Isaías 57:15 - Li Santil hu

¹⁵ Quixye ajcuiꞌ li santil Dios li nim xcuanquil ut yoꞌyo chi junelic: —La̱in nincuan saꞌ jun li Santil Naꞌajej li cuan takecꞌ. Ut nincuan ajcuiꞌ riqꞌuineb li tu̱laneb ut eb li nequeꞌxcubsi ribeb. La̱in ninqꞌue xcacuilal xchꞌo̱leb li nequeꞌxcubsi ribeb ut ninqꞌue ajcuiꞌ xcacuilal xchꞌo̱leb li nequeꞌyotꞌeꞌ xchꞌo̱l.

Q'eqchi Bible

¹⁵ Xb'aan naq jo'ka'in xyehom li Nimajwal Yos, li nim xwankil, li junelik wank chalen chaq q'e kutan ut li q'axal Sant li xk'ab'a': “Laa'in wankin sa' li na'ajej najt xteram ut jwal loq', ab'anan wankin ajwi' rik'in li ra sa' xch'ool ut li tz'eqtaananb'il, re xk'eeb'al xkawub' xch'ool li kub'enaq xwankil ut li namayok raanm.

Isaías 57:15 ပူးပေါင်းရင်းမြစ်များ

Salmos 34:18

Li Ka̱cuaꞌ junelic cuan chixtenkꞌanquileb li nequeꞌchꞌinan xchꞌo̱leb ut naxqꞌue xcacuileb xchꞌo̱l li nequeꞌchꞌinan xchꞌo̱leb. Ut naxqꞌue xcacuileb xchꞌo̱l li nequeꞌrecꞌa nak incꞌaꞌ chic nequeꞌxcuy xnumsinquil li raylal.

Salmos 138:6

Usta kꞌaxal nim la̱ cuanquil, abanan junelic nacacuil xtokꞌoba̱l ruheb li ma̱cꞌaꞌeb xcuanquil ut nacaqꞌue retal li cꞌaꞌru nequeꞌxba̱nu li nequeꞌxnimobresi ribeb.

Salmos 147:3

Junelic naxtenkꞌaheb li teꞌyotꞌekꞌ xchꞌo̱l ut narisi lix raylaleb.

Éxodo 15:11

Ma̱cꞌaꞌ chic junak dios joꞌ la̱at, at Ka̱cuaꞌ. Ma̱ ani chic junak cuan xti̱quilal joꞌ la̱ ti̱quilal la̱at. Ma̱ ani chic junak nim xcuanquil joꞌ la̱ nimajcual cuanquilal la̱at. Ma̱ ani chic junak naru ta̱ba̱nu̱nk re li sachba chꞌo̱lej xaba̱nu la̱at.

Daniel 4:34

—Nak ac xnumeꞌ li cuukub chihab, chan li rey Nabucodonosor, la̱in quin-iloc saꞌ choxa ut quiqꞌueheꞌ cuiꞌchic cue lin naꞌleb. Ut la̱in quinlokꞌoni li nimajcual Dios. Quinqꞌue xlokꞌal li Ka̱cuaꞌ li yoꞌyo chi junelic. Aꞌan li cuan xcuanquil chi junelic kꞌe cutan.

Isaías 52:13

Li Ka̱cuaꞌ Dios quixye chi joꞌcaꞌin: —Abihomak li oc cue chixyebal e̱re anakcuan. Laj cꞌanjel chicuu us ta̱e̱lk riqꞌuin li cꞌaꞌru tixba̱nu. Nimak xcuanquil ut ta̱qꞌuehekꞌ xnimal xlokꞌal.

Isaías 40:28

¿Ma incꞌaꞌ ta biꞌ nequenau nak li Ka̱cuaꞌ ac aꞌan ajcuiꞌ chalen chak najter kꞌe cutan? Ut, ¿Ma incꞌaꞌ ta biꞌ e̱rabiom nak li Ka̱cuaꞌ, aꞌan li quiyoꞌobtesin re li cꞌaꞌru cuan saꞌ chixjunil li ruchichꞌochꞌ? Aꞌan incꞌaꞌ nalub chi moco nalaj lix metzꞌe̱u. Lix cꞌaꞌux ma̱ ani nataꞌoc re.

