Isaías 54:11 - Li Santil hu

¹¹ Li Ka̱cuaꞌ quixye: —La̱ex aj Jerusalén, tokꞌob e̱ru. Kꞌaxal ra xecꞌul ut ma̱ ani xcꞌojoban e̱chꞌo̱l. La̱in tinyi̱b cuiꞌchic le̱ tenamit riqꞌuin li cha̱bil pec carbunclo ut tinqꞌue li cimiento riqꞌuin li cha̱bil pec zafiro.

Q'eqchi Bible

¹¹ “Toq'ob' aawu, tawasinb'ilat xb'aan li kaqsut-iq': maajun nak'ojob'ank aach'ool! Laa'in tatinwaklesi wi' chik rik'in q'eqjohinkil pek ut cho'q rub'elankil tink'eheb' li safiro.

Isaías 54:11 ပူးပေါင်းရင်းမြစ်များ

Jeremías 30:17

La̱in texinqꞌuirtesi ut tinban le̱ yocꞌolal, usta eb li xicꞌ nequeꞌiloc e̱re nequeꞌxye nak li tenamit Sión tzꞌekta̱nanbil ut ma̱ ani nacꞌoxlan re.

Hechos 14:22

Yo̱queb chixqꞌuebal xcacuil xchꞌo̱leb laj pa̱banel. Queꞌxye reheb nak teꞌxpa̱b li Ka̱cuaꞌ chi anchaleb xchꞌo̱l ut incꞌaꞌ teꞌxcanab xpa̱banquil. Queꞌxye reheb nak tento teꞌxcuy xnumsinquil li raylal re nak teꞌoc saꞌ lix nimajcual cuanquilal li Dios.

1 Crónicas 29:2

La̱in xinyal inkꞌe chixchꞌutubanquil chixjunil li ta̱cꞌanjelak re xyi̱banquil lix templo li Dios. Xinchꞌutub li oro re li cꞌaꞌak re ru li ta̱yi̱ba̱k riqꞌuin oro, ut xinchꞌutub li plata re li ta̱yi̱ba̱k riqꞌuin plata ut li bronce re li ta̱yi̱ba̱k riqꞌuin bronce. Xinchꞌutub li hierro re li ta̱yi̱ba̱k riqꞌuin hierro ut li cheꞌ re li ta̱yi̱ba̱k riqꞌuin cheꞌ. Xinchꞌutub ajcuiꞌ li cha̱bil pec ónice ut li pec li terto xtzꞌak, joꞌ ajcuiꞌ li kꞌeki pec ut li pec jalan jala̱nk xbonol. Ut cuan ajcuiꞌ nabal li cha̱bil pec mármol.

San Juan 16:33

Xinye e̱re li cꞌaꞌak re ru aꞌin re nak texcua̱nk cuiqꞌuin ut ta̱cua̱nk e̱riqꞌuin li tuktu̱quilal. Saꞌ li ruchichꞌochꞌ te̱cꞌul li raylal. Abanan cacuubresihomak le̱ chꞌo̱l xban nak la̱in ac xinnumta saꞌ xbe̱n li nataklan saꞌ ruchichꞌochꞌ, chan li Jesús reheb lix tzolom.

Ezequiel 10:1

Ut quicuil nak saꞌ xbe̱n li chanchan choxa li cuan saꞌ xbe̱neb li querubines quicꞌutun jun li cꞌojariba̱l yi̱banbil riqꞌuin li cha̱bil pec zafiro.

Isaías 54:6

La̱ex aj Israel, chanchanex jun li ixk li xsumla nak toj sa̱j ut ra saꞌ xchꞌo̱l xban nak quicanaba̱c xban lix be̱lom. La̱in li Ka̱cuaꞌ texinbok cuiꞌchic cuiqꞌuin joꞌ li be̱lomej li naxcꞌam cuiꞌchic saꞌ usilal li rixakil.

Isaías 51:21

Abihomak la̱ex li rahobtesinbilex. Qꞌuehomak retal la̱ex li chanchan texcala̱k, abanan moco xban ta li vino.

Isaías 49:14

Eb li cuanqueb Sión yo̱queb chixyebal: —Li Ka̱cuaꞌ xoxcanab kajunes. Li kaDios xosach saꞌ xchꞌo̱l, chanqueb.

