Ester 4:1 - Li Santil hu

¹ Nak quirabi li cꞌaꞌru quicꞌulman, laj Mardoqueo quixpej li rakꞌ xban xrahil xchꞌo̱l ut quixqꞌue li kꞌes ru tꞌicr chirix ut quixqꞌue li cha chirix. Ut co̱ saꞌ li tenamit. Japjo re chi ya̱bac xban xrahil xchꞌo̱l.

Q'eqchi Bible

¹ Naq laj Mardokeo kixnaw chixjunil li kik'ulmank, kixq'ich li raq', reetalil li xrahil xch'ool, kixk'e q'es ruhil t'ikr chirix ut kixk'e cha sa' xjolom. Ut kixb'eeni chixjunil li tenamit chi japjo re xb'aan li rahilal xchalk sa' xb'eeneb';

Ester 4:1 ပူးပေါင်းရင်းမြစ်များ

Daniel 9:3

Ut chi anchal inchꞌo̱l quintijoc chiru li Ka̱cuaꞌ ut quintzꞌa̱man chiru. Quinba̱nu lin ayu̱n ut quicuocsi li kꞌes ru tꞌicr ut quinqꞌue li cha chicuix.

Li xHu LAJ JOB 42:6

Anakcuan la̱in xinqꞌue retal nak incꞌaꞌ us xinye. Joꞌcan nak narahoꞌ inchꞌo̱l. Anakcuan tinjal incꞌaꞌux. Tinchunub cuib saꞌ poks ut saꞌ cha xban xrahil inchꞌo̱l, chan laj Job.

2 Samuel 13:19

Lix Tamar quixqꞌue li cha saꞌ xjolom. Quixpej li rakꞌ. Quixtzꞌap li ru riqꞌuin li rukꞌ ut yo̱ chi ya̱bac nak co̱.

2 Samuel 1:11

Laj David, joꞌ eb ajcuiꞌ chixjunileb li cui̱nk li cuanqueb rochben, queꞌxpej li rakꞌeb xban xrahil xchꞌo̱leb.

Li xHu LAJ JOB 2:8

Ut laj Job co̱ chixchunubanquil rib saꞌ li cha. Quixchap jun peda̱s xcꞌaj ucꞌal ut riqꞌuin aꞌan quixjoch li rix.

Hechos 14:14

Nak queꞌxqꞌue retal li cꞌaꞌru yo̱queb li tenamit, laj Pablo ut laj Bernabé queꞌxpej li rakꞌeb retalil nak incꞌaꞌ quicuulac chiruheb li cꞌaꞌru yo̱queb chixba̱nunquil li tenamit. Ut queꞌco̱eb saꞌ a̱nil saꞌ xya̱nkeb li tenamit ut queꞌxye chi cau xya̱b xcuxeb:

San Mateo 11:21

—Raylal cha̱lel saꞌ e̱be̱n, ex aj Corazín. Raylal cha̱lel saꞌ e̱be̱n ex aj Betsaida. Cui ta qui-uxman aran Tiro li milagro aꞌin li xinba̱nu che̱ru ut cui ta qui-uxman aran Sidón, ac najter raj queꞌxqꞌue li cha saꞌ xjolomeb ut ac queꞌxqꞌue raj li kꞌes ru tꞌicr chirixeb chokꞌ retalil nak raheb saꞌ xchꞌo̱l ut queꞌyotꞌeꞌ raj xchꞌo̱leb ut queꞌxjal raj xcꞌaꞌuxeb.

Sofonías 1:14

Yo̱ chi cuulac xkꞌehil nak ta̱rakok a̱tin li Ka̱cuaꞌ. Ac yo̱ chi nachꞌoc chak li cutan aꞌan. Kꞌaxal ra teꞌxcꞌul saꞌ li cutan aꞌan. Usta kꞌaxal cauheb rib, abanan teꞌxjap ajcuiꞌ re xbaneb xxiu chiru.

Miqueas 1:8

Ut quixye cuiꞌchic laj Miqueas: —Cꞌajoꞌ narahoꞌ inchꞌo̱l xban li ma̱usilal yo̱queb chixba̱nunquil laj Israel. Tinjap cue xban xrahil inchꞌo̱l ut tinya̱bak. Re xcꞌutbal chiruheb li tenamit nak kꞌaxal ra saꞌ inchꞌo̱l tincuisi lin xa̱b ut tincuisi li cuakꞌ. Chanchan nak nacuuꞌteꞌec laj xoj ut chanchan nak naya̱bac li cuarom nak tinya̱bak chi cau.

Ezequiel 21:6

Joꞌcan nak tatya̱bak, at ralal cui̱nk, xban xrahil a̱chꞌo̱l chiruheb. Ya̱ban chi kꞌaxal ra saꞌ a̱chꞌo̱l.

