Deuteronomio 1:8 - Li Santil hu

⁸ Qꞌuehomak retal. La̱in xinqꞌue e̱re li naꞌajej aꞌin. Texxic ut te̱re̱chani li naꞌajej joꞌ quinye riqꞌuin juramento reheb le̱ xeꞌto̱nil yucuaꞌ, laj Abraham, laj Isaac ut laj Jacob ut reheb ajcuiꞌ li ralal xcꞌajoleb li teꞌcua̱nk mokon, chan li Dios.

Q'eqchi Bible

⁸ Ilomaq: laa'in xinq'axtesi li ch'och' a'an sa' eeruq'. Ayuqex ut eechaniiq li na'ajej li kixyeechi'i li Qaawa' sa' jurament reheb' leexe'toonil yuwa' laj Abrahán, laj Isahak ut laj Jakob, jo'wi' reheb' li ralal xk'ajoleb'», chan li Qaawa'.

Deuteronomio 1:8 ပူးပေါင်းရင်းမြစ်များ

Génesis 15:18

Aꞌan aꞌin li retalil nak saꞌ li cutan aꞌan li Ka̱cuaꞌ Dios quixba̱nu jun li contrato riqꞌuin laj Abram. Ut li Dios quixye re laj Abram: —Li naꞌajej aꞌin tinqꞌue chokꞌ a̱cue ut chokꞌ reheb ajcuiꞌ la̱ cualal a̱cꞌajol li teꞌcua̱nk. Li naꞌajej li tinqꞌue reheb naticla chak cuan cuiꞌ li nimaꞌ re Egipto ut nocoxrakekꞌ cuan cuiꞌ li nimla nimaꞌ Éufrates, chan.

Génesis 12:7

Saꞌ li naꞌajej aꞌan quia̱tinac li Dios riqꞌuin laj Abram ut quixye re, —Saꞌ jun cutan tinqꞌue chixjunil li naꞌajej aꞌin reheb la̱ cualal a̱cꞌajol, chan li Dios. Joꞌcan nak laj Abram quixtus li pec ut quixyi̱b jun lix artal re xlokꞌoninquil li Ka̱cuaꞌ Dios.

Génesis 15:16

Li xca̱ xte̱pal la̱ cualal a̱cꞌajol teꞌsukꞌi̱k chak saꞌ li naꞌajej aꞌin. Abanan toj ta̱numta̱k li ma̱usilal teꞌxba̱nu laj amorreo, tojoꞌnak tinmakꞌ li naꞌajej aꞌin chiruheb, chan li Dios re laj Abram.

Hebreos 6:13

Ma̱cꞌaꞌ junak mas nim xcuanquil chiru li Dios. Joꞌcan nak li Dios quixpatzꞌ xcꞌabaꞌ chi ribil rib nak quixyechiꞌi li rosobtesinquil laj Abraham.

Hebreos 6:14

Quixye re: Relic chi ya̱l tatcuosobtesi ut tinqꞌue chi qꞌuia̱nc la̱ cualal a̱cꞌajol. (Gén. 22:16-17)

Éxodo 23:31

La̱in tinqꞌue retalil bar ta̱numekꞌ li nuba̱l re li naꞌajej li tinqꞌue e̱re. Li nuba̱l ta̱numekꞌ cuan cuiꞌ li Caki Palau ut ta̱cuulak cuan cuiꞌ li palau Mediterráneo li cuan saꞌ xcue̱nt lix tenamiteb laj filisteo ut ta̱cuulak cuan cuiꞌ li chaki chꞌochꞌ ut toj cuan cuiꞌ li nimaꞌ Éufrates. La̱in tinkꞌaxtesiheb saꞌ e̱rukꞌ li cuanqueb saꞌ li naꞌajej aꞌan, ut la̱ex tex-isi̱nk reheb aran.

Éxodo 33:1

Li Dios quixye re laj Moisés: —Ayukex, cꞌameb li tenamit li xacuisiheb chak aran Egipto. Texxic saꞌ li naꞌajej li xinyechiꞌi reheb laj Abraham, laj Isaac, joꞌ ajcuiꞌ laj Jacob nak xinye reheb, “Tinsi li naꞌajej aꞌin reheb le̱ ralal e̱cꞌajol.”

