Isaías 1:11 - Li Santil hu

¹¹ Li Dios quixye: —Ma̱cꞌaꞌ na-oc cuiꞌ cue li qꞌuila mayej nequemayeja chicuu. Xintitzꞌ xban le̱ cꞌatbil mayej. Xintitzꞌ riqꞌuin li cꞌatbil carner ut lix xe̱bul li sa̱j cuacax ni̱nkeb xtibel. Incꞌaꞌ chic nacuulac chicuu lix quiqꞌuel li toro, li carner, ut li chiba̱t.

Q'eqchi Bible

¹¹ “K'aru aj e we leek'iila mayej? Jwal xintitz'k xb'aan leekarneer nekek'at chiwu, ut ninyib' li xk'iila xeeb'ul leewakax. Li xkik'eleb' li wakax ut eb' li chib'aat ink'a' nawulak chiwu.

Isaías 1:11 ပူးပေါင်းရင်းမြစ်များ

Amós 5:21

Li Ka̱cuaꞌ quixye: —Xicꞌ nacuil le̱ ninkꞌe ut nintzꞌekta̱na chixjunil li cꞌaꞌru nequeba̱nu nak nequexninkꞌei̱c. Incꞌaꞌ nacuulac chicuu nak nequechꞌutub e̱rib chinlokꞌoninquil.

1 Samuel 15:22

Laj Samuel quixye re: —¿Cꞌaꞌru li kꞌaxal lokꞌ chiru li Ka̱cuaꞌ? ¿Ma li mayejac malaj ut li abi̱nc? Chiru li Ka̱cuaꞌ li abi̱nc, aꞌan li kꞌaxal lokꞌ chiru li mayejac. Li xba̱nunquil li cꞌaꞌru naxye li Dios, aꞌan kꞌaxal lokꞌ chiru xcꞌatbal xxe̱bul li carner.

Jeremías 6:20

¿Cꞌaꞌru aj e nak teꞌxcꞌam chak li pom toj saꞌ li tenamit Sabá? ¿Cꞌaꞌru rajbal nak teꞌxic chi najt chixsicꞌbal li sununquil ban? La̱in incꞌaꞌ nacuulac chicuu lix mayej chi moco tincꞌuleb ta lix cꞌatbil mayej.

Isaías 66:3

Eb aꞌan queꞌxsicꞌ ru li cꞌaꞌru queꞌraj xba̱nunquil ut aꞌ chic li ma̱usilal queꞌxra. Incꞌaꞌ tincꞌul lix mayejeb. Cui teꞌxcamsi li toro re teꞌxmayeja chicuu, chanchan nak teꞌxcamsi li ras ri̱tzꞌin. Ut cui teꞌxcamsi li carner, chanchan nak teꞌxtok xcux li tzꞌiꞌ. Ut nak teꞌxmayeja li ru li trigo, chanchan nak teꞌxmayeja xquiqꞌuel li a̱k chicuu. Nak teꞌxcꞌat lix pom chicuu, chanchan nak yo̱queb chixlokꞌoninquil li jalanil dios.

Miqueas 6:7

¿Ma ta̱sahokꞌ saꞌ xchꞌo̱l li Ka̱cuaꞌ cui takamayeja nabalak li carner chiru? ¿Ma ta̱sahokꞌ xchꞌo̱l riqꞌuin cui takamayeja chiru nabalak li aceite? ¿Ma takaqꞌue chokꞌ kamayej li xbe̱n kalal re tixcuy kama̱c nak xkakꞌet li ra̱tin? ¿Ma takamayeja li xbe̱n kalal re xtojbal rix li kama̱c?

Malaquías 1:10

Li Ka̱cuaꞌ li nimajcual Dios quixye: —Us raj cuan ta junak e̱re tixtzꞌap raj xpuertil lin templo re nak ma̱ ani chic ta̱oc aran chixtzꞌabbal li xam saꞌ xbe̱n lin artal chi ma̱cꞌaꞌ rajbal. La̱in incꞌaꞌ sa saꞌ inchꞌo̱l e̱riqꞌuin ut incꞌaꞌ chic tincꞌul li nequemayeja chicuu.

Proverbios 15:8

Li Ka̱cuaꞌ xicꞌ naril lix mayejeb li incꞌaꞌ useb xnaꞌleb. Abanan lix tijeb li ti̱queb xchꞌo̱l li Ka̱cuaꞌ naxcꞌul chi sa saꞌ xchꞌo̱l.

Salmos 50:8

Moco xban ta li cꞌatbil mayej nak texinkꞌus xban nak junelic yo̱quex chixqꞌuebal li mayej chicuu.

Proverbios 21:27

Li Ka̱cuaꞌ xicꞌ naril lix mayejeb li incꞌaꞌ useb xnaꞌleb. ¿Ma tojaꞌ ta chic tixcꞌul nak teꞌxqꞌue chi incꞌaꞌ useb lix cꞌaꞌuxeb?

San Mateo 9:13

Cheqꞌuehak biꞌ e̱chꞌo̱l chixtaubal ru lix ya̱lal li a̱tin aꞌin: “li kꞌaxal lokꞌ chicuu, aꞌan li uxta̱na̱nc u ut ma̱cuaꞌ li mayejac xul”. La̱in incꞌaꞌ xinchal chixsicꞌbal li ti̱queb xchꞌo̱l. Xinchal ban chixsicꞌbaleb laj ma̱c re nak teꞌyotꞌekꞌ xchꞌo̱l teꞌxjal xcꞌaꞌux, chan li Jesús.

Salmos 51:16

Cui ta cꞌatbil mayej nacacuaj, tinqꞌue raj a̱cue. Abanan la̱at incꞌaꞌ nacacuaj li cꞌatbil mayej.

Jeremías 7:21

Ut quixye ajcuiꞌ li nimajcual Dios, lix Dioseb laj Israel: —La̱ex lin tenamit, la̱ex yo̱quex chixqꞌuebal nabal le̱ cꞌatbil mayej joꞌ ajcuiꞌ le̱ mayej jun chꞌol chic. Abanan ma̱cꞌaꞌ na-oc cuiꞌ le̱ mayej. Kꞌaxal us raj nak te̱tzaca la̱ex.

San Mateo 22:4

Quixtakla cuiꞌchic jalaneb chic lix mo̱s ut quixye reheb: “Yehomak reheb li ac bokbileb, ‘Ac cꞌu̱bcꞌu li tzacae̱mk, ac xeꞌcamsiman eb li cuacax ut chixjunil li xul li ni̱nk xtibeleb. Ac cauresinbil chixjunil. Cha̱lkex saꞌ li sumla̱c,’ chaꞌakex reheb.”

Números 7:45

Quixqꞌue ajcuiꞌ jun li toro toj sa̱j, jun li te̱lom carner, ut jun li te̱lom carner jun chihab cuan re, re li cꞌatbil mayej.

Salmos 40:6

La̱at incꞌaꞌ nacacuaj nak tomayejak ut incꞌaꞌ nacacuaj nak ta̱cꞌatma̱nk li xul saꞌ xbe̱n li artal. Xacutanobresi ban li kanaꞌleb ut xkaqꞌue retal nak moco riqꞌuin ta li nakamayeja nak ta̱isi̱k li kama̱c.

Proverbios 21:3

Chexcua̱nk saꞌ cha̱bilal ut saꞌ ti̱quilal xban nak aꞌan li kꞌaxal lokꞌ chiru li Dios chiru li cꞌatbil mayej.

Isaías 58:2

Cuulaj cuulaj yo̱queb chinsicꞌbal. Nequeꞌraj xnaubal cꞌaꞌru tincuaj teꞌxba̱nu. Chanchaneb jun li tenamit li nequeꞌxba̱nu li us. Chanchan nak incꞌaꞌ xeꞌxkꞌet lin chakꞌrab. Nequeꞌxtzꞌa̱ma chicuu li chakꞌrab li ti̱c. Nequeꞌxye nak nacuulac chiruheb inlokꞌoninquil, chan li Dios.

Oseas 6:6

Ma̱cꞌaꞌ aj e nak nequexmayejac chicuu cui incꞌaꞌ nequex-uxta̱nan u. Ut ma̱cꞌaꞌ aj e nak nequexcꞌatoc xul cui incꞌaꞌ niquine̱pa̱b chi anchal e̱chꞌo̱l.

Amós 5:22

Usta nequemayeja li cꞌatbil xul re xqꞌuebal inlokꞌal ut nequemayeja li ru le̱ trigo, abanan incꞌaꞌ nacuulac chicuu. Usta te̱mayeja li ral li cuacax, li nim xtibel re xcꞌambal cuiꞌchic e̱rib saꞌ usilal cuiqꞌuin, abanan la̱in incꞌaꞌ tincꞌul.

Hageo 2:14

Quichakꞌoc laj Hageo ut quixye reheb: —Joꞌcan eb ajcuiꞌ li tenamit aꞌin chicuu, chan li nimajcual Dios. —Chixjunil li cꞌaꞌru nequeꞌxba̱nu ut li cꞌaꞌru nequeꞌxmayeja chicuu ac muxbil ru, chan.

Zacarías 7:5

—Ye reheb chixjunileb li tenamit ut reheb ajcuiꞌ laj tij chi joꞌcaꞌin: Ya̱l nak la̱ex xeba̱nu le̱ ayu̱n ut xexya̱bac saꞌ li roꞌ po ut saꞌ li xcuuk po. Xeba̱nu aꞌan rajlal chihab chiru laje̱b xca̱cꞌa̱l (70) chihab. ¿Ma re xqꞌuebal ta biꞌ inlokꞌal la̱in nak xeba̱nu aꞌan?

Oseas 8:13

Nequeꞌxmayeja li xul chicuu ut eb aꞌan ajcuiꞌ li nequeꞌtzacan re. La̱in incꞌaꞌ nacuulac chicuu lix mayejeb xban nak najulticoꞌ cue li ma̱usilal nequeꞌxba̱nu. Joꞌcan nak re xtojbal rixeb lix ma̱c, ta̱cha̱lk li raylal saꞌ xbe̱neb. Chanchan li raylal li queꞌxcꞌul nak cuanqueb chak Egipto.

Amós 4:5

Ayukex. Chemayeja le̱ caxlan cua li cuan xchꞌamal ut yehomak resil li joꞌ qꞌuial xemayeja xban nak aꞌan li nacuulac che̱ru xba̱nunquil, la̱ex aj Israel, chan li Ka̱cuaꞌ Dios.