Isaías 58:5

¿Ma aꞌin ta biꞌ li ayunic li nacuulac chicuu la̱in? ¿Ma jun cutan ajcuiꞌ naru te̱cubsi e̱rib? ¿Ma riqꞌuin xxulubanquil le̱ jolom joꞌ na-ecꞌan li caxlan aj te̱ba̱nu li us? ¿Ma nequecꞌoxla la̱ex nak riqꞌuin xqꞌuebal li kꞌes ru tꞌicr che̱rix ut riqꞌuin xyocobanquil e̱rib saꞌ li cha te̱ba̱nu li us? ¿Ma aꞌan xya̱lal li ayunic che̱ru la̱ex? ¿Ma nacuulac chicuu li ayunic chi joꞌcan nak nequecꞌoxla la̱ex?

Isaías 22:4

Joꞌcan nak la̱in ninye: —Canabomakin injunes. Oc cue chi ya̱bac xban xrahil inchꞌo̱l. Ut ma̱ ani tixbay rib chixcꞌojobanquil inchꞌo̱l xban nak lin tenamit teꞌsachekꞌ ru.—

Isaías 15:4

Eb li cuanqueb Hesbón ut Eleale teꞌxjap reheb. Ut ta̱abi̱k lix ya̱beb toj saꞌ li tenamit Jahaza. Joꞌcan nak teꞌxucuak li soldado li cuanqueb Moab ut teꞌchꞌina̱nk xchꞌo̱leb.

Li xHu LAJ JOB 1:20

Nak quirabi aꞌan, laj Job quicuacli ut quixpej li rakꞌ ut quixbes li rismal retalil lix rahil xchꞌo̱l ut quixcuikꞌib rib saꞌ chꞌochꞌ ut quixlokꞌoni li Dios.

Ester 4:3

Saꞌ eb li tenamit li cuanqueb rubel xcuanquil li rey Asuero quicuulac resil li chakꞌrab li quixqꞌue. Quicuan jun nimla rahil chꞌo̱lej saꞌ xya̱nkeb laj judío. Queꞌayunic ut queꞌya̱bac. Queꞌxqꞌue li kꞌes ru tꞌicr chirixeb ut nabaleb queꞌxyocob rib saꞌ cha xban xrahil xchꞌo̱leb.

Josué 7:6

Laj Josué ut eb li nequeꞌcꞌamoc be saꞌ xya̱nkeb laj Israel queꞌxkꞌich li rakꞌeb ut queꞌxcut rib saꞌ chꞌochꞌ chiru li Lokꞌlaj Ca̱x xban xrahil xchꞌo̱leb ut queꞌxqꞌue poks saꞌ xjolomeb ut queꞌcana aran toj qui-ecuu.

Génesis 27:34

Nak quirabi li cꞌaꞌru quixye lix yucuaꞌ, laj Esaú quixjap re chi ya̱bac xban xrahil saꞌ xchꞌo̱l. Ut quixtzꞌa̱ma chiru lix yucuaꞌ: —China̱cuosobtesi ajcuiꞌ la̱in, at inyucuaꞌ, chan.

Apocalipsis 11:3

La̱in tintaklaheb cuib aj cꞌanjel chicuu. Cua̱nk rakꞌeb chirix kꞌes ru retalil li rahil chꞌo̱lej. Eb aꞌan teꞌxye cuesilal chiru oxib chihab riqꞌuin cuakib po.—

Ester 4:2

Quicuulac saꞌ li oqueba̱l re li rochoch li rey. Abanan incꞌaꞌ qui-oc xban nak ma̱ ani naru na-oc saꞌ li rochoch li rey cui cuan li kꞌes ru tꞌicr chirix.

Génesis 37:34

Laj Jacob quixkꞌichi li rakꞌ li cuan chirix xban xrahil saꞌ xchꞌo̱l chirix lix camic li ralal. Ut quixqꞌue li kꞌesnal ru tꞌicr chirix chanchan coxtal retalil nak ra saꞌ xchꞌo̱l. Najt quicuan li rakꞌ aꞌan chirix ut incꞌaꞌ quinumeꞌ xrahil saꞌ xchꞌo̱l.

Isaías 37:1

Nak quirabi li cꞌaꞌru quixye lix reyeb laj Asiria, li rey Ezequías quixpej li rakꞌ ut quixqꞌue li kꞌes ru tꞌicr chirix retalil lix rahil xchꞌo̱l ut co̱ saꞌ lix templo li Ka̱cuaꞌ.

Isaías 37:2

Ut quixtaklaheb riqꞌuin li profeta Isaías li ralal laj Amoz laj Eliaquim li na-iloc re li palacio rochben laj Sebna laj tzꞌi̱b, joꞌ eb ajcuiꞌ li nequeꞌcꞌamoc be saꞌ xya̱nkeb laj tij. Cuan li kꞌes ru tꞌicr chirixeb nak queꞌco̱eb.

Ezequiel 21:11

Li chꞌi̱chꞌ kꞌesnanbil re ut cauresinbil re ta̱kꞌaxtesi̱k saꞌ rukꞌ li ani ta̱camsi̱nk reheb.