Deuteronomio 33:27

Li Ka̱cuaꞌ li cuan chi junelic, aꞌan li nacoloc e̱re. Aꞌan natenkꞌan e̱re riqꞌuin lix cuanquil li incꞌaꞌ na-osoꞌ. Aꞌan li ta̱isi̱nk reheb li xicꞌ nequeꞌiloc e̱re saꞌ li naꞌajej li tixqꞌue e̱re. Aꞌan li quixye e̱re nak te̱sach ruheb.

Salmos 90:2

Chalen chak najter kꞌe cutan nak toj ma̱jiꞌ nacayi̱beb li tzu̱l ut li ruchichꞌochꞌ, ac la̱at ajcuiꞌ chak Dios.

Santiago 4:6

Li Dios kꞌaxal numtajenak cuiꞌchic li rusilal naxqꞌue ke. Li Santil Hu naxye nak li Dios incꞌaꞌ nacuulac chiru li nequeꞌxnimobresi rib. Abanan li Dios naxqꞌue li rusilal reheb li tu̱laneb. (Prov. 3:34)

Salmos 83:18

re nak chixjunileb teꞌxnau nak caꞌaj cuiꞌ la̱at li nimajcual Dios li cuan a̱cuanquil saꞌ xbe̱n chixjunil li ruchichꞌochꞌ.

2 Crónicas 34:27

xyotꞌeꞌ a̱chꞌo̱l ut xacubsi a̱cuib chiru li Ka̱cuaꞌ. Xapej la̱ cuakꞌ ut xatya̱bac nak xacuabi li raylal li tixcꞌul li tenamit aꞌin ut eb li cristian li cuanqueb arin. Xban nak xaba̱nu chi joꞌcan, la̱in li Ka̱cuaꞌ xcuabi li cꞌaꞌru xaye.

Salmos 51:17

Li mayej nacacuaj la̱at, aꞌan nak ta̱yotꞌekꞌ inchꞌo̱l chi tzꞌakal ut tinjal incꞌaꞌux. At inDios, la̱at incꞌaꞌ nacatzꞌekta̱na li ani naxcubsi rib cha̱cuu.

1 Timoteo 1:17

Lokꞌoninbil taxak li tzꞌakal Rey li cuan chi junelic kꞌe cutan, li incꞌaꞌ nacam ut incꞌaꞌ na-ilman ru, li junaj chi Dios li numtajenak xnaꞌleb. Chikalokꞌonihak taxak anakcuan ut chi junelic kꞌe cutan. Joꞌcan taxak.

Romanos 1:20

Chalen chak saꞌ xticlajic li ruchichꞌochꞌ nacꞌutun xcuanquil ut xlokꞌal li Dios riqꞌuin li cꞌaꞌak re ru quilajxyi̱b. Nacꞌutun nak aꞌan li tzꞌakal Dios ut kꞌaxal nim xcuanquil chi junelic. Joꞌcan nak ma̱cꞌaꞌ junak a̱tin teꞌxcol cuiꞌ rib chiru xjoskꞌil li Dios.

Salmos 93:2

At Ka̱cuaꞌ, chalen chak saꞌ xticlajic xakxo saꞌ xnaꞌaj la̱ cuanquilal xban nak la̱at ac cuancat ajcuiꞌ chak chalen najter kꞌe cutan nak toj ma̱cꞌaꞌ li ruchichꞌochꞌ.

Apocalipsis 3:7

Ut li Cꞌajolbej quixye cuiꞌchic cue: —Tzꞌi̱ban riqꞌuin lix takl li Dios li na-iloc reheb li jun chꞌu̱tal chi aj pa̱banel li cuanqueb Filadelfia, ut ta̱ye re: Li ti̱c xchꞌo̱l ut li tzꞌakal Dios, aꞌan cuan xcuanquilal joꞌ li cuanquil li quiqꞌueheꞌ re laj David junxil. Li oqueba̱l li tixte aꞌan, ma̱ ani naru ta̱tzꞌapok re; ut li oqueba̱l li tixtzꞌap aꞌan, ma̱ ani naru ta̱tehok re.

San Lucas 1:49

Lokꞌoninbil taxak ru li Ka̱cuaꞌ li kꞌaxal nim xcuanquil xban nak quixcꞌutbesi chicuu lix nimal lix cuanquilal. Aꞌan tzꞌakal santo.

