Daniel 11:36 - Li Santil hu

³⁶ Li rey li cuan saꞌ li norte tixba̱nu li cꞌaꞌru ta̱raj. Tixnimobresi rib ut tixye nak aꞌan kꞌaxal nim xcuanquil chiru yalak cꞌaꞌru chi diosil. Ut tixye ajcuiꞌ nak aꞌan kꞌaxal nim xcuanquil chiru li tzꞌakal Dios. Ut chixjunil us ta̱e̱lk chiru toj ta̱cuulak xkꞌehil nak li Dios tixqꞌue chixtojbal rix lix ma̱c xban nak ac chꞌolchꞌo nak joꞌcan ta̱cꞌulma̱nk.

Q'eqchi Bible

³⁶ «Li awab'ej re Siria tixb'aanu li k'aru taaraj xb'aanunkil; tixnimob'resi rib', tixk'e xwankil sa' xb'een chixjunileb' li yos ut tixmajewa li tz'aqal Yos. Jwal us taa'elq toj reetal li Yos tixk'ut li xnimal xjosq'il, xb'aan naq li ak xyeemank xb'aan li Qaawa', taa'uxq.

Daniel 11:36 ပူးပေါင်းရင်းမြစ်များ

2 Ts 2:4

Aꞌan tixqꞌue xcuanquil xjunes rib ut xicꞌ ta̱ril yalak cꞌaꞌ chi diosil ut li cꞌaꞌak re ru nalokꞌoniman saꞌ ruchichꞌochꞌ. Tixnimobresi rib saꞌ xbe̱n chixjunil toj retal nak ta̱cꞌojla̱k saꞌ rochoch li Dios ut aꞌan chic tixqꞌue rib chokꞌ dios.

Daniel 8:19

Ut quixye cue: —Anakcuan la̱in tinye a̱cue li cꞌaꞌru ta̱cꞌulma̱nk saꞌ rosoꞌjiqueb li cutan xban xjoskꞌil li Dios. Li visión li xacuil, aꞌan retalil li talajeꞌcꞌulma̱nk saꞌ eb li cutan cha̱lel.

Deuteronomio 10:17

Xban nak li Ka̱cuaꞌ le̱ Dios, aꞌan li nimajcual Dios. Ma̱cꞌaꞌ chic junak Dios chiru aꞌan. Kꞌaxal nim xcuanquil saꞌ xbe̱neb chixjunileb li cuanqueb xcuanquil ut xucuajel ru. Aꞌan incꞌaꞌ naxsicꞌ ru li ani tixra ut ma̱ ani naru ta̱tumina̱nk ru.

Daniel 11:16

Ut li rey li cuan saꞌ li norte tixba̱nu li cꞌaꞌru naraj riqꞌuineb. Ut ta̱cana̱k saꞌ li cha̱bil naꞌajej yechiꞌinbil reheb laj Israel ut chixjunil ta̱cana̱k saꞌ rukꞌ aꞌan ut ma̱ ani ta̱ru̱k ta̱colok reheb.

Daniel 2:47

Ut quixye re laj Daniel: —Relic chi ya̱l nak la̱ Dios, aꞌan li tzꞌakal Dios ut aꞌan li kꞌaxal nim xcuanquil saꞌ xbe̱neb chixjunileb li yi̱banbil dios. Aꞌan li Ka̱cuaꞌ ut aꞌan li nim xcuanquil saꞌ xbe̱neb chixjunileb li rey. Aꞌan li nacꞌutbesin xya̱lal li incꞌaꞌ natauman ru. Ninnau nak ya̱l aꞌan xban nak la̱at xaye cue cꞌaꞌru xya̱lal lin matcꞌ, chan li rey.

Isaías 14:13

La̱at cacꞌoxla nak kꞌaxal nim a̱cuanquil. Caye saꞌ a̱chꞌo̱l: —Tintakekꞌ toj saꞌ choxa ut tinqꞌue lin cꞌojariba̱l saꞌ xbe̱neb li chahim li quixyi̱b li Dios. Tincꞌojla̱k saꞌ li tzu̱l li nacana saꞌ li norte bar nequeꞌxchꞌutub cuiꞌ ribeb chixlokꞌoninquil lix dioseb.

Apocalipsis 10:7

Nak tixya̱basi lix trompeta li xcuuk ángel, saꞌ eb li cutan aꞌan ta̱tzꞌaklok ru lix cꞌaꞌux li Dios, li mukmu nak quicuan. Ta̱tzꞌaklok ru joꞌ quixye reheb li profeta li queꞌcꞌanjelac chiru, chan.

