Hechos 3:12 - Li Santil hu

¹² Nak laj Pedro quirileb, quixye reheb: —La̱ex aj Israel, ¿cꞌaꞌut nak sachso e̱chꞌo̱l nequexcana xban li cꞌaꞌru xcꞌulman? ¿Cꞌaꞌut nak yo̱quex chikilbal? ¿Ma nequecꞌoxla la̱ex nak la̱o xkaqꞌuirtesi li cui̱nk aꞌin kajunes? ¿Ma xban ta biꞌ kacuanquil ut li kacha̱bilal nak xkaqꞌue chi be̱c li cui̱nk aꞌin?

Q'eqchi Bible

¹² Naq kiril a'in laj Pedro, kixye reheb' li tenamit: “Ex aj Israel, k'a'ut naq nasachk eech'ool chi rilb'al a'in? K'a'ut naq nokooheeka'ya laa'o, chanchan wi' rik'in qawankil malaj qusilal xqak'e wi' chi b'eek li winq a'in?

Hechos 3:12 ပူးပေါင်းရင်းမြစ်များ

2 Corintios 3:5

Ma̱ jun cꞌanjel naru nakayoꞌob kajunes, chi moco naru nakacꞌoxla xba̱nunquil. Li Dios ban naxqꞌue kacuanquil chixba̱nunquil li cꞌaꞌru nakaba̱nu.

Génesis 41:16

Ut laj José quixye re: —La̱in injunes incꞌaꞌ naru tinye cꞌaꞌru xya̱lal la̱ matcꞌ. Caꞌaj cuiꞌ li Ka̱cuaꞌ Dios nanaꞌoc re lix ya̱lal. Aꞌan ta̱tenkꞌa̱nk cue xtaubal ru xya̱lal la̱ matcꞌ, at faraón, re nak ta̱cꞌojla̱k a̱chꞌo̱l, chan laj José.

Romanos 9:4

Aꞌan eb li ralal xcꞌajol laj Israel. Li Dios quixsiqꞌueb ru ut quixcꞌuleb chokꞌ ralal xcꞌajol, ut quixcꞌut lix lokꞌal chiruheb retalil nak cuan riqꞌuineb. Quixba̱nu li contrato riqꞌuineb ut quixqꞌue lix chakꞌrab reheb. Quicꞌuteꞌ chiruheb chanru teꞌxlokꞌoni li Dios saꞌ xya̱lal ut cuan cꞌaꞌ re ru quixyechiꞌi li Dios reheb.

Hechos 2:22

Ex aj Israel, abihomak li tinye e̱re. La̱ex ac nequenau nak li Jesús aj Nazaret, aꞌan qꞌuebil xcuanquil xban li Dios saꞌ e̱ya̱nk la̱ex riqꞌuin li sachba chꞌo̱lej ut li milagro quilajxba̱nu. La̱ex ac nequenau nak riqꞌuin xcuanquil li Dios quixba̱nu li sachba chꞌo̱lej.

Romanos 11:1

Tinpatzꞌ e̱re, ¿ma xeꞌtzꞌekta̱na̱c laj Israel xban li Dios chi joꞌcanan? ¡Chi ya̱l nak incꞌaꞌ! La̱in ajcuiꞌ aj Israel la̱in ut la̱in ralal xcꞌajol laj Benjamín ut laj Abraham.

Hechos 13:26

Ex kas ki̱tzꞌin, la̱ex ralal xcꞌajol laj Abraham, ut la̱ex li ma̱cuaꞌex aj judío li nequexucua ru li Dios, taklanbil chak chokꞌ e̱re laj Colonel.

San Juan 7:18

Cui junak naxchꞌolob xya̱lal li naxcꞌoxla xjunes, li jun aꞌan naraj nak ta̱qꞌuehekꞌ xlokꞌal xbaneb li nequeꞌabin re. Abanan li ani naraj nak ta̱qꞌuehekꞌ xlokꞌal li quitaklan chak re, li jun aꞌan ti̱c xchꞌo̱l ut ma̱cꞌaꞌ balakꞌic riqꞌuin.

Génesis 40:8

Eb aꞌan queꞌxye re: —La̱o xomatqꞌuec ut ma̱ ani naru xyebal ke cꞌaꞌru xya̱lal li kamatcꞌ.— Laj José quixye reheb: —Caꞌaj cuiꞌ li Ka̱cuaꞌ Dios nanaꞌoc re cꞌaꞌru xya̱lal lix matcꞌ li junju̱nk. Naru te̱ye cue le̱ matcꞌ, chan.

Hechos 3:11

Ut li cui̱nk li quiqꞌuirtesi̱c incꞌaꞌ quiraj xcanabanquil rib riqꞌuineb laj Pedro ut laj Juan. Yo̱ chi be̱c rochbeneb. Ut chixjunileb sachso̱queb xchꞌo̱l chirilbal li quicꞌulman. Queꞌco̱eb saꞌ a̱nil saꞌ li templo ut queꞌxchꞌutub ribeb saꞌ li oqueba̱l Salomón xcꞌabaꞌ, cuanqueb cuiꞌ laj Pedro ut laj Juan.

Hechos 3:13

Li Dios li queꞌxlokꞌoni chak laj Abraham, laj Isaac ut laj Jacob joꞌqueb ajcuiꞌ li kaxeꞌto̱nil yucuaꞌ, aꞌan quiqꞌuehoc xcuanquil li Jesucristo laj cꞌanjel chiru. Ut la̱ex quekꞌaxtesi aꞌan re laj Pilato. Ut nak laj Pilato quiraj raj rachꞌabanquil, la̱ex incꞌaꞌ queraj.

Apocalipsis 7:13

Ut jun reheb li ca̱hib xcaꞌcꞌa̱l li cꞌojcꞌo̱queb aran quixpatzꞌ cue: —¿Aniheb aꞌin li tikibanbileb riqꞌuin saki akꞌ? Ut, ¿bar xeꞌchal chak?—