Apocalipsis 15:4

¿Ma cuan ta biꞌ junak incꞌaꞌ tixxucua a̱cuu? Chixjunileb teꞌxnima a̱cuu, at Ka̱cuaꞌ, xban nak caꞌaj cuiꞌ la̱at ti̱c a̱chꞌo̱l. Chixjunileb li cuanqueb saꞌ li xni̱nkal ru tenamit teꞌcha̱lk ut teꞌxcuikꞌib ribeb cha̱cuu ut tateꞌxlokꞌoni xban nak teꞌxqꞌue retal nak la̱at tatrakok a̱tin saꞌ ti̱quilal.

Jeremías 10:10

Abanan li Ka̱cuaꞌ, aꞌan li tzꞌakal Dios. Aꞌan li yoꞌyo̱quil Dios ut li tzꞌakal Rey chi junelic kꞌe cutan. Nak yo̱ xjoskꞌil li Ka̱cuaꞌ, li ruchichꞌochꞌ na-ecꞌan saꞌ xnaꞌaj. Ut eb li xni̱nkal ru tenamit incꞌaꞌ teꞌxcuy rilbal lix joskꞌil.

1 Pedro 5:5

Ut anakcuan, ex herma̱n, tinye cuib oxibak a̱tin e̱re la̱ex li toj sa̱jex. Chex-abi̱nk chiruheb li nequeꞌcꞌamoc be saꞌ e̱ya̱nk. Me̱nimobresi e̱rib che̱ribil e̱rib. Chetenkꞌa ban e̱rib che̱ribil e̱rib che̱junilex joꞌ tzꞌi̱banbil saꞌ li Santil Hu: Li Dios naxtzꞌekta̱naheb li kꞌetkꞌeteb ut naxba̱nu usilal reheb li nequeꞌxcubsi ribeb. (Prov. 3:34)

1 Timoteo 6:16

Li Dios yoꞌyo chi junelic. Ma̱cꞌaꞌ xticlajic ut ma̱cꞌaꞌ rosoꞌjic. Aꞌan cutan saken chi junelic ut ma̱ ani naru na-oc riqꞌuin xban nak kꞌaxal lokꞌ. Incꞌaꞌ ilbil ru chi moco na-ileꞌ ru saꞌ ruchichꞌochꞌ. Chikaqꞌuehak taxak xlokꞌal ut chikalokꞌonihak taxak xban nak kꞌaxal nim lix cuanquilal anakcuan ut chi junelic. Joꞌcan taxak.

Miqueas 5:2

La̱ex aj Belén Efrata, le̱ tenamit kꞌaxal caꞌchꞌin chiruheb chixjunil li tenamit aran Judá. Abanan saꞌ le̱ chꞌina tenamit ta̱yoꞌla̱k li Acuabej li ta̱takla̱nk saꞌ xbe̱n li tenamit Israel. Aꞌan li Acuabej li ac cuan chak chalen saꞌ xticlajic.

Isaías 6:3

Ut queꞌxjap re chi ribileb rib chixyebal: —Santo, santo, santo li Ka̱cuaꞌ li nimajcual Dios. Chixjunil li ruchichꞌochꞌ nujenak riqꞌuin lix nimal xlokꞌal, chanqueb.

Proverbios 8:23

Li cha̱bil naꞌleb ac cuan ajcuiꞌ chak nak toj ma̱jiꞌ naxyi̱b chak li ruchichꞌochꞌ li Dios.

Salmos 123:1

At nimajcual Dios, cha̱cuu la̱at nintzꞌa̱ma intenkꞌanquil. La̱at li cuancat saꞌ li santil choxa.

Salmos 115:3

Li kaDios, aꞌan cuan saꞌ choxa ut aꞌan naxba̱nu li cꞌaꞌru naraj.

Salmos 97:9

Nequeꞌsahoꞌ saꞌ xchꞌo̱leb xban nak la̱at, at nimajcual Dios, nim a̱cuanquil saꞌ xbe̱neb chixjunileb li cuanqueb saꞌ ruchichꞌochꞌ. Ut kꞌaxal nim a̱cuanquil saꞌ xbe̱neb chixjunileb li yi̱banbil dios.

Li xHu LAJ JOB 6:10

Cui ta li Dios tixsach cuu, tincꞌojob raj inchꞌo̱l. Usta kꞌaxal ra yo̱quin chixcꞌulbal ma̱cꞌaꞌ raj nacuaj re. Ninnau nak incꞌaꞌ chic najt tincꞌul li raylal. La̱in junelic xinba̱nu li cꞌaꞌru naraj li Dios santo.