Números 14:23

Joꞌcan nak incꞌaꞌ teꞌril li cha̱bil naꞌajej li quinyechiꞌi reheb lix xeꞌto̱nil yucuaꞌeb. Ma̱ jun reheb li xeꞌqꞌuehoc injoskꞌil teꞌoc saꞌ li cha̱bil naꞌajej li quinyechiꞌi reheb.

Números 32:11

“Eb li cui̱nk li queꞌel chak Egipto li cuan junmay chihab reheb, joꞌ eb ajcuiꞌ li ac numenakeb junmay chihab, incꞌaꞌ teꞌoc saꞌ li cha̱bil naꞌajej li quinyechiꞌi riqꞌuin juramento reheb laj Abraham, laj Isaac, ut laj Jacob xban nak incꞌaꞌ queꞌxpa̱b chi anchal xchꞌo̱leb li cꞌaꞌru quinye reheb.

Deuteronomio 1:11

Aꞌ taxak li Ka̱cuaꞌ, lix Dioseb li kaxeꞌto̱nil yucuaꞌ, ta̱qꞌuehok e̱re chi ta̱mc chi nabal chiru anakcuan ut texrosobtesi chi nabal joꞌ quixyechiꞌi xba̱nunquil ke.

Deuteronomio 11:24

Chixjunil li naꞌajej li texnumekꞌ cuiꞌ, e̱rehak la̱ex. Naticla chak saꞌ li chaki chꞌochꞌ nacuulac Líbano. Naticla cuan cuiꞌ li nimaꞌ Éufrates ut nacuulac toj cuan cuiꞌ li palau Mediterráneo. Chixjunil li naꞌajej li texbe̱k cuiꞌ, e̱rehak.

Nehemías 9:15

Ut nak queꞌtzꞌoca, saꞌ choxa quichal chak li cua caqꞌue chixcuaꞌeb. Ut nak ta̱chakik reheb, cacuisi li haꞌ saꞌ li sako̱nac ut caqꞌue reheb. Caye ajcuiꞌ reheb nak teꞌoc saꞌ li naꞌajej li cayechiꞌi reheb riqꞌuin juramento.

Jeremías 32:22

Caqꞌue li naꞌajej aꞌin reheb joꞌ caye reheb lix xeꞌto̱nil yucuaꞌ nak ta̱ba̱nu. Caqꞌue li naꞌajej reheb li na-el cuiꞌ chi us li sahil echej.

Ezequiel 47:14

La̱in quinye reheb le̱ xeꞌto̱nil yucuaꞌ riqꞌuin juramento nak tinqꞌue reheb li naꞌajej aꞌin. Joꞌcan nak ta̱jeqꞌui reheb ut juntakꞌe̱t xni̱nkal li teꞌxcꞌul li junju̱nk. Aꞌan aꞌin li chꞌochꞌ li tinqꞌue chokꞌ e̱herencia.

Deuteronomio 1:35

“Ma̱ jun e̱re la̱ex li incꞌaꞌ us le̱ naꞌleb te̱ril li cha̱bil naꞌajej li quinyechiꞌi riqꞌuin juramento reheb le̱ xeꞌto̱nil yucuaꞌ.

Deuteronomio 2:29

Choa̱canab chi numecꞌ saꞌ le̱ naꞌaj toj retal tonumekꞌ jun pacꞌal li nimaꞌ Jordán saꞌ li naꞌajej li xqꞌue ke li Ka̱cuaꞌ li kaDios joꞌ nak xoeꞌxcanab chi numecꞌ saꞌ lix naꞌajeb li ralal xcꞌajol laj Esaú li cuanqueb Seir ut eb li ralal xcꞌajol laj Moab li cuanqueb Ar, chanquin re li rey.

Deuteronomio 4:1

Laj Moisés quixye reheb: —Anakcuan ut ex aj Israel, cherabihak li chakꞌrab ut li tijleb li yo̱quin chixyebal e̱re. Cheba̱nuhak li cꞌaꞌru naxye li chakꞌrab re nak ta̱cua̱nk le̱ yuꞌam ut tex-oc saꞌ li naꞌajej li tixqꞌue e̱re li Ka̱cuaꞌ lix Dioseb li kaxeꞌto̱nil yucuaꞌ.

