Isaías 26:17 - Li Santil hu

¹⁷ Chanchano li yaj aj ixk li oc re chi qꞌuira̱c. Japjo re xban li raylal. Joꞌcan yo̱co chixcꞌulbal la̱o, at Ka̱cuaꞌ.

Q'eqchi Bible

¹⁷ Jo' naq li ixq wank sa' yu'am ut xwulak xhonalil li alank, japjo re xb'aan li rahilal, jo'kan ajwi' naq xoowank chawu, at Qaawa'.

Isaías 26:17 ပူးပေါင်းရင်းမြစ်များ

San Juan 16:21

Junak ixk yoꞌla̱c re lix cꞌulaꞌal narecꞌa xrahil lix raylal. Abanan nak ac xyoꞌla lix cꞌulaꞌal, nasach saꞌ xchꞌo̱l li raylal li quixcꞌul ut nasahoꞌ saꞌ xchꞌo̱l xban nak ac xyoꞌla lix cꞌulaꞌal.

Isaías 13:8

Nabal li raylal ta̱cha̱lk saꞌ xbe̱neb ut yo̱keb xxiu. Cꞌajoꞌ li raylal li teꞌxcꞌul. Chanchanak li raylal li naxcꞌul li ixk li oc re chi qꞌuira̱c. Teꞌxcaꞌya ribeb ut teꞌsach xchꞌo̱leb chi rilbal li cꞌaꞌru teꞌxcꞌul li jun chꞌol chic ut teꞌxuta̱nak.

1 Ts 5:3

Nak eb li tenamit yo̱keb chixyebal, “Cuanco saꞌ tuktu̱quil usilal ut ma̱cꞌaꞌ cꞌoxlac”, tojoꞌnak ta̱cha̱lk rosoꞌjiqueb saꞌ junpa̱t chi ma̱cꞌaꞌak saꞌ xchꞌo̱leb joꞌ nak nachal xraylal li yaj aj ixk chi ma̱cꞌaꞌ saꞌ xchꞌo̱l. Ut eb aꞌan incꞌaꞌ teꞌcolekꞌ chiru li raylal ta̱cha̱lk saꞌ xbe̱neb.

Isaías 21:3

Cꞌajoꞌ lin xiu ut ra cuanquin xban li cꞌaꞌru quicuil saꞌ li visión. Chanchan li raylal li naxcꞌul li ixk li oc re chi qꞌuira̱c. Nayotꞌeꞌ inchꞌo̱l xban li cꞌaꞌru quicuabi ut sachso innaꞌleb xban li cꞌaꞌru quicuil.

Jeremías 30:6

Cꞌoxlahomak junpa̱tak. ¿Ma naru ta biꞌ nayoꞌla junak xcꞌulaꞌal li cui̱nk? ¿Cꞌaꞌut nak yo̱queb chi xucuac li cui̱nk ut yo̱queb chi ya̱bac? Sakquirin aj chic nequeꞌiloc xbaneb xxiu. Chanchaneb chic li ixk li oqueb re chi qꞌuira̱c.

Jeremías 6:24

Eb li cuanqueb Jerusalén nequeꞌxye: —Xkabi resil nak kꞌaxal ra nequeꞌxba̱nu li yo̱queb chi cha̱lc. Yo̱ kaxiu ut ma̱cꞌaꞌ chic kametzꞌe̱u. Kꞌaxal ra cuanco joꞌ jun li ixk oc re chi qꞌuira̱c.

Jeremías 4:31

La̱in xcuabi nak yo̱queb chi ya̱bac laj Jerusalén. Chanchan nak naxjap re li ixk nak oc re chi qꞌuira̱c riqꞌuin li xbe̱n xcꞌulaꞌal. Incꞌaꞌ chic nequeꞌxcuy musikꞌac. Nequeꞌxyeꞌ li rukꞌeb nak yo̱queb chixtzꞌa̱manquil xtenkꞌanquileb. “Tokꞌob ku. Incꞌaꞌ nakacuy saꞌ rukꞌeb li nequeꞌraj kacamsinquil,” chanqueb.

Salmos 48:6

Nequeꞌsicsot queꞌcana xban xxiuheb ut queꞌoc chirecꞌanquil jun li raylal. Chanchan xraylal junak ixk oc re chi qꞌuira̱c.

Apocalipsis 12:2

Li ixk aꞌan yaj aj ixk. Ac oc re chi qꞌuira̱c. Yo̱ chixjapbal re xban lix raylal.

Isaías 37:3

Queꞌxye re laj Isaías: —Aꞌan aꞌin li naxye laj Ezequías. Chiru li cutan aꞌin yo̱co chi cꞌuluc raylal xban li ma̱c xkaba̱nu. Yo̱queb chikamajecuanquil li xicꞌ nequeꞌiloc ke ut yo̱queb chikahobbal. Yo̱co chi cꞌuluc raylal. Chanchano jun li ixk oc re chi qꞌuira̱c ut ma̱cꞌaꞌ chic xmetzꞌe̱u.

Génesis 3:16

Ut li Dios quixye re li ixk: —Kꞌaxal cuiꞌchic nabal li raylal tinqꞌue saꞌ a̱be̱n nak cua̱nkat chi yaj aj ixk. Riqꞌuin raylal teꞌyoꞌla̱k la̱ cocꞌal. Ut ta̱cuaj nak cua̱nk la̱ be̱lom a̱cuiqꞌuin ut aꞌan ta̱takla̱nk a̱cue.