1 Samuel 2:2

Ut quixye ajcuiꞌ: —Ma̱cꞌaꞌ chic junak Dios santo joꞌ li nimajcual Dios. Ma̱ ani naru nacoloc ke. Caꞌaj cuiꞌ li Ka̱cuaꞌ. Ma̱ ani chic junak joꞌ aꞌan.

Apocalipsis 4:8

Cuan cuakitk xiqꞌueb li junju̱nk. Nabal li xnakꞌeb ru cuan xcaꞌ pacꞌalil. Chi kꞌek chi cutan yo̱queb chixyebal: Santo, santo, santo. Lokꞌoninbil taxak ru li Ka̱cuaꞌ Dios li kꞌaxal nim xcuanquil, li ac cuan ajcuiꞌ chak saꞌ xticlajic, li cuan anakcuan ut li cua̱nk chi junelic.

Hebreos 9:14

Cui lix quiqꞌuel li xul naru naxsach lix paltileb, kꞌaxal nim cuiꞌchic xcuanquil lix quiqꞌuel li Jesucristo xban nak aꞌan narisi li kama̱c. Li Santil Musikꞌej quixtenkꞌa li Jesucristo nak quixmayeja rib chiru li Dios re xtojbal rix li kama̱c. Li Jesucristo tzꞌakal cha̱bil. Ma̱cꞌaꞌ xma̱c ut lix quiqꞌuel narisi li kama̱c li nacꞌamoc chak re li ca̱mc saꞌ kabe̱n. Naxsakobresi li kacꞌaꞌux re nak caꞌaj cuiꞌ chiru li yoꞌyo̱quil Dios tocꞌanjelak.

2 Corintios 7:6

Abanan li Dios naxcꞌojob xchꞌo̱leb li raheb saꞌ xchꞌo̱l. Ut aꞌan quixqꞌue xcacuilal kachꞌo̱l riqꞌuin lix cꞌulunic laj Tito.

San Lucas 4:18

Lix musikꞌ li nimajcual Dios cuan cuiqꞌuin xban nak li Dios quixsicꞌ cuu chixyebal li cha̱bil esil reheb li cuanqueb saꞌ nebaꞌil. Quinixtakla chixcolbaleb li cuanqueb saꞌ raylal ut chixyebal resil nak teꞌachꞌaba̱k li cuanqueb chi pre̱xil ut re ajcuiꞌ nak tinqꞌueheb chi iloc li mutzꞌ ut teꞌcuisi ajcuiꞌ saꞌ raylal li rahobtesinbileb.

San Mateo 6:9

Ut la̱ex joꞌcaꞌin nak textijok: At Ka̱cuaꞌ, cuancat saꞌ li santil choxa, lokꞌoninbilak taxak la̱ santil cꞌabaꞌ.

Zacarías 2:13

Chixjunileb li cuanqueb saꞌ ruchichꞌochꞌ cheꞌxxucua ta ru li Ka̱cuaꞌ ut incꞌaꞌ ta chic teꞌecꞌa̱nk xban nak aꞌan tixcanab chak lix Santil Naꞌaj ut ta̱cha̱lk saꞌ kaya̱nk.

Salmos 111:9

Quixcoleb li ralal xcꞌajol ut quixba̱nu li santil contrato riqꞌuineb. Li Ka̱cuaꞌ Dios, aꞌan santo ut kꞌaxal xiu xiu ru.

Salmos 99:3

Cheꞌxqꞌue taxak xlokꞌal lix cꞌabaꞌ ut cheꞌxxucua taxak ru xban nak aꞌan santo.

2 Corintios 1:4

Naxcꞌojob kachꞌo̱l saꞌ chixjunil li karaylal re nak ta̱ru̱k takacꞌojob xchꞌo̱leb li cuanqueb saꞌ raylal. Joꞌ nak naxcꞌojob kachꞌo̱l li Dios la̱o, joꞌcan ajcuiꞌ nak takacꞌojob xchꞌo̱leb li cuanqueb saꞌ raylal.

Ezequiel 16:63

La̱in tincuy a̱ma̱c. Abanan cua̱nk saꞌ a̱chꞌo̱l li ma̱usilal xaba̱nu ut tatxuta̱na̱k xban. Incꞌaꞌ chic te̱nimobresi e̱rib xban nak texxuta̱na̱k. La̱in li nimajcual Dios quinyehoc re aꞌin.—

Ezequiel 9:4

Ut li Ka̱cuaꞌ quixye re: —Ayu saꞌ li tenamit Jerusalén. Ta̱suti xsaꞌ li tenamit ut ta̱qꞌue retalileb saꞌ xpe̱quemeb li teꞌyotꞌekꞌ xban xrahileb xchꞌo̱l xban li ma̱usilal li yo̱queb chixba̱nunquil li tenamit, chan.

