Deuteronomio 12:2 - Li Santil hu

² Te̱sach chi junaj cua chixjunileb li naꞌajej li nequeꞌxlokꞌoni cuiꞌ li jalanil dios eb li tenamit li te̱re̱chani. Te̱jucꞌ chi junaj cua lix artal li cuanqueb saꞌ eb li tzu̱l, ut saꞌ xbe̱n bol, joꞌ eb ajcuiꞌ li cuanqueb rubel li cheꞌ li ni̱nkeb xmu.

Q'eqchi Bible

² “Teesach chi junajwa chixjunileb' li na'ajej b'arwi' neke'xloq'oni li xyoseb' eb' li tenamit teereechani: teesach sa' xb'eeneb' li tzuul, sa' xb'eeneb' li b'ool ut rub'elatq chixjunil li xchaq'alil ru che'.

Deuteronomio 12:2 ပူးပေါင်းရင်းမြစ်များ

Deuteronomio 7:5

Li cꞌaꞌru tento te̱ba̱nu, aꞌan aꞌin: te̱sach chi junaj cua lix artaleb. Te̱sach chixjunil li joꞌ qꞌuial cuan saꞌ li naꞌajej li nequeꞌxlokꞌoni cuiꞌ li jalanil dios. Te̱sach lix jalam u̱cheb lix Asera xcꞌabaꞌ ut te̱cꞌat chixjunileb lix yi̱banbil dios.

2 Reyes 16:4

Quixqꞌue lix cꞌatbil mayej ut quixcꞌat li incienso saꞌ eb li naꞌajej li najt xteram ut saꞌ eb li tzu̱l ut rubel eb li cheꞌ li ni̱nk xmuheb.

Oseas 4:13

Nequeꞌxic saꞌ li tzu̱l chi mayejac ut aran nequeꞌxcꞌat lix pomeb rubeleb li ni̱nki cheꞌ ji, álamo ut olmo, xban nak naque̱nac cua̱nc rubel lix mu. Xban nak la̱ex nequexcꞌamoc be chiruheb le̱ ralal e̱cꞌajol chixlokꞌoninquil li jalanil dios, joꞌcan nak nequecanabeb le̱ rabin chi yumbe̱tac ut nequecanabeb le̱ ralib chixmuxbal ru lix sumlajiqueb.

Jeremías 3:6

Quixye laj Jeremías: —Nak toj cuan chokꞌ rey laj Josías, li Ka̱cuaꞌ quixye cue chi joꞌcaꞌin: ¿Ma yo̱cat chixqꞌuebal retal cꞌaꞌru yo̱queb laj Israel? Eb aꞌan yo̱queb chintzꞌekta̱nanquil. Chanchaneb chic li ixk li nequeꞌxcꞌayi rib xban nak nequeꞌtakeꞌ saꞌ eb li tzu̱l. Ut rubeleb li cheꞌ li ni̱nk xmu nequeꞌxlokꞌoni li jalanil dios.

2 Reyes 23:13

Ut quixtakla ajcuiꞌ xpoꞌbal eb li artal li quixyi̱b laj Salomón lix reyeb laj Israel. Eb li artal aꞌan queꞌcuan saꞌ li este re Jerusalén ut saꞌ li sur re li tzu̱l Olivos. Eb li artal aꞌan queꞌyi̱ba̱c re xlokꞌoninquileb li jalanil dios li kꞌaxal yibeb ru. Aꞌaneb lix Astoret lix dioseb laj Sidón, laj Quemos lix dioseb laj Moab ut laj Milcom lix dioseb li ralal xcꞌajol laj Amón.

Jueces 2:2

Abanan tento nak la̱ex incꞌaꞌ te̱ba̱nu junak contrato riqꞌuineb li cuanqueb saꞌ li naꞌajej aꞌin. Te̱juqꞌui ban lix artaleb.” Abanan la̱ex incꞌaꞌ xeba̱nu li quinye e̱re. Xekꞌet ban li cua̱tin.

Números 22:41

Cuulajak chic laj Balac quixcꞌam laj Balaam ut queꞌco̱eb toj Bamot-baal. Ut laj Balaam quiru rilbaleb laj Israel li cuanqueb chi nachꞌ.