Deuteronomio 6:10

Li Ka̱cuaꞌ le̱ Dios texqꞌue chi cua̱nc saꞌ li naꞌajej li quixyechiꞌi chak reheb le̱ xeꞌto̱nil yucuaꞌ, laj Abraham, laj Isaac ut laj Jacob. Quixye nak tixqꞌue e̱re li xni̱nkal ru tenamit li kꞌaxal chꞌinaꞌus, usta ma̱cuaꞌ la̱ex xexyi̱ban re.

Deuteronomio 7:8

Quixsicꞌ ban e̱ru xban nak nequexra ut xban nak quiraj xba̱nunquil li quixyechiꞌi reheb le̱ xeꞌto̱nil yucuaꞌ nak texrisi Egipto. Joꞌcan nak quexrisi riqꞌuin xcuanquil saꞌ li naꞌajej li quexcuan cuiꞌ chokꞌ rahobtesinbil mo̱s rubel xcuanquil laj faraón.

Deuteronomio 7:12

Cui la̱ex te̱qꞌue retal li chakꞌrab aꞌin ut cui te̱qꞌue e̱chꞌo̱l chixba̱nunquil, li Ka̱cuaꞌ le̱ Dios tixba̱nu joꞌ quixye saꞌ li contrato ut ta̱ruxta̱na e̱ru joꞌ quixyechiꞌi reheb le̱ xeꞌto̱nil yucuaꞌ.

Deuteronomio 7:13

Li Ka̱cuaꞌ texra ut texrosobtesi ut tixqꞌue chi qꞌuia̱nc le̱ ralal e̱cꞌajol ut ta̱rosobtesiheb. Ut tixqꞌue ajcuiꞌ chi nabalocꞌ li ru le̱ racui̱mk. Tixqꞌue nabal le̱ trigo, le̱ vino ut le̱ aceite. Tixqꞌue nabal li ral le̱ cuacax ut le̱ carner saꞌ li naꞌajej li quixyechiꞌi riqꞌuin juramento reheb le̱ xeꞌto̱nil yucuaꞌ.

Deuteronomio 8:1

Qꞌuehomak e̱chꞌo̱l chixba̱nunquil chixjunil li chakꞌrab li yo̱quin chixyebal e̱re anakcuan re nak ta̱cua̱nk le̱ yuꞌam ut texnabalokꞌ ut tex-oc chi cua̱nc saꞌ li naꞌajej li quixyechiꞌi li Dios reheb le̱ xeꞌto̱nil yucuaꞌ riqꞌuin juramento.

Deuteronomio 9:5

Moco xban ta xti̱quilal le̱ chꞌo̱l nak li Dios tixqꞌue chere̱chani li naꞌajej aꞌan. Ta̱risiheb ban xban nak kꞌaxal yibru lix naꞌlebeb ut xban ajcuiꞌ nak tento tixba̱nu li cꞌaꞌru quixyechiꞌi riqꞌuin juramento reheb le̱ xeꞌto̱nil yucuaꞌ, laj Abraham, laj Isaac, ut laj Jacob.

Deuteronomio 10:11

Ut li Ka̱cuaꞌ quixye cue, “Ayu anakcuan ut tatcꞌamok be chiruheb li tenamit nak teꞌxic re nak teꞌoc saꞌ li cha̱bil naꞌajej ut teꞌre̱chani joꞌ xinye reheb lix xeꞌto̱nil yucuaꞌ riqꞌuin juramento.”

Deuteronomio 11:9

Cui te̱ba̱nu li naxye li chakꞌrab, ta̱najtokꞌ rok le̱ yuꞌam saꞌ li naꞌajej li quiyechiꞌi̱c reheb le̱ xeꞌto̱nil yucuaꞌ joꞌ ajcuiꞌ e̱re la̱ex li ralal xcꞌajolex. Saꞌ li naꞌajej aꞌan natauman li cha̱bil echej joꞌ li leche ut li xyaꞌal cab.