2 Corintios 2:7

Us cui te̱cuy xma̱c anakcuan ut te̱cꞌojob xchꞌo̱l xban nak naru nachꞌinan cuiꞌchic xchꞌo̱l.

Hechos 3:14

La̱ex incꞌaꞌ queraj xcolbal rix li santil cui̱nk aꞌin, li ti̱c xchꞌo̱l. Aꞌ chic laj camsinel queqꞌue chi achꞌaba̱c.

Daniel 4:17

Aꞌan aꞌin li tenebanbil saꞌ xbe̱n xbaneb li santil ángel li nequeꞌcꞌacꞌalen, re nak chixjunileb teꞌxqꞌue retal nak li nimajcual Dios nim xcuanquil saꞌ xbe̱neb li nequeꞌtaklan saꞌ ruchichꞌochꞌ. Aꞌan naqꞌuehoc xcuanquileb li ani naraj aꞌan, ut naxqꞌueheb xcuanquil li ma̱cꞌaꞌeb xcuanquil.” Joꞌcan quixye cue li ángel.

Isaías 6:1

Saꞌ li chihab nak quicam li rey Uzías, chanchan matqꞌuenbil quinba̱nu nak quixcꞌutbesi rib li Ka̱cuaꞌ chicuu. Quicuil nak cꞌojcꞌo saꞌ xbe̱n jun cꞌojariba̱l saꞌ jun naꞌajej najt xteram ut ma̱ cꞌajoꞌ xchakꞌal ru. Ut quinujac li rochoch li Dios riqꞌuin li rakꞌ.

1 Reyes 8:27

¿Ma naru ta biꞌ nacatcuan saꞌ ruchichꞌochꞌ? Li choxa kꞌaxal nim, abanan aꞌan incꞌaꞌ tzꞌakal chokꞌ a̱naꞌaj, at Ka̱cuaꞌ. ¿Ma tojaꞌ ta chic li cab li xinyi̱b ta̱tzꞌaklok chokꞌ a̱naꞌaj?

Génesis 21:33

Ut laj Abraham quirau jun to̱n li cheꞌ tamarisco aran Beerseba. Ut saꞌ li naꞌajej aꞌan quitijoc chiru li Ka̱cuaꞌ Dios.

Éxodo 15:18

Acuabej Dios, la̱at ta̱takla̱nk saꞌ kabe̱n riqꞌuin xnimal la̱ cuanquilal chi junelic kꞌe cutan.

Salmos 138:7

Usta yo̱quin chixcꞌulbal li raylal, la̱at nacaqꞌue inyuꞌam. Ut riqꞌuin la̱ cuanquil niquina̱col chiruheb li xicꞌ nequeꞌiloc cue.

Proverbios 16:19

Kꞌaxal us nak takacubsi kib saꞌ xya̱nkeb li nebaꞌ chiru nak takanimobresi kib saꞌ xya̱nkeb li cuanqueb xbiomal.

Isaías 33:5

Li Ka̱cuaꞌ cuan saꞌ choxa ut kꞌaxal nim lix cuanquil saꞌ xbe̱n chixjunil li cꞌaꞌru cuan. Ut tixqꞌueheb chi cua̱nc saꞌ ti̱quilal ut saꞌ cha̱bilal li cuanqueb Sión.

Daniel 2:11

Li cꞌaꞌru nacapatzꞌ, at rey, kꞌaxal chꞌaꞌaj xsumenquil. Ma̱ ani naru ta̱yehok a̱cue li cꞌaꞌru nacacuaj xnaubal. Caꞌaj eb cuiꞌ li kadios nequeꞌnaꞌoc re aꞌan; abanan ma̱ aniheb saꞌ kaya̱nk xban nak eb aꞌan incꞌaꞌ nequeꞌcuan saꞌ xya̱nkeb yal cui̱nk, chanqueb.