Isaías 28:16

Joꞌcan nak li Ka̱cuaꞌ Dios quixye chi joꞌcaꞌin: —Qꞌuehomak retal. La̱in xinsicꞌ ru jun li pec kꞌaxal lokꞌ ut xinqꞌue aran Sión chokꞌ xxuc li cab re nak cau ta̱cana̱k. Ut li ani tixcꞌojob xchꞌo̱l riqꞌuin incꞌaꞌ ta̱chꞌina̱nk xchꞌo̱l.

Isaías 14:32

¿Cꞌaꞌru ta̱yehekꞌ reheb laj filisteo li nequeꞌchal kiqꞌuin? Takaye reheb nak li Ka̱cuaꞌ quixxakab saꞌ xnaꞌaj li tenamit Sión ut eb lix tenamit, li rahobtesinbileb, teꞌcolekꞌ aran.

Salmos 34:19

Kꞌaxal nabal li raylal nequeꞌxcꞌul li ti̱queb xchꞌo̱l. Abanan li Ka̱cuaꞌ cuan chixtenkꞌanquileb re nak teꞌxcuy xnumsinquil li raylal.

Efesios 2:20

La̱o aj pa̱banel chanchano li rochoch li Dios. Chanchano li pec li na-oc saꞌ xbe̱n li cimiento. Ut li cimiento, aꞌaneb li apóstol ut li profeta. Abanan li tzꞌakal xakxo cuiꞌ li cab, aꞌan li Jesucristo.

San Mateo 8:24

Nak ac cuanqueb chiru haꞌ, saꞌ junpa̱t quichal jun li nimla ca̱k-sut-ikꞌ. Ut yo̱ chi oc lix cau ok li haꞌ saꞌ li jucub. Ut li Jesús sa xcuara.

Ezequiel 1:26

Ut saꞌ xbe̱n li chanchan choxa li cuan saꞌ xbe̱neb li chanchaneb ángel, quicꞌutun jun li cꞌojariba̱l yi̱banbil riqꞌuin li cha̱bil raxi pec zafiro. Ut saꞌ li cꞌojariba̱l aꞌan chunchu jun li chanchan cui̱nk.

Lamentaciones 1:21

Eb li tenamit queꞌrabi nak yo̱co chi ya̱bac xban li raylal, abanan ma̱ ani nacꞌojoban kachꞌo̱l. Nequeꞌsahoꞌ saꞌ xchꞌo̱leb li xicꞌ nequeꞌiloc ke nak nequeꞌrabi resil li raylal li xaqꞌue saꞌ kabe̱n. Chicuulak taxak xkꞌehil li rakba a̱tin re nak teꞌxcꞌul ajcuiꞌ eb aꞌan joꞌ yo̱co chixcꞌulbal la̱o.

Isaías 51:23

Tintakla ban li raylal aꞌin saꞌ xbe̱neb li nequeꞌrahobtesin e̱re, eb li xeꞌxye e̱re, “Yoclankex re nak tonumekꞌ saꞌ e̱be̱n”. Ut la̱ex xeyocob e̱rib re teꞌnumekꞌ saꞌ e̱be̱n. Chanchanex chic li chꞌochꞌ.—

Cantares 5:14

Cꞌajoꞌ xchꞌinaꞌusal li rukꞌ. Chanchan li matkꞌab oro yi̱banbil riqꞌuin li cha̱bil pec topacio. Ut li ru xsaꞌ chanchan li cha̱bil marfil qꞌuebil xsahob ru riqꞌuin li cha̱bil pec zafiro.

1 Reyes 5:17

Li rey Salomón quixtakla xcꞌambaleb chak li ni̱nki pec li kꞌaxal cha̱bil re teꞌcꞌanjelak chokꞌ xcimiento li templo. Ut quixtakla ajcuiꞌ xcꞌambal li pec li ti̱cobresinbil ruheb.

