Génesis 1:1 - Li Santil hu

¹ Saꞌ xticlajic li Dios quixyi̱b chak li choxa ut li ruchichꞌochꞌ.

Q'eqchi Bible

¹ Sa' xtiklajik chaq li Yos kixyoob'tesi li choxach'och'.

Génesis 1:1 ပူးပေါင်းရင်းမြစ်များ

Hebreos 11:3

Xban nak nakapa̱b li ra̱tin li Dios, nakanau nak li Dios quixyi̱b li choxa joꞌ ajcuiꞌ li ruchichꞌochꞌ. Ma̱cuaꞌ riqꞌuin cꞌaꞌak re ru quixyi̱b li ruchichꞌochꞌ. Yal riqꞌuin li ra̱tin quixyi̱b.

Isaías 45:18

Li Ka̱cuaꞌ li quiyi̱ban re li choxa, aꞌan li Ka̱cuaꞌ li tzꞌakal Dios. Aꞌan li quixakaban re li ruchichꞌochꞌ saꞌ xnaꞌaj. Aꞌan incꞌaꞌ quixyi̱b li ruchichꞌochꞌ re nak ta̱cua̱nk chi ma̱cꞌaꞌ cua̱nk chi saꞌ. Quixyi̱b ban re nak cua̱nk xnaꞌajeb li cristian. Aꞌan li quiyehoc re: —La̱in li Ka̱cuaꞌ Dios. Ma̱cꞌaꞌ chic junak dios chicuu la̱in.

Apocalipsis 4:11

Ut queꞌxye re: At Ka̱cuaꞌ, at kaDios, a̱cꞌulub nak takaqꞌue a̱lokꞌal. A̱cꞌulub nak ta̱nima̱k a̱cuu ut ta̱qꞌuehekꞌ a̱cuanquil xban nak la̱at catyi̱ban re chixjunil li cꞌaꞌru cuan. Xban nak joꞌcan xacuaj la̱at, joꞌcan nak xayoꞌobtesiheb li cꞌaꞌru cuanqueb.

Hebreos 1:10

Li Dios quixye cuiꞌchic re li Cꞌajolbej: La̱at, at Ka̱cuaꞌ, saꞌ xticlajic cayi̱b li ruchichꞌochꞌ ut riqꞌuin ajcuiꞌ a̱cuukꞌ cayi̱b li choxa.

Isaías 42:5

Li Ka̱cuaꞌ li quiyi̱ban re li choxa ut quixhel ru, li quiyi̱ban re li ruchichꞌochꞌ ut chixjunil li cuan chiru, li quiyoꞌobtesin reheb li tenamit ut quixqꞌue xyuꞌameb naxye chi joꞌcaꞌin re laj cꞌanjel chiru:

Éxodo 20:11

Chiru cuakib cutan li Ka̱cuaꞌ Dios quixyi̱b li choxa, li ruchichꞌochꞌ ut li palau. Quilajxyi̱b chixjunil li cꞌaꞌak re ru cuan saꞌ ruchichꞌochꞌ joꞌ ajcuiꞌ saꞌ choxa. Ut saꞌ xcuuk li cutan quihilan. Joꞌcan nak li Ka̱cuaꞌ Dios quirosobtesi li hiloba̱l cutan ut quixsantobresi.

Li xHu LAJ JOB 38:4

¿Ma ac cuancat ta biꞌ la̱at nak quinyi̱b chak saꞌ xnaꞌaj li ruchichꞌochꞌ? Cui la̱at mas nacanau chicuu la̱in, cꞌut chicuu la̱ naꞌleb.

Hechos 17:24

Ut aꞌan ajcuiꞌ li Dios, li quiyi̱ban re li ruchichꞌochꞌ ut chixjunil li cꞌaꞌak re ru cuan. Aꞌan laj e̱chal re li choxa ut li ruchichꞌochꞌ. Aꞌan incꞌaꞌ nacuan saꞌ junak cab yi̱banbil xban cui̱nk.

2 Pedro 3:5

Li nequeꞌxye chi joꞌcan incꞌaꞌ nequeꞌraj xjulticanquil chanru qui-uxman chak najter. Incꞌaꞌ nequeꞌraj xqꞌuebal retal nak yal riqꞌuin ra̱tin li Dios quixyoꞌobtesi li choxa ut li ruchichꞌochꞌ. Li Dios quixyi̱b li ruchichꞌochꞌ saꞌ haꞌ ut saꞌ xbe̱n haꞌ quicꞌojla li chꞌochꞌ xban li Dios.

Nehemías 9:6

Ut laj Esdras quitijoc ut quixye: —At Ka̱cuaꞌ, caꞌaj cuiꞌ la̱at li Dios. Ma̱ ani chic junak Dios. Caꞌaj cuiꞌ la̱at. La̱at catyi̱ban re li choxa joꞌ ajcuiꞌ chixjunil li cuan chiru. La̱at catyi̱ban re li ruchichꞌochꞌ ut chixjunil li cuan chiru. La̱at catyi̱ban re li palau joꞌ ajcuiꞌ chixjunil li cuan chi saꞌ. La̱at nacaqꞌue xyuꞌameb chixjunil li cꞌaꞌru cuan. Joꞌcan nak chixjunileb li cuanqueb saꞌ choxa nacateꞌxlokꞌoni.

Isaías 44:24

Aꞌan aꞌin li quixye li Ka̱cuaꞌ: —La̱in li Ka̱cuaꞌ laj Colol e̱re. La̱in quinyoꞌobtesin e̱re nak toj ma̱jiꞌ nequexyoꞌla. La̱in li Ka̱cuaꞌ. La̱in quinyi̱ban re chixjunil li cꞌaꞌru cuan. La̱in quinyi̱b li choxa ut quinhel ru. Ma̱ ani quitenkꞌan cue nak quinyi̱b li ruchichꞌochꞌ.

Jeremías 32:17

—At Ka̱cuaꞌ, at nimajcual Dios, kꞌaxal nim la̱ cuanquil. La̱at catyi̱ban re li choxa ut li ruchichꞌochꞌ riqꞌuin xnimal a̱cuanquil. Ma̱cꞌaꞌ chꞌaꞌaj cha̱cuu la̱at.

Jeremías 51:15

Li Ka̱cuaꞌ quixyi̱b li ruchichꞌochꞌ riqꞌuin lix cuanquil. Quixxakab saꞌ xnaꞌaj riqꞌuin lix naꞌleb ut quixyi̱b li choxa.

Salmos 33:9

Yal riqꞌuin ra̱tin li Dios chixjunil quicana chi yi̱banbil. Riqꞌuin li quixye li Ka̱cuaꞌ quiya̱loꞌ ru chixjunil.

Proverbios 3:19

Xban nak cuan xnaꞌleb li Ka̱cuaꞌ Dios quixqꞌue li ruchichꞌochꞌ saꞌ xnaꞌaj, ut quixyi̱b ajcuiꞌ li choxa saꞌ xnaꞌaj riqꞌuin lix se̱bal xchꞌo̱l.

Apocalipsis 14:7

Yo̱ chixyebal chi cau xya̱b xcux: —Chexucua̱k ru li Dios ut cheqꞌue xlokꞌal xban nak xcuulac xkꞌehil nak ta̱rakok a̱tin saꞌ xbe̱neb li cuanqueb saꞌ ruchichꞌochꞌ. Chelokꞌonihak aꞌan li quiyi̱ban re li choxa, li ruchichꞌochꞌ, ut li palau joꞌqueb ajcuiꞌ li yuꞌam haꞌ, chan.

Salmos 115:15

Aꞌ ta li nimajcual Dios li quiyi̱ban re li choxa ut li ruchichꞌochꞌ chi-osobtesi̱nk e̱re.

Hechos 14:15

—Ex tenamit, ¿cꞌaꞌut nak nequeba̱nu chi joꞌcan? La̱o yal cui̱nko joꞌ la̱ex. Juntakꞌe̱to e̱riqꞌuin. Aꞌan aj e nak xochal arin saꞌ e̱ya̱nk chixyebal e̱re nak te̱canab li joꞌ ma̱joꞌil naꞌleb. Sicꞌomak ban li yoꞌyo̱quil Dios li quiyi̱ban re li choxa, li ruchichꞌochꞌ, li palau ut chixjunil li cꞌaꞌru cuan.

