Amós 3:10 - Li Santil hu

¹⁰ Joꞌcaꞌin quixye li Ka̱cuaꞌ: —Incꞌaꞌ nequeꞌxnau xba̱nunquil li ti̱quilal. Nujenak lix palacio riqꞌuin li cꞌaꞌak re ru nequeꞌrelkꞌa riqꞌuin pletic ut numtajenak li ma̱usilal nequeꞌxba̱nu.

Q'eqchi Bible

¹⁰ Li Qaawa' kixye chi jo'ka'in: “Eb' a'an ink'a' neke'xb'aanu li tiikilal, ut neke'xnujob'resi li rochocheb' rik'in li k'aru xe'relq'a naq xe'xrahob'tesi eb' li ras riitz'in”.

Amós 3:10 ပူးပေါင်းရင်းမြစ်များ

Sofonías 1:9

Saꞌeb li cutan aꞌan tinqꞌueheb ajcuiꞌ chixtojbal xma̱queb li nequeꞌoc chi piscꞌonbil saꞌ li rochocheb lix dioseb joꞌ ajcuiꞌ li nequeꞌxtu̱b saꞌ rochocheb lix dioseb li nequeꞌrelkꞌa chak riqꞌuin balakꞌi̱nc.

Jeremías 4:22

Li Ka̱cuaꞌ quixye: —Ma̱cꞌaꞌeb xnaꞌleb lin tenamit. Incꞌaꞌ nequeꞌxnau cuu. Chanchaneb li cocꞌal li ma̱cꞌaꞌeb xnaꞌleb. Chanchaneb li cocꞌal li incꞌaꞌ nequeꞌxtau xya̱lal. Cuanqueb xnaꞌleb chixba̱nunquil li ma̱usilal, abanan incꞌaꞌ nequeꞌraj xba̱nunquil li us, chan.

Salmos 14:4

¿Ma incꞌaꞌ nequeꞌxtau xya̱lal? chan li Ka̱cuaꞌ. ¿Ma ma̱cꞌaꞌ xnaꞌleb li nequeꞌxba̱nu li ma̱usilal? Nequeꞌxrahobtesi li cualal incꞌajol ut ma̱cꞌaꞌ nequeꞌraj re chi moco niquineꞌxcꞌoxla la̱in, chan li Ka̱cuaꞌ.

2 Pedro 3:5

Li nequeꞌxye chi joꞌcan incꞌaꞌ nequeꞌraj xjulticanquil chanru qui-uxman chak najter. Incꞌaꞌ nequeꞌraj xqꞌuebal retal nak yal riqꞌuin ra̱tin li Dios quixyoꞌobtesi li choxa ut li ruchichꞌochꞌ. Li Dios quixyi̱b li ruchichꞌochꞌ saꞌ haꞌ ut saꞌ xbe̱n haꞌ quicꞌojla li chꞌochꞌ xban li Dios.

Amós 6:12

¿Ma ta̱ru̱k ta biꞌ teꞌa̱linak li cacua̱y saꞌ xbe̱n ni̱nki pec? ¿Ma naru ta biꞌ xbecbal li palau riqꞌuin chꞌi̱chꞌ joꞌ nabecman li chꞌochꞌ? ¿Cꞌaꞌut nak la̱ex xesukꞌisi li us chokꞌ re camsi̱nc? Ut, ¿cꞌaꞌut nak xesukꞌisi li ti̱quilal chokꞌ ma̱usilal?

Amós 5:7

Raylal ta̱cha̱lk saꞌ e̱be̱n la̱ex li nequesukꞌisi li ti̱quilal chokꞌ ma̱usilal ut nequesach xcuanquil li us.

Jeremías 5:4

La̱in quinye nak aꞌaneb li nebaꞌ li incꞌaꞌ queꞌxtzol ribeb. Incꞌaꞌ nequeꞌxtau ru li cꞌaꞌru naraj li Dios, chi moco nequeꞌxnau nak tento teꞌxba̱nu li cꞌaꞌru quixye.

Ezequiel 8:17

Ut li chanchan cui̱nk quixye cue: —At ralal cui̱nk, ¿ma xacuil chixjunil aꞌin? ¿Ma incꞌaꞌ nacꞌojla xchꞌo̱leb laj Judá nak nequeꞌxba̱nu li ma̱usilal aꞌin? ¿Ma incꞌaꞌ tzꞌakal nak nequeꞌrahobtesin yalak bar? Ut nequeꞌchal arin saꞌ lin templo chixba̱nunquil li ma̱usilal re nak teꞌxqꞌue injoskꞌil. Niquineꞌxmajecua nak nequeꞌxqꞌue li rukꞌ cheꞌ saꞌ ruꞌujeb.

