Efesios 1:23 - Li Santil hu

²³ Li Cristo aꞌan li najolomin ke la̱o aj pa̱banel. Ut la̱o chanchano li rok rukꞌ nak cuanco. Junak li tzꞌejcualej moco tzꞌakal ta re ru cui ma̱cꞌaꞌ lix jolom. Joꞌcan ajcuiꞌ junak li jolomej, cui ma̱cꞌaꞌ li rok rukꞌ incꞌaꞌ tzꞌakal re ru. Joꞌcan nak tento nak li Cristo ta̱jolomi̱nk ke la̱o aj pa̱banel ut la̱o cua̱nko joꞌ li rok rukꞌ li Cristo.

Q'eqchi Bible

²³ a'an li xtz'ejwal, xtz'aqob' li Kriist li naxnujob'resi ru chixjunil chi tz'aqal re ru.

Efesios 1:23 ပူးပေါင်းရင်းမြစ်များ

San Juan 1:16

Xban xnimal rusilal, kꞌaxal numtajenak li kosobtesinquil naxqꞌue.

Efesios 4:12

Quiqꞌueheꞌ xma̱taneb re nak tzꞌakalakeb ru saꞌ xpa̱ba̱leb ut re nak teꞌcꞌanjelak chiru li Dios ut re nak teꞌxtenkꞌaheb laj pa̱banel chi qꞌui̱c saꞌ xpa̱ba̱leb.

Efesios 3:19

Ma̱ jokꞌe ta̱ru̱k takatau ru chi tzꞌakal lix rahom xban nak ma̱cꞌaꞌ rosoꞌjic ut kꞌaxal lokꞌ. Nintzꞌa̱ma chiru li Dios nak tixcꞌut che̱ru nak cꞌajoꞌ nequexra li Cristo, ut chinujak taxak le̱ chꞌo̱l riqꞌuin xnimajcual xcuanquil.

Efesios 4:10

Quicube saꞌ ruchichꞌochꞌ ut quitakeꞌ ajcuiꞌ toj saꞌ li Santil Choxa re nak ta̱cua̱nk xcuanquil saꞌ xbe̱n chixjunil saꞌ choxa joꞌ ajcuiꞌ saꞌ ruchichꞌochꞌ.

1 Corintios 15:28

Ut nak acak xcanaba̱c xban li Dios chixjunil li cꞌaꞌak re ru rubel xcuanquil li Cristo li Alalbej, tojoꞌnak li Cristo tixkꞌaxtesi ajcuiꞌ rib rubel xcuanquil li Acuabej Dios, li quiqꞌuehoc xcuanquil li Cristo saꞌ xbe̱n chixjunil, ut li Dios aꞌanak chic yal re saꞌ xbe̱n chixjunil.

Colosenses 1:24

La̱in nasahoꞌ saꞌ inchꞌo̱l nak yo̱quin chixcꞌulbal li raylal saꞌ e̱cꞌabaꞌ. Li Cristo quixye nak teꞌxcꞌul li raylal li ralal xcꞌajol. Joꞌcan nak nasahoꞌ saꞌ inchꞌo̱l nak yo̱quin chi tzꞌako̱nc riqꞌuin li raylal joꞌ quixcꞌul li Cristo saꞌ xcꞌabaꞌeb chixjunileb li nequeꞌpa̱ban re.

Colosenses 3:15

Junajakex taxak saꞌ le̱ pa̱ba̱l xban nak sicꞌbil e̱ru xban li Dios. Chicua̱nk li tuktu̱quilal saꞌ le̱ chꞌo̱l li naxqꞌue li Cristo re nak texcua̱nk saꞌ xya̱lal. Ut junelic chebantioxi chiru li Dios li usilal xba̱nu e̱re.

Colosenses 3:11

La̱o aj pa̱banel juntakꞌe̱to chiru li Dios xban nak junajo saꞌ li acꞌ yuꞌam. Moco jalaneb ta laj griego chiruheb laj judío. Moco jalaneb ta li tzolbileb chiruheb li incꞌaꞌ tzolbileb. Moco jalaneb ta li xeꞌxba̱nu li circuncisión chiruheb li incꞌaꞌ xeꞌxba̱nu. Moco jalan ta li junju̱nk usta jalan xtenamit. Moco jalaneb ta li cuanqueb xpatrón chiruheb li ma̱cꞌaꞌeb xpatrón. Li kꞌaxal lokꞌ xcꞌoxlanquil aꞌan aꞌin: Li Jesucristo cuan riqꞌuineb li junju̱nk li nequeꞌpa̱ban re ut junajo chic saꞌ xcꞌabaꞌ li Jesucristo.

Efesios 2:16

Riqꞌuin lix camic chiru li cruz li Cristo quirisi lix joskꞌinquil kib chi kibil kib ut coxcꞌam cuiꞌchic saꞌ usilal riqꞌuin li Dios ut junaj chic ku.

1 Corintios 12:6

Jalan jala̱nk li cꞌanjel nocoxqꞌue cuiꞌ li Dios. Abanan jun ajcuiꞌ li Dios ut aꞌan li natenkꞌan ke chi xba̱nunquil li cꞌanjel li naxqꞌue ke.

Romanos 13:5

Joꞌcan nak tento texpa̱ba̱nk chiruheb li cuanqueb xcuanquil saꞌ xbe̱n li tenamit. Ma̱cuaꞌ yal re nak incꞌaꞌ texqꞌuehekꞌ chixtojbal rix le̱ ma̱c; re aj ban cuiꞌ nak cꞌojcꞌo̱k e̱chꞌo̱l riqꞌuin xba̱nunquil li cꞌaꞌru us.

Efesios 4:4

La̱o li ralal xcꞌajol li Dios chanchan nak jun chi tzꞌejcualej nak cuanco ut jun ajcuiꞌ li Santil Musikꞌej naberesin ke. Jun ajcuiꞌ li kama̱tan li nakayoꞌoni saꞌ comonil, la̱o li sicꞌbil ku.

Efesios 3:10

Li Dios quixba̱nu chi joꞌcaꞌin re xcꞌutbal chiruheb li cuanqueb xcuanquil saꞌ choxa nak numtajenak xnaꞌleb li Dios. Teꞌxnau nak numtajenak xnaꞌleb nak teꞌxqꞌue retal nak quixjunaji ruheb laj judío riqꞌuineb li ma̱cuaꞌeb aj judío chokꞌ ralal xcꞌajol.

Efesios 4:13

Qꞌuebil ke li kama̱tan re nak takatenkꞌaheb laj pa̱banel chi cacuu̱c saꞌ lix pa̱ba̱leb toj ta̱cuulak xkꞌehil nak ta̱tzꞌaklok ke ku riqꞌuin lix cuanquil li Cristo ut junajak chic ku xban nak nakapa̱b li Ralal li Dios. Tzꞌakalak ke ku joꞌ li Cristo tzꞌakal re ru.

Colosenses 2:19

Eb aꞌan moco cuanqueb ta rubel xcuanquil li Cristo. Joꞌcan nak nequeꞌxba̱nu li bar cuan nequeꞌraj eb aꞌan. Abanan la̱o aj pa̱banel, junajo riqꞌuin li Cristo ut cau kachꞌo̱l riqꞌuin xban nak aꞌan najolomin ke. Ut aꞌan ajcuiꞌ natenkꞌan ke chi qꞌui̱c saꞌ li kapa̱ba̱l joꞌ naraj li Dios.