Salmos 136:5

Aꞌan li quiyi̱ban re li choxa riqꞌuin lix naꞌleb xban nak kꞌaxal nim li ruxta̱n saꞌ kabe̱n junelic.

Jeremías 10:12

Li Ka̱cuaꞌ Dios, aꞌan li quiyi̱ban re li ruchichꞌochꞌ riqꞌuin xnimal xcuanquil. Riqꞌuin lix naꞌleb quixyi̱b li ruchichꞌochꞌ saꞌ xnaꞌaj ut quixyi̱b ajcuiꞌ li choxa.

1 Corintios 8:6

Abanan la̱o aj pa̱banel nakanau nak jun ajcuiꞌ li Dios cuan. Ut li Dios Acuabej aꞌan li quiyi̱ban re chixjunil li cꞌaꞌru cuan. Coxyoꞌobtesi la̱o re nak takalokꞌoni aꞌan. Ut jun ajcuiꞌ li Ka̱cuaꞌ cuan, aꞌ li Jesucristo. Ut saꞌ xcꞌabaꞌ aꞌan cuan chixjunil ut saꞌ xcꞌabaꞌ aꞌan nak cuan li colba-ib.

Salmos 8:3

Nak nacuil li choxa, ut li po, ut li chahim, ut chixjunil li yi̱banbil a̱ban,

Salmos 102:25

Najter kꞌe cutan la̱at catyi̱ban re li ruchichꞌochꞌ. Ut la̱at ajcuiꞌ catyi̱ban re li choxa riqꞌuin la̱ cuukꞌ.

Hebreos 3:4

Li junju̱nk chi ochoch cuan ani nayi̱ban re; aꞌut li quiyi̱ban re chixjunil li cꞌaꞌak re ru cuan, aꞌan li Ka̱cuaꞌ Dios.

Salmos 124:8

Li nimajcual Dios, li quiyi̱ban re li choxa ut li ruchichꞌochꞌ, aꞌan li natenkꞌan ke.

Hebreos 1:2

Aban anakcuan ma̱cuaꞌeb chic li profeta nequeꞌyehoc re li ra̱tin li Dios. Aꞌ chic li Dios Cꞌajolbej. Saꞌ xcꞌabaꞌ aꞌan, li Dios quixyi̱b li ruchichꞌochꞌ ut chixjunil li cꞌaꞌak re ru cuan. Chixjunil li quixyi̱b quicana saꞌ rukꞌ li Dios Cꞌajolbej.

Proverbios 16:4

Cuan xya̱lal nak quixyi̱b li cꞌaꞌak re ru li Dios. Ut quixyi̱beb ajcuiꞌ li incꞌaꞌ useb xnaꞌleb re nak teꞌroybeni lix tojbal lix ma̱queb.

Salmos 33:6

Li choxa ut chixjunil li cꞌaꞌru cuan chiru yal riqꞌuin li ra̱tin quilajxyi̱b li Dios.

Salmos 121:2

Li nimajcual Dios, aꞌan li ta̱tenkꞌa̱nk cue. Aꞌan li quiyi̱ban re li choxa ut li ruchichꞌochꞌ.

Zacarías 12:1

Li Ka̱cuaꞌ li kꞌaxal nim xcuanquil li quiyi̱ban re li choxa ut quixakaban re li ruchichꞌochꞌ saꞌ xnaꞌaj, li quiqꞌuehoc xmusikꞌ li cui̱nk, aꞌan li xyehoc re aꞌin chirix li tenamit Israel:

Isaías 40:28

¿Ma incꞌaꞌ ta biꞌ nequenau nak li Ka̱cuaꞌ ac aꞌan ajcuiꞌ chalen chak najter kꞌe cutan? Ut, ¿Ma incꞌaꞌ ta biꞌ e̱rabiom nak li Ka̱cuaꞌ, aꞌan li quiyoꞌobtesin re li cꞌaꞌru cuan saꞌ chixjunil li ruchichꞌochꞌ? Aꞌan incꞌaꞌ nalub chi moco nalaj lix metzꞌe̱u. Lix cꞌaꞌux ma̱ ani nataꞌoc re.

Salmos 104:24

At Ka̱cuaꞌ, cꞌajoꞌ xlokꞌal li cꞌanjel li quilaja̱ba̱nu. Chixjunil li cꞌanjel aꞌin quilaja̱ba̱nu riqꞌuin la̱ naꞌleb. Li ruchichꞌochꞌ nujenak riqꞌuin chixjunil li us quilaja̱ba̱nu.

Salmos 96:5

Eb li dios li nequeꞌxlokꞌoni li jalanil tenamit yal yi̱banbil. Moco tzꞌakal dios ta. Abanan li Ka̱cuaꞌ, aꞌan li tzꞌakal Dios. Aꞌan li quiyi̱ban re li choxa.

Apocalipsis 10:6

ut quixba̱nu li juramento saꞌ xcꞌabaꞌ li Jun li yoꞌyo chi junelic, li quiyoꞌobtesin re li choxa joꞌ ajcuiꞌ li ruchichꞌochꞌ ut chixjunil li cuan chiru, joꞌ ajcuiꞌ li palau ut chixjunil li cuan chi saꞌ. Quixye nak ac xcuulac xkꞌehil. Incꞌaꞌ chic ta̱ba̱yk.

Romanos 11:36

Chixjunil li cꞌaꞌ re ru cuan, riqꞌuin li Dios nachal chak. Li Dios quiyi̱ban re chixjunil ut aꞌan aj e̱chal re chixjunil. Lokꞌoninbil taxak li Ka̱cuaꞌ Dios chi junelic kꞌe cutan. Joꞌcan taxak.

Hechos 4:24

Nak queꞌrabi aꞌan, chixjunileb laj pa̱banel queꞌtijoc chiru li Dios saꞌ comonil ut queꞌxye: —At Ka̱cuaꞌ at nimajcual Dios, la̱at catyi̱ban re li choxa, li ruchichꞌochꞌ, ut li palau. La̱at catyi̱ban re chixjunil li cꞌaꞌru cuan.

Salmos 90:2

Chalen chak najter kꞌe cutan nak toj ma̱jiꞌ nacayi̱beb li tzu̱l ut li ruchichꞌochꞌ, ac la̱at ajcuiꞌ chak Dios.

Isaías 51:16

La̱in xinqꞌue a̱cue li cua̱tin, ut xatincol riqꞌuin lin cuanquil. La̱in quinyi̱ban re li choxa joꞌ ajcuiꞌ li ruchichꞌochꞌ ut quinqꞌue saꞌ xnaꞌaj. Ut quinye reheb li cuanqueb Sión “La̱ex intenamit”, chan li Dios.

Isaías 37:16

—At nimajcual Dios, la̱at lix Dioseb laj Israel. Cuancat saꞌ xyiheb li querubines. Caꞌaj cuiꞌ la̱at li tzꞌakal Dios. La̱at cuan a̱cuanquil saꞌ xbe̱neb chixjunileb li cuanqueb xcuanquil saꞌ ruchichꞌochꞌ. La̱at catyi̱ban re li choxa ut li ruchichꞌochꞌ.

Salmos 146:6

Li Ka̱cuaꞌ, aꞌan li quiyi̱ban re li choxa ut li ruchichꞌochꞌ. Aꞌan li quiyi̱ban re li palau ut chixjunil li cuan chi saꞌ. Aꞌan junelic naxba̱nu li cꞌaꞌru naxye.

Salmos 134:3

Aꞌ taxak li nimajcual Dios li cuan Sión chi-osobtesi̱nk e̱re. Aꞌ taxak li Ka̱cuaꞌ li quiyi̱ban re li choxa ut li ruchichꞌochꞌ chi-osobtesi̱nk e̱re.

Apocalipsis 22:13

La̱in li Alfa ut li Omega. La̱in ac cuanquin chak saꞌ xticlajic li ruchichꞌochꞌ ut cua̱nkin ajcuiꞌ saꞌ rosoꞌjic.—

1 Juan 1:1

Nintzꞌi̱bac e̱riqꞌuin chirix li Dios Cꞌajolbej li cuan chalen chak saꞌ xticlajic li ruchichꞌochꞌ. La̱o quikil riqꞌuin xnakꞌ ku ut coa̱tinac riqꞌuin. Quikil ru aꞌan chi tzꞌakal ut xkachꞌeꞌ riqꞌuin kukꞌ. Aꞌan aꞌin li A̱tin naqꞌuehoc yuꞌam.

San Marcos 13:19

Saꞌ eb li cutan aꞌan ma̱ caꞌchꞌin li raylal ta̱cua̱nk. Ma̱ jun cua quicꞌulman chi joꞌcan chalen chak saꞌ xticlajic nak li Dios quixyi̱b li ruchichꞌochꞌ, chi moco ta̱cꞌulma̱nk chi joꞌcan mokon.

Isaías 40:26

Taksihomak le̱ riloba̱l saꞌ choxa ut te̱qꞌue retal. ¿Ani li quiyoꞌobtesin re li choxa ut lix sahob ru? Aꞌan li Ka̱cuaꞌ li kꞌaxal nim xcuanquil. Aꞌan naxqꞌue li junju̱nk saꞌ xnaꞌaj ut naxqꞌue xcꞌabaꞌ li junju̱nk. Ma̱ jun ta̱paltok.

Salmos 104:30

Abanan la̱at ta̱qꞌueheb cuiꞌchic chi yoꞌla̱c re̱kaj ut acꞌobresinbilak chic li ruchichꞌochꞌ.

1 Crónicas 16:26

Eb li dios li nequeꞌxlokꞌoni li jalanil tenamit yal yi̱banbileb dios. Abanan li Ka̱cuaꞌ, aꞌan li tzꞌakal Dios. Aꞌan li quiyi̱ban re li choxa.

Apocalipsis 21:6

Ut quixye cue: —Xtzꞌakloc ru chixjunil. La̱in li Alfa ut li Omega. La̱in tinqꞌue chi ma̱tan li yuꞌam chi junelic re li ani ta̱raj joꞌ nak ta̱qꞌuehekꞌ chi ucꞌac li ani ta̱chakik re.

Efesios 3:9

Joꞌcan nak tento tinchꞌolob yalak bar lix ya̱lal li naꞌleb li mukmu nak quicuan chak junxil. Chalen chak saꞌ xticlajic chixjunil li naꞌleb aꞌin mukmu chak xban li Dios li quiyi̱ban re chixjunil.

Isaías 51:13

¿Cꞌaꞌut nak ninsach saꞌ a̱chꞌo̱l la̱in li Ka̱cuaꞌ li quinyoꞌobtesin a̱cue? La̱in li quinyi̱ban re li choxa ut chixjunil li cuan chiru ut la̱in ajcuiꞌ li quinyi̱ban re li ruchichꞌochꞌ ut quinqꞌue saꞌ xnaꞌaj. ¿Cꞌaꞌut nak junelic yo̱ a̱xiu xbaneb li nequeꞌrahobtesin a̱cue? ¿Cꞌaꞌut nak nacaxucuaheb li nequeꞌraj a̱sachbal? Eb aꞌan ma̱cꞌaꞌ naru teꞌxba̱nu a̱cue.

Isaías 65:17

Qꞌuehomak retal. La̱in tinyi̱b jun acꞌ choxa ut tinyi̱b ajcuiꞌ jun li acꞌ ruchichꞌochꞌ. Incꞌaꞌ chic ta̱julticama̱nk li cꞌaꞌak re ru quilajnumeꞌ ut ma̱ ani chic ta̱cꞌoxlak chirix.