Joel 2:13

Cheyotꞌ e̱chꞌo̱l chiru li Dios ut me̱pej chic le̱ rakꞌ. Jalomak ban e̱cꞌaꞌux ut patzꞌomak e̱cuybal chiru li Ka̱cuaꞌ le̱ Dios xban nak aꞌan na-uxta̱nan u ut nequexra. Aꞌan incꞌaꞌ najoskꞌoꞌ saꞌ junpa̱t. Kꞌaxal nim ban xcuyum ut narahoꞌ saꞌ xchꞌo̱l nak naxqꞌue li tojbal ma̱c saꞌ e̱be̱n.

Miqueas 6:8

Li Ka̱cuaꞌ incꞌaꞌ naraj aꞌan. Ac chꞌolchꞌo chiku li cꞌaꞌru us. Ac yebil ke cꞌaꞌru naraj li Ka̱cuaꞌ. Li Ka̱cuaꞌ naraj nak tocua̱nk saꞌ ti̱quilal ut takaqꞌue kachꞌo̱l chi uxta̱na̱nc u, ut chikacubsi kib re nak tocua̱nk chi sum a̱tin riqꞌuin li Dios.

Zacarías 9:9

Chisahokꞌ taxak saꞌ le̱ chꞌo̱l la̱ex li cuanquex saꞌ li tenamit Sión. Chexbicha̱nk xban xsahil le̱ chꞌo̱l, la̱ex li cuanquex Jerusalén xban nak yo̱ chak chi cha̱lc le̱ rey. Aꞌan ti̱c xchꞌo̱l ut tu̱lan. Aꞌan laj Colonel. Cꞌojcꞌo chak chirix jun chꞌina bu̱r. Chirix jun chꞌina ral bu̱r yo̱ chak chi cha̱lc.

Éxodo 15:13

Xban nak kꞌaxal nim la̱ cuusilal, la̱at yo̱cat chi cꞌamoc be chiku ut xoa̱col. Riqꞌuin lix nimal a̱cuanquilal toa̱cꞌam saꞌ li naꞌajej li xayechiꞌi ke junxilaj.

Éxodo 40:34

Quicube chak li chok ut quixtzꞌap li tabernáculo. Ut quinujac li tabernáculo riqꞌuin xlokꞌal li Dios.

Éxodo 40:35

Laj Moisés incꞌaꞌ naru na-oc xban nak sutsu saꞌ chok li tabernáculo, ut nujenak riqꞌuin xlokꞌal li Dios.

Li xHu LAJ JOB 22:29

xban nak li Dios naxcubsi xcuanquil li ani naxnimobresi rib ut naxcoleb li cubenak xcuanquileb.

Salmos 34:19

Kꞌaxal nabal li raylal nequeꞌxcꞌul li ti̱queb xchꞌo̱l. Abanan li Ka̱cuaꞌ cuan chixtenkꞌanquileb re nak teꞌxcuy xnumsinquil li raylal.

Salmos 51:19

Ut la̱at ta̱cꞌul cuiꞌchic li mayej li teꞌxqꞌue chi anchal xchꞌo̱leb. Ta̱cꞌul cuiꞌchic li cꞌatbil mayej ut li mayej xul li nacꞌatman. Ut teꞌxmayeja ajcuiꞌ li cocꞌ ral cuacax saꞌ la̱ artal.

Isaías 18:4

Li Ka̱cuaꞌ quixye cue: —Incꞌaꞌ tin-ecꞌa̱nk nak tin-ilok chak saꞌ choxa li nincuan cuiꞌ. Tincuil cꞌaꞌru yo̱queb li tenamit. Chanchanakin li sakꞌe nak tik tik ru nak ac xqꞌue jun cꞌasal li hab. Chanchanakin li chok li naxtꞌakresi li pim saꞌ sakꞌehil, chan li Ka̱cuaꞌ.

Isaías 63:15

At Ka̱cuaꞌ, li cuancat saꞌ li santil choxa, qꞌue chak retal li cꞌaꞌru yo̱co chixcꞌulbal toj saꞌ li lokꞌlaj naꞌajej li cuancat cuiꞌ. ¿Ma incꞌaꞌ narahoꞌ a̱chꞌo̱l chikilbal? ¿Cꞌaꞌut nak incꞌaꞌ nacaqꞌue a̱chꞌo̱l chikatenkꞌanquil riqꞌuin la̱ cuanquil? ¿Ma incꞌaꞌ ta̱ru̱k ta̱cuuxta̱na ku?

Lamentaciones 3:41

Chikaya̱ba xcꞌabaꞌ li Ka̱cuaꞌ cuan saꞌ choxa ut takaye: