Isaías 54:8 - Li Santil hu

⁸ Nak yo̱ injoskꞌil xinmuk cuib che̱ru junpa̱t. Abanan xban nak junelic nin-uxta̱nan u, la̱in tincuil cuiꞌchic xtokꞌoba̱l e̱ru, chan li Ka̱cuaꞌ laj Colol e̱re.

Q'eqchi Bible

⁸ Naq xchaalunk linjosq'il, jun k'amok xinmuq wib' chawu; ab'an nakatinra rik'in xnimal inrahom wank chi junelik -chan li Qaawa', laj kolol aawe-.

Isaías 54:8 ပူးပေါင်းရင်းမြစ်များ

Jeremías 31:3

Li Ka̱cuaꞌ quixcꞌutbesi rib chiruheb laj Israel junxil ut quixye reheb: —La̱in junelic ninrahoc e̱re. Joꞌcan nak junelic nacuuxta̱na e̱ru.

1 Timoteo 1:16

Usta la̱in kꞌaxalin aj ma̱c nak quincuan, abanan li Jesucristo quiruxta̱na cuu re nak tixcꞌutbesi nak kꞌaxal nim lix cuyum re xcuybal xsachbal li ma̱c. Quixcꞌut chiruheb lix nimal lix cuyum nak quixcuy inma̱c la̱in. Aꞌan quiraj nak la̱in tincꞌamok be chiruheb li ani teꞌpa̱ba̱nk re li Jesucristo ut teꞌxcꞌul li junelic yuꞌam.

Isaías 60:10

Li Ka̱cuaꞌ quixye reheb li cuanqueb Jerusalén: —Eb li jalaneb xtenamit teꞌxyi̱b cuiꞌchic li tzꞌac li sutsu cuiꞌ le̱ tenamit. Eb lix reyeb teꞌcꞌanjelak che̱ru. Nak yo̱ injoskꞌil la̱in quexinqꞌue chixtojbal e̱ma̱c. Abanan anakcuan xban nak xcuil xtokꞌoba̱l e̱re, xcuuxta̱na cuiꞌchic e̱ru.

Zacarías 1:15

Yo̱ caꞌchꞌin injoskꞌil saꞌ xbe̱neb lin tenamit. Abanan kꞌaxal cuiꞌchic yo̱ injoskꞌil saꞌ xbe̱neb li tenamit li incꞌaꞌ nequeꞌpa̱ban ut cꞌojcꞌo̱queb xchꞌo̱l xjuneseb xban nak kꞌaxal cuiꞌchic ra xeꞌxba̱nu reheb lin tenamit, chan.

Isaías 55:3

Cha̱lkex cuiqꞌuin. Cherabihak li cꞌaꞌru ninye. Cheba̱nuhak li cꞌaꞌru ninye ut ta̱cua̱nk e̱yuꞌam chi junelic. La̱in tinba̱nu jun li contrato e̱riqꞌuin. Texcuosobtesi chi junelic joꞌ xinyechiꞌi re laj David junxil.

Isaías 54:10

Usta na-ecꞌasi̱c li tzu̱l saꞌ xnaꞌajeb ut usta nequeꞌtꞌaneꞌ li tzu̱l, abanan lin rahom saꞌ e̱be̱n ma̱ jokꞌe ta̱jala̱k. Junelic ban texinra. Tinba̱nu li xinye saꞌ li contrato li xinba̱nu e̱riqꞌuin re nak junelic cua̱nko saꞌ usilal, chan li Ka̱cuaꞌ li na-uxta̱nan e̱ru.

Isaías 54:5

La̱in li Ka̱cuaꞌ li quinyoꞌobtesin e̱re. Chanchanakin le̱ be̱lom. “Nimajcual Dios” incꞌabaꞌ. La̱in li Ka̱cuaꞌ lix santil Dios laj Israel. La̱in tincolok e̱re. La̱in li kꞌaxal nim incuanquil saꞌ xbe̱neb chixjunileb li cuanqueb saꞌ ruchichꞌochꞌ.

Isaías 48:17

Li Dios Santo, le̱ Dios la̱ex aj Israel, laj Colol e̱re, quixye chi joꞌcaꞌin: —La̱in li Ka̱cuaꞌ le̱ Dios. La̱in nincꞌutuc che̱ru li cꞌaꞌru te̱ba̱nu re nak us tex-e̱lk. La̱in ninberesin e̱re re nak te̱ba̱nu li us.

Isaías 47:6

Nak yo̱ injoskꞌil saꞌ xbe̱n lin tenamit quinkꞌaxtesiheb saꞌ e̱rukꞌ la̱ex. Quinqꞌue lin tenamit chi cꞌutecꞌ xxuta̱n. Ut la̱ex incꞌaꞌ xeril xtokꞌoba̱l ruheb. Usta ac ti̱xeb, xeqꞌueheb chi cꞌanjelac chi cau.

Isaías 8:17

Usta quixmuk rib li Ka̱cuaꞌ chiruheb li ralal xcꞌajol laj Jacob, abanan la̱in cau inchꞌo̱l ut cꞌojcꞌo inchꞌo̱l riqꞌuin.

2 Ts 2:16

Li Ka̱cuaꞌ Jesucristo ut li Dios li kaYucuaꞌ, li narahoc ke, xban xnimal rusilal naxcꞌojob kachꞌo̱l chi junelic ut naxqꞌue xcacuilal kachꞌo̱l chi oybeni̱nc.

Isaías 49:26

La̱in tinqꞌueheb chixcamsinquil ribeb chi ribileb rib li queꞌrahobtesin a̱cue. Chanchan nak teꞌcala̱k xban li camsi̱nc xeꞌxba̱nu. Ut chixjunileb li tenamit teꞌxnau nak la̱in li Ka̱cuaꞌ, li nacoloc a̱cue. Teꞌxnau nak la̱in lix Dios laj Jacob ut cau cuib.—

Isaías 45:15

Li Ka̱cuaꞌ, le̱ Dios la̱ex aj Israel, aꞌan laj Colol e̱re. Aꞌan incꞌaꞌ na-ilman ru.

Salmos 103:17

Abanan lix rahom ut lix ti̱quilal li Ka̱cuaꞌ junelic cuan saꞌ xbe̱neb li nequeꞌxucuan ru li Ka̱cuaꞌ joꞌ ajcuiꞌ saꞌ xbe̱neb li ralal xcꞌajol li teꞌcua̱nk mokon.

Salmos 13:1

At Ka̱cuaꞌ, ¿joꞌ najtil tinsachk saꞌ a̱chꞌo̱l? Ut, ¿joꞌ najtil ta̱muk a̱cuib chicuu?

Salmos 27:9

Joꞌcan nak ma̱muk a̱cuib chicuu, at Ka̱cuaꞌ. Matjoskꞌoꞌ cuiqꞌuin ut mina̱tzꞌekta̱na xban nak caꞌaj cuiꞌ la̱at nacattenkꞌan cue. Mina̱canab injunes. China̱col ban. Caꞌaj cuiꞌ la̱at lin Dios. Ut caꞌaj cuiꞌ la̱at nacatcoloc cue.

Salmos 30:5

At Ka̱cuaꞌ, junpa̱t ajcuiꞌ nacatjoskꞌoꞌ. Abanan la̱ cha̱bilal nacuan chi junelic. Ma̱re tinya̱bak chiru li kꞌojyi̱n xban xrahil saꞌ inchꞌo̱l. Abanan joꞌ cuulajak chic sahak chic saꞌ inchꞌo̱l.

Isaías 14:1

Li Ka̱cuaꞌ ta̱ril xtokꞌoba̱l ruheb laj Israel, li ralal xcꞌajol laj Jacob. Tixsicꞌ cuiꞌchic ruheb ut tixcꞌameb cuiꞌchic saꞌ lix naꞌajeb. Ut eb li jalaneb xtenamiteb teꞌcha̱lk chi cua̱nc aran rochbeneb.

Isaías 26:20

Ex intenamit, ocankex saꞌ le̱ rochoch ut tzꞌapomak li oqueba̱l. Mukumak caꞌchꞌinak e̱rib toj ta̱numekꞌ xjoskꞌil li Dios.

Isaías 40:27

Ex aj Israel, ralal xcꞌajolex laj Jacob, ¿cꞌaꞌut nak nequecuechꞌi rix li Ka̱cuaꞌ? ¿Cꞌaꞌut nak nequeye nak li Ka̱cuaꞌ incꞌaꞌ naxqꞌue retal li raylal li yo̱quex chixcꞌulbal? ¿Cꞌaꞌut nak nequeye nak li Dios incꞌaꞌ naxqꞌue xchꞌo̱l che̱tenkꞌanquil?

Isaías 49:10

Incꞌaꞌ chic teꞌtzꞌoca̱k chi moco ta̱chakik reheb, ut lix tikcual li sakꞌe incꞌaꞌ ta̱chꞌiꞌchꞌiꞌi̱nk reheb xban nak li Jun li na-uxta̱nan ruheb tixberesiheb ut tixcꞌameb cuan cuiꞌ li yuꞌam haꞌ.

Isaías 49:13

At choxa, jap a̱cue xban xsahil a̱chꞌo̱l. At ruchichꞌochꞌ, chisahokꞌ a̱chꞌo̱l. Ut la̱ex tzu̱l chisahokꞌ saꞌ e̱chꞌo̱l xban nak li Ka̱cuaꞌ tixcꞌojob cuiꞌchic xchꞌo̱leb lix tenamit ut ta̱ril cuiꞌchic xtokꞌoba̱l ruheb nak yo̱queb chi cꞌuluc raylal.

Isaías 55:7

Ut eb li incꞌaꞌ useb xnaꞌleb cheꞌxcanabak xba̱nunquil li ma̱usilal. Cheꞌxjal lix cꞌaꞌuxeb ut cheꞌcha̱lk riqꞌuin li Ka̱cuaꞌ ut ta̱uxta̱na̱k ruheb xban. Cheꞌcha̱lk riqꞌuin li kaDios li kꞌaxal nim xcuyum chixcuybal li ma̱c.

Isaías 63:7

La̱in tinye resil li rusilal li Dios li nacuan chi junelic. Tinbicha lix lokꞌal xban li cꞌaꞌru naxba̱nu. Quirosobtesiheb laj Israel xban nak junelic na-uxta̱nan u ut junelic narahoc.

Isaías 64:7

Ma̱ ani chic naya̱ban la̱ cꞌabaꞌ ut ma̱ ani chic naxsicꞌ xtenkꞌanquil a̱cuiqꞌuin. Joꞌcan nak xoa̱canab kajunes. Xoa̱canab chi sachecꞌ xban li kama̱c.

Jeremías 33:26

la̱in xintzꞌekta̱na ajcuiꞌ raj li ralal xcꞌajol laj Jacob ut eb li ralal xcꞌajol laj David laj cꞌanjel chicuu. Ut incꞌaꞌ raj quebinxakab chi takla̱nc eb li ralal xcꞌajol laj Abraham ut laj Isaac ut laj Jacob. Abanan la̱in incꞌaꞌ tintzꞌekta̱naheb. Tincuuxta̱na ban ruheb ut tebinqꞌue cuiꞌchic chi sukꞌi̱c saꞌ lix naꞌajeb li queꞌcꞌameꞌ cuiꞌ chi pre̱xil, chan li Ka̱cuaꞌ.

Jeremías 51:5

Eb li ralal xcꞌajol laj Israel ut eb li ralal xcꞌajol laj Judá incꞌaꞌ queꞌtzꞌekta̱na̱c chi junaj cua xban li Ka̱cuaꞌ, li nimajcual Dios, usta numtajenak lix ma̱queb chiru li Ka̱cuaꞌ lix santil Dioseb.

Habacuc 3:2

At nimajcual Dios, nak quicuabi resil li joꞌ qꞌuial xaba̱nu, quinxucua a̱cuu. At Ka̱cuaꞌ Dios, chacꞌutbesi ta cuiꞌchic chiku anakcuan li caba̱nu chak junxil. Chacuuxta̱na taxak ku usta yo̱ a̱joskꞌil saꞌ kabe̱n.

Zacarías 1:16

Joꞌcan nak li nimajcual Dios quixye: —Tincuuxta̱na cuiꞌchic ruheb laj Jerusalén. Ta̱yi̱ba̱k cuiꞌchic li templo ut ta̱yi̱ba̱k ajcuiꞌ chixjunil li tenamit Jerusalén, chan li Dios.

Zacarías 10:6

La̱in tinqꞌue xcacuil xchꞌo̱leb li ralal xcꞌajol laj Judá. Ut tincoleb ajcuiꞌ li ralal xcꞌajol laj José. Tebinqꞌue cuiꞌchic chi sukꞌi̱c saꞌ lix naꞌajeb. La̱in tincuuxta̱na ruheb. Chanchan nak ma̱ jun sut xintzꞌekta̱naheb xban nak la̱in li Ka̱cuaꞌ lix Dioseb. Ut tincuabi li cꞌaꞌru teꞌxtzꞌa̱ma chicuu.

Salmos 103:4

Aꞌan nacoloc cue chiru li ca̱mc. Aꞌan naruxta̱na cuu ut naxqꞌue xsahil inchꞌo̱l.

Ezequiel 39:29

Ut ma̱ jaruj chic tincanabeb xjuneseb xban nak tinqꞌue lin musikꞌ reheb li ralal xcꞌajol laj Israel, chan li nimajcual Dios.