Deuteronomio 26:3

Ut texxic riqꞌuineb laj tij li cua̱nkeb saꞌ li cutan aꞌan ut te̱ye reheb, “La̱in ninye anakcuan chiru li Ka̱cuaꞌ lin Dios nak xo-oc saꞌ li naꞌajej li quixye reheb li kaxeꞌto̱nil yucuaꞌ riqꞌuin juramento nak tixqꞌue ke.”

Deuteronomio 26:15

China̱cuil, at Ka̱cuaꞌ, toj saꞌ la̱ santil naꞌaj saꞌ choxa. Chacuosobtesiheb laj Israel la̱ tenamit. Ut chacuosobtesi li naꞌajej li xaqꞌue ke joꞌ xaye reheb li kaxeꞌto̱nil yucuaꞌ nak xaba̱nu li juramento. Xaqꞌue ke li cha̱bil naꞌajej li na-el cuiꞌ chi us li acui̱mk,” chaꞌkex.

Deuteronomio 28:11

Li Ka̱cuaꞌ tixqꞌue nabal le̱ ralal e̱cꞌajol ut nabal le̱ queto̱mk ut nabal le̱ racui̱mk saꞌ li naꞌajej li tixqꞌue e̱re joꞌ quixyechiꞌi riqꞌuin juramento reheb le̱ xeꞌto̱nil yucuaꞌ.

Deuteronomio 29:12

Cuanquex arin anakcuan re nak te̱ba̱nu li contrato riqꞌuin li Ka̱cuaꞌ le̱ Dios. Riqꞌuin juramento tixba̱nu li contrato li Ka̱cuaꞌ,

Deuteronomio 30:20

Te̱ra taxak li Ka̱cuaꞌ le̱ Dios ut te̱ba̱nu taxak li cꞌaꞌru naxye aꞌan. Ti̱cak taxak le̱ chꞌo̱l chiru ut me̱jal taxak e̱cꞌaꞌux. Li Ka̱cuaꞌ ta̱qꞌuehok re le̱ yuꞌam re nak najt texcua̱nk saꞌ li naꞌajej li quixyechiꞌi riqꞌuin juramento reheb le̱ xeꞌto̱nil yucuaꞌ, laj Abraham, laj Isaac ut laj Jacob, chan laj Moisés.

Deuteronomio 31:7

Ut chirix aꞌan laj Moisés quixbok laj Josué ut chiruheb chixjunileb laj Israel quixye re: —Cacuubresi a̱chꞌo̱l, at Josué, ut cauhak taxak a̱cuib, xban nak la̱at tatcꞌamok be chiruheb li tenamit nak teꞌoc saꞌ li naꞌajej li quixyechiꞌi li Ka̱cuaꞌ reheb le̱ xeꞌto̱nil yucuaꞌ. La̱at ta̱cꞌam xbeheb chire̱chaninquil li naꞌajej.

Deuteronomio 34:4

Ut li Ka̱cuaꞌ quixye re laj Moisés: —Aꞌan aꞌin li naꞌajej li quinyechiꞌi reheb laj Abraham, laj Isaac ut laj Jacob. Quinye riqꞌuin juramento nak tinqꞌue reheb li ralal xcꞌajoleb. La̱in nacuaj nak ta̱cuil, usta incꞌaꞌ naru tat-oc saꞌ li naꞌajej aꞌan, chan li Ka̱cuaꞌ.

Josué 1:6

Cacuubresi a̱chꞌo̱l ut chicua̱nk a̱metzꞌe̱u xban nak la̱at tatjecꞌok re li naꞌajej aꞌin reheb laj Israel. Aꞌan aꞌin li naꞌajej li quinyechiꞌi reheb la̱ xeꞌto̱nil yucuaꞌ.

Jueces 2:1

Qui-el ut lix ángel li Ka̱cuaꞌ saꞌ li tenamit Gilgal ut co̱ toj Boquim. Quixye reheb laj Israel: —La̱in quin-isin chak e̱re Egipto ut la̱in xexincꞌam chak saꞌ li naꞌajej aꞌin li xinyechiꞌi reheb le̱ xeꞌto̱nil yucuaꞌ riqꞌuin juramento. Quinye e̱re, “La̱in ma̱ jaruj tinkꞌet li contrato li xinba̱nu e̱riqꞌuin.