Deuteronomio 31:17

Saꞌ li cutan aꞌan la̱in tinjoskꞌokꞌ saꞌ xbe̱neb ut tintzꞌekta̱naheb. Tincanabeb xjuneseb ut teꞌsachekꞌ ruheb. Nabal li raylal ut li chꞌaꞌajquilal ta̱cha̱lk saꞌ xbe̱neb. Ut eb aꞌan teꞌxye: —Yo̱co chixcꞌulbal li raylal aꞌin xban nak li Ka̱cuaꞌ li kaDios xoxcanab kajunes, chaꞌkeb.

Éxodo 24:10

Ut eb laj Israel queꞌril ru li Ka̱cuaꞌ Dios li queꞌxlokꞌoni. Rubel rok li Dios cuan li quicꞌutun rax rax ut cutan ru. Chanchan li terto̱quil pec zafiro xcꞌabaꞌ li kꞌaxal rax ru. Chanchan raxil ru li choxa.

Éxodo 3:7

Li Ka̱cuaꞌ Dios quixye re: —La̱in yo̱quin chirilbal li raylal li yo̱queb chixcꞌulbal lin tenamit li cuanqueb Egipto. Yo̱quin chirabinquil nak yo̱queb chixkꞌokonquil ribeb saꞌ rukꞌeb li nequeꞌtaklan reheb saꞌ joskꞌil. Ninnau nak kꞌaxal nayotꞌeꞌ xchꞌo̱leb xban nak rahobtesinbileb.

Éxodo 3:2

Aran quixcꞌutbesi rib lix ángel li Ka̱cuaꞌ Dios chiru laj Moisés saꞌ rakꞌ li xam saꞌ li jun to̱n chi qꞌuix. Laj Moisés quiril nak yo̱ xxamlel ut incꞌaꞌ na-osoꞌ li qꞌuix.

Éxodo 2:23

Ac xnumeꞌ chic nabal cutan nak quicam lix reyeb laj Egipto. Eb laj Israel japjo̱queb re xban li raylal yo̱queb chixcꞌulbal joꞌ rahobtesinbil mo̱s. Li Dios quirabi nak yo̱queb chi kꞌoko̱nc.

Isaías 60:15

Usta tzꞌekta̱nanbilex nak quexcuan ut usta xicꞌ quex-ileꞌ ut ma̱ ani quinumeꞌ saꞌ le̱ tenamit, abanan la̱in tinqꞌue e̱lokꞌal ut chixjunileb teꞌsahokꞌ saꞌ xchꞌo̱leb e̱riqꞌuin chi junelic.

Li xHu LAJ JOB 28:16

Li cha̱bil naꞌleb kꞌaxal cuiꞌchic terto xtzꞌak chiru li cha̱bil oro li natauman saꞌ li naꞌajej Ofir. Ut kꞌaxal cuiꞌchic terto xtzꞌak chiru li cha̱bil pec ónice ut li terto̱quil pec zafiro.

Isaías 44:28

Nak la̱in tinye re laj Ciro nak aꞌan ta̱cꞌanjelak chicuu, laj Ciro tixba̱nu li cꞌaꞌru nacuaj toj retal nak tixye nak li tenamit Jerusalén ta̱yi̱ba̱k cuiꞌchic. Ut tixye ajcuiꞌ nak li templo ta̱yi̱ba̱k cuiꞌchic, chan li Ka̱cuaꞌ.

Isaías 54:12

Eb li ventanas tinyi̱beb riqꞌuin li cha̱bil pec terto xtzꞌak ut eb li puerta tinyi̱beb riqꞌuin li cha̱bil pec carbunclo. Chixjunileb li tzꞌac tinyi̱b riqꞌuin li cha̱bil pec terto xtzꞌak.

Miqueas 7:11

Ta̱cuulak xkꞌehil nak ta̱yi̱ba̱k cuiꞌchic li tzꞌac li sutsu cuiꞌ le̱ tenamit ut ta̱nima̱nk le̱ naꞌaj la̱ex li cuanquex Jerusalén.

1 Reyes 6:30

Ut queꞌxqꞌue ajcuiꞌ li oro chiru li cheꞌ li queꞌxqꞌue chiru chꞌochꞌ, joꞌ chi saꞌ joꞌ chirix.

2 Crónicas 3:6

Ut quixletz li terto̱quil pec chiru li templo re xqꞌuebal xsahob ru. Li oro, aꞌan li quichal chak Parvaim.