Apocalipsis 3:14

Ut li Cꞌajolbej quixye cuiꞌchic cue: —Tzꞌi̱ban riqꞌuin lix takl li Dios li na-iloc reheb li jun chꞌu̱tal chi aj pa̱banel li cuanqueb Laodicea ut ta̱ye re: Li ani naxcꞌabaꞌin “Amén”, li junelic ti̱c xchꞌo̱l chixyebal li ya̱l, li ac cuan chak nak quiyi̱ba̱c chak li ruchichꞌochꞌ ut chixjunil li cꞌaꞌak re ru cuan, naxye e̱re chi joꞌcaꞌin:

Li xHu LAJ JOB 26:13

Yal riqꞌuin lix musikꞌ quixyi̱b lix sahob ru li choxa. Ut riqꞌuin li rukꞌ quixyi̱b li cꞌantiꞌ li kꞌaxal se̱b xchꞌo̱l chixba̱nunquil li ma̱usilal.

Eclesiastés 12:1

Nak toj cuancat saꞌ la̱ sa̱jilal, chijulticokꞌ a̱cue li Dios li quiyoꞌobtesin a̱cue. Chijulticokꞌ a̱cue li Dios nak toj ma̱jiꞌ nacuulac li cutan nak cuan nabal li chꞌaꞌajquilal ut nak ma̱jiꞌ nacuulac li chihab nak ta̱ye: —Ma̱cꞌaꞌ chic nasahoꞌ cuiꞌ inchꞌo̱l.—

San Mateo 11:25

Saꞌ eb li cutan aꞌan, li Jesús quitijoc ut quixye: —At inYucuaꞌ, la̱at laj e̱chal re li choxa joꞌ ajcuiꞌ li ruchichꞌochꞌ. Ninbantioxi cha̱cuu xban nak xamuk lix ya̱lal chirix lix nimal la̱ cuanquilal chiruheb li cuanqueb xnaꞌleb nak nequeꞌxye rib, ut xamuk ajcuiꞌ chiruheb li tzolbileb. Ut xacꞌut lix ya̱lal chiruheb li cubenakeb xcuanquil, li chanchaneb cocꞌal.

Éxodo 31:18

Nak quirakeꞌ chi a̱tinac li Dios riqꞌuin laj Moisés saꞌ li tzu̱l Sinaí, quixkꞌaxtesi li cuib chi perpo̱quil pec re, li quixtzꞌi̱ba cuiꞌ li chakꞌrab.

Li xHu LAJ JOB 9:8

Ma̱ ani quitenkꞌan re nak quixyi̱b li choxa. Ut aꞌan ajcuiꞌ yal re saꞌ xbe̱n li palau.

Isaías 40:21

¿Ma incꞌaꞌ ta biꞌ nequenau? ¿Ma incꞌaꞌ ta biꞌ querabi chak resil junxil? ¿Ma incꞌaꞌ ta biꞌ quiyeheꞌ chak resil saꞌ xticlajic? ¿Ma incꞌaꞌ ta biꞌ quicꞌuteꞌ chak che̱ru lix ya̱lal chalen saꞌ xticlajic li ruchichꞌochꞌ?

2 Reyes 19:15

Quitijoc ut quixye: —At Ka̱cuaꞌ, la̱at li kaDios la̱o aj Israel. La̱at li cuancat saꞌ xyi li querubines. Caꞌaj cuiꞌ la̱at li Dios. La̱at cuan a̱cuanquil saꞌ xbe̱neb li xni̱nkal ru tenamit li cuanqueb saꞌ ruchichꞌochꞌ. La̱at catyi̱ban re li choxa ut li ruchichꞌochꞌ.

2 Crónicas 2:11

Ut laj Hiram, lix reyeb laj Tiro quixtakla re̱kaj lix hu laj Salomón ut quixye re chi joꞌcaꞌin: —Xban nak li Ka̱cuaꞌ naxraheb lix tenamit, joꞌcan nak catxqꞌue chokꞌ xreyeb.

Salmos 8:4

la̱in nincꞌoxla ut ninye, ¿cꞌaꞌut nak nacacꞌoxlaheb li cui̱nk? Ma̱cꞌaꞌ xcuanquileb. ¿Cꞌaꞌut nak nacaqꞌue a̱chꞌo̱l chirixeb? Eb aꞌan ma̱cꞌaꞌ xcuanquileb.