Isaías 66:3 - Li Santil hu

³ Eb aꞌan queꞌxsicꞌ ru li cꞌaꞌru queꞌraj xba̱nunquil ut aꞌ chic li ma̱usilal queꞌxra. Incꞌaꞌ tincꞌul lix mayejeb. Cui teꞌxcamsi li toro re teꞌxmayeja chicuu, chanchan nak teꞌxcamsi li ras ri̱tzꞌin. Ut cui teꞌxcamsi li carner, chanchan nak teꞌxtok xcux li tzꞌiꞌ. Ut nak teꞌxmayeja li ru li trigo, chanchan nak teꞌxmayeja xquiqꞌuel li a̱k chicuu. Nak teꞌxcꞌat lix pom chicuu, chanchan nak yo̱queb chixlokꞌoninquil li jalanil dios.

Q'eqchi Bible

³ Ab'anan wankeb' li neke'mayejak teelom wakax, ut neke'xkamsi ajwi' junaq winq; neke'xxeq' junaq karneer, ut neke'xch'ot ajwi' xkux junaq tz'i'; neke'mayejak triiw, ut neke'xyeechi'i ajwi' xkik'el li aaq; neke'k'atok k'ajpom chiwu, ut neke'xloq'oni ajwi' li jalanil yos. Eb' li xe'sik'ok re li jo'maajo'il na'leb' a'in q'axal sa sa' xch'ooleb' chi xb'aanunkil chixjunil a'an.

Isaías 66:3 ပူးပေါင်းရင်းမြစ်များ

Proverbios 15:8

Li Ka̱cuaꞌ xicꞌ naril lix mayejeb li incꞌaꞌ useb xnaꞌleb. Abanan lix tijeb li ti̱queb xchꞌo̱l li Ka̱cuaꞌ naxcꞌul chi sa saꞌ xchꞌo̱l.

Isaías 66:17

Li Ka̱cuaꞌ quixye: —Teꞌsachekꞌ ruheb li tenamit li nequeꞌxsantobresi ribeb ut nequeꞌxkꞌaxtesi ribeb chixlokꞌoninquil li yi̱banbil dios. Nequeꞌxic chi tzoltzo saꞌ xnaꞌajeb li utzꞌuꞌuj chi lokꞌoni̱nc rochbeneb li nequeꞌxtiu lix tibel a̱k ut li chꞌo ut li cꞌaꞌak re ru chi xulil li moco tiꞌecꞌ ta naraj. Jun xiquic nak teꞌsachekꞌ ruheb.

Isaías 65:12

Joꞌcan nak la̱in xinteneb ca̱mc saꞌ e̱be̱n. Texinqꞌue chi camsi̱c chi chꞌi̱chꞌ xban nak quexinbok ut incꞌaꞌ quine̱chakꞌbe. Nak quexcua̱tina incꞌaꞌ quine̱rabi. Queba̱nu ban li incꞌaꞌ us chicuu. Queba̱nu li incꞌaꞌ nacuulac chicuu.

Levítico 2:2

Chirix aꞌan tixcꞌam riqꞌuineb laj tij. Aꞌaneb li ralal xcꞌajol laj Aarón. Jun reheb laj tij tixchap jun mo̱chꞌ li cha̱bil cꞌaj rochben aceite ut incienso, ut tixcꞌat saꞌ xbe̱n li artal chokꞌ mayej chiru li Ka̱cuaꞌ. Aꞌan retalil nak chixjunil li cꞌaj kꞌaxtesinbil re li Dios. Li mayej li ta̱cꞌatk, aꞌanak jun sununquil mayej chiru li Ka̱cuaꞌ.

Proverbios 21:27

Li Ka̱cuaꞌ xicꞌ naril lix mayejeb li incꞌaꞌ useb xnaꞌleb. ¿Ma tojaꞌ ta chic tixcꞌul nak teꞌxqꞌue chi incꞌaꞌ useb lix cꞌaꞌuxeb?

Deuteronomio 23:18

Ut incꞌaꞌ naru teꞌxqꞌue chokꞌ xmayej saꞌ lix tabernáculo li Ka̱cuaꞌ le̱ Dios li tumin li nequeꞌxcꞌul li nequeꞌxcꞌayi ribeb. Incꞌaꞌ naru nequeꞌxtoj riqꞌuin li tumin aꞌan li cꞌaꞌru xeꞌxyechiꞌi re li Dios. Li Ka̱cuaꞌ xicꞌ naril li ma̱c aꞌan.