Isaías 10:25

Chi se̱b ta̱numekꞌ lin joskꞌil saꞌ e̱be̱n. Tojoꞌnak tincuisi injoskꞌil saꞌ xbe̱neb laj Asiria ut tinsach ruheb, chan.

Salmos 136:2

Cheqꞌuehak taxak xlokꞌal li nimajcual Dios, li kꞌaxal nim xcuanquil chiruheb li yi̱banbil dios, xban nak kꞌaxal nim li ruxta̱n saꞌ kabe̱n junelic.

Apocalipsis 17:17

Li Dios quiqꞌuehoc re saꞌ xchꞌo̱leb li rey nak joꞌcan teꞌxba̱nu. Joꞌcan nak junajakeb lix cꞌaꞌux chixqꞌuebal lix cuanquileb re li joskꞌ aj xul re nak ta̱takla̱nk toj ta̱tzꞌaklok ru li quixye li Dios.

Apocalipsis 17:3

Saꞌ li visión li quixcꞌutbesi chicuu li Santil Musikꞌej, quicuil nak li ángel quinixcꞌam saꞌ jun li naꞌajej bar ma̱cꞌaꞌ cuan. Aran quicuil li ixk chunchu chirix jun li joskꞌ aj xul cak rix. Tzꞌi̱banbil nabal li a̱tin chirix re xmajecuanquil li Dios. Cuan cuukub xjolom ut cuan laje̱b xxucub.

Apocalipsis 12:14

Quiqꞌueheꞌ cuib lix xicꞌ li ixk re ta̱rupupik chanchan xxicꞌ li nimla cꞌuch re nak ta̱e̱lelik ut ta̱xic toj saꞌ li chaki chꞌochꞌ saꞌ li naꞌajej ac cauresinbil chokꞌ re bar ma̱cꞌaꞌ cuan. Ut aran ta̱chꞌolani̱k xban li Dios chiru oxib chihab riqꞌuin cuakib po. Ut aran tixmuk rib chiru li cꞌantiꞌ.

Hechos 4:28

Joꞌcaꞌin queꞌxba̱nu xban nak ac joꞌcan chak saꞌ a̱chꞌo̱l la̱at. Ut ac yebil chak a̱ban nak joꞌcan ta̱cꞌulma̱nk.

San Juan 6:38

La̱in xinchal chak saꞌ choxa re tinba̱nu li cꞌaꞌru naraj li Dios li quitaklan chak cue. Moco xinchal ta chixba̱nunquil li cꞌaꞌru nacuaj la̱in.

San Juan 5:30

La̱in ma̱cꞌaꞌ naru ninba̱nu injunes. La̱in ninrakoc a̱tin joꞌ naxye cue li Yucuaꞌbej. Joꞌcan nak ninrakoc a̱tin saꞌ ti̱quilal. Incꞌaꞌ ninba̱nu li cꞌaꞌru nacuaj la̱in. Ninba̱nu ban li cꞌaꞌru naraj li Yucuaꞌbej li quitaklan chak cue.

Daniel 12:7

Ut li jun li lino rakꞌ, li cuan saꞌ xbe̱n li haꞌ, quixtaksi li rukꞌ xcabichal ut quicuabi nak quixpatzꞌ xcꞌabaꞌ li Dios li cuan chi junelic kꞌe cutan ut quixye nak li sachba chꞌo̱lej aꞌin ta̱cꞌulma̱nk chiru oxib chihab riqꞌuin media. Nak acak xsacheꞌ xcuanquileb lix tenamit li Dios, ta̱rakekꞌ xcꞌulbal chixjunil aꞌin, chan.

Daniel 11:3

Ut aran Grecia ta̱cua̱nk jun li rey kꞌaxal cau rib. Aꞌan ta̱takla̱nk riqꞌuin xnimal lix cuanquil ut tixba̱nu li cꞌaꞌru naraj.

Daniel 8:4

Quicuil nak li te̱lom carner yo̱ chi xekꞌoc riqꞌuin lix xucub saꞌ li oeste li bar na-oc cuiꞌ li sakꞌe ut saꞌ li norte ut saꞌ li sur. Ut ma̱ jun li xul nacuyuc xmetzꞌe̱u, chi moco naru teꞌe̱lelik chiru lix cuanquil. Li carner quixba̱nu li cꞌaꞌru quiraj aꞌan ut quixnimobresi xcuanquil.

