Isaías 55:2 - Li Santil hu

² ¿Cꞌaꞌut nak te̱sach e̱tumin riqꞌuin li moco cua ta? ¿Cꞌaꞌut nak te̱sach le̱ tojbal riqꞌuin li cꞌaꞌru moco nacꞌojla ta e̱chꞌo̱l xban? Te̱rabi ut te̱ba̱nu taxak li cꞌaꞌru ninye e̱re ut te̱tzaca li cha̱bil tzacae̱mk. Ta̱cꞌojla̱k e̱chꞌo̱l.

Q'eqchi Bible

² K'a'ut naq nekesach eetumin chirix li moko wa ta, ut nekesach leetojb'al chirix li ink'a' nak'ojob'ank ch'oolej? Paab'omaq li ninye ut textzekanq chaab'il tzekemq; taak'ojlaaq leech'ool rik'ineb' li sahil eechej.

Isaías 55:2 ပူးပေါင်းရင်းမြစ်များ

Jeremías 2:13

Cuib li ma̱c queꞌxba̱nu lin tenamit. Quineꞌxtzꞌekta̱na la̱in li Dios, li chanchanin li yuꞌam haꞌ li incꞌaꞌ na-osoꞌ xban nak ninqꞌue xyuꞌameb. Chanchan nak queꞌxbec xjulel li haꞌ, li incꞌaꞌ natꞌil haꞌ chi saꞌ, nak queꞌxlokꞌoni li jalanil dios.

Salmos 36:8

La̱at nacatqꞌuehoc ke chi tzꞌakal li cꞌaꞌru nakaj xban nak la̱at aj e̱chal re chixjunil li cꞌaꞌru cuan. Lix sahilal li kachꞌo̱l li nacaqꞌue la̱at, chanchan jun li nimaꞌ li incꞌaꞌ nachakic.

Salmos 22:26

Eb li ma̱cꞌaꞌ cuan reheb teꞌcuaꞌak chi us ut teꞌnujak xsaꞌeb. Cheꞌxlokꞌonihak li Ka̱cuaꞌ ut cheꞌcua̱nk xyuꞌameb chi junelic.

Hebreos 13:9

Me̱qꞌue e̱rib chi balakꞌi̱c xbaneb laj balakꞌ, xban nak jalan jala̱nk li tijleb nequeꞌxye. Ma̱cuaꞌ li cꞌaꞌru nakatzaca li najaloc re li kayuꞌam. Aꞌ ban li rusilal li Dios najaloc re ut naxqꞌue xcacuil kachꞌo̱l.

Jeremías 31:14

Tinqꞌueheb li cha̱bil tzacae̱mk chixtzacaheb laj tij. Ut eb lin tenamit sa teꞌcua̱nk xban nak la̱in tinqꞌue reheb li cꞌaꞌru teꞌraj. La̱in li Ka̱cuaꞌ yo̱quin chi yehoc re aꞌin.

Habacuc 2:13

¿Ma ma̱cuaꞌ ta biꞌ li nimajcual Dios xyehoc re aꞌin? Li tenamit teꞌcꞌanjelak yal re ta̱cꞌatekꞌ. Usta teꞌlubk riqꞌuin li cꞌaꞌru teꞌxba̱nu, abanan ma̱cꞌaꞌ ta̱oc cuiꞌ.

Oseas 8:7

Li cꞌaꞌru yo̱queb chixba̱nunquil ma̱cꞌaꞌ na-oc cuiꞌ. Ut li cꞌaꞌru teꞌxcꞌul, aꞌan li osocꞌ. Chanchan nak xeꞌrau li ikꞌ ut aꞌ chic li ca̱k-sut-ikꞌ li xeꞌxkꞌol. Li trigo teꞌrau incꞌaꞌ ta̱atzꞌumak chi moco tixqꞌue ru. Ut cui ta tixqꞌue, jalan chic teꞌtzaca̱nk re.

Isaías 51:7

Cherabihak li cꞌaꞌru ninye, la̱ex li nequenau li us, la̱ex li nequecꞌu̱la lin chakꞌrab saꞌ le̱ chꞌo̱l. Mexxucuac nak eb li tenamit nequexseꞌe ut michꞌinan e̱chꞌo̱l nak nequexhobeꞌ.

San Marcos 7:14

Ut li Jesús quixbokeb li tenamit ut quixye reheb: —Abihomak che̱junilex li cꞌaꞌru tinye ut qꞌuehomak retal re nak te̱tau xya̱lal.

San Mateo 22:4

Quixtakla cuiꞌchic jalaneb chic lix mo̱s ut quixye reheb: “Yehomak reheb li ac bokbileb, ‘Ac cꞌu̱bcꞌu li tzacae̱mk, ac xeꞌcamsiman eb li cuacax ut chixjunil li xul li ni̱nk xtibeleb. Ac cauresinbil chixjunil. Cha̱lkex saꞌ li sumla̱c,’ chaꞌakex reheb.”

Isaías 51:1

Li Dios quixye: —Chine̱rabi la̱ex li nequeqꞌue e̱chꞌo̱l chixba̱nunquil li ti̱quilal ut nequesicꞌ li Ka̱cuaꞌ. Cꞌoxlahomak aniheb le̱ xeꞌto̱nil yucuaꞌ. Eb aꞌan chanchaneb li pec li isinbil chak saꞌ junak li sako̱nac.

Salmos 63:5

Cꞌojcꞌo̱k inchꞌo̱l a̱cuiqꞌuin joꞌ junak ac xrakeꞌ chixcuaꞌbal li cha̱bil tzacae̱mk. Ut chi sa saꞌ inchꞌo̱l tinqꞌue a̱lokꞌal.

Romanos 9:31

Ut eb laj judío yo̱queb chixsicꞌbal li ti̱quil chꞌo̱lej riqꞌuin xba̱nunquil li naxye li chakꞌrab, aban incꞌaꞌ queꞌxtau.

San Mateo 15:9

Ma̱cꞌaꞌ rajbal nak niquineꞌxlokꞌoni xban nak li tijleb li nequeꞌxcꞌut aꞌan yal xchakꞌrabeb li cui̱nk.— (Isa. 29:13)

Isaías 51:4

Chine̱rabi, ex intenamit. Cheqꞌuehak retal li oc cue chixyebal. La̱in tinqꞌue lin chakꞌrab reheb li xni̱nkal ru tenamit. Ut lin ti̱quilal ta̱cutanobresi̱nk reheb li tenamit.

Isaías 1:19

Cui tixcꞌul e̱chꞌo̱l xba̱nunquil li cꞌaꞌru ninye e̱re, te̱tzaca li ru li acui̱mk li na-el saꞌ li chꞌochꞌ.

Proverbios 9:5

Cha̱lkex. Cuaꞌinkex cuiqꞌuin. Ucꞌumak li vino li xinyi̱b.

Salmos 34:11

Quimkex, ex cualal incꞌajol, ut cherabihak li oc cue chixyebal e̱re. Tincꞌut che̱ru chanru xlokꞌoninquil li Ka̱cuaꞌ.

Romanos 10:17

Joꞌcan nak li pa̱ba̱l natauman riqꞌuin rabinquil resil li Jesucristo.

San Lucas 15:23

Ut cꞌamomak chak li chꞌina cuacax, li chꞌolaninbil chi us. Camsihomak ut toninkꞌei̱k,

Oseas 12:1

Chanchan yal ikꞌ nataklan reheb laj Efraín xban nak ma̱cꞌaꞌ na-oc cuiꞌ li nequeꞌxba̱nu. Chanchan li ikꞌ nachal saꞌ releb sakꞌe bar cuanqueb cuiꞌ laj Asiria. Nanumta li ticꞌtiꞌ ut li ma̱usilal li nequeꞌxba̱nu. Nequeꞌxba̱nu li contrato riqꞌuineb laj Asiria ut nequeꞌxtakla lix aceite aran Egipto.

Isaías 46:6

Cuanqueb li nequeꞌrisi lix oro saꞌ lix bo̱ls ut nequeꞌxbis li plata saꞌ li bisleb. Nequeꞌxqꞌue li oro ut li plata re laj tenol chꞌi̱chꞌ re nak tixyi̱b jun lix dios. Chirix aꞌan nequeꞌxcuikꞌib ribeb chiru ut nequeꞌxlokꞌoni.

Isaías 25:6

Saꞌ li tzu̱l Sión li Ka̱cuaꞌ li nimajcual Dios tixba̱nu jun li ninkꞌe re chixjunileb li xni̱nkal ru tenamit. Teꞌxtzaca li cha̱bil tzacae̱mk ut teꞌrucꞌ li cha̱bil vino.

Eclesiastés 6:2

Cuanqueb li nequeꞌqꞌueheꞌ xbiomal ut xlokꞌal xban li Dios. Chixjunil cuan reheb. Ma̱cꞌaꞌ napaltoꞌ chiruheb. Abanan li Dios incꞌaꞌ naxqꞌueheb chixyalbal xsahil lix biomaleb. Jalan ban chic aj e nacana cuiꞌ. Aꞌin ma̱cꞌaꞌ na-oc cuiꞌ. Aꞌan jun raylal ut chꞌaꞌajquilal chokꞌ reheb li cristian.

Proverbios 8:32

Joꞌcan ut, ex cualal incꞌajol, cherabihak li cꞌaꞌru ninye e̱re. Us xak e̱re cui te̱ba̱nu li cꞌaꞌru ninye.

Deuteronomio 11:13

Joꞌcan nak cheba̱nu li cꞌaꞌru naxye saꞌ li chakꞌrab li xinqꞌue e̱re anakcuan. Te̱ra li Ka̱cuaꞌ le̱ Dios ut texcꞌanjelak chiru chi anchal le̱ chꞌo̱l ut chi anchal le̱ ra̱m.