Deuteronomio 14:8

Joꞌcan ajcuiꞌ li a̱k. Incꞌaꞌ naru nequetzaca xban nak usta cuib li rixiꞌij, abanan incꞌaꞌ nequeꞌxhab xcuaheb xcaꞌ sut. Incꞌaꞌ naru te̱tzaca xtibel chi moco naru te̱chꞌeꞌ cui camenak.

Jueces 10:14

Ayukex ut ya̱bahomak xcꞌabaꞌeb li jalanil dios li xesicꞌ ruheb. Ma̱re eb aꞌan chic teꞌcolok e̱re chiru li raylal li cuanquex cuiꞌ anakcuan, chan li Dios.

Isaías 57:17

Xban li ma̱usilal li nequeꞌxba̱nu ut xban nak chixjunil nequeꞌxrahi ru, la̱in xinjoskꞌoꞌ riqꞌuineb. La̱in xinqꞌueheb chixtojbal lix ma̱queb ut xincanabeb xjuneseb. Abanan xeꞌxcacuubresi xchꞌo̱leb ut junelic xeꞌxba̱nu li incꞌaꞌ us.

Jueces 5:8

Nak nequeꞌoc chixlokꞌoninquil li jalanil dios, naticla cuiꞌchic li ple̱t. Ut ma̱ jun saꞌ xya̱nkeb li caꞌcꞌa̱l mil (40,000) chi cui̱nk quicuan xchꞌi̱chꞌ malaj xla̱ns re teꞌxcol cuiꞌ ribeb nak queꞌchal chi pletic li xicꞌ nequeꞌiloc reheb.

Isaías 44:19

Li cui̱nk li quiyi̱ban re ma̱cꞌaꞌ xnaꞌleb. Incꞌaꞌ nacꞌoxlac chi moco naru tixye, “Jun jachal li cheꞌ xincꞌat. Xinyi̱b lin tzacae̱mk ut xinpom lin tib ut xincuaꞌac. ¿Ma tinyi̱b ta biꞌ li dios cheꞌ li ma̱cꞌaꞌ na-oc cuiꞌ riqꞌuin li jun jachal chic? ¿Ma naru ta biꞌ tincuikꞌib cuib chiru jun tokolak li cheꞌ?”

Isaías 65:2

La̱in junelic xinqꞌue inchꞌo̱l re xtenkꞌanquileb lin tenamit. Abanan eb aꞌan xeꞌxkꞌetkꞌeti ribeb chicuu. Ut nequeꞌxba̱nu li incꞌaꞌ us li nequeꞌraj eb aꞌan.

Jeremías 6:20

¿Cꞌaꞌru aj e nak teꞌxcꞌam chak li pom toj saꞌ li tenamit Sabá? ¿Cꞌaꞌru rajbal nak teꞌxic chi najt chixsicꞌbal li sununquil ban? La̱in incꞌaꞌ nacuulac chicuu lix mayej chi moco tincꞌuleb ta lix cꞌatbil mayej.

Jueces 21:25

Saꞌ eb li cutan aꞌan ma̱cꞌaꞌ xreyeb laj Israel. Chixjunileb queꞌxba̱nu li cꞌaꞌru queꞌraj xba̱nunquil xjuneseb.

Isaías 53:6

La̱o xkasach kib kajunes saꞌ li ma̱c. Chanchano li carner li nequeꞌxchaꞌchaꞌi ribeb. Ac kabe kabe xkachap chikaju̱nkal. Abanan li xtojbal rix li kama̱usilal li Ka̱cuaꞌ Dios quixqꞌue saꞌ xbe̱n aꞌan.

Hageo 2:14

Quichakꞌoc laj Hageo ut quixye reheb: —Joꞌcan eb ajcuiꞌ li tenamit aꞌin chicuu, chan li nimajcual Dios. —Chixjunil li cꞌaꞌru nequeꞌxba̱nu ut li cꞌaꞌru nequeꞌxmayeja chicuu ac muxbil ru, chan.