Ezequiel 18:7

Ma̱ ani naxrahobtesi chi moco na-elkꞌac. Naxkꞌaxtesi li nequeꞌxcanab riqꞌuin chokꞌ xprenda li ani natoꞌonin. Naxqꞌue xtzacae̱mk li ta̱tzꞌoca̱k ut naxqꞌue rakꞌ li ma̱cꞌaꞌ rakꞌ.

Ezequiel 22:29

Eb li tenamit junes rahobtesi̱nc nequeꞌxcꞌoxla xba̱nunquil. Ut aj e̱lkꞌeb. Nequeꞌxba̱nu raylal reheb li nebaꞌ ut reheb li tenkꞌa̱c teꞌraj. Nequeꞌxrahobtesiheb ajcuiꞌ li jalan xtenamiteb li incꞌaꞌ xcꞌulubeb rahobtesi̱c.

Amós 6:3

Incꞌaꞌ nequecꞌoxla nak ta̱cuulak xkꞌehil li rakba a̱tin saꞌ e̱be̱n ut riqꞌuin li ma̱usilal nequeba̱nu kꞌaxal cuiꞌchic nabal li raylal yo̱quex chixbokbal saꞌ e̱be̱n.

Amós 6:8

Li Ka̱cuaꞌ Dios quixba̱nu li juramento saꞌ xcꞌabaꞌ ajcuiꞌ aꞌan ut quixye: —La̱in li Ka̱cuaꞌ li nimajcual Dios. Xicꞌ nequeꞌcuil li ralal xcꞌajol laj Jacob xban nak nequeꞌxnimobresi ribeb. Nintzꞌekta̱naheb lix ni̱nkal ru cab. Joꞌcan nak tincanabeb li xicꞌ nequeꞌiloc reheb chi numta̱c saꞌ xbe̱neb lix tenamiteb laj Israel jun xiquic chixjunil li cꞌaꞌru cuan reheb.

Miqueas 6:10

¿Ma incꞌaꞌ ta biꞌ toj cuan ajcuiꞌ saꞌ rochocheb li incꞌaꞌ useb xnaꞌleb lix biomal li queꞌre̱chani riqꞌuin xbalakꞌinquileb li tenamit? Ut, ¿ma incꞌaꞌ ta biꞌ toj cuan ajcuiꞌ lix bisleb li incꞌaꞌ tzꞌakal nequeꞌbisoc cuiꞌ? La̱in xicꞌ nacuil chixjunil li nequeꞌxba̱nu.

Li xHu LAJ JOB 20:21

Ma̱ ani naxcol rib chiru. Ut moco najt ta ta̱cua̱nk lix biomal.

Proverbios 1:13

Ut sa chic tocua̱nk. Ta̱cana̱k chokꞌ ke chixjunil li takelkꞌa chiruheb ut cua̱nk chic kabiomal.

Proverbios 11:16

Junak ixk cha̱bil xnaꞌleb naqꞌueheꞌ xlokꞌal. Ut junak cui̱nk se̱b xchꞌo̱l nabiomoꞌ.

Proverbios 28:5

Eb li incꞌaꞌ useb xnaꞌleb incꞌaꞌ nequeꞌxtau ru cꞌaꞌru li ti̱quilal. Abanan eb li nequeꞌxpa̱b li Ka̱cuaꞌ nequeꞌxtau ru cꞌaꞌru li ti̱quilal.

Eclesiastés 4:1

Ut quinqꞌue ajcuiꞌ retal chixjunil li ra xi̱cꞌ li nequeꞌxba̱nu saꞌ ruchichꞌochꞌ. Eb li rahobtesinbileb yo̱queb chi ya̱bac xban li raylal nequeꞌxcꞌul. Ut ma̱ ani nacꞌojoban xchꞌo̱leb. Eb li nequeꞌrahobtesin reheb cuanqueb xcuanquil saꞌ xbe̱neb. Ut ma̱ ani natenkꞌan reheb li yo̱queb chi cꞌuluc raylal.

Oseas 7:1

Nak xcuaj raj xcolbaleb laj Israel, xjulticoꞌ cue lix ma̱queb li ralal xcꞌajol laj Efraín joꞌ ajcuiꞌ lix ma̱queb laj Samaria. Nequeꞌbalakꞌin, nequeꞌelkꞌac saꞌ rochocheb li ras ri̱tzꞌin, ut nequeꞌelkꞌac ajcuiꞌ saꞌ eb li be.

Amós 4:1

Abihomak ex ixk aj Samaria. Chanchanex li cuacax aran Basán, li ni̱nkeb ut chꞌolaninbil chi us. La̱ex nequerahobtesi li ma̱cꞌaꞌeb xcuanquil ut eb li nebaꞌ. Ut nequetaklaheb le̱ be̱lom chixcꞌambal e̱vino re te̱rucꞌ.