Éxodo 23:24

Ut me̱cuikꞌib e̱rib chiru lix yi̱banbil dios eb aꞌan, chi moco chexcꞌanjelak chiruheb. Me̱ba̱nu joꞌ nequeꞌxba̱nu eb aꞌan. Te̱jucꞌ ban lix yi̱banbil dios ut te̱sach ruheb chi junaj cua.

1 Reyes 3:2

Eb li cristian yo̱queb chixqꞌuebal lix mayej saꞌ eb li tzu̱l li najt xteram xban nak toj ma̱jiꞌ quiyi̱ba̱c lix templo li Dios saꞌ eb li cutan aꞌan.

1 Reyes 14:23

Queꞌxyi̱b li naꞌajej najt xteram re teꞌxlokꞌoniheb li jalanil dios. Ut queꞌxyi̱b riqꞌuin pec ut cheꞌ li yi̱banbil dios Asera ut queꞌxlokꞌoni saꞌ chixjunil li tzu̱l ut rubel chixjunileb li cheꞌ li ni̱nk xmuheb.

2 Reyes 11:18

Chirix aꞌan eb li tenamit queꞌco̱eb saꞌ lix templo li dios Baal ut queꞌxtꞌan. Ut queꞌxjuqꞌui chixjunileb li artal ut queꞌxjucꞌ ajcuiꞌ chixjunileb li yi̱banbil dios. Ut queꞌxcamsi chiru li artal laj Matán laj tij li quicꞌanjelac chiru laj Baal. Ut laj Joiada laj tij quixqꞌueheb li soldado chixcꞌacꞌalenquil lix templo li Ka̱cuaꞌ Dios.

Isaías 36:7

Ut cui la̱ex te̱ye cue nak cꞌojcꞌo e̱chꞌo̱l riqꞌuin li Ka̱cuaꞌ le̱ Dios, ¿ma incꞌaꞌ ta biꞌ isinbil saꞌ e̱ya̱nk chixjunileb li artal xban li rey Ezequías? ¿Ma ma̱cuaꞌ ta biꞌ aꞌan quiyehoc reheb laj Judá ut laj Jerusalén nak jun ajcuiꞌ li artal texlokꞌoni̱nk cuiꞌ aran Jerusalén?

Jeremías 2:20

Li nimajcual Dios quixye: —La̱ex aj Israel, ac junxil xerisi e̱rib rubel incuanquil ut queye nak incꞌaꞌ chic texcꞌanjelak chicuu. Saꞌ xbe̱neb li tzu̱l ut rubeleb li cheꞌ li ni̱nk xmu xelokꞌoni li jalanil dios. Chanchanex li ixk li nequeꞌxcꞌayi ribeb.

Jeremías 3:2

Ilomakeb li tzu̱l. ¿Ma cuan ta biꞌ junak naꞌajej li incꞌaꞌ xelokꞌoniheb cuiꞌ li jalanil dios? Xecꞌojob e̱rib chire li be roybeninquileb li te̱lokꞌoniheb. Chanchanex laj árabe li naroybeni ani tixchap saꞌ li chaki chꞌochꞌ. La̱ex xemux ru li naꞌajej xban nak xelokꞌoniheb li jalanil dios.

Jeremías 3:13

Caꞌaj cuiꞌ te̱qꞌue retal nak xexma̱cob chicuu la̱in li Ka̱cuaꞌ le̱ Dios ut te̱patzꞌ e̱cuybal. Xekꞌet li cua̱tin. Xelokꞌoniheb li jalanil dios rubeleb li ni̱nki cheꞌ. Ut incꞌaꞌ xeba̱nu li cꞌaꞌru xinye e̱re, chan li Dios.

Salmos 78:58

Queꞌxqꞌue xjoskꞌil li Dios xban nak queꞌxyi̱b li artal li nequeꞌxlokꞌoni cuiꞌ li yi̱banbil dios. Xban nak queꞌxlokꞌoni li yi̱banbil dios, cꞌajoꞌ nak quirahoꞌ xchꞌo̱l li Ka̱cuaꞌ.

Jeremías 17:2

Jultic reheb le̱ ralal e̱cꞌajol eb li artal ut li yi̱banbil dios xAsera li quelokꞌoni rubeleb li cheꞌ li ni̱nk xmuheb ut saꞌ eb li naꞌajej li ni̱nkeb xteram.