Éxodo 15:26

Quixye reheb: —Junelic te̱rabi li cua̱tin. Te̱ba̱nu li ti̱quilal chicuu. La̱ex te̱pa̱b lin chakꞌrab. Cui te̱ba̱nu chixjunil li texintakla cuiꞌ, incꞌaꞌ tinqꞌue li yajel saꞌ e̱be̱n, li quinqꞌue saꞌ xbe̱neb laj Egipto. La̱in li Ka̱cuaꞌ Dios. La̱in li ninqꞌuirtesin e̱re, chan li Dios.

Isaías 44:20

Chanchan nak naxcuaꞌ li cha. Naxqꞌue rib chi balakꞌi̱c. Incꞌaꞌ naru tixcol rib chiru li ticꞌtiꞌ. Incꞌaꞌ naru tixye, “moco dios ta li cuan saꞌ lin nim ukꞌ.”

Proverbios 7:23

Incꞌaꞌ naxnau nak yo̱ chixsachbal lix yuꞌam. Chanchan li xul narupupic. Naxic saꞌ junpa̱t chi tꞌanecꞌ saꞌ li raꞌal ut moco naxnau ta nak ta̱sachekꞌ ru xban li naxba̱nu.

Proverbios 1:33

Abanan li ani naxqꞌue xchꞌo̱l chirabinquil li ninye la̱in, aꞌan ta̱cua̱nk saꞌ tuktu̱quil usilal ut incꞌaꞌ ta̱xucuak xban li raylal.

San Mateo 5:6

Us xak reheb li teꞌraj ru xba̱nunquil li ti̱quilal. Chanchan li teꞌtzꞌoca̱k ut teꞌchakik re. Us xak reheb xban nak li Dios ta̱tenkꞌa̱nk reheb chixba̱nunquil li us.

San Juan 6:27

Mixic e̱chꞌo̱l caꞌaj cuiꞌ riqꞌuin xsicꞌbal li tzacae̱mk li na-osoꞌ. Cheqꞌuehak ban e̱chꞌo̱l chixsicꞌbal li tzacae̱mk li incꞌaꞌ nalaj na-osoꞌ. Aꞌan li junelic yuꞌam li ninqꞌue la̱in li Cꞌajolbej. Aꞌan aj e nak quixqꞌue incuanquil ut quinixtakla chak li Yucuaꞌbej, chan li Jesús.

Isaías 10:27

Saꞌ eb li cutan aꞌan tex-isi̱k rubel xcuanquil eb laj Asiria. Incꞌaꞌ chic texrahobtesi̱k xbaneb. Chanchan nak ta̱isi̱k li a̱lal i̱k li cuan saꞌ e̱be̱n. Malaj ut chanchan nak ta̱isi̱k junak yugo saꞌ e̱be̱n. Chanchan nak ta̱tokekꞌ li yugo.

Isaías 62:8

Li Ka̱cuaꞌ riqꞌuin lix cuanquil quixye riqꞌuin juramento nak incꞌaꞌ chic tixqꞌue lix trigo lix tenamit chixtzacaheb li xicꞌ nequeꞌiloc reheb. Chi moco eb li jalan tenamit tixqꞌueheb xlese̱ns chirucꞌbal li xyaꞌal li uvas li nequeꞌxcꞌanjela.

Isaías 62:9

Eb aꞌan ban teꞌsicꞌok re ut teꞌxtzaca ut teꞌxlokꞌoni li Ka̱cuaꞌ. Eb li teꞌsicꞌok ru li uvas, aꞌaneb ajcuiꞌ li teꞌucꞌak re li xyaꞌal saꞌ li neba̱l re lix templo li Ka̱cuaꞌ.

Isaías 65:23

Incꞌaꞌ teꞌcꞌanjelak chi ma̱cꞌaꞌ rajbal, chi moco eb li ralal xcꞌajol teꞌca̱mk chi toj ma̱jiꞌ nacuulac xkꞌehil. Li tenamit aꞌan osobtesinbilakeb xban li Ka̱cuaꞌ joꞌ ajcuiꞌ li ralal xcꞌajoleb.

Jeremías 12:13

Eb lin tenamit teꞌrau li trigo, abanan saꞌ lix chꞌochꞌ ta̱e̱lk li qꞌuix. Teꞌxtacuasi ribeb chi cꞌanjelac, abanan ma̱cꞌaꞌak rajbal lix cꞌanjeleb. Incꞌaꞌ tinqꞌue chi e̱lc li racui̱mkeb xban nak la̱in yo̱ injoskꞌil saꞌ xbe̱neb, chan li Ka̱cuaꞌ.

Jeremías 17:24

La̱in li Ka̱cuaꞌ ninye: Cheba̱nuhak chi anchal e̱chꞌo̱l li cꞌaꞌru ninye e̱re. Incꞌaꞌ te̱numsi li cꞌaꞌak re ru saꞌ eb li oqueba̱l re li tenamit chiru li hiloba̱l cutan ut incꞌaꞌ texcꞌanjelak. Cheqꞌuehak xlokꞌal li hiloba̱l cutan.