Daniel 7:8

Nak yo̱quin chirilbal lix xucub, aran quicuil jun chic li xucub chꞌina caꞌchꞌin. Yo̱ chak chi e̱lc saꞌ xya̱nkeb li laje̱b chic. Ut qui-isi̱c oxib li xucub li quicuil xbe̱n cua. Cuan xnakꞌ ru li chꞌina xucub nak quicuil. Chanchan xnakꞌ ru cui̱nk ut riqꞌuin lix tzꞌu̱mal re yo̱ chixnimobresinquil rib.

Daniel 4:35

Chixjunileb li cuanqueb saꞌ ruchichꞌochꞌ ma̱cꞌaꞌeb xcuanquil chiru aꞌan. Li Ka̱cuaꞌ kꞌaxal nim xcuanquil saꞌ xbe̱neb li cuanqueb saꞌ choxa joꞌ ajcuiꞌ saꞌ ruchichꞌochꞌ. Naxba̱nu li cꞌaꞌru naraj aꞌan ut ma̱ ani naru naa̱tinac chirix.

Isaías 46:10

La̱in quinyehoc chak re cꞌaꞌru quicꞌulman chalen saꞌ xticlajic toj saꞌ rosoꞌjic. Chalen najter kꞌe cutan la̱in quinyehoc re cꞌaꞌru ta̱cꞌulma̱nk usta toj ma̱jiꞌ nacꞌulman. Li cꞌaꞌru ninye, aꞌan li ta̱cꞌulma̱nk. La̱in ninba̱nu chixjunil li cꞌaꞌru nacuaj.

Isaías 26:20

Ex intenamit, ocankex saꞌ le̱ rochoch ut tzꞌapomak li oqueba̱l. Mukumak caꞌchꞌinak e̱rib toj ta̱numekꞌ xjoskꞌil li Dios.

Proverbios 19:21

Eb li cristian nabal li cꞌaꞌak re ru nequeꞌxcꞌu̱b ru. Abanan caꞌaj cuiꞌ li Dios yal re ma ta̱uxma̱nk chixjunil li nequeꞌxcꞌu̱b ru.

Salmos 33:10

Li Ka̱cuaꞌ nasach ru li cꞌaꞌru nequeꞌxcꞌoxla xba̱nunquil li tenamit li incꞌaꞌ nequeꞌpa̱ban. Naxcanab chi ma̱cꞌaꞌ na-oc cuiꞌ li cꞌaꞌru nequeꞌxcꞌu̱b ru.

Josué 22:22

—Li Ka̱cuaꞌ li nimajcual Dios, aꞌan naxnau chixjunil. Aꞌan naxnau cꞌaꞌru aj e nak xkayi̱b li artal aꞌin. Ut aꞌan ta̱cꞌutuk re lix ya̱lal che̱ru. Cui la̱o xkayi̱b li artal aꞌin re takakꞌetkꞌeti kib chiru, malaj ut re xtzꞌekta̱nanquil li Dios, choxqꞌuehak ta chi ca̱mc.

2 Ts 2:3

Ma̱cꞌaꞌ ta cꞌaꞌru chexbalakꞌi̱k cuiꞌ. Li Ka̱cuaꞌ Jesucristo incꞌaꞌ ta̱cha̱lk chi ma̱jiꞌak natzꞌekta̱na̱c li Dios xbaneb nabal chi tenamit. Ut ta̱cha̱lk ajcuiꞌ li cui̱nk laj kꞌetol chakꞌrab. Aꞌan li ta̱cꞌuluk re li sachc chi junaj cua.

2 Ts 2:8

Saꞌ eb li cutan aꞌan ta̱cꞌutbesi̱k laj kꞌetol chakꞌrab. Tojoꞌnak li Ka̱cuaꞌ Jesucristo ta̱cꞌulu̱nk riqꞌuin xnimal xlokꞌal. Ta̱apusi̱k laj kꞌetol chakꞌrab xban li Ka̱cuaꞌ ut aran ta̱osokꞌ. Chi joꞌcan ta̱sachekꞌ chixjunil lix cuanquil saꞌ xcꞌulunic li Ka̱cuaꞌ Jesucristo.

Apocalipsis 13:1

Ut li dragón quixakli chire li palau ut quicuil nak qui-el chak saꞌ li palau jun chic chanchan joskꞌ aj xul cuan cuukub xjolom ut laje̱b lix xucub. Ut saꞌ li laje̱b chi xucub cuan junju̱nk lix corona. Ut tzꞌi̱banbil saꞌ eb lix jolom jun li cꞌabaꞌej re xmajecuanquil li Ka̱cuaꞌ.

Ezequiel 35:13

Xekꞌetkꞌeti e̱rib chicuu nak xeye li incꞌaꞌ us chicuix. Nabal xex-a̱tinac. Ut la̱in xcuabi li cꞌaꞌru xeye nak xine̱hob.

Daniel 5:19

Ut xban lix nimal xcuanquil li quiqꞌueheꞌ re, chixjunileb li cuanqueb saꞌ ruchichꞌochꞌ aꞌ yal bar xtenamiteb ut aꞌ yal cꞌaꞌru ra̱tinoba̱leb, nequeꞌsicsot xbaneb xxiu chiru. Quixcamsi li ani quiraj xcamsinquil ut quixcol li ani quiraj xcolbal. Quixqꞌue xcuanquil li ani quiraj xqꞌuebal xcuanquil ut quixcubsi xcuanquil li ani quiraj xcubsinquil xcuanquil.

Daniel 5:20

Abanan qui-isi̱c saꞌ xcuanquil xban nak quixkꞌetkꞌeti rib ut quixcacuubresi lix chꞌo̱l. Xban lix kꞌetkꞌetil kꞌaxal cuiꞌchic quixnimobresi rib. Joꞌcan nak qui-isi̱c saꞌ xcuanquil ut qui-isi̱c ajcuiꞌ lix lokꞌal.

Daniel 11:37

Li rey li cuan saꞌ li norte tixtzꞌekta̱naheb lix dioseb lix xeꞌto̱nil yucuaꞌ ut tixtzꞌekta̱na ajcuiꞌ li dios li nequeꞌxlokꞌoni li ixk. Ma̱ jun li dios tixqꞌue xcuanquil xban nak tixcꞌoxla nak caꞌaj cuiꞌ aꞌan li kꞌaxal nim xcuanquil saꞌ xbe̱neb chixjunileb.

Isaías 10:5

Li Ka̱cuaꞌ quixye: —Eb laj Asiria nequeꞌcꞌanjelac chicuu joꞌ jun li tzꞌu̱m re xqꞌuebaleb chixtojbal xma̱queb li tenamit li yo̱ injoskꞌil saꞌ xbe̱n.

Isaías 10:23

Relic chi ya̱l li Ka̱cuaꞌ li nimajcual Dios tixsach ru lix tenamiteb joꞌ quixye nak tixba̱nu.

Isaías 14:14

Tinxic toj takecꞌ toj jun pacꞌal li chok. Chanchanakin li nimajcual Dios, chancat.

Isaías 30:33

Ac junxil cauresinbil chak li naꞌajej Tofet li ta̱cꞌatekꞌ cuiꞌ lix reyeb laj Asiria. Li naꞌajej aꞌan nim ru ut cꞌajoꞌ xchamal. Nabal li siꞌ ac tusbil saꞌ li naꞌajej aꞌan. Li Ka̱cuaꞌ nak ta̱musikꞌak tixloch xxamlel ut tixcꞌat riqꞌuin azufre.

Isaías 57:9

Quexco̱ex chi najt riqꞌuin li rey ut quecꞌam le̱ sununquil ban nak quexco̱ex. Quetaklaheb le̱ takl yalak bar. Chanchan nak quexco̱ex saꞌ xnaꞌajeb li camenak chixsicꞌbal le̱ naꞌleb.

Ezequiel 28:2

—At ralal cui̱nk, ta̱ye re lix reyeb laj Tiro nak la̱in li nimajcual Dios ninye chi joꞌcaꞌin: Xban nak kꞌaxal nacanimobresi a̱cuib, nacaye saꞌ a̱chꞌo̱l “La̱in diosin”. Nacaye nak la̱at cꞌojcꞌo̱cat saꞌ xcꞌojariba̱l li Dios xban nak la̱ tenamit sutsu xban li palau. Abanan la̱at moco diosat ta. Yal cui̱nkat usta nacacꞌoxla nak cuan a̱naꞌleb joꞌ Dios.

Zacarías 11:16

Li cꞌaꞌru ta̱ba̱nu, aꞌan retalil nak la̱in tinqꞌue junak aj cꞌamol be reheb lin tenamit. Chanchanak laj ilol carner li incꞌaꞌ tixqꞌue xchꞌo̱l chirilbal li carner li sachenakeb, chi moco tixsicꞌ chak li sachenak, chi moco tixban li tochꞌol. Ut incꞌaꞌ tixqꞌue xcua li ma̱cꞌaꞌ chic xmetzꞌe̱u. Tixsicꞌ ban ru li ni̱nkeb xtibel ut tixtiu. Incꞌaꞌ ta̱ril xtokꞌoba̱l ruheb.