Esdras 6:16 - Li Santil hu

¹⁶ Chixjunileb laj Israel ut eb laj tij joꞌ eb ajcuiꞌ laj levita li queꞌsukꞌi cuiꞌchic Jerusalén queꞌxkꞌaxtesi re li Dios li templo li queꞌxyi̱b. Queꞌxninkꞌei chi cꞌajoꞌ xsahil xchꞌo̱leb.

Q'eqchi Bible

¹⁶ Eb' laj Israel, eb' laj tij, eb' laj Leví ut li junch'ol chik li ke'sutq'iik wi' chik Jerusalén ke'xninq'ehi chi saheb' sa' xch'ool li xq'axtesinkil sa' ruq' li Yos li loq'laj ochoch a'in.

Esdras 6:16 ပူးပေါင်းရင်းမြစ်များ

2 Crónicas 7:5

Ut li rey Salomón quixmayeja cuib xcaꞌcꞌa̱l mil (22,000) li bo̱yx ut jun ciento mil riqꞌuin junmay mil (120,000) li carner. Joꞌcaꞌin nak queꞌxkꞌaxtesi li templo chiru li Dios li rey ut eb li tenamit Israel.

1 Reyes 8:63

Laj Salomón quixqꞌue li mayej chiru li Dios re xcꞌambaleb rib saꞌ usilal riqꞌuin. Cuib xcaꞌcꞌa̱l mil (22,000) li cuacax quixmayeja. Ut quixmayeja ajcuiꞌ jun ciento mil riqꞌuin junmay mil (120,000) li carner. Joꞌcaꞌin nak queꞌxkꞌaxtesi li templo chiru li Dios li rey ut eb li ralal xcꞌajol laj Israel.

Filipenses 4:4

Chisahokꞌ taxak saꞌ e̱chꞌo̱l chi junelic xban nak junajex chic riqꞌuin li Ka̱cuaꞌ. Ut jun sut chic tinye e̱re: Chisahokꞌ taxak saꞌ e̱chꞌo̱l.

San Juan 10:22

Yo̱ li habalkꞌe aran Jerusalén nak quicuulac xkꞌehil li ninkꞌe re xjulticanquil nak queꞌxkꞌaxtesi li templo saꞌ rukꞌ li Ka̱cuaꞌ Dios.

Salmos 122:1

La̱in quisahoꞌ saꞌ inchꞌo̱l nak queꞌxye cue: Yoꞌkeb saꞌ rochoch li Ka̱cuaꞌ.

Esdras 6:22

Cuukub cutan queꞌninkꞌei̱c chi sa saꞌ xchꞌo̱leb ut queꞌxcuaꞌ li caxlan cua li ma̱cꞌaꞌ xchꞌamal, joꞌ nequeꞌxcuaꞌ saꞌ li ninkꞌe aꞌan. Cꞌajoꞌ xsahil xchꞌo̱leb xban nak li Ka̱cuaꞌ quixjal xcꞌaꞌux lix reyeb laj Persia ut aꞌan quixtenkꞌaheb chixyi̱banquil lix templo li Ka̱cuaꞌ, lix Dioseb laj Israel.

Nehemías 7:73

Eb laj tij, ut eb laj levita joꞌ eb ajcuiꞌ li queꞌcꞌacꞌalen chire xpuertil li templo, eb li nequeꞌbichan, ut eb li nequeꞌcꞌanjelac saꞌ li templo ut chixjunileb laj Israel ac saꞌ xtenamiteb queꞌcana chi cua̱nc.

Esdras 4:1

Eb li xicꞌ nequeꞌiloc reheb li ralal xcꞌajol laj Judá ut eb li ralal xcꞌajol laj Benjamín, queꞌrabi resil nak eb aꞌan, li queꞌchapeꞌ ut queꞌcꞌameꞌ chi najt, queꞌsukꞌi cuiꞌchic Jerusalén ut yo̱queb chixyi̱banquil lix templo li Ka̱cuaꞌ lix Dioseb laj Israel.

2 Crónicas 30:26

Cꞌajoꞌ li sahil chꞌo̱lejil quicuan aran Jerusalén. Ma̱ jun sut qui-uxman chi joꞌcan chalen saꞌ eb li cutan nak quicuan laj Salomón li ralal laj David li quicuan chokꞌ rey aran Israel.

2 Crónicas 30:23

Chixjunileb li chꞌutchꞌu̱queb aran queꞌxcꞌul xchꞌo̱l xninkꞌeinquil cuukub cutan chic. Joꞌcan nak queꞌxba̱nu li ninkꞌe cuukub cutan chic chi sa saꞌ xchꞌo̱leb.

1 Crónicas 15:28

Joꞌcan nak chixjunileb laj Israel queꞌxcꞌam lix Lokꞌlaj Ca̱x li Ka̱cuaꞌ. Japjo̱queb re xban xsahileb saꞌ xchꞌo̱l. Yo̱queb chixya̱basinquil li xucub ut li trompeta ut yo̱queb chixchꞌeꞌbal li arpa ut li salterio ut li sursu̱quil chꞌi̱chꞌ.

1 Crónicas 9:2

Eb li xbe̱n li queꞌsukꞌi saꞌ lix naꞌajeb, aꞌaneb laj Israel, eb laj tij, eb laj levita, ut eb li queꞌcꞌanjelac saꞌ lix templo li Ka̱cuaꞌ.

Deuteronomio 12:7

Saꞌ li naꞌajej aꞌan texcuaꞌak chiru li Ka̱cuaꞌ le̱ Dios ut ta̱sahokꞌ saꞌ e̱chꞌo̱l la̱ex e̱rochben le̱ ralal e̱cꞌajol xban nak li Ka̱cuaꞌ le̱ Dios xexrosobtesi.

Nehemías 12:43

Nabaleb li xul xkamayeja saꞌ li cutan aꞌan. Cꞌajoꞌ nak quisahoꞌ saꞌ kachꞌo̱l xban nak li Dios quixqꞌue jun sahil chꞌo̱lejil ke. Eb li ixk ut eb li cocꞌal queꞌsahoꞌ ajcuiꞌ saꞌ xchꞌo̱leb. Ut toj chi najt qui-abi̱c chak nak cꞌajoꞌ xsahil saꞌ kachꞌo̱l Jerusalén.

Nehemías 8:10

Ut queꞌxye ajcuiꞌ reheb: —Chenima ru li cutan aꞌin xban nak li cutan aꞌin kꞌaxal lokꞌ chiru li Ka̱cuaꞌ. Mirahoꞌ e̱chꞌo̱l. Tzacahomak li cha̱bil tzacae̱mk ut ucꞌumak li cha̱bil vino li quiꞌ ut qꞌuehomak xtzacae̱mk li ma̱cꞌaꞌ cuan reheb yi̱banbil. Ut chisahokꞌ taxak saꞌ e̱chꞌo̱l xban nak li sahil chꞌo̱lej li naxqꞌue li Ka̱cuaꞌ, aꞌan naxqꞌue xcacuil kachꞌo̱l.—

1 Reyes 8:62

Ut chirix chic aꞌan, li rey joꞌ eb ajcuiꞌ li tenamit Israel queꞌxcamsi li xul re teꞌxmayeja chiru li Ka̱cuaꞌ.

Daniel 5:13

Joꞌcan nak laj Daniel quicꞌameꞌ riqꞌuin li rey, ut li rey quixye re: —¿Ma la̱at laj Daniel li ralal xcꞌajoleb laj Judá li queꞌcꞌameꞌ chak arin xban inyucuaꞌ laj Nabucodonosor? chan.

2 Crónicas 29:30

Ut chirix aꞌan, li rey rochbeneb li cuanqueb xcuanquil queꞌxye reheb laj levita nak teꞌxqꞌue xlokꞌal li Ka̱cuaꞌ riqꞌuin li bich li queꞌxyi̱b li rey David ut li profeta Asaf. Ut eb aꞌan queꞌxbicha xlokꞌal li Ka̱cuaꞌ Dios chi saheb saꞌ xchꞌo̱l. Queꞌxcuikꞌib ribeb ut queꞌxlokꞌoni li Ka̱cuaꞌ.

Nehemías 12:27

Nak quicuulac xkꞌehil nak teꞌxkꞌaxtesi saꞌ rukꞌ li Dios li tzꞌac li sutsu cuiꞌ li tenamit Jerusalén, queꞌxtakla xbokbaleb chixjunileb laj levita li cuanqueb saꞌ li junju̱nk chi tenamit. Queꞌbokeꞌ Jerusalén re xsulbal li tzꞌac re nak teꞌxqꞌue sahil chꞌo̱lej riqꞌuin li bicha̱nc ut riqꞌuin xchꞌeꞌbal li cuajb, li arpa, li címbalos, ut li salterios.