Amós 6:14 - Li Santil hu

¹⁴ Cheqꞌuehak retal la̱ex aj Israel. Li Ka̱cuaꞌ, li nimajcual Dios, naxye chi joꞌcaꞌin: —La̱in tintakla jun li tenamit chi numta̱c saꞌ e̱be̱n. Eb aꞌan teꞌrahobtesi̱nk e̱re la̱ex li cuanquex toj saꞌ li naꞌajej Hamat li cuan saꞌ li norte ut toj chire li haꞌ li cuan saꞌ li sur, chan li Ka̱cuaꞌ.

Q'eqchi Bible

¹⁴ “Jo'kan naq, ex aj Israel, tinwaklesi chaq jun li tenamit chi numtaak sa' eeb'een chalen chaq Jamat ut toj chire li nima' Arabá”, chan li Qaawa', li Nimajwal Yos.

Amós 6:14 ပူးပေါင်းရင်းမြစ်များ

2 Reyes 14:25

Laj Jeroboam quixyi̱b cuiꞌchic lix nuba̱l lix chꞌochꞌeb laj Israel joꞌ nak quicuan junxil. Naticla saꞌ li oqueba̱l re Hamat saꞌ li norte ut nacuulac toj saꞌ li palau li cuan Arabá. Quixba̱nu joꞌ quixye li Ka̱cuaꞌ lix Dioseb laj Israel re li profeta Jonás li ralal laj Amitai, li chalenak chak saꞌ li naꞌajej Gat-hefer.

1 Reyes 8:65

Saꞌ eb li cutan aꞌan laj Salomón quixba̱nu jun li ninkꞌe rochbeneb chixjunileb laj Israel. Kꞌaxal nabaleb li chꞌutchꞌu̱queb aran. Eb aꞌan queꞌchal chak saꞌ eb li naꞌajej Hamat ut toj cuan cuiꞌ li nimaꞌ re Egipto. Li ninkꞌe aꞌin queꞌxba̱nu cuukub cutan ut chirix aꞌan queꞌxba̱nu cuukub cutan chic. Ca̱laju cutan queꞌninkꞌei̱c re xlokꞌoninquil li Dios.

Oseas 10:5

Eb laj Samaria teꞌxucuak ut teꞌya̱bak xban xrahil xchꞌo̱leb nak ta̱sachekꞌ li cuacax oro li cuan Bet-avén. Teꞌya̱bak ajcuiꞌ laj tij li nequeꞌxqꞌue xchꞌo̱l chi cꞌanjelac chiru. Cau teꞌya̱bak nak ta̱sachekꞌ xlokꞌal lix dioseb.

Isaías 7:20

Ut saꞌ eb li cutan aꞌan li Ka̱cuaꞌ tixtakla lix reyeb laj Asiria, li cuan jun pacꞌal li nimaꞌ Éufrates. Li cui̱nk aꞌan chanchan jun aj besonel xban nak tixtakla xbesbal le̱ jolom joꞌ ajcuiꞌ le̱ mach ut le̱ tzelec.

2 Reyes 17:6

Yo̱ chic xbele chihab roquic laj Oseas chokꞌ xreyeb laj Israel nak lix reyeb laj Asiria quire̱chani li tenamit Samaria ut quixcꞌameb chi pre̱xil laj Israel aran Asiria. Cuan li quixcanabeb saꞌ li naꞌajej Halah. Cuan li quixcanabeb saꞌ li naꞌajej Habor li cuan nachꞌ riqꞌuin li nimaꞌ Gozán. Ut cuan ajcuiꞌ li quixcanabeb saꞌ eb li tenamit li cuanqueb saꞌ xcue̱nt li tenamit Medo.

2 Reyes 15:29

Saꞌ eb li cutan nak laj Peka cuan chokꞌ rey aran Israel, laj Tiglat-pileser lix reyeb laj Asiria quichal chi pletic riqꞌuineb laj Israel. Quinumta saꞌ xbe̱neb li tenamit Ijón, Abel-bet-maaca, Janoa, Cedes, Hazor, Galaad, Galilea ut chixjunil lix naꞌajeb li ralal xcꞌajol laj Neftalí. Quixchapeb li cristian ut quixcꞌameb chi pre̱xil aran Asiria.

Ezequiel 47:20

Li nuba̱l li cuan saꞌ li oeste, aꞌan li palau Mediterráneo. Nacuulac saꞌ li norte toj saꞌ li oqueba̱l re Hamat. Aꞌan li nuba̱l li cuan saꞌ li oeste.

Amós 3:11

Joꞌcan nak li Ka̱cuaꞌ quixye chi joꞌcaꞌin: —Eb li xicꞌ nequeꞌiloc e̱re la̱ex aj Israel teꞌcha̱lk ut teꞌxsut le̱ tenamit. Teꞌxjucꞌ li cab xeyi̱b re xcolbal e̱rib ut teꞌrelkꞌa li cꞌaꞌru e̱re cuan saꞌ le̱ palacio, chan.