incꞌaꞌ nacuulac cha̱cuu. La̱at xatrakoc a̱tin saꞌ inbe̱n saꞌ ti̱quilal ut ma̱ ani ta̱yehok re nak incꞌaꞌ us li nacaba̱nu.

Salmos 37:35

Xinnau ru jun li cui̱nk kꞌaxal numtajenak xyibal ru xnaꞌleb. Chanchan jun li nimla caki cheꞌ aran Líbano nak queꞌoc raj chi numta̱c saꞌ xbe̱neb chixjunileb.

Sofonías 3:5

Usta eb li tenamit incꞌaꞌ useb xnaꞌleb, abanan li Dios cuan saꞌ xya̱nkeb ut ti̱c xchꞌo̱l. Aꞌan incꞌaꞌ naxba̱nu cꞌaꞌak re ru incꞌaꞌ us. Rajlal cutan naxcꞌutbesi lix ti̱quilal chiruheb ut junelic naxba̱nu. Abanan li incꞌaꞌ useb xnaꞌleb incꞌaꞌ nequeꞌxnau xuta̱nac.

Jeremías 11:20

Abanan la̱at, at Ka̱cuaꞌ at nimajcual Dios, la̱at nacatrakoc a̱tin saꞌ ti̱quilal. La̱at nacanau chanru xnaꞌleb li junju̱nk ut cꞌaꞌru cuan saꞌ xcꞌaꞌuxeb. Nacuaj nacuil nak ta̱qꞌue re̱kaj reheb li ma̱usilal nequeꞌxba̱nu. La̱in nincanab cuib saꞌ a̱cuukꞌ la̱at.

Jeremías 12:6

Eb la̱ cuas ut eb la̱ cui̱tzꞌin yo̱queb chabalakꞌinquil. La̱ cuechꞌalal xeꞌxjunaji ribeb riqꞌuineb li yo̱queb chixcꞌu̱banquil ru chanru nak teꞌxba̱nu raylal a̱cue. Ma̱cꞌojob a̱chꞌo̱l riqꞌuineb, usta cha̱bil nequeꞌa̱tinac a̱cuiqꞌuin.

Jeremías 5:11

Eb laj Israel ut eb laj Judá xineꞌxtzꞌekta̱na, chan li Ka̱cuaꞌ.

Li xHu LAJ JOB 13:3

Abanan la̱in nacuaj xyi̱banquil ru aꞌin riqꞌuin li nimajcual Dios. La̱in nacuaj xcꞌu̱banquil ru riqꞌuin li Ka̱cuaꞌ.

Esdras 9:15

At Ka̱cuaꞌ, at kaDios, la̱at li kaDios la̱o aj Israel. La̱at ti̱c la̱ chꞌo̱l. Joꞌcan nak toj yoꞌyo̱co la̱o anakcuan, li joꞌ qꞌuial chic xocoleꞌ. Ya̱l nak cuan li kama̱c cha̱cuu. Joꞌcan nak incꞌaꞌ naru nococuan chi sum a̱tin a̱cuiqꞌuin, chan laj Esdras nak quitijoc.

Oseas 6:7

Joꞌ quixba̱nu laj Adán nak quixkꞌet li cua̱tin, joꞌcan ajcuiꞌ queꞌxba̱nu lin tenamit nak quineꞌxtzꞌekta̱na.

Isaías 48:8

Incꞌaꞌ xerabi chi moco xetau ru. Chalen najter incꞌaꞌ nequetau xya̱lal. La̱in ninnau chanru le̱ naꞌleb. La̱in ninnau nak kꞌetkꞌetex chalen saꞌ le̱ yoꞌlajic.

Isaías 41:21

Quimkex la̱ex li yi̱banbil dios. A̱tinankex re xcolbal e̱rib. Cha̱lkex, ut cꞌutumak chicuu li cꞌaꞌru xeba̱nu, chan li Ka̱cuaꞌ lix Dioseb laj Israel.

Proverbios 1:32

Eb li ma̱cꞌaꞌeb xnaꞌleb nequeꞌcam xban nak incꞌaꞌ nequeꞌraj xcꞌulbal lix naꞌlebeb. Joꞌcaneb ajcuiꞌ li jip xchꞌo̱leb. Nequeꞌcam xban nak nequeꞌxtzꞌekta̱na li naꞌleb naqꞌueheꞌ reheb.

Salmos 145:17

Li nimajcual Dios naxba̱nu chixjunil saꞌ ti̱quilal. Ut junelic na-uxta̱nan u.

Salmos 119:137

At nimajcual Dios, la̱at kꞌaxal ti̱c a̱chꞌo̱l ut ti̱c ajcuiꞌ la̱ chakꞌrab.

Salmos 119:75

At nimajcual Dios, la̱in ninnau nak nacatrakoc a̱tin saꞌ ti̱quilal. Ut xban nak cha̱bilat cuiqꞌuin, niquina̱kꞌus.

Deuteronomio 32:4

Li Ka̱cuaꞌ, aꞌan li nacoloc ke joꞌ jun li sako̱nac li nequeꞌxcol cuiꞌ ribeb li tenamit. Li Ka̱cuaꞌ, aꞌan kꞌaxal cha̱bil ut ti̱c xchꞌo̱l. Naxba̱nu li ti̱quilal. Li Ka̱cuaꞌ kꞌaxal cha̱bil. Incꞌaꞌ naxba̱nu li incꞌaꞌ us. Junelic ban naxba̱nu li us ut li ti̱quilal.

Génesis 18:25

Incꞌaꞌ naru ta̱sacheb ru li ti̱queb xchꞌo̱l joꞌ ta̱ba̱nu riqꞌuineb li incꞌaꞌ ti̱queb xchꞌo̱l. Ninnau nak la̱at incꞌaꞌ ta̱ba̱nu aꞌan xban nak la̱at nacatrakoc a̱tin saꞌ xya̱lal saꞌ xbe̱neb chixjunileb li cuanqueb saꞌ ruchichꞌochꞌ, chan laj Abraham.

Nehemías 9:33

Riqꞌuin chixjunil li raylal li yo̱co chixcꞌulbal nacꞌutun la̱ ti̱quilal xban nak xaba̱nu joꞌ caye. La̱at saꞌ ti̱quilal nacaba̱nu chixjunil. Abanan la̱o junes ma̱usilal nakaba̱nu.

Salmos 116:5

Li Ka̱cuaꞌ, aꞌan ti̱c xchꞌo̱l ut kꞌaxal cha̱bil. Aꞌan na-uxta̱nan u.

Eclesiastés 8:14

Cuan jun chic li naꞌleb na-uxman saꞌ ruchichꞌochꞌ incꞌaꞌ nintau ru. Aꞌan nak eb li cha̱bileb xnaꞌleb nequeꞌxcꞌul raylal. Ut li raylal nequeꞌxcꞌul eb aꞌan, reheb raj li incꞌaꞌ useb xnaꞌleb. Ut eb li incꞌaꞌ useb xnaꞌleb, usilal nequeꞌxcꞌul. Ut li usilal li nequeꞌxcꞌul, aꞌan reheb raj li cha̱bileb xnaꞌleb. La̱in ninye nak aꞌin ma̱cꞌaꞌ na-oc cuiꞌ.

Jeremías 3:7

La̱in quincꞌoxla nak ma̱re teꞌsukꞌi̱k cuiꞌchic cuiqꞌuin, usta ac xeꞌxba̱nu li ma̱c aꞌan. Abanan incꞌaꞌ queꞌsukꞌi cuiqꞌuin. Eb laj Judá li rech tenamitil queꞌril li yo̱queb chixba̱nunquil ut queꞌoc ajcuiꞌ chixba̱nunquil joꞌ yo̱queb aꞌan.

Jeremías 3:20

Abanan la̱ex xine̱tzꞌekta̱na. Chanchanex li ixk li xtzꞌekta̱na xbe̱lom. La̱in li Ka̱cuaꞌ yo̱quin chi yehoc re aꞌin.

Jeremías 9:2

Cui cuan ta inmuheba̱l saꞌ li chaki chꞌochꞌ bar ta̱ru̱k tincua̱nk cuiꞌ, tine̱lk raj saꞌ xya̱nkeb lin tenamit xban nak moco cha̱bileb ta. Chixjunileb nequeꞌbalakꞌic ut nequeꞌxlokꞌoni li jalanil dios, chan laj Jeremías.

Jeremías 32:16

Nak ac quinqꞌue li hu re laj Baruc li ralal laj Nerías, quintijoc chiru li Dios ut quinye re:

Lamentaciones 1:18

Li Ka̱cuaꞌ quirakoc a̱tin saꞌ kabe̱n saꞌ ti̱quilal. La̱o xkakꞌet li ra̱tin. Che̱junilex la̱ex, qꞌuehomak retal li raylal li yo̱co chixcꞌulbal. Chixjunileb li toj sa̱jeb queꞌchapeꞌ ut queꞌcꞌameꞌ chi najt, joꞌ cui̱nk, joꞌ ixk.

Ezequiel 18:25

Ut cui la̱ex te̱ye nak moco ti̱c ta li cꞌaꞌru yo̱quin chixba̱nunquil, la̱in li Ka̱cuaꞌ tinye e̱re: Abihomak la̱ex aj Israel. ¿Ma ya̱l nak moco ti̱c ta li cꞌaꞌru yo̱quin chixba̱nunquil? ¿Ma ma̱cuaꞌ ta biꞌ la̱ex li incꞌaꞌ nequexcuan saꞌ ti̱quilal?

Li xHu LAJ JOB 8:17

Li xeꞌ naxic saꞌ xya̱nkeb li pec ut nequeꞌxbaqꞌui rib saꞌ xya̱nkeb li pec.

Li xHu LAJ JOB 24:12

Saꞌ li tenamit yo̱queb chi a̱canac li rahobtesinbileb. Yo̱queb chixtzꞌa̱manquil xtenkꞌanquil li ca̱mqueb re. Abanan li Dios incꞌaꞌ narabi lix tijeb.

Li xHu LAJ JOB 24:23

Li Dios naxcanabeb chi cua̱nc chi ma̱cꞌaꞌeb xcꞌaꞌux. Abanan yo̱ chixqꞌuebal retal li cꞌaꞌru nequeꞌxba̱nu.

Salmos 51:6

La̱at nacuulac cha̱cuu li ti̱quil chꞌo̱lej ut nacacutanobresi lin cꞌaꞌux.

Daniel 9:14

At Ka̱cuaꞌ, la̱at xaba̱nu joꞌ xaye. Xatakla chak li raylal saꞌ kabe̱n, xban nak la̱o incꞌaꞌ xkaba̱nu li cꞌaꞌru xaye ke. La̱at, at Ka̱cuaꞌ, chixjunil nacaba̱nu saꞌ ti̱quilal.

Malaquías 2:17

Li Ka̱cuaꞌ xtitzꞌ chirabinquil li cꞌaꞌru nequeye. Ut toj nequeye, “¿Cꞌaꞌru xtitzꞌ cuiꞌ li Ka̱cuaꞌ kaban?” Xtitzꞌ e̱ban xban nak la̱ex nequeye nak nasahoꞌ xchꞌo̱l li Dios riqꞌuin li ani naxba̱nu ma̱usilal. Ut nequeye ajcuiꞌ, “Cui ta ya̱l nak ti̱c xchꞌo̱l li Dios, ac xqꞌueheb raj chixtojbal xma̱queb li ani nequeꞌba̱nun ma